ᑑᑕᕒᐋᓇᒦ 24 - ᐅᒋᐺ ᑭᒋᒪᓯᓇᐃᑲᓐᐌᐱᓂᑎᐎᓐ ᐁᑕᔑᑌᒃ 1 ᑮᔥᐱᓐ ᓴ ᐃᓂᓂ ᑮᐐᑎᑫᒫᒡ ᐃᑴᐗᓐ, ᐊᓂ ᓇᐁᓂᒫᓯᒃ ᐃᑕᔥ, ᐅᓵᒻ ᑫᑰᓐ ᐁᒥᑲᕽ ᐁᔑ ᐯᑳᑎᓯᓯᓂᒃ ᒦ ᓴ ᐃ ᑫᐃᔑᒋᑫᒡ ᒋᐅᔑᐲᐊᕽ ᐌᐱᓂᑏ ᒪᓯᓇᐃᑲᓐ ᒋᒦᓈᒡ ᐃᑕᔥ᙮ ᓂᑯᒋ ᐃᑕᔥ ᑲᔦ ᐅᑖᐎᓂᕽ ᐅᑲ ᐅᒋ ᐃᔑᓂᔕᐙᓐ᙮ 2 ᐊᐊ ᑕᔥ ᐃᑴ ᑮᐃᔥᒀ ᓇᑲᑕᕽ ᐅᑖᐎᓂᓂ ᐃᓂ ᐃᓂᓂᐗᓐ, ᑯᑕᒃ ᐃᑕᔥ ᐃᓂᓂᐗᓐ ᐊᓂ ᐐᑎᑫᒥᑯᒡ, 3 ᑮᔥᐱᓐ ᐃᑕᔥ ᐃᓂ ᐅᑖᒋ ᐅᓈᐯᒪᓐ ᐊᑕᐌᓂᒥᑯᓯᒃ, ᐅᔑᑑᓂᒡ ᐃᑕᔥ ᐃᐃ ᐌᐱᓂᑏ ᒪᓯᓇᐃᑲᓐ, ᒦᓂᑯᒡ ᐃᑕᔥ ᐅᑖᐎᓂᓃᕽ ᑲᔦ ᐅᒋ ᓵᑭᒋᓂᔕᐅᑯᒡ, ᑯᒫ ᑲᔦ ᓂᐳᓂᒡ ᐃᓂ ᐅᓈᐯᒪᓐ, 4 ᐃᓂ ᓴ ᓂᑕᒻ ᑳᑮ ᐐᑎᑫᒥᑯᐸᓐ ᐃᓂᓂᐗᓐ ᑳᐐᓐ ᑕᐸᑭᑎᓈᓰᐗᓐ ᒋᑮᐌ ᐐᑎᑫᒥᑯᒡ, ᐅᓵᒻ ᐋᓃᔥ ᑮᐐᓀᑖᑯᓯᐃᑎᓱ; ᒦ ᐄᑐᒃ ᐃᐃᐌᓂ ᑳᑲᒀᓂᓴᑫᑕᕽ ᑳᑎᐯᒋᑫᒡ᙮ ᑳᐐᓐ ᑭᑲ ᐲᑑᓰᒻ ᒪᒋᑑᑕᒧᐎᓐ ᐃᐃᒫ ᐊᑮᕽ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᒦᓂᓀᒃ ᒋᑎᐱᓇᐌᐎᓯᔦᒃ᙮ ᑯᑕᒃ ᐅᓇᔓᐌᐎᓇᓐ ᐁᑕᔑᑌᑭᓐ 5 ᐊᐲ ᓴ ᐃᓂᓂ ᐅᔥᑭᑴᐌᒡ, ᑳᐐᓐ ᓴ ᑕᐊᑕ ᒦᑳᓱᓰ, ᑳᐐᓐ ᑲᔦ ᑕᒦᓈᓰ ᑫᑰᓐ ᒋᐅᐸᐹᒥᓯᐎᓂᒡ᙮ ᒦ ᓴ ᐃ ᐁᔑᓈᑾᓂᓂᒃ ᐯᔑᑯᐱᐴᓐ ᒋᐊᔮᒡ ᐅᑖᐎᓂᕽ, ᒋᒥᓉᑕᒥᐋᐸᓐ ᐐᐗᓐ ᑳᑮ ᐐᑎᑫᒫᒡ᙮ 10 ᐊᐲ ᓴ ᑫᑰᓂᓂ ᐱᑯ ᐁᐊᐎᐊᒡ ᑭᐐᒋᑖᒫᑲᓐ, ᑫᑯ ᐲᑎᑫᐙᑫᓐ ᐅᐙᑳᐃᑲᓐ ᒋᓈᓯᑲᒧᐗᒡ ᑳᑮ ᐃᑭᑐᒡ ᐁᐊᓺ ᑎᐸᐃᑳᑫᒡ᙮ 11 ᐊᑾᒌᕽ ᓴ ᑕᔑ ᐲᐅᓐ, ᑕᑲ ᐐᓐ ᐊᐊ ᑳᐊᐎᐋᓲᒥᒃ ᑭᑲ ᐲᑕᒫᒃ ᐃᐃ ᑳᐃᑭᑐᒡ ᐁᐐ ᑎᐸᐃᑳᑫᒡ᙮ 12 ᑮᔥᐱᓐ ᐃᑕᔥ ᐐᓐ ᑭᑎᒫᑭᓯᒡ, ᑫᑯ ᐐᓐ ᑲᐯᑎᐱᒃ ᑲᓇᐌᑕᒧᐙᑫᓐ ᑳᑮ ᐃᑭᑐᒡ ᐁᐐ ᑎᐸᐃᑳᑫᒡ᙮ 13 ᐁᑕᓱᓈᑯᔥ ᐃᓴ ᑫᒋᓈᒡ ᑭᑲ ᑮᐌ ᒦᓈ ᐃᐃ ᑳᑮ ᐃᑭᑐᒡ ᐁᐐ ᑎᐸᐃᑳᑫᒡ, ᒋᑮᐌ ᒦᓇᒡ ᐃᐃ ᐅᑲᔥᑮᑮᐎᓐ ᑫᐱᓯᑲᕽ ᓂᐹᒡ, ᒦᑴᒡ ᐃᑕᔥ ᑭᑲᐃᒃ᙮ ᒦ ᓴ ᑕᔥ ᐃᐃ ᑫᐃᓇᑭᑌᒃ ᑾᔭᑯᒋᑫᐎᓐ ᐁᓈᓴᒦᒡ ᑳᑎᐯᒋᑫᒡ ᑭᑭᔐᒪᓂᑑᒻ᙮ 14 ᑳᐐᓐ ᓴ ᑭᑲ ᐗᔦᔑᒫᓯᐙᐙ ᐊᐎᔭ ᐁᓄᑮᐁᒃ ᑫᑎᒫᑭᓯᒡ, ᑫᑰᓐ ᑳᓅᑌᓭᒡ, ᑳᐐᒋ ᐅᒌᒣᒃ ᐃᐃᒫ ᐃᔅᕒᐃᔭᓬᐊᑮᕽ Israel, ᒥᓴᐙ ᑯ ᑲᔦ ᐲᐎᑌᐎᑴᓐ ᑭᑑᑌᓈᒥᐙᕽ ᐁᔑᑖᒡ᙮ 15 ᐁᑕᓱ ᑮᔑᒃ ᓴ ᑭᑲ ᑎᐸᐊᒪᐙᐙ ᒋᑆ ᐸᑭᔑᒧᓂᒡ ᑮᓯᓲᓐ, ᐁᑭᑎᒫᑭᓯᒡ ᐋᓃᔥ ᐅᑕᐯᓂᒧᓄᑖᓐ ᐃᐃ ᑫᔑ ᑎᐸᐊᒪᐌᒃ᙮ ᑮᔥᐱᓐ ᑎᐸᐊᒪᐙᓯᐌᒃ, ᒫᑭᔖ ᐅᑲ ᔖᑯᐙᓈᓐ ᑳᑎᐯᒋᑫᓂᒡ ᒋᓈᑕᒫᑯᒡ ᑮᓇᐙ ᐅᒋ, ᒦᔥ ᒪᒋᑑᑕᒧᐎᓂᕽ ᒋᐃᓇᑭᑕᒫᑯᔦᒃ᙮ 16 ᐅᓃᑭᐃᑯᒫᒃ ᓴ ᑳᐐᓐ ᑕᐅᒋ ᓂᓵᓰᐗᒃ ᐋᓃᓐ ᑳᔑ ᒪᒫᔒᓂᒡ ᐅᓃᒑᓂᓯᐙᐞ, ᐊᐱᓅᒌᔕᒃ ᑲᔦ ᑳᐐᓐ ᑕᐅᒋ ᓂᓵᓰᐗᒃ ᐋᓃᓐ ᑳᑮ ᐃᔑ ᒪᒫᔒᓂᒡ ᐅᓃᑭᐃᑯᐙᐞ᙮ ᐊᐎᔭ ᓴ ᑯ ᑕᐅᒋ ᓂᓵ ᐐᓐ ᐃᑯ ᑳᑮ ᐃᔑ ᒪᒫᔒᒡ᙮ 17 ᑫᑯ ᑲᔦ ᒫᔑ ᑑᑕᐙᑫᒀᓂᒃ ᑳᐲᐎᑌᐎᐙᒡ, ᑮᐗᔑᔖᓇᒃ ᑲᔦ ᒋᐅᑖᐱᓇᒪᐌᒀ ᐌᐌᓂ ᑫᐅᒋ ᑑᑕᐎᑣᐸᓐ᙮ ᑫᑯ ᑲᔦ ᐅᑲᔥᑮᑮᐎᓐ ᑮᐙᒋᑴ ᐅᑖᐱᓇᒪᐙᑫᒃ ᒋᐃᓇᑭᑕᒪᐌᒃ ᑫᑰᓂᓂ ᑫᑮᐌ ᑎᐸᐃᑳᑫᒡ᙮ 18 ᒫᒥᑲᐎᒃ ᑮᓇᐙ ᐁᑮ ᑲᒀᑕᑭ ᒥᑕᓄᑮᐃᑰᔦᒃ ᐌᑎ ᐄᒋᐸᑮᕽ Egypt, ᑳᑎᐯᒋᑫᒡ ᑭᑭᔐᒪᓂᑑᒥᐙ ᑕᔥ ᐌᑎ ᑭᑮ ᐅᒋ ᔖᐾᐃᑯᐙ᙮ ᒦᑕᔥ ᑳᐅᒋ ᐊᓅᓂᓇᑰᒃ ᐅᐅ ᒋᐃᔑᒋᑫᔦᒃ᙮ 19 ᐊᐲ ᑕᔥ ᒪᓂᔑᑫᔦᒃ ᑭᑭᑎᑫᐗᑲᒥᑯᐙᕽ, ᐸᓈᐸᑕᒣᒃ ᐃᑕᔥ ᐸᑴᔑᑲᓂᐎ ᑭᑎᑳᓐ, ᑳᐐᓐ ᓴ ᑭᑲ ᑮᐌ ᓈᓯᑲᓰᒻ᙮ ᒦᐗᓐ ᓴ ᐃᓂ ᑳᒪᔭᑭᓯᐙᒡ, ᑮᐗᔑᔖᓇᒃ, ᑮᐙᒋᑴᐗᒃ ᑲᔦ ᑫᐱ ᒫᒨᔕᑭᓇᒧᐙᒡ, ᑳᑎᐯᒋᑫᒡ ᑭᑭᔐᒪᓂᑑᒥᐙ ᒋᔕᐌᓂᒥᓀᒃ ᑲᑭᓇ ᑫᑰᓐ ᐁᔑᒋᑫᐌᒃ᙮ 20 ᐊᐲ ᑕᔥ ᐸᐗᑲᓈᒣᒀ ᐋᓬᐃᑉ ᑎᓄᐙᑎᑰᒃ, ᑫᑯ ᓈᓵᑉ ᐸᐹᒣᑕᑫᒃ ᐗᑎᑾᓇᓐ᙮ ᒦᐗᓐ ᓴ ᐃᓂ ᑳᐲᐎᑌᐎᐙᒡ, ᑮᐗᔑᔖᓇᒃ, ᑮᐙᒋᑴᐗᒃ ᑲᔦ ᑫᒫᒨᔕᑭᓇᒧᐙᒡ᙮ 21 ᐊᐲ ᑲᔦ ᒪᒨᔕᑭᓀᒀ ᔔᒥᓇᒃ ᑳᔑ ᑭᑎᑫᔦᒃ, ᑫᑯ ᐐᓐ ᒦᓇᐙ ᓈᓵᑉ ᐸᐹᒣᑕᑫᒃ ᐗᑎᑾᓇᓐ᙮ ᒦᐗᓐ ᓴ ᐃᓂ ᑳᒪᔭᑭᓯᐙᒡ, ᑮᐗᔑᔖᓇᒃ, ᑮᐙᒋᑴᐗᒃ ᑲᔦ ᑫᐱ ᒫᒨᔕᑭᓇᒧᐙᒡ᙮ 22 ᒦᑕᔥ ᒋᒫᒥᑲᐎᔦᒃ ᑫᑮᓇᐙ ᐁᑮ ᑲᒀᑕᑭ ᒥᑕᓄᑮᐃᑰᔦᒃ ᐌᑎ ᐄᒋᐸᑮᕽ, ᒦᑕᔥ ᑳᐅᒋ ᐊᓅᓂᓇᑰᒃ ᐅᐅ ᒋᐃᔑᒋᑫᔦᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society