ᑑᑕᕒᐋᓇᒦ 18 - ᐅᒋᐺ ᑭᒋᒪᓯᓇᐃᑲᓐᑭᔐᒪᓂᑑ ᑮᐃᑭᑐᒡ ᐁᐐᐲᒋᓂᔕᐙᒡ ᑫᑲᓅᑕᒫᑯᒡ 14 ᒦᑕᔥ ᒨᓯᔅ Moses ᑳᐃᑭᑐᒡ, ᐃᑭᐌᓂᐗᒃ ᓴ ᐯᑳᓉᐙᓇᑭᓯᐙᒡ ᐯᒫᑎᓯᐙᒡ ᑫᒪᑲᒣᒀ ᐅᑕᑮᐙ ᐅᐱᓯᑕᐙᐙᐞ ᑳᑲᑲᓅᓈᓂᒡ ᒌᐸᔭᐞ, ᐃᐃ ᑲᔦ ᑳᒪᒫᑖᐎ ᐊᑕ ᑭᑫᒋᑫᓂᒡ᙮ ᑮᓇᐙ ᑕᔥ ᐐᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᐐᓐ ᑭᐸᑭᑎᓂᑯᓰᐙ ᐅᐅ ᒋᐃᔑᒋᑫᔦᒃ᙮ 15 ᒣᔥᑾᒡ ᑕᔥ ᑳᑎᐯᒋᑫᒡ ᑭᑲ ᐃᔑᓂᔕᐊᒫᑯᐙ ᑫᑲᓅᑕᒫᑯᒡ ᑖᐱᔥᑰ ᓃᓐ ᑎᓄ, ᐁᐐ ᐅᑎᓈᒡ ᐃᐃᒫ ᑳᔑ ᐊᔮᓂᒡ ᑮᒋᐱᒫᑎᓰᐙᐞ᙮ ᒦᑕᔥ ᐗᐊ ᑫᐱᓯᑕᐌᒃ᙮ 16 ᒦᑕᔥ ᐅᐅᐌᓂ ᑲᑭᓇ ᑳᑮ ᐃᔑ ᑲᑴᒋᒣᑭᐸᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐌᑎ ᑭᒋ ᐗᒌᕽ ᐆᕒᐁᑉ Horeb ᐁᒋᑳᑌᓂᒃ᙮ ᒦ ᐊᐲ ᐁᑮᔑᑲᒃ ᑳᑮ ᐱ ᓈᓯᑲᐎᔦᑭᐸᓐ ᐁᑮ ᐃᑭᑐᔦᑭᐸᓐ, ᑫᑯ ᐸᑭᑎᓂᔑᓈᑳᕽ ᒋᓅᑕᐗᑭᒡ ᑳᑎᐯᒋᑫᒡ ᓂᑭᔐᒪᓂᑑᒥᓈᓐ, ᑫᑯ ᑲᔦ ᐸᑭᑎᓂᔑᓈᑳᕽ ᐊᐗᔑᒣ ᒋᐙᐸᑕᒫᕽ ᐃᐃ ᑭᒋ ᐃᔥᑯᑌ ᒋᓂᐳᓯᐙᕽ᙮ 17 ᒦᑕᔥ ᐅᐅ ᑳᐃᔑᐸᓐ ᑳᑎᐯᒋᑫᒡ, ᐋᐱᒋ ᓴ ᑾᔭᒃ ᐃᑭᑐᐗᒃ ᐃᐃ ᑳᐃᑭᑐᐙᒡ᙮ 18 ᐅᐅ ᑕᔥ ᑮᐊᓂ ᐃᑭᑐ, ᓂᑲ ᐅᑎᓇᒪᐙᒃ ᓴ ᑫᑲᓅᑕᒫᑯᐙᒡ ᑖᐱᔥᑰ ᑮᓐ ᑎᓄ, ᐃᐃᒫ ᓴ ᓂᑲ ᐅᑎᓂᒫᓐ ᑳᔑ ᐊᔮᓂᒡ ᐐᒋᐱᒫᑎᓰᐙᐞ᙮ ᓂᑎᑭᑐᐎᓇᓐ ᓴ ᐅᑲ ᑕᔑᑕᒫᑯᐙᓐ; ᑫᔑ ᐊᓅᓂᒪᒃ ᑕᔥ ᑲᔦ ᑲᑭᓇ ᐅᑲᐃᑯᐙᓐ᙮ 19 ᐊᐌᓀᓐ ᑕᔥ ᐃᑯ ᑫᐱᓯᑕᓯᒃ ᓂᑎᑭᑐᐎᓇᓐ ᑫᐃᑭᑐᓂᒡ ᐃᐃᒫ ᓂᐐᓱᐎᓂᓃᕽ, ᓃᓐ ᓴ ᐱᑯ ᐊᐊᐌ ᓂᑲ ᓇᓇᐊᓵ᙮ 20 ᐊᐊ ᑕᔥ ᑭᔐᒪᓂᑑᓐ ᑳᑲᓅᑕᒪᐙᒡ ᑮᔥᐱᓐ ᑫᑰᓂᓂ ᐃᑭᑐᒡ ᓂᐐᓱᐎᓂᕽ ᑳᑮ ᐃᔑ ᐊᓅᓈᓯᐗᒃ, ᐊᐊ ᑲᔦ ᑫᑰᓂᓂ ᑳᐃᑭᑐᒡ ᐅᐐᓱᐎᓂᓃᕽ ᑯᑕᒃ ᒪᓂᑑᐞ, ᒦ ᓴ ᐊᐌ ᑫᓂᐳᒡ᙮ 21 ᑭᑌᐃᐙᕽ ᒫᐐᓐ ᑭᑎᑭᑐᒥᐙᑐᒃ, ᐋᓃᓐ ᑕᔥ ᑫᐅᒋ ᑭᑫᑕᒫᕽ ᑳᑎᐯᒋᑫᒡ ᐁᑭᑐᓯᒃ? 22 ᐊᐲ ᓴ ᑫᑰᓂᓂ ᑮᐃᑭᑐᒡ ᐊᐊ ᑭᔐᒪᓂᑑᓐ ᑳᑲᓅᑕᒪᐙᒡ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ, ᑮᔥᐱᓐ ᐃᑕᔥ ᐃᔑᓭᓯᓂᓂᒃ ᐃᐃ ᑳᐃᑭᑐᒡ, ᑌᐺᐗᓯᓂᓂᒃ ᑲᔦ, ᑳᐐᓐ ᐄᓴᓐ ᐃᐃᐌᓂ ᑳᑎᐯᒋᑫᒡ ᐅᑎᑭᑐᐎᓐ᙮ ᐐᓐ ᐄᓴᓐ ᐱᑯ ᐃᐃᐌᓂ ᑮᐃᓀᑕᒻ ᑳᑮ ᐃᑭᑐᒡ ᐊᐊ ᐅᑲᓅᑕᒫᑫ; ᑫᑯ ᑕᔥ ᒣᒬᒡ ᑯᑖᓀᓂᒫᑫᒃ ᐊᐊ ᑎᓄ, ᐅᑮ ᐃᓈᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society