ᑑᑕᕒᐋᓇᒦ 34 - ᐅᒋᐺ ᑭᒋᒪᓯᓇᐃᑲᓐᒨᓯᔅ ᐊᐲ ᑮᐃᔥᒀᐱᒫᑎᓯᒡ 1 ᒨᓯᔅ Moses ᑕᔥ ᐃᐃᒫ ᑳᐃᔑ ᐸᔥᒀᒃ ᒨᐗᑉ Moab ᑮᐅᒋ ᒫᒑ ᐁᑮ ᐃᔖᒡ ᑳᑮ ᐃᔑᐊᔮᓂᒃ ᑭᒋ ᐗᒋᐤ ᓃᐳ Nebo᙮ ᒦᔥ ᑳᐊᓂ ᒫᒑᒡ ᐌᑎ ᐗᑭᒐᔭᐄ ᐗᒌᕽ ᐱᔅᑲ Pisgah ᑳᑮ ᐃᔑᐊᔮᓂᒃ ᐙᐸᓄᕽ ᐃᓇᑫ ᒉᕒᐊᑯ Jericho ᑭᒋ ᐆᑌᓈᓂ᙮ ᒦᑕᔥ ᐌᑎ ᑳᐃᔑ ᐙᐸᑕᐃᑯᒡ ᑳᑎᐯᒋᑫᓂᒡ ᐃᐃ ᒥᓯᐌ ᐊᑮᓂ᙮ ᐁᑮ ᐙᐸᑕᐃᑯᒡ ᐊᑮᓂ ᑭᓬᐃᔭᑦ Gilead ᐲᓂᔥ ᐌᑎ ᑌᓐ Dan ᐁᒋᑳᑌᓂᒃ᙮ 2 ᑮᐙᐸᑕᐋ ᑕᔥ ᑲᔦ ᐃᓂ ᐯᐸᑳᓐ ᑳᑮ ᐃᔑ ᐸᐸᑴᓂᑳᑌᓂᒃ, ᓇᐱᑕᓬᐋᐃ Naphtali, ᐄᐸᕒᐃᔭᒻ Ephraim, ᐃᐃ ᑲᔦ ᑲᑭᓇ ᐊᑮᓂ ᒎᑕ Judah ᐲᓂᔥ ᐌᑎ ᑭᒋᑲᒦᕽ ᓂᑳᐲᐊᓄᕽ ᐃᓇᑫ᙮ 3 ᐌᑎ ᑲᔦ ᓇᑫ ᔖᐗᓄᕽ ᐃᓇᑫ ᒎᑕ ᐊᑮᕽ, ᐲᓂᔥ ᐌᑎ ᑳᑮ ᐊᓂ ᐅᒋᒋ ᐸᔥᒀᓂᒃ ᔂᕒ Zoar ᐁᒋᑳᑌᓂᒃ, ᐲᓂᔥ ᐌᑎ ᐆᑌᓈᕽ ᒉᕒᐊᑯ ᐁᔑᐊᔮᓂᒡ ᐹᒻ palm ᑎᓄᐙᑎᑰᐞ᙮ 4 ᒦᑕᔥ ᒨᓯᔅ ᑳᐃᑯᒡ ᑳᑎᐯᒋᑫᓂᒡ, ᒦ ᓴ ᐃᐌ ᐊᑮᓂ ᑳᑮ ᐊᔓᑕᒪᐗᒀ ᐁᐸᕒᐊᐋᒻ Abraham, ᐋᐃᓯᒃ Isaac, ᐊᐊ ᑲᔦ ᒉᑲᑉ Jacob ᐁᐐ ᒦᓂᒪᒃ ᐅᐲᐌᓰᒥᐙᐞ᙮ ᑮᓐ ᐃᑕᔥ ᑭᐸᑭᑎᓂᓐ ᒋᐙᐸᑕᒪᓐ, ᑳᐐᓐ ᑕᔥ ᐌᑎ ᑮᓐ ᑭᑲ ᐃᔖᓰ, ᐁᑮᐃᑯᒡ᙮ 5 ᒦᑕᔥ ᒨᓯᔅ ᑳᑮ ᐊᓄᑮᑕᐙᒡ ᑳᑎᐯᒋᑫᓂᒡ ᑳᑕᔑ ᐃᔥᒀ ᐱᒫᑎᓯᒡ ᐌᑎ ᒨᐗᑉ ᐊᑮᕽ, ᐁᑮ ᐃᔑᓭᓂᒃ ᑳᑮ ᐃᑭᑐᓂᒡ ᑳᑎᐯᒋᑫᓂᒡ᙮ 6 ᑳᑎᐯᒋᑫᓂᒡ ᐃᑕᔥ ᐅᑮ ᐃᔑ ᓇᐃᓂᑰᓐ ᐁᔑ ᐸᓴᑎᓈᓂᒃ ᐌᑎ ᒨᐗᑉ ᐊᑮᕽ, ᑴᑲᔭᐄ ᐃᓇᑫ ᐯᑦ ᐲᐅᕒ Beth-peor ᐆᑌᓈᓂ ᑳᑮ ᐃᔑᓂᑳᑌᓂᒃ᙮ ᑳᐐᓐ ᐃᑕᔥ ᐊᐎᔭᓐ ᐅᑭᑫᑕᓰᓂ ᐅᐅ ᐃᔑᐊᐲ ᓅᑯᒻ ᑳᑮᔑᑲᓂᓂᒃ ᐊᓃᑎ ᑳᐃᔑ ᓇᐃᓂᑲᓂᐎᑯᐸᓀᓐ᙮ 7 ᒨᓯᔅ ᓴ ᓂᑯᑣᒃ ᓃᔥᑕᓇ 120 ᑮᑕᓱ ᐱᐴᓉ ᐊᐲ ᑮᐃᔥᒀ ᐱᒫᑎᓯᒡ᙮ ᑳᐐᓐ ᓴ ᓅᑕᐞ ᑮᐊᐲᒌᓰ, ᐗᐐᑫ ᑲᔦ ᑫᔮᐱ ᑮᓇᐋᐱ ᐃᐃ ᐊᐲ᙮ 8 ᐃᔅᕒᐃᔭᓬᐊᒃ Israel ᑕᔥ ᐃᐃᒫ ᒨᐗᑉ ᐊᑮᕽ ᐅᑮ ᑕᔑ ᒪᐎᒫᐙᓐ ᒨᓯᓲᓐ ᓂᓯᒥᑕᓇ 30 ᑕᓱ ᑮᔑᒃ ᒥᓂᒃ᙮ ᑫᑲᐲ ᑕᔥ ᑮᐅᒋᒋᓭᓂ ᒋᐴᓂ ᒪᐎᒫᐙᒡ᙮ 9 ᐊᐊᐌ ᑕᔥ ᒑᔓᐙ Joshua ᑳᑮ ᐅᑯᓯᓯᒥᑯᒡ ᓇᓐ Nun ᐁᔑᓂᑳᓱᓂᒡ, ᐗᐐᑫ ᑮᑲᑮᑖᐎ ᐊᔮ᙮ ᒨᓯᓲᓐ ᐄᑐᒃ ᐅᑮ ᓵᒥᓂᑰᓐ᙮ ᐃᔅᕒᐃᔭᓬᐊᒃ ᑕᔥ ᐅᑮ ᓇᐃᑕᐙᐙᓐ, ᐁᑮ ᐃᔑᒋᑫᐙᒡ ᑲᔦ ᑳᑎᐯᒋᑫᓂᒡ ᑳᑮ ᐃᓇᓅᓈᓂᒡ ᒨᓯᓲᓐ᙮ 10 ᑳᐐᓐ ᑕᔥ ᒦᓇᐙ ᐐᑳ ᑮᐱ ᐊᔮᓰ ᑭᔐᒪᓂᑑᓐ ᑳᑲᓅᑕᒪᐙᒡ ᐃᐃᒫ ᐃᔅᕒᐃᔭᓬᐊᑮᕽ ᑖᐱᔥᑰ ᒨᓯᔅ᙮ ᑳᑎᐯᒋᑫᓂᒡ ᐅᔕ ᑎᐱᓇᐌ ᐅᑮ ᑭᑭᓄᐊᒫᑰᓐ᙮ 11 ᑳᐐᓐ ᑲᔦ ᐸᑳᓐ ᐅᑮᑭᑐᑕᒫᑫ ᑮᐱᒥ ᐃᔑᒋᑫᓰ ᑖᐱᔥᑰ ᒨᓯᔅ ᑳᑮ ᐃᔑᒋᑫᒡ᙮ ᐁᑮ ᑲᔥᑭᑑᒡ ᒋᑑᑕᕽ ᐃᓂ ᑭᑭᓇᐙᒋᒋᑫᐎᓇᓐ, ᒫᒪᑳᒋᒋᑫᐎᓇᓐ ᐊᐲ ᑳᑎᐯᒋᑫᓂᒡ ᑮᐃᔑᓂᔕᐅᑯᒡ ᐌᑎ ᐄᒋᐸᑮᕽ Egypt ᑳᑮ ᐃᔑᐊᔮᓂᒡ ᑭᒋ ᐅᑭᒫᓐ ᐯᕒᐆᓐ Pharaoh, ᐃᐃ ᑲᔦ ᑲᑭᓇ ᑳᑮ ᐸᒦᑖᑯᓂᒡ ᐃᐃᐌ ᑲᔦ ᒥᓯᐌ ᐅᑕᑮᒥᓃᕽ᙮ 12 ᑲᑭᓇ ᓴ ᑳᑭᒋ ᒪᔥᑲᐌᑖᑾᓂᓂᒃ, ᑲᑭᓇ ᑲᔦ ᑳᑯᑖᓀᑖᑾᓂᓂᒃ ᒨᓯᔅ ᐁᑮ ᐃᔑᒋᑫᒡ, ᐁᑮ ᐙᐸᒥᑯᒡ ᑲᑭᓇ ᐃᔅᕒᐃᔭᓬᐊᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society