ᑑᑕᕒᐋᓇᒦ 26 - ᐅᒋᐺ ᑭᒋᒪᓯᓇᐃᑲᓐᐸᑭᑎᓂᑫᐎᓇᓐ ᐁᑕᔑᑌᑭᓐ 1 ᐊᐲ ᑕᔥ ᑮᐲᑎᑫᔥᑳᔦᒃ ᐃᐃ ᐊᑭ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᒦᓂᓀᒃ ᒋᑎᐱᓇᐌᐎᓯᔦᒃ, ᐊᐲ ᑕᔥ ᐅᑖᐱᓇᒣᒃ, ᑮᑲᐯᔒᓄᑕᒣᒃ ᐃᑕᔥ, 2 ᑭᑲ ᐅᑖᐱᓈᒻ ᓴ ᑲᑭᓇ ᓂᑕᒻ ᑫᑰᓐ ᑭᑭᑎᑫᐗᑲᒥᑯᐙᕽ ᑳᐅᒋ ᓂᑖᐎᑭᑑᔦᒃ ᐃᐃᒫ ᐊᑮᕽ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᒦᓂᓀᒃ᙮ ᐗᑕᐲᐗᔑᕽ ᐃᑕᔥ ᑭᑲ ᐃᔑ ᐲᓇᐋᒻ᙮ ᑭᑲ ᐃᔖᒻ ᐃᑕᔥ ᐋᑎ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᔑ ᐅᓀᑕᕽ ᐁᐐ ᑕᓀᑖᑯᑑᒡ ᐅᐐᓱᐎᓐ᙮ 3 ᑭᑲ ᐊᑕ ᐙᐸᒫᐙ ᑕᔥ ᐊᓇᒥᐁᐎᑭᒫ ᑳᐊᔮᒡ ᐁᑕᓇᓄᑮᒡ ᐃᐃ ᐊᐲ ᐅᐅ ᒋᐃᓇᒡ, ᓅᑯᒻ ᓴ ᑳᑮᔑᑲᓂᓂᒃ ᓂᐐᑕᒪᐙ ᑳᑎᐯᒋᑫᒡ ᓂᑭᔐᒪᓂᑑᒻ ᐁᑮ ᐱ ᑕᑯᔑᓄᐗᒃ ᐅᐅᒫ ᐊᑮᕽ ᑳᑎᐯᒋᑫᒡ ᑳᑮ ᐋᔩᒋ ᐊᔓᑕᒪᐙᑯᐸᓀᓐ ᑭᑫᑌᔭᐋᒥᓈᓃᐞ ᐁᐐ ᒦᓂᓇᕽ᙮ 4 ᒦᔥ ᐊᓇᒥᐁᐎᑭᒫ ᒋᐅᑖᐱᓇᕽ ᐃᐃ ᐗᑕᐲᐗᔥ ᑳᑕᑯᓇᒧᐗᒡ, ᐃᐃᒫ ᑕᔥ ᐅᑲᔑ ᐊᑑᓐ ᐁᔑᐊᔮᓂᒃ ᑳᔑ ᐸᑭᑎᓈᓱᕽ ᐁᓈᓴᒦᓂᒡ ᑳᑎᐯᒋᑫᓂᒡ ᑭᑭᔐᒪᓂᑑᒪᓐ᙮ 5 ᒦᑕᔥ ᑫᐃᑭᑐᐗᒡ ᐁᓈᓴᒦᒡ ᑳᑎᐯᒋᑫᒡ ᑭᑭᔐᒪᓂᑑᒻ, ᑳᑮ ᐅᑌᑌᔮᓐ ᓴ ᑮᐸᐹᒥ ᐊᔮ ᐁᕒᐊᒥᔭᓐ Aramean ᐁᑮ ᑎᓄᐎᒡ, ᐄᒋᐸᑮᕽ Egypt ᐁᑮ ᐃᔖᑯᐸᓀᓐ, ᒦᔥ ᐌᑎ ᑳᐃᔑ ᑲᐯᔑᑯᐸᓀᓐ᙮ ᐋᐱᒋ ᓴ ᑮᐊᑳᓰᓄᐙᑯᐸᓐ᙮ ᒦᑕᔥ ᑳᑮ ᐊᓂ ᑭᒋ ᐃᓀᑖᑯᓯᐙᑯᐸᓀᓐ, ᑳᑮ ᐊᓂ ᓲᑫᑖᑯᓯᐙᑯᐸᓀᓐ ᑲᔦ, ᐐᑫ ᑕᔥ ᐁᑮ ᐊᓂ ᐹᑏᓄᐙᑯᐸᓀᓐ᙮ 6 ᐄᒋᑉ ᑳᑎᓄᐎᐙᒡ ᐃᑕᔥ ᓂᑮ ᓴᓇᑭᐃᑯᓈᓂᒃ, ᑳᐐᓐ ᑲᔦ ᓂᑮ ᒪᓈᒋᐃᑯᓰᓈᓂᒃ, ᐐᑫ ᑲᔦ ᓂᑮ ᑲᒀᑕᑭ ᒥᑕᓄᑮᐃᑯᓈᓂᒃ᙮ 7 ᒦᑕᔥ ᑳᑮ ᔖᑯᐙᓇᑭᒡ ᑳᑎᐯᒋᑫᒡ, ᑳᑮ ᐅᑭᔐᒪᓂᑑᒥᐙᒡ ᓂᑫᑌᔭᐋᒥᓈᐸᓃᒃ᙮ ᑳᑎᐯᒋᑫᒡ ᓂᑮ ᓅᑖᑯᓈᓐ, ᐅᑮ ᐙᐸᑖᓐ ᑲᔦ ᐋᓃᓐ ᑳᑮ ᐃᔑ ᒪᓈᒋᐃᑰᓯᐙᕽ, ᑳᑮ ᐃᓇᓄᑮᐃᑰᔮᕽ, ᑳᑮ ᐃᔑ ᐌᓵᓂᐃᑰᔮᕽ ᑲᔦ᙮ 8 ᒦᔥ ᑳᑎᐯᒋᑫᒡ ᑳᑮ ᓵᑭᒋᐎᓂᔭᒥᓐᒡ ᐄᒋᐸᑮᕽ ᐁᑮ ᐋᐸᒋᑑᒡ ᐅᓂᓐᒡ ᒣᔥᑲᐌᑖᑾᓂᓂᒃ, ᐁᑮ ᔒᐱᓂᑫᓂᒡ ᑲᔦ ᐁᓲᑭᓈᑯᒋᑫᒡ ᐁᑮ ᑭᑭᓇᐙᓯᓈᑯᒋᑫᒡ, ᐁᑮ ᒫᒪᑳᒋᒋᑫᒡ ᑲᔦ᙮ 9 ᒦᔥ ᑳᑮ ᐲᔑᔭᒥᓐᒡ ᐅᐅᒫ ᐊᑮᕽ, ᑳᔑ ᐌᓅᒋ ᓂᑖᐎᑭᓂᓂᒃ ᑫᑰᓐ᙮ 10 ᐃᓇᔥᑫ ᑕᔥ ᓅᑯᒻ ᓂᐲᑑᓐ ᓂᑕᒻ ᑫᑰᓐ ᓀᑖᐎᑭᕽ ᒥᑕᑲᒥᑯᕽ ᑮᓐ ᑌᐯᒋᑫᔭᓐ ᑳᑮ ᒦᔑᔭᓐ᙮ ᒦᔥ ᒋᐸᑭᑎᓇᒪᐗᒡ ᐃᐃ ᐗᑕᐲᐗᔥ ᐁᓈᓴᒦᒡ ᑳᑎᐯᒋᑫᒡ ᑭᑭᔐᒪᓂᑑᒻ, ᒋᑕᑯ ᐊᓂᒥᑯᑖᐗᒡ᙮ 11 ᑮᓐ ᐃᑕᔥ, ᐃᑭ ᑲᔦ ᓬᐄᐹᐃᕽ Levites ᐌᑕᑳᓀᓯᐙᒡ, ᐃᑭ ᑲᔦ ᑳᒪᔭᑭᓯᐙᒡ ᐁᔮᐙᒡ ᑳᔑ ᐊᔮᔦᒃ, ᒫᒪᐤ ᑭᑲ ᒌᑫᑖᒻ ᐃᓂ ᑲᑭᓇ ᑫᑰᓇᓐ ᐌᓂᔑᔑᓂᓂᑭᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᑮ ᒦᓂᓀᒃ, ᑭᑖᐎᓂᐙᕽ ᑲᔦ ᐁᔮᓂᒡ᙮ 12 ᐊᐲ ᑕᔥ ᑮᐃᔥᒀ ᐅᓇᑑᔭᓐ ᐯᔑᒃ ᑫᑰᓐ ᐁᑕᓱ ᒥᑖᓱ ᑲᑭᓇ ᑫᑰᓐ ᓀᑖᐎᑭᑑᔭᓐ ᓂᓱᐱᐴᓐ ᐃᔑᓭᒃ᙮ ᐊᐲ ᑕᔥ ᐃᐌ ᐱᐴᕽ ᑳᒦᑭᐌᓈᓂᐗᕽ ᐯᔑᒃ ᑫᑰᓐ ᐁᑕᓱ ᒥᑖᓱ, ᑭᑲ ᒦᓈᐙᒃ ᓴ ᓬᐄᐹᐃᕽ ᐌᑕᑳᓀᓯᐙᒡ, ᒣᔭᑭᓯᐙᒡ ᑲᔦ, ᑮᐗᔑᔖᓇᒃ ᑲᔦ, ᑮᐙᒋᑴᐗᒃ ᐃᑕᔥ ᑲᔦ᙮ ᑭᑑᑌᓈᒥᐙᕽ ᐃᑕᔥ ᑕᑕᔑ ᐐᓯᓂᐗᒃ, ᒋᑌᐃᓇᒪᒋᐅᐙᒡ᙮ 13 ᒦᑕᔥ ᑫᐃᓇᒡ ᑳᑎᐯᒋᑫᒡ ᑭᑭᔐᒪᓂᑑᒻ, ᓂᑮ ᐅᑖᐱᓈᓇᓐ ᓴ ᓂᑖᐎᓂᕽ ᑳᑭᑌᑖᑾᑭᓐ ᑫᑰᓇᓐ, ᐁᑮ ᒦᓇᒀ ᑲᔦ ᓬᐄᐹᐃᕽ ᐌᑕᑳᓀᓯᐙᒡ, ᒣᔭᑭᓯᐙᒡ, ᑮᐗᔑᔖᓇᒃ, ᑮᐙᒋᑴᐗᒃ ᑲᔦ, ᐁᑮ ᐃᔑᒋᑫᔮᓐ ᑲᑭᓇ ᑳᑮ ᐃᓈᑯᓂᑫᔭᓐ᙮ ᑳᐐᓐ ᓴ ᓂᑮ ᐸᑫᓄᑕᓰᓇᓐ ᑭᑎᓈᑯᓂᑫᐎᓇᓐ, ᑳᐐᓐ ᑲᔦ ᓂᑮ ᐗᓃᑫᓄᑕᓰᓇᓐ᙮ 14 ᑳᐐᓐ ᓴ ᓂᑑᒋ ᒦᒋᓰᓐ ᒣᒀ ᑮᒪᐎᔮᓐ, ᑳᐐᓐ ᑲᔦ ᓂᑮ ᐅᑖᐱᓇᓰᓐ ᒣᒀ ᑮᐐᓀᑖᑯᓯᔮᓐ, ᑳᐐᓐ ᑲᔦ ᓂᑑᒋ ᐸᑭᑎᓇᒪᐙᓰᒃ ᐃᑭ ᓀᐳᐙᒡ᙮ ᓂᑮ ᓇᐃᑕᐙ ᓴ ᑳᑎᐯᒋᑫᒡ ᓂᑭᔐᒪᓂᑑᒻ, ᑲᑭᓇ ᓴ ᓂᑮ ᐃᔑᒋᑫ ᑳᑮ ᐃᔑ ᐊᓅᔑᔭᓐ᙮ 15 ᑭᒋ ᑮᔑᑯᕽ ᑳᑭᑌᑖᑾᒃ ᐁᔑᑖᔭᓐ ᑭᑲ ᐅᓵᑉ ᐅᐅᒫ ᓇᑫ ᓈᔕᔭᐄ ᒋᐲᓈᐱᔭᓐ, ᒋᒥᓄᓭᐊᑣ ᑭᐱᒫᑎᓰᒪᒃ ᐃᔅᕒᐃᔭᓬᐊᒃ Israel, ᒋᒥᓄᓭᑑᔭᓐ ᑲᔦ ᐊᑭ ᑳᑮ ᒦᔑᔮᕽ, ᐊᑮᕽ ᑳᔑ ᐌᓅᒋ ᓂᑖᐎᑭᕽ ᑫᑰᓐ, ᑳᑮ ᐃᔑ ᐋᔩᒋ ᐊᔓᑕᒪᐗᑣ ᓂᑫᑌᔭᐋᒥᓈᐸᓃᒃ᙮ ᑳᑎᐯᒋᑫᒡ ᐐᓐ ᐃᑯ ᑌᐯᓂᒫᒡ ᐯᒫᑎᓯᓂᒡ 16 ᓅᑯᒻ ᐃᑕᔥ ᑳᑮᔑᑲᓂᓂᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑭᑲᓅᓂᑯᐙ ᒋᐱᒥᓂᔕᐊᒧᐌᒃ ᐅᑎᑭᑐᐎᓇᓐ, ᐅᑑᓇᔓᐌᐎᓇᓐ ᑲᔦ᙮ ᐌᐌᓂ ᓴ ᑭᑲ ᐃᔑᒋᑫᒻ ᒋᑑᑕᒧᐌᒃ ᐁᓂᑯᑯᑌᐁᔦᒃ, ᒥᓯᐌ ᑲᔦ ᑭᑕᒑᑯᐙᕽ᙮ 17 ᓅᑯᒻ ᓴ ᑳᑮᔑᑲᒃ ᑭᑮ ᐃᑭᑐᒻ ᑳᑎᐯᒋᑫᒡ ᒋᐅᑭᔐᒪᓂᑑᒥᔦᒃ, ᐁᐐ ᐃᔑ ᐱᒧᓭᐌᒃ ᑲᔦ ᐅᑎᔑᑣᐎᓂᕽ, ᐁᐐ ᑲᓇᐌᑕᒧᐌᒃ ᑲᔦ ᐅᑎᑭᑐᐎᓇᓐ, ᐅᑎᓈᑯᓂᑫᐎᓇᓐ ᑲᔦ, ᐅᑕᓇᒥᐁᒋᑫᐎᓇᓐ ᑲᔦ, ᐁᐐ ᐱᓯᑕᒧᐌᒃ ᑲᔦ ᐋᓃᓐ ᐁᓂᓀᒃ᙮ 18 ᓅᑯᒻ ᐃᑕᔥ ᑳᑮᔑᑲᓂᓂᒃ ᑳᑎᐯᒋᑫᒡ ᑭᑎᑯᐙ ᐁᐐ ᑎᐱᓇᐌᐎᓰᒥᓀᒃ, ᑳᑮ ᐃᔑ ᐊᔓᑕᒪᐎᓀᒃ, ᒋᑲᓇᐌᑕᒧᐌᒃ ᑲᑭᓇ ᐅᑎᓈᑯᓂᑫᐎᓇᓐ; 19 ᑮᐃᑭᑐ ᑲᔦ ᐁᐐ ᐃᓇᓯᓀᒃ ᓇᐗᒡ ᒋᑭᒋ ᐃᓀᑖᑯᓯᐌᒃ, ᒋᑭᑫᓂᒥᑰᐌᒃ, ᒋᑭᑌᑖᑯᓯᔦᒃ ᑲᔦ ᐊᐲᒡ ᐐᓐ ᑲᑭᓇ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ ᑳᑮ ᐅᔑᐋᒡ᙮ ᐐᓐ ᓴ ᑯ ᑎᐱᓇᐌ ᑭᐐ ᑎᐱᓇᐌᐎᓰᒥᑯᐙ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑖᐱᔥᑰ ᑳᑮ ᐃᔑ ᐊᔓᑕᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society