ᑑᑕᕒᐋᓇᒦ 31 - ᐅᒋᐺ ᑭᒋᒪᓯᓇᐃᑲᓐᒑᔓᐙ ᑮᓈᐱᔥᑲᐙᒡ ᒨᓯᓲᓐ 1 ᒨᓯᔅ Moses ᐃᑕᔥ ᑮᐃᔖ ᐁᑮ ᐊᐎ ᑲᓅᓈᒡ ᑲᑭᓇ ᐃᔅᕒᐃᔭᓬᐊᐞ Israel᙮ 2 ᒦᑕᔥ ᐅᐅ ᑳᐃᑭᑐᒡ, ᐋᔕ ᐅᔕ ᓂᑯᑣᒃ ᓃᔥᑕᓇ 120 ᓂᑕᓱ ᐱᐴᓉ, ᑳᐐᓐ ᓴ ᐊᐗᔑᒣ ᓂᑖ ᑲᔥᑭᑑᓰᓐ ᒋᓃᑳᓃᑕᒪᐎᓇᑰᒃ᙮ ᐋᓃᔥ ᑳᑎᐯᒋᑫᒡ ᓂᑮᐃᒃ, ᑳᐐᓐ ᓴ ᑮᓐ ᑭᑲ ᐋᔕᐎᔥᑳᓰ ᐃᐃ ᒞᕒᑕᓐ Jordan᙮ 3 ᐐᓐ ᓴ ᐱᑯ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑭᑲ ᓃᑳᓃᑕᒫᑯᐙ ᐋᔕᐎᔥᑳᔦᒃ᙮ ᐐᓐ ᓴ ᑫᔖᑰᒋᐋᒡ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ ᑫᓂ ᐃᔖᔦᒃ, ᐅᑲ ᒪᑲᒫᐞ ᑲᔦ ᐅᑕᑮᒥᓂ᙮ ᒑᔓᐙ Joshua ᓴ ᑭᑲ ᓃᑳᓃᑕᒫᑯᐙ ᐋᔕᐎᔥᑳᔦᒃ, ᒋᐃᔑᓭᓂᒃ ᑳᑎᐯᒋᑫᒡ ᑳᐃᑭᑐᒡ᙮ 4 ᒦ ᓴ ᑳᑎᐯᒋᑫᒡ ᑫᑑᑕᐙᒡ ᐃᐃ ᐯᒫᑎᓯᓂᒡ ᑖᐱᔥᑰ ᑳᑮ ᑑᑕᐙᒡ ᓵᐃᐋᓇᓐ Sihon, ᔑᑾ ᐋᑲᓐ Og ᑳᑮ ᑭᒋ ᐅᑭᒫᐎᓂᒡ ᐁᒧᕒᐄ ᑳᑎᓄᐎᓂᒡ Amorites, ᐅᑕᑮᒥᓂ ᑲᔦ ᑳᑮ ᓂᔑᐗᓈᒋᑕᒪᐙᒡ᙮ 5 ᑳᑎᐯᒋᑫᒡ ᓴ ᐅᑲ ᐃᔑᐋᐞ ᒋᔖᑰᒋᐃᒣᒃ, ᒦ ᓴ ᐃ ᐁᔑᓈᑾᒃ ᒋᑑᑕᐌᒀ ᑲᑭᓇ ᑳᑮ ᐃᔑ ᐊᓅᓂᓇᑰᒃ᙮ 6 ᒪᔥᑲᐎ ᐊᔮᒃ, ᒪᔥᑲᐌᑕᒧᒃ ᑲᔦ, ᑫᑯ ᓂᓂᑳᓂᒥᓯᑫᒃ ᒋᑯᓭᒀ, ᐋᓃᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑭᑲ ᐐᒌᐎᑯᐙ᙮ ᑳᐐᓐ ᓴ ᑭᑲ ᓇᑲᓂᑯᓰᐙ, ᑳᐐᓐ ᑲᔦ ᑭᑲ ᐌᐱᓂᑯᓰᐙ᙮ 7 ᒦᑕᔥ ᒨᓯᔅ ᑳᑮ ᐊᑐᒫᒡ ᒑᔓᐙᓐ ᐅᐅ ᐁᑮᐃᓈᒡ ᐁᓈᓴᒦᓂᒡ ᑲᑭᓇ ᐃᔅᕒᐃᔭᓬᐊᐞ Israel, ᒪᔥᑲᐎ ᐊᔮᓐ, ᒪᔥᑲᐌᑕᓐ, ᑮᓐ ᓴ ᑭᑲ ᐃᔑ ᐐᒌᐙᒃ ᐅᑯ ᐯᒫᑎᓯᐙᒡ ᐌᑎ ᐊᑮᕽ ᑳᑎᐯᒋᑫᒡ ᑳᑮ ᐋᔩᒋ ᐊᔓᑕᒪᐙᑯᐸᓀᓐ ᐅᑫᑌᔭᐋᒥᐙᐸᓃᐞ ᐁᐐ ᒦᓈᒡ, ᑮᓐ ᓴ ᑕᔥ ᑭᑲ ᐅᔑ ᒦᓈᒃ ᒋᑎᐱᓇᐌᐎᓯᐙᒡ᙮ 8 ᐐᓐ ᓴ ᐱᑯ ᑳᑎᐯᒋᑫᒡ ᑭᑲ ᓃᑳᓃᑕᒫᒃ, ᑭᑲ ᐐᒌᐎᒃ ᑲᔦ᙮ ᑳᐐᓐ ᓴ ᑭᑲ ᓇᑲᓂᑯᓰ, ᑳᐐᓐ ᑭᑲ ᐌᐱᓂᑯᓰ᙮ ᑫᑯ ᓭᑭᓯᑫᓐ, ᑫᑯ ᒥᑯᔥᑳᑌᑕᑫᓐ, ᐅᑮᐃᓈᓐ᙮ ᐅᓇᔓᐌᐎᓐ ᐁᑕᓱᓃᔣᓱ ᐱᐴᓐ ᒋᐊᓇᒥᒋᑳᑌᑭᐸᓐ 9 ᒦᑕᔥ ᒨᓯᔅ Moses ᑳᑮ ᐅᔑᐲᐊᕽ ᐅᐅ ᐅᓇᔓᐌᐎᓐ ᐁᑮ ᒦᓈᒡ ᐃᐃ ᑳᓃᑳᓂᓯᓂᒡ ᐃᐃᒫ ᐃᔅᕒᐃᔭᓬᐊᐞ, ᐃᐃ ᑲᔦ ᐊᓇᒥᐁᐎᑭᒫᐞ ᓬᐄᐹᐃᕽ Levites ᐌᑕᑳᓀᓯᓂᒡ ᑳᑮ ᐱᒥᐎᑑᓂᒡ ᑳᑎᐯᒋᑫᒡ ᐅᑕᔓᑕᒫᑫᒪᑲᑯᓂ᙮ 10 ᒦᔥ ᐅᐅ ᒨᓯᔅ ᑳᐃᓈᒡ ᐃᔅᕒᐃᔭᓬᐊᐞ, ᐁᓂ ᐊᔨᔥᒀᓭᑭᓐ ᓴ ᓀᓃᔣᓱ 7 ᐱᐴᓐ ᐊᐲ ᑮᑳᓯᐃᑳᑌᑭᓐ ᒪᓯᓇᐃᑫᐎᓇᓐ, ᐊᐲ ᑮᐊᑲᐙᑌᐃᑲᓂ ᐐᑾᑏᐗᑲᒥᑭᓯᕽ᙮ 11 ᐊᐲ ᑲᑭᓇ ᐃᔅᕒᐃᔭᓬᐊᒃ Israel ᐲᔖᐙᒡ ᐁᔑᐊᔮᓂᒡ ᑳᑎᐯᒋᑫᓂᒡ ᑭᑭᔐᒪᓂᑑᒥᐙᓐ ᑫᔑ ᐅᓈᐸᑕᒥᓂᒡ, ᒦ ᓴ ᐅᐌ ᐅᓇᔓᐌᐎᓐ ᑫᐊᓇᒥᑑᔭᓐ ᒋᓅᑕᒧᐙᒡ ᑲᑭᓇ ᐃᔅᕒᐃᔭᓬᐊᒃ᙮ 12 ᒫᒪᐎ ᐊᑐᒻ ᐯᒫᑎᓯᐙᒡ, ᐃᓂᓂᐗᒃ, ᐃᑴᐗᒃ, ᐊᐱᓅᒌᔕᒃ ᑲᔦ, ᒣᔭᑭᓯᐙᒡ ᑭᑑᑌᓈᒥᐙᕽ ᐁᔮᐙᒡ ᒋᓅᑕᒧᐙᒡ, ᒋᑭᑫᑕᒧᐙᒡ ᑲᔦ, ᒋᑯᑖᓀᓂᒫᐙᒡ ᐃᑕᔥ ᑳᑎᐯᒋᑫᓂᒡ ᑭᑭᔐᒪᓂᑑᒥᐙᓐ᙮ ᐌᐌᓂ ᑲᔦ ᒋᐃᔑᒋᑫᐙᒡ ᑲᑭᓇ ᐁᑭᑑᒪᑲᓂᓂᒃ ᐅᐅ ᐅᓇᔓᐌᐎᓐ᙮ 13 ᐅᓃᒑᓂᓯᐙᐞ ᑲᔦ ᑫᑫᑕᓯᓂᒃ ᐅᐅ ᐅᓇᔓᐌᐎᓐ ᐅᑲ ᓅᑕᒥᓂ ᒋᑭᑫᑕᒥᓂᒡ ᒋᑯᑖᓀᓂᒫᓂᒡ ᑳᑎᐯᒋᑫᓂᒡ ᑭᑭᔐᒪᓂᑑᒥᐙᓐ, ᒥᓂᒃ ᐃᑯ ᑫᑖᓄᑕᒣᒃ ᐃᐃ ᐊᑭ ᐋᔕ ᑫᑳ ᑳᐐ ᐊᐎ ᑎᐱᓇᐌᐎᓯᔦᒃ ᐊᐎ ᐋᔕᐎᔥᑳᔦᒃ ᒞᕒᑕᓐ Jordan, ᐅᑮ ᐃᓈᐞ᙮ ᒨᓯᔅ ᐃᔥᒀᒡ ᑳᑮᐃᑯᒡ ᑳᑎᐯᒋᑫᓂᒡ 14 ᑳᑎᐯᒋᑫᓂᒡ ᐃᑕᔥ ᒨᓯᔅ Moses ᐅᑮᐃᑰᓐ, ᐃᓇᔥᑫ, ᒦ ᐅᔕ ᐃ ᐋᔕ ᑫᑳ ᒋᐃᔥᒀ ᐱᒫᑎᓯᔭᓐ; ᐊᑐᒻ ᐃᑕᔥ ᒑᔓᐙ Joshua, ᒋᐲᔖᔦᒃ ᑳᔑ ᒫᐗᒋᐃᑎᕽ ᐸᒀᓀᑲᒥᑯᕽ, ᒦᑕᔥ ᒋᐅᓇᑭᒪᒃ, ᐅᑮᐃᑰᓐ᙮ ᒨᓯᔅ, ᐊᐊ ᑕᔥ ᑲᔦ ᒑᔓᐙ ᑮᐃᔖᐗᒃ ᐁᔑ ᒫᐗᒋᐃᑎᕽ ᐸᒀᓀᑲᒥᑯᕽ᙮ 15 ᒦᔥ ᑳᑎᐯᒋᑫᓂᒡ ᐗᑸᕽ ᑳᑮ ᐸᑕᑳᓇᑾᓂᓂᒃ ᑳᑮ ᐅᒋ ᓈᑯᓰᑖᑯᐙᒡ ᐃᐃᒫ ᐁᔑ ᐃᔥᒀᑌᒥᐗᓂᓂᒃ ᐁᔑ ᒫᐗᒋᐃᑎᕽ ᐸᒀᓀᑲᒥᒃ᙮ 16 ᒦᔥ ᐅᐅ ᒨᓯᔅ ᑳᑮᐃᑯᒡ ᑳᑎᐯᒋᑫᓂᒡ, ᐋᔕ ᑫᑳ ᒋᐃᔥᒀ ᐱᒫᑎᓯᔭᓐ᙮ ᐅᑯ ᑕᔥ ᐐᓐ ᐯᒫᑎᓯᐙᒡ ᑕᐱᔑᒀᑌᑖᑯᓯᐗᒃ ᒋᓅᒋᐋᐙᒡ ᒪᔭᑭ ᒪᓂᑑᐞ ᐁᔮᓂᒡ ᐊᑮᕽ ᑳᐐ ᐃᔑ ᐲᑎᑫᔥᑳᐙᒡ᙮ ᓂᑲ ᐌᐱᓂᑰᒃ ᒋᐲᑯᓇᒧᐙᒡ ᐊᔓᑕᒫᑫᐎᓐ ᑳᑮ ᐅᔑᑕᒪᐗᒀᐸᓐ᙮ 17 ᒦᔥ ᐃᐃ ᐊᐲ ᑮᔑᑲᓂᓂᒃ ᓂᓂᔥᑳᑎᓯᐎᓐ ᐅᑲ ᐸᑲᒥᔥᑳᑯᓈᐙ᙮ ᓂᑲ ᐌᐱᓈᒃ ᐃᑕᔥ, ᓂᑲ ᑳᓲᑕᐙᒃ ᑲᔦ᙮ ᑕᓂᔑᐗᓈᑎᓯᐗᒃ ᐃᑕᔥ, ᑕᐹᑏᓇᑎᓂᓂ ᓴ ᒪᒋᑫᑰᓐ ᑫᐅᑎᓯᑯᐙᒡ, ᐗᓯᑖᐎᓭᐎᓇᓐ ᑲᔦ ᐅᑲ ᐅᑎᓯᑯᓈᐙ᙮ ᐃᐃ ᑕᔥ ᐊᐲ ᑮᔑᑲᓂᓂᒃ ᑕᐃᑭᑐᐗᒃ, ᒦᓇᐅ ᐌᒋ ᐅᑎᓯᑯᔮᕽ ᐅᓄ ᒪᒋᑫᑰᓇᓐ ᑭᔐᒪᓂᑑ ᐁᐐᒌᐎᓯᔭᒥᓐᒡ? 18 ᑌᐺ ᓴ ᓂᑲ ᑳᓲᑕᐙᒃ ᐃᐃ ᐊᐲ ᑮᔑᑲᓂᓂᒃ ᐅᓵᒻ ᐋᓃᔥ ᒥᓯᐌ ᐃᔑ ᒪᒋᑑᑕᒧᒃ ᐁᐐ ᓅᒋᐋᐙᒡ ᑯᑕᒃ ᒪᓂᑑᐞ᙮ 19 ᓅᑯᒻ ᐃᑕᔥ ᐅᔑᐲᐊᓐ ᐅᐅ ᓂᑲᒧᓐ ᑮᓇᐙ ᐅᒋ, ᒋᑭᑭᓄᐊᒪᐗᑣ ᐃᔅᕒᐃᔭᓬᐊᒃ Israel ᒋᐃᓇᐊᒧᐙᒡ᙮ ᒦᑕᔥ ᐃᐃᐌᓂ ᑫᑎᐹᒋᒥᑯᐙᒡ ᓂᑲᒧᓂᓂ ᐃᔅᕒᐃᔭᓬᐊᒃ᙮ 20 ᐊᐲ ᑕᔥ ᐲᓇᒀ ᐃᐃᒫ ᐊᑮᕽ ᑲᔑ ᐌᓅᒋ ᓂᑖᐎᑭᓂᓂᒃ ᑫᑰᓐ, ᑳᑮ ᐊᔓᑕᒪᐎᒪᑭᐸᓐ ᐅᑫᑌᔭᐋᒥᐙᐞ, ᐃᔥᒀ ᑌᐐᓯᓂᐙᒡ ᐃᑕᔥ, ᐊᓂ ᐌᓅᒋᓭᐙᒡ ᐃᑕᔥ ᑲᔦ, ᒦ ᓴ ᐃ ᒋᑴᑮᐙᒡ ᒋᓅᒋᐋᐙᒡ ᑯᑕᒃ ᒪᓂᑑᐞ, ᒋᐊᓇᒥᐁᑕᐙᐙᒡ ᑲᔦ᙮ ᒦᔥ ᑫᔑ ᐋᓇᐌᓂᒥᐙᒡ, ᒋᐲᑯᓇᒧᐙᒡ ᑲᔦ ᐊᔓᑕᒫᑫᐎᓐ ᑳᑮ ᐅᔑᑕᒪᐗᒀᐸᓐ᙮ 21 ᑕᓂ ᐃᔑᓭᓂ ᑕᔥ ᐊᐲ ᒋᐅᑎᓯᑯᐙᒡ ᓃᐱᐗᐞ ᒪᒋᑫᑰᓇᓐ, ᐗᓯᑖᐎᓭᐎᓇᓐ ᑲᔦ᙮ ᒦᑕᔥ ᐅᐅᐌᓂ ᓂᑲᒧᓐ ᑫᑎᐹᒋᒥᑯᐙᒡ ᐋᓃᔥ ᑳᐐᓐ ᐅᑲ ᐗᓃᑫᓄᑕᓰᓂ ᑫᐅᐲᐌᓰᒥᐙᒡ᙮ ᓂᑭᑫᓂᒫᒃ ᓴ ᓅᑯᒻ ᑳᑮᔑᑲᓂᓂᒃ ᐁᓀᑕᒧᐙᒡ ᒋᑆ ᐃᔑᐎᓇᒀ ᐌᑎ ᐊᑮᕽ ᑳᑮ ᐊᔩᒋ ᐊᔓᑕᒪᐗᒀ᙮ 22 ᒦᑕᔥ ᒨᓯᔅ ᑳᑮ ᐅᔑᐲᐊᕽ ᐅᐅ ᓂᑲᒧᓐ ᐃᐃ ᐯᔑᑾᓐ ᐁᑮᔑᑲᓂᓂᒃ, ᐁᑮ ᑭᑭᓄᐊᒪᐙᒡ ᐃᔅᕒᐃᔭᓬᐊᐞ᙮ 23 ᒦᑕᔥ ᑳᑎᐯᒋᑫᒡ ᑳᑮ ᐅᓇᑭᒫᒡ ᒑᔓᐙᓐ ᑳᑮ ᐅᑌᑌᓂᒡ ᓇᓐ Nun ᐁᔑᓂᑳᓱᓂᒡ, ᐅᐅ ᓴ ᐅᑮᐃᓈᓐ, ᒪᔥᑲᐎ ᐊᔮᓐ, ᒪᔥᑲᐌᑕᓐ ᑲᔦ, ᑮᓐ ᐅᔕ ᑭᑲ ᐃᔑᐎᓈᒃ ᐃᔅᕒᐃᔭᓬᐊᒃ ᐌᑎ ᐊᑮᕽ ᑳᑮ ᐊᔩᒋ ᐊᔓᑕᒫᑫᔮᐸᓐ, ᑭᑲ ᐐᒌᐎᓐ ᑲᔦ, ᐅᑮᐃᓈᓐ᙮ 24 ᒦᔥ ᒨᓯᔅ ᒪᓯᓇᐃᑲᓂᕽ ᑳᑮ ᐃᔑ ᐅᔑᐲᐊᕽ ᐅᑑᓇᔓᐌᐎᓂᓂ ᑳᑎᐯᒋᑫᓂᒡ ᐲᓂᔥ ᐐᑫ ᐁᑮ ᑮᔑᐲᐊᕽ᙮ 25 ᒦᔥ ᑳᑮᐃᓈᒡ ᓬᐄᐹᐃᕽ ᐌᑕᑳᓀᓯᓂᒡ ᑳᑮ ᐱᒥᐎᑑᓂᒡ ᑳᑎᐯᒋᑫᓂᒡ ᐅᑕᔓᑕᒫᑫᒪᑲᑯᓂ ᐁᑮᐃᓈᒡ, 26 ᐅᑖᐱᓇᒧᒃ ᓴ ᐅᐅ ᒪᓯᓇᐃᑲᓐ ᐁᔑ ᐅᔑᐲᐃᑳᑌᒃ ᐅᓇᔓᐌᐎᓐ ᒋᔑ ᐊᑑᔦᒃ ᐅᐱᒣᔭᐄ ᐁᔑ ᐊᑌᒃ ᐃᐃ ᑳᑎᐯᒋᑫᓂᒡ ᑭᑭᔐᒪᓂᑑᒥᐙ ᐅᑕᔓᑕᒫᑫᒪᑲᒃ᙮ ᒦᑕᔥ ᐃᐃᒫ ᑫᐊᔮᒃ ᑫᑎᐹᒋᒥᑯᔦᒃ᙮ 27 ᑭᑭᑫᓂᒥᓂᓂᒻ ᐅᔕ ᐁᔕᔒᐱᑕᒣᒃ, ᐁᒪᒪᔦᒋᐎᔦᒃ ᑲᔦ; ᐃᓇᔥᑫ ᓅᑯᒻ ᐃᑯ ᑳᑮᔑᑲᒃ ᐁᐐᒋᐱᒫᑎᓰᒥᓇᑰᒃ, ᑭᐱ ᔕᔒᐱᑖᒻ, ᐁᔕᔒᐱᑕᐌᒃ ᑳᑎᐯᒋᑫᒡ᙮ ᐋᒌᑫ ᒫᐐᓐ ᑭᑲ ᔕᔒᐱᑖᒻ ᑮᐃᔥᒀ ᐱᒫᑎᓯᔮᓐ! 28 ᐲᑕᒪᐎᔑᒃ ᓴ ᑲᑭᓇ ᑳᓃᑳᓂᓯᐙᒡ ᐁᑕᓶᐙᓇᑭᓯᔦᒃ, ᑳᓂ ᐋᓂᑫ ᓃᑳᓂᓯᐙᒡ ᑲᔦ ᐁᐐ ᐐᑕᒪᐗᒀ ᐅᓄ ᐃᑭᑐᐎᓇᓐ ᒋᓅᑕᒧᐙᒡ᙮ ᑮᔑᒃ ᐃᑕᔥ ᐊᑭ ᑲᔦ ᓂᐐ ᑲᓅᑖᓇᓐ ᒋᑎᐹᒋᒥᑯᔦᒃ᙮ 29 ᓂᑭᑫᑖᓐ ᐅᔕ ᑮᐃᔥᒀ ᐱᒫᑎᓯᔮᓐ ᓅᒋᑯ ᐃᔑᒋᑫᔦᒃ, ᒋᓇᑲᑕᒣᒃ ᑲᔦ ᑳᑮᐃᓂᓇᑰᒃ ᒋᐃᔑᒋᑫᔦᑭᐸᓐ᙮ ᓈᓈᑫ ᑕᔥ ᑕᐊᓂ ᐃᔑᓭ ᒪᒋᑫᑰᓐ ᒋᐅᑎᓯᑯᔦᒃ, ᐋᓃᔥ ᑭᑲ ᒪᒋᐃᔑᒋᑫᒻ ᐁᓈᓴᒦᒡ ᑳᑎᐯᒋᑫᒡ᙮ ᑭᑎᔑᒋᑫᐎᓂᐙᕽ ᓴ ᑭᑲ ᐅᒋ ᓂᔥᑭᐋᐙ, ᑮᐃᑭᑐ᙮ ᒨᓯᔅ ᑳᑮᐃᓇᐊᕽ 30 ᒨᓯᔅ ᐃᑕᔥ ᑮᑲᑭᑐ ᐁᑮ ᓅᑖᑯᒡ ᑲᑭᓇ ᐃᔅᕒᐃᔭᓬᐊᐞ ᐁᑮ ᐐᑕᕽ ᐁᑭᑑᒪᑲᓂᓂᒃ ᐅᐅ ᓂᑲᒧᓐ, ᐲᓂᔥ ᐁᑮ ᑮᔑᑑᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society