Ehstar 1 - ᐅᒋᐺ ᑭᒋᒪᓯᓇᐃᑲᓐᑭᒋᐅᑭᒫᑴ ᐹᔥᑖᐃ, ᑭᒋᐅᑭᒫ ᓭᕒᐊᒃᓰᔅ 1-2 ᒦ ᓴ ᐅᐌ ᑳᐃᔑᓭᒃ ᐊᐲ ᑮᑭᒋᐅᑭᒫᐎᒡ ᓭᕒᐊᒃᓰᔅ Xerxes ᐃᐃᒫ ᐁᔮᒡ ᑭᒋ ᐆᑌᓈᕽ ᑫᒋ ᐃᓀᑖᑾᓂᓂᕽ ᐯᕒᔕ Persia ᐊᑮᕽ᙮ ᓂᑯᑣᒃ ᓃᔥᑕᓇᔑᓃᔣᓱ 127 ᓴ ᐊᑮᓐ ᐅᑮ ᑎᐯᑖᓇᓐ ᐌᑎ ᐄᑎᔭ India ᐁᑮ ᐅᒋ ᒫᒋᓭᓂᒃ ᐲᓂᔥ ᐌᑎ ᓱᑌᓐ Sudan ᐊᑮᕽ ᐁᑮ ᐊᑯᓭᓂᒃ᙮ 3 ᓂᓱᐱᐴᓐ 3 ᐃᑕᔥ ᑳᐊᓂ ᐃᔑᓭᓂᒃ ᑮᑭᒋᐅᑭᒫᐎᒡ ᑮᑭᒋ ᐐᑾᑫ ᑲᑭᓇ ᐌᑭᒫᐙᑎᓯᓂᓐᒡ, ᐃᐃ ᑲᔦ ᑳᓃᑳᓀᑖᑯᓯᓂᒡ ᐁᑮ ᐲᔖᓂᒡ᙮ ᐃᐃ ᑕᔥ ᑲᔦ ᔑᒫᑲᓂᔕᐞ ᐯᕒᔕ ᐊᑮᕽ ᐌᒌᓂᒡ, ᐃᐃ ᑕᔥ ᑲᔦ ᒦᑎᔭ Media ᐊᑮᕽ ᐌᒌᓂᒡ ᐃᐃᒫ ᑮᐊᔮᐗᐞ᙮ ᑯᑕᒃ ᐃᑕᔥ ᑲᔦ ᐌᑭᒫᐌᑖᑯᓯᓂᒡ ᐯᐸᑳᓐ ᐊᑮᕽ ᐌᒌᓂᒡ ᐃᐃᒫ ᑮᐲᔖᐗᐞ᙮ 4 ᓂᑯᑣᓱᑮᓯᔅ 6 ᒥᓂᒃ ᑮᐙᐸᑕᐃᐌ ᐁᔑ ᐌᓅᑕᓂᓂᒃ ᐅᑑᑭᒫᐎᐎᓐ, ᐋᓃᓐ ᑲᔦ ᐁᐲᒋ ᒥᓄᓈᑾᓂᓂᒃ, ᐋᓃᓐ ᐁᐲᒋ ᐅᑭᒫᐌᑖᑾᓂᓂᒃ᙮ 5 ᐅᐅ ᓴ ᑳᐃᔥᒀᓭᓂᒃ, ᑭᒋᐅᑭᒫ ᑮᐐᑾᑫ ᑭᒋ ᐆᑌᓈᕽ ᓲᓴ Susa ᐁᔑᓂᑳᑌᓂᒃ᙮ ᑳᐌᓅᑎᓯᓂᒡ, ᐃᐃ ᑲᔦ ᑫᑎᒫᑭᓯᓂᒡ ᐅᑮ ᐊᑐᒫᐞ᙮ ᓃᔣᓱ ᑮᔑᒃ 7 ᐅᐅ ᑮᐃᓇᑲᒥᑲᓐ᙮ ᐃᐃᒫ ᓴ ᑮᑕᓇᑲᒥᑲᓐ ᑭᒋᐅᑭᒫ ᐁᔑ ᐲᑎᑰᐗᓂᓂᒃ ᐅᑭᑎᑳᓂᑲᒥᒃ ᐃᐃᒫ ᒌᑲᔭᐄ ᐅᑑᑭᒫᐎᑲᒥᑯᕽ᙮ 6 ᐃᐃᒫ ᓴ ᐲᑎᒃ ᑳᑮ ᑕᓇᑲᒥᑲᒃ ᑮᐊᑰᑌᐗᓐ ᐃᔒᑭᓅᓐ ᐁᐅᓵᐗᔥᒀᑭᓐ, ᐋᓂᑕ ᑲᔦ ᐁᐙᐱᔥᑳᑭᓐ᙮ ᒪᑲᑌ ᒥᔅᑴᑲᓀᔮᑉ ᐃᓴ ᑮᐋᐸᑕᓐ ᐁᑮ ᑕᑯᐱᑌᑭᓐ ᐃᓂ ᐃᔒᑭᓅᓐ ᐃᐃᒫ ᐙᐹᐱᑯ ᔔᓂᔮ ᐙᐱᑯᐎ ᐐᐸᔮᑭᓂᑲᓂᕽ ᐁᑮ ᐃᔑ ᑭᒋᐎᓯᑭᓐ ᐃᒫ ᒪᔥᑲᐗᓯᓃᕽ ᑳᑮ ᐸᑕᑭᓱᐙᒡ ᐃᐃᒫ᙮ ᑭᒋ ᑌᓴᐱᐎᓇᓐ ᑲᔦ ᐅᓵᐎ ᔔᓂᔮ ᐙᐱᑯᕽ ᐌᒋ ᐅᔑᒋᑳᑌᑭᓐ, ᐙᐹᐱᑯ ᔔᓂᔮ ᐙᐱᑯᕽ ᑲᔦ ᐃᐃᒫ ᑮᐊᒋᑳᑌᐗᓐ ᐁᑕᓇᑲᒥᑲᒃ᙮ ᐐᑫ ᑲᔦ ᐁᔑ ᐱᒧᓭᕽ ᑮᐅᓂᔑᔑᓐ ᐯᐸᑳᓐ ᑎᓄ ᐊᓯᓃᒃ ᑳᐗᐗᓂᔑᔑᐙᒡ, ᐯᐸᑳᓐ ᑳᐃᓇᓯᓈᓱᐙᒡ, ᑳᒥᔅᑯᓯᐙᒡ, ᑳᐙᐱᔥᑭᓯᐙᒡ, ᑳᒪᑲᑌᐎᓯᐙᒡ ᑲᔦ ᐁᑮ ᐋᐸᑎᓯᐙᒡ᙮ 7 ᔔᒥᓈᐳ ᑮᐃᔑ ᓰᑭᓂᑳᑌ ᐅᓵᐎ ᔔᓂᔮ ᐙᐱᑯᐎ ᒥᓂᒀᑲᓂᕽ᙮ ᑲᑭᓇ ᐯᐸᑳᓐ ᑮᐃᔑᓈᑾᓅᓐ᙮ ᑭᒋᐅᑭᒫ ᓴ ᑮᐸᑭᑎᓇᒫᑫ ᐱᓵᓂᑯ ᒥᓂᒃ ᒋᒥᓂᑴᓈᓂᐗᓂᓂᒃ᙮ 8 ᑭᒋᐅᑭᒫ ᐃᓴ ᑮᐃᑭᑐ ᐱᓵᓂᑯ ᒥᓂᒃ ᒋᒥᓂᑴᓈᓂᐗᓂᓂᒃ᙮ ᐯᒦᑖᑫᐙᒡ ᐃᐃᒫ ᐅᑭᒫᐎᑲᒥᑯᕽ ᑮᑲᓅᓈᐗᒃ ᐋᓃᓐ ᐃᑯ ᒥᓂᒃ ᒋᒥᓇᐋᐙᒡ ᐁᔑ ᒥᓴᐌᑕᒥᓂᒡ᙮ 9 ᑫᐐᓐ ᐃᑕᔥ ᐊᐊ ᑭᒋᐅᑭᒫᑴ ᐹᔥᑖᐃ Vashti ᑮᐐᑾᑫ ᐃᐃᒫ ᐲᑎᒃ ᑭᒋᐅᑭᒫᐎᑲᒥᑯᕽ, ᐁᑮ ᐊᑐᒫᒡ ᐃᑴᐗᐞ᙮ 10 ᓃᔣᓱᑮᔑᒃ 7 ᐃᑕᔥ ᑭᒋᐅᑭᒫ ᓭᕒᐊᒃᓰᔅ ᑳᐐᑾᑫᒡ, ᐐᑫ ᓴ ᑮᒌᑲᑭᓯᑫ᙮ ᒦᔥ ᑳᑮ ᑲᓅᓈᒡ ᓃᔣᓱ ᑳᑮ ᐃᔑᐃᒥᓐᒡ ᒋᐐᑎᑫᓯᓂᒃ ᐃᓂᐌᓂᐗᐞ ᐐᓐ ᐃᑯ ᑳᑮ ᐸᒦᑖᑯᒡ ᐃᐃᒫ ᑭᒋᐅᑭᒫᐎᑲᒥᑯᕽ᙮ ᒦᔥ ᐅᐅ ᑳᐃᔑᓂᑳᓱᓂᒡ, ᒦᔫᒪᓐ Mehuman, ᐱᔅᑕ Biztha, ᐊᕒᐴᓇ Harbona, ᐱᒃᑕ Bigtha, ᐊᐹᒃᑕ Abagtha, ᓰᑕᕒ Zethar, ᔑᑾ ᑲᔦ ᑳᕒᑲᔅ Carkas᙮ 11 ᒦᐗᐞ ᐃᑕᔥ ᐅᐅ ᑳᑮ ᐊᓅᓈᒡ ᒋᓈᓯᑲᐙᓂᒡ ᑭᒋᐅᑭᒫᑴᓐ ᐹᔥᑖᐃ ᐁᔑᓂᑳᓱᓂᒡ ᒋᑭᑭᔥᑲᒥᓂᒡ ᐅᑭᒋᐅᑭᒫᑴᐙᓄᒀᓂᓂ᙮ ᐁᐐ ᐙᐸᑕᐃᐌᒡ ᐋᓃᓐ ᐁᐲᒋ ᒥᓄᓈᑯᓯᓂᒡ, ᒋᐙᐸᒥᑯᓂᒡ ᐅᑭᒫᐞ ᐃᐃ ᑲᔦ ᑲᑭᓇ ᑳᑮ ᐊᑐᒫᒡ᙮ 12 ᐊᐲ ᐃᑭ ᐯᒦᑖᑫᐙᒡ ᑳᑲᓅᓈᐙᒡ ᑭᒋᐅᑭᒫᑴᓐ ᐹᔥᑖᐃᐗᓐ ᑳᐐᓐ ᑮᐃᓀᑕᓰᐗᓐ ᒋᐲᔖᓂᒡ᙮ ᐐᑫ ᑕᔥ ᑭᒋᐅᑭᒫ ᑮᓂᔥᑳᑎᓯ᙮ 13 ᒦᑕᔥ ᑭᒋᐅᑭᒫ ᑳᓂᑖ ᐃᔑᒋᑫᒡ ᐁᐐ ᑕᔑᑕᕽ ᐅᓇᔓᐌᐎᓐ, ᐁᑮ ᑲᓅᓈᒡ ᑫᑮᑖᐌᑕᒥᓂᒡ ᐃᓂᓂᐗᐞ ᑫᑫᑕᒥᓂᒡ ᐅᓇᔓᐌᐎᓐ᙮ 14 ᒦᐗᐞ ᐃᑕᔥ ᐅᐅ ᑳᐃᔑᓂᑳᓱᓂᒡ ᑳᑮ ᓂᑖ ᑲᓅᓈᒡ ᑫᑰᓐ ᑮᐐ ᑭᑫᑕᕽ: ᑲᕒᔒᓇ Carshena, ᔒᑕᕒ Shethar, ᐋᑦᒪᑖ Admatha, ᑖᕒᔑᔥ Tarshish, ᒦᕒᐊᔅ Meres, ᒪᕒᓰᓇ Marsena ᑲᔦ ᑕᔥ ᒦᒨᑲᓐ Memucan᙮ ᒦᐗᒃ ᐃᑕᔥ ᐅᑯ ᓃᔣᓱ 7 ᐌᑭᒫᐌᑖᑯᓯᐙᒡ ᐌᒌᐙᒡ ᒦᑎᔭ ᐊᑮᕽ, ᐯᕒᔕ ᐊᑮᕽ ᑲᔦ ᑮᐃᓀᑖᑯᓯᐗᒃ ᐱᓵᓐ ᒋᐲᑎᑲᐙᐙᒡ ᑭᒋᐅᑭᒫᓐ, ᑲᔦ ᑕᔥ ᐁᑮ ᐃᔥᐯᑖᑯᓯᐙᒡ ᐃᐃᒫ ᐅᑭᒫᐎᐎᓂᕽ᙮ 15 ᒦᑕᔥ ᑭᒋᐅᑭᒫ ᑳᐃᓈᒡ, ᐃᐃ ᓴ ᐁᔑᓯᕽ ᐅᓇᔓᐌᐎᓐ, ᐋᓃᓐ ᐃᑕᔥ ᐃᓈ ᑫᑑᑕᐎᓐᒡ ᐊᐊ ᑭᒋᐅᑭᒫᑴ ᐹᔥᑖᐃ? ᓃᓐ ᑭᒋᐅᑭᒫ ᓭᕒᐊᒃᓰᔅ ᐁᑮ ᐊᓅᓇᒀ ᐯᒦᑕᐎᐙᒡ ᒋᐲᓈᐙᒡ ᑭᒋᐅᑭᒫᑴᓐ, ᑳᐐᓐ ᐄᑐᒃ ᑮᐃᓀᑕᓰᐗᓐ ᒋᐲᔖᓂᒡ᙮ 16 ᒦᒨᑲᓐ ᐁᔑᓂᑳᓱᓂᒡ ᐃᓴ ᑮᐃᑭᑐᐗᓐ, ᑭᒋᐅᑭᒫᑴ ᐹᔥᑖᐃ ᓴ ᑳᐐᓐ ᑾᔭᒃ ᐃᔑᒋᑫᓰ᙮ ᑳᐐᓐ ᑮᓀᑕ ᑭᒪᒫᔒᑲᑖᑯᓰ᙮ ᑲᑭᓇ ᓴ ᑯ ᐌᑭᒫᐌᑖᑯᓯᓂᒡ, ᑲᑭᓇ ᑲᔦ ᐃᓂᓂᐗᐞ ᐅᐅᒫ ᐁᔮᓂᒡ ᐊᑮᕽ ᐅᒪᒫᔒᑲᑕᐙᐞ! 17 ᑲᑭᓇ ᐅᔕ ᐃᑴᐗᒃ ᐅᑲᓂ ᑭᑫᑖᓈᐙ ᐋᓃᓐ ᑳᐃᔑᒋᑫᓂᒡ ᑭᒋᐅᑭᒫᑴᓐ ᐹᔥᑖᐃᐗᓐ, ᒦᔥ ᒋᐊᓂ ᐋᓇᐌᓂᒫᐙᒡ ᐅᓈᐯᒥᐙᐞ᙮ ᒦᔥ ᑫᐃᑭᑐᐙᒡ, ᑭᒋᐅᑭᒫ ᓭᕒᐊᒃᓰᔅ ᐁᐊᑐᒫᒡ ᑭᒋᐅᑭᒫᑴᓐ ᐹᔥᑖᐃᐗᓐ, ᑳᐐᓐ ᐅᑮ ᑌᐺᑖᑯᓰᓐ᙮ 18 ᐃᓇᔥᑫ ᑕᔥ ᐃᑭ ᐃᑴᐗᒃ ᐌᓈᐯᒥᐙᒡ ᐌᑭᒫᐌᑖᑯᓯᓂᒡ ᐌᒌᓂᒡ ᒦᑎᔭ ᐊᑮᕽ, ᐯᕒᔕ ᐊᑮᕽ ᑲᔦ, ᐊᐲ ᓅᑕᒧᐙᒡ ᐋᓃᓐ ᑳᐃᔑᒋᑫᒡ ᑭᒋᐅᑭᒫᑴ, ᒦ ᐯᔑᑾᓐ ᑫᑑᑕᐙᐙᒡ ᐅᓈᐯᒥᐙᐞ᙮ ᑳᐐᓐ ᐃᑕᔥ ᐅᑲ ᑭᒋ ᐃᓀᓂᒫᓯᐙᐙᐞ ᐅᓈᐯᒥᐙᐞ, ᑲᔦ ᑕᐅᒋ ᓂᔥᑫᑕᒧᐞ᙮ 19 ᑮᔥᐱᓐ ᐃᑕᔥ ᐃᔑ ᒥᓍᐸᑕᒪᓐ, ᑕᑲ ᐅᓇᑑᓐ ᑭᒋᐅᑭᒫ ᐅᓇᔓᐌᐎᓐ ᒋᐅᔑᐲᐃᑳᑌᒃ ᐅᑑᓇᔓᐌᐎᓂᐙᕽ ᒦᑎᔭ ᐊᑮᕽ ᐌᒌᐙᒡ, ᐃᑭ ᑲᔦ ᐯᕒᔕ ᐊᑮᕽ ᐌᒌᐙᒡ᙮ ᑳᐐᓐ ᐃᑕᔥ ᐐᑳ ᑕᐋᒋᒋᑳᑌᓯᓅᓐ ᒋᐃᓇᑌᒃ ᐐᑳ ᒦᓇᐙ ᑭᒋᐅᑭᒫᑴ ᐹᔥᑖᐃ ᒋᐲᑎᑫᓯᒃ ᐁᔑᐊᔮᓂᒡ ᑭᒋᐅᑭᒫᓐ᙮ ᑕᑲ ᓴ ᑭᒋᐅᑭᒫ ᐅᑲ ᐃᓇᑑᓐ ᐯᑳᓂᓯᓂᒡ ᐃᑴᐗᓐ ᒋᓈᐱᔥᑲᐙᓂᒡ ᑭᒋᐅᑭᒫᑴᓐ᙮ 20 ᐊᐲ ᑕᔥ ᑭᒋᐅᑭᒫ ᐅᓇᑑᒡ ᐅᓇᔓᐌᐎᓐ ᒥᓯᐌ ᐸᐹ ᐐᑌᓂᒃ ᐅᑑᑭᒫᐎᐎᓂᕽ, ᑲᑭᓇ ᓴ ᑕᔥ ᐃᑴᐗᒃ ᐅᑲ ᑭᑌᓂᒫᐙᐞ ᐅᓈᐯᒥᐙᐞ ᒥᓴᐙ ᑯ ᑭᑎᒫᑭᓯᐙᒡ, ᑯᒫ ᑲᔦ ᐌᓅᑎᓯᐙᒡ, ᑮᐃᑭᑐ ᒦᒨᑲᓐ᙮ 21 ᑭᒋᐅᑭᒫ ᓴ, ᐃᑭ ᑲᔦ ᐌᑭᒫᐌᑖᑯᓯᐙᒡ ᐅᑮ ᒥᓄᑖᓈᐙ ᑳᑮ ᐃᑭᑐᓂᒡ ᒦᒨᑲᓇᓐ᙮ ᒦᑕᔥ ᑭᒋᐅᑭᒫ ᑳᐃᔑᒋᑫᒡ ᑳᑮ ᐃᑭᑐᓂᒡ᙮ 22 ᐁᑕᓯᓂᓂᑭᓐ ᐃᑕᔥ ᐯᐸᑳᓐ ᐊᑮᓐ ᑌᐯᑕᕽ ᐅᑮ ᐃᔑᓂᔕᐋᓐ ᐅᑑᓇᔓᐌᐎᓐ ᐁᑕᓶᐙᓇᑭᓯᓂᒡ, ᐁᑕᓱ ᐃᔑᑮᔗᓂᒡ ᑲᔦ᙮ ᑮ ᐃᓇᔓᐌ ᑲᑭᓇ ᐃᓂᓂᐗᐞ ᒋᑎᐯᑕᒥᓂᒡ ᐅᑖᐎᓂᓂ, ᑲᔦ ᑕᔥ ᒋᐅᑭᒫᑲᑕᒥᓂᒡ ᐅᑖᐎᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society