ᑑᑕᕒᐋᓇᒦ 11 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᐅᑭᒋᐃᓀᑖᑯᓯᐎᓐ ᐁᑕᔑᑌᓂᒃ 1 ᑭᑲ ᓵᑭᐋᐙ ᓴ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᒨᔕᒃ ᑲᔦ ᑭᑲ ᑲᓇᐌᑕᒧᐙᒻ ᐁᔑ ᐊᑕᐌᓂᒥᓀᒃ, ᐅᑎᑭᑐᐎᓇᓐ ᑲᔦ ᐅᑕᓇᒥᐁᒋᑫᐎᓇᓐ ᑲᔦ ᐅᑎᓈᑯᓂᑫᐎᓇᓐ ᑲᔦ᙮ 2 ᓅᑯᒻ ᐃᑕᔥ ᑳᑮᔑᑲᒃ ᑭᑫᑕᒧᒃ ᑳᐐᓐ ᐐᓐ ᑭᓃᒑᓂᓯᐙᒃ ᑳᑲᓅᓇᒀ, ᑳᑮ ᐱ ᑭᑫᑕᓯᒀ, ᑳᑮ ᐱ ᐙᐸᑕᓯᒀ ᑲᔦ ᐁᔑ ᑭᑭᓄᐃᑫᓂᒡ ᑳᑎᐯᒋᑫᓂᒡ ᑭᑭᔐᒪᓂᑑᒥᐙᓐ᙮ ᑮᓇᐙ ᐅᔕ ᑳᐃᓂᓇᑰᒃ ᑳᑮ ᐙᐸᑕᒧᐌᒃ ᐅᑭᒋ ᐃᓀᑖᑯᓯᐎᓐ, ᐅᒪᔥᑲᐎᓰᐎᓐ, ᐁᔑᒋᑫᒡ ᑲᔦ ᑮᐗᑲᐎᓂᑫᓂᒡ, 3 ᐅᑭᑭᓇᐙᒋᒋᑫᐎᓇᓐ ᑲᔦ, ᑳᑮ ᐃᔑᒋᑫᒡ ᒣᑴᔭᐄ ᐄᒋᐸᑮᕽ Egypt᙮ ᑳᑮ ᑑᑕᐙᒡ ᑲᔦ ᐯᕒᐆᓐ Pharaoh ᑭᒋ ᐅᑭᒫᓐ, ᑳᑮ ᑑᑕᕽ ᒥᓯᐌ ᑲᔦ ᐅᑕᑮᒥᓂ᙮ 4 ᑭᑮ ᐙᐸᑫᒻ ᐄᑐᒃ ᐋᓃᓐ ᑳᑑᑕᐙᒡ ᐄᒋᐲᐎ ᔑᒫᑲᓂᔕᐞ, ᐅᒥᑕᑎᒨᒥᓂ ᑲᔦ, ᐅᑑᑖᐹᓈᑯᓂ ᑲᔦ, ᐊᐲ ᑮᐃᔑᒋᑫᒡ ᒥᔅᑯ ᑭᒋᑲᒦᓂ Red Sea ᑮᓂᓵᐹᐙᓂᑯᓂᒡ ᒣᒀ ᑮᐱᒥᓂᔕᐅᓀᒃ᙮ ᑳᑎᐯᒋᑫᒡ ᐄᑐᒃ ᐐᑫ ᐅᑮ ᒑᑭᐋᐞ᙮ 5 ᑭᑭᑫᑖᒻ ᑲᔦ ᐋᓃᓐ ᑳᐃᔑᒋᑫᑕᒪᐎᓀᒃ ᐌᑎ ᐱᑾᑕᑲᒥᒃ ᐲᓂᔥ ᐅᐅᒫ ᑮᐱ ᑕᑯᔑᓀᒃ᙮ 6 ᑭᑭᑫᑖᒻ ᑲᔦ ᐋᓃᓐ ᑳᑑᑕᐙᒡ ᑌᑕᓇᓐ Dathan, ᐊᐹᐃᕒᐊᒪᓐ Abiram ᑲᔦ ᑳᑮ ᐅᑌᑌᓂᒡ ᐄᓬᐋᐃᐸᓐ Eliab, ᐅᕒᐆᐸᓂᕽ Reuben ᑳᑮ ᐅᑕᑳᓀᓯᓂᒡ, ᐊᐲ ᑮᐹᑭᓭᓂᑭᐸᓐ ᐊᑭ ᑮᐲᒋᓭᐙᐸᓐ ᐃᑕᔥ᙮ ᑲᑭᓇ ᐁᑕᔑᓂᒡ ᐄᑐᒃ ᐅᑖᐎᓂᓃᕽ ᐁᔮᓂᐸᓐ ᑮᐲᒋᓭᐗᐞ, ᐅᐸᒀᓀᑲᒥᑯᓂ, ᑲᑭᓇ ᓴ ᑯ ᑫᑰᓐ ᐯᒫᑕᓂᓂᒃ ᑳᑮ ᑎᐯᑕᒥᓂᒡ᙮ 7 ᑮᓇᐙ ᓴ ᑭᔥᑮᔑᑯᐙᕽ ᑭᑮ ᐅᒋ ᐙᐸᑖᒻ ᑭᒋ ᑫᑰᓇᓐ ᑳᑎᐯᒋᑫᒡ ᑳᑮ ᐃᔑᒋᑫᐃᓀᒃ᙮ ᐁᑕᔑᑌᒃ ᐃᐃ ᐊᑭ ᑭᔐᒪᓂᑑ ᑳᑮᐊᔓᑕᒫᑫᒡ 8 ᑭᑲ ᑲᓇᐌᑖᒻ ᐃᑕᔥ ᑲᑭᓇ ᐃᓈᑯᓂᑫᐎᓇᓐ ᑳᐃᓂᓇᑰᒃ ᓅᑯᒻ ᑳᑮᔑᑲᒃ, ᒋᓲᑫᑖᑯᓯᔦᒃ ᐲᑎᑫᔥᑳᔦᒃ ᒋᑎᐱᓇᐌᐎᓯᔦᒃ ᐃᐃ ᐊᑭ᙮ ᐋᔕ ᐄᑐᒃ ᑫᑳ ᑭᐐ ᐋᔕᐎᔥᑳᒻ ᒋᑎᐱᓇᐌᐎᓯᔦᒃ᙮ 9 ᒦᔥ ᑭᓉᔥ ᒋᐱᒫᑎᓯᔦᒃ ᐃᐃᒫ ᐊᑮᕽ ᑳᑎᐯᒋᑫᒡ ᑳᑮ ᐊᔩᒋ ᐊᔓᑕᒪᐙᑯᐸᓀᓐ ᑭᑫᑌᔭᐋᒥᐙᐞ ᐁᐐ ᒦᓈᑯᐸᓀᓐ, ᐅᐲᐌᓰᒥᓂ ᑲᔦ᙮ ᒦ ᓴ ᐃᐃᒫ ᐊᑮᕽ ᐁᔑ ᐌᓅᒋ ᓂᑖᐎᑭᒃ ᑫᑰᓐ᙮ 10 ᐃᐃ ᓴ ᐊᑭ ᑳᐲᑎᑫᔥᑳᔦᒃ ᐁᐐ ᑎᐱᓇᐌᐎᓯᔦᒃ, ᑳᐐᓐ ᐐᓐ ᑖᐱᔥᑰ ᐄᒋᐸᑮᕽ Egypt ᑳᑮ ᐱ ᐅᒌᔦᒃ ᐃᓀᑖᑾᓯᓅᓐ᙮ ᐐᑫ ᐄᑐᒃ ᐐᓐ ᐌᑎ ᑭᑮ ᑭᒋ ᐊᓄᑮᒻ ᑮᑭᑎᑫᔦᑭᐸᓐ, ᑮᐅᔑᑑᔦᑭᐸᓐ ᑲᔦ ᓂᐱ ᑫᐃᔑᒋᐗᕽ ᑳᔑ ᑲᑭᑎᑳᓂᐗᕽ᙮ 11 ᐃᐃ ᑕᔥ ᑳᐐ ᐋᔕᐎᔥᑳᔦᒃ ᐁᐐ ᐊᐎ ᑎᐱᓇᐌᐎᓯᔦᒃ ᐃᐃ ᐊᑭ, ᒦ ᓴ ᐃᐃᒫ ᐊᑮᕽ ᐁᔑᐊᔮᑭᓐ ᑭᒋ ᐗᒌᓐ, ᒦᑲᔦ ᐃᒫ ᐁᔑ ᐸᐸᓴᑎᓈᒃ᙮ ᐐᑫ ᑲᔦ ᐃᐃᒫ ᓂᑖ ᑭᒥᐗᓐ᙮ 12 ᒦ ᓴ ᐃᐌᓂ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᓈᓈᑲᒋᑑᒡ ᐊᑮᓂ, ᑲᐯᔭᐄ ᐁᓈᓈᑲᒋᑑᒡ᙮ 13 ᑮᔥᐱᓐ ᐃᑕᔥ ᐸᑭᒌᓯᐌᒃ ᒋᓇᐃᑕᒣᒃ ᐃᓈᑯᓂᑫᐎᓇᓐ ᑳᐐᑕᒪᐎᓇᑰᒃ ᓅᑯᒻ ᑳᑮᔑᑲᒃ, ᒋᓵᑭᐁᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᒋᐊᓄᑮᑕᐌᒃ ᑲᔦ ᐁᓂᑯᑯᑌᐁᔦᒃ, ᒥᓯᐌ ᑲᔦ ᑭᑕᒑᑯᐙᕽ, 14 ᒦᑕᔥ ᐃᐃ ᒋᐃᔑᒋᑫᒡ ᒋᑭᒥᐗᓂᓂᒃ ᑭᑕᑮᒥᐙᕽ ᐊᐸᓂᑯ, ᑳᓂᑖ ᑭᒥᐗᕽ ᑮᑕᒀᑭᕽ, ᑮᓰᑾᕽ ᑲᔦ᙮ ᒦᑕᔥ ᒋᓂᑖᐎᑭᕽ ᑫᒫᒨᔕᑭᓇᒣᒃ᙮ ᑭᑲ ᐊᔮᒻ ᑲᔦ ᐅᔥᑭ ᔔᒥᓈᐳ, ᑫᐅᐱᒥᑌᒥᔦᒃ ᑲᔦ᙮ 15 ᒦᔥ ᒋᐃᔑᒋᑫᔮᓐ ᒋᒪᔥᑯᓰᑳᒃ ᒥᔕᐗᑲᒥᒃ ᑫᒦᒋᐙᒡ ᑭᐱᔑᑮᒥᐙᒃ, ᑮᓇᐙ ᑕᔥ ᒦ ᐃ ᒋᐐᓯᓂᔦᒃ, ᐐᑫ ᒋᑌᐃᓇᒪᒋᐅᔦᒃ᙮ 16 ᐊᔮᒀᒥᓯᒃ ᐃᑕᔥ, ᒫᑭᔖ ᑭᑲ ᑲᔥᑭᐃᑰᒻ ᒋᑴᑭᒋᑫᔦᒃ, ᒋᐊᓂᒥᑯᑖᔦᒃ ᒋᐊᓇᒥᐁᑕᐌᒀ ᑯᑕᒃ ᒪᓂᑑᒃ᙮ 17 ᑮᔥᐱᓐ ᐃᑕᔥ ᐐᓐ ᐃᐃ ᐃᔑᒋᑫᔦᒃ, ᑳᑎᐯᒋᑫᒡ ᓴ ᑭᑲ ᓂᔥᑭᐋᐙ᙮ ᑕᐃᔑᒋᑫ ᑕᔥ ᒋᑭᒥᐗᓯᓂᓂᒃ᙮ ᐃᓇᔥᑫ ᑭᒥᐗᓯᓄᒃ, ᑳᐐᓐ ᓴ ᑫᑰᓐ ᒥᑕᑲᒥᒃ ᑕᓂᑖᐎᑭᓯᓅᓐ; ᐋᐱᒋ ᑕᔥ ᐐᐸ ᑭᑲ ᐅᒋ ᑲᑲᐗᔅᑲᑌᒻ ᐃᐃᒫ ᓴᓭᑳ ᐊᑮᕽ ᑳᑎᐯᒋᑫᒡ ᑳᒦᓂᓀᒃ᙮ 18 ᐊᔩᑕᑑᒃ ᐃᑕᔥ ᐅᓄ ᓂᑎᑭᑐᐎᓇᓐ ᑭᑌᐃᐙᕽ, ᑭᓈᓈᑲᑕᐌᑕᒧᐎᓂᐙᕽ ᑲᔦ; ᑭᓂᒌᐙᕽ ᐃᔑᐊᑾᐱᑑᒃ, ᑭᔅᑲᑎᑯᐙᕽ ᐃᑕᔥ ᑲᔦ ᐃᔑ ᑭᑭᔥᑲᒧᒃ ᑫᐅᒋ ᑭᑭᓇᐙᒋ ᒫᒥᑲᐎᔦᒃ᙮ 19 ᒦᑕᔥ ᐅᐅ ᑫᔑ ᑭᑭᓄᐊᒪᐌᒀ ᑭᓃᒑᓂᓯᐙᒃ᙮ ᑭᑲ ᑲᓅᓈᐙᒃ ᓴ ᑭᑖᐎᓂᐙᕽ ᓇᓇᒪᑕᐱᔦᒃ, ᐱᒧᓭᔦᒃ ᑲᔦ ᒦᑲᓈᕽ, ᐱᒥᔑᓀᒃ ᑲᔦ, ᐊᐲ ᑲᔦ ᐗᓂᔥᑳᔦᒃ᙮ 20 ᑭᐙᑳᐃᑲᓂᐙᕽ ᐃᑕᔥ ᑲᔦ ᐁᔑᐊᔮᑭᓐ ᐃᔥᒀᑌᒫᑎᑰᓐ, ᑭᒣᓂᑲᓂᔥᒀᑌᒥᐙᕽ ᑲᔦ ᑭᑲ ᐃᔑ ᐅᔑᐲᐋᒻ ᓂᑎᑭᑐᐎᓇᓐ᙮ 21 ᑭᓉᔥ ᐃᑕᔥ ᑭᑲ ᐱᒫᑎᓯᒻ, ᑭᓃᒑᓂᓯᐙᒃ ᑲᔦ ᑭᓉᔥ ᑕᐱᒫᑎᓯᐗᒃ ᐃᐃᒫ ᐊᑮᕽ ᑳᑎᐯᒋᑫᒡ ᑳᑮ ᐊᔩᒋ ᐊᔓᑕᒪᐙᒡ ᑭᑫᑌᔭᐋᒥᐙᐸᓃᐞ ᐁᐐ ᒦᓈᒡ ᒋᑎᐱᓇᐌᐎᓯᓂᒡ ᒥᓂᒃ ᐃᑯ ᑫᐊᔮᓂᒃ ᑮᔑᒃ ᐃᔥᐱᒥᕽ ᐊᑮᕽ᙮ 22 ᑮᔥᐱᓐ ᐃᑕᔥ ᐌᐌᓂ ᐃᔑᒋᑫᔦᒃ ᐅᓄ ᑲᑭᓇ ᐅᓇᔓᐌᐎᓇᓐ ᑳᐊᓅᓂᓇᑰᒃ ᒋᐃᔑᒋᑫᔦᒃ ᒋᓵᑭᐁᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᒋᐃᔑ ᐱᒧᓭᐌᒃ ᒥᓯᐌ ᐁᔑᑣᒡ, ᒋᐴᓂ ᑌᐺᔦᓂᒫᓯᐌᒃ ᑲᔦ᙮ 23 ᒦᔥ ᐃᐃ ᑳᑎᐯᒋᑫᒡ ᒋᓵᑭᑖᒪᐙᒡ ᑲᑭᓇ ᐅᐅ ᑳᐹᐸᑳᓉᐙᓇᑭᓯᓂᒡ ᐯᒫᑎᓯᓂᒡ ᑫᐊᓂ ᐃᔖᐌᒃ, ᒋᒪᑲᒣᒀ ᐃᑭ ᐯᒫᑎᓯᐙᒡ ᓇᐗᒡ ᑳᐹᑏᓄᐙᒡ, ᓇᐗᒡ ᑲᔦ ᒣᔥᑲᐌᑖᑯᓯᐙᒡ ᐊᐲᒡ ᑮᓇᐙ᙮ 24 ᐋᓃᑎ ᓴ ᑯ ᑫᔑ ᑕᑯᑮᔦᒃ, ᒦ ᓴ ᐃ ᑫᑎᐱᓇᐌᐎᓯᔦᒃ; ᐃᐃ ᑫᑎᐱᓇᐌᐎᓯᔦᒃ ᐌᑎ ᑕᐊᑯᓭ ᐱᑾᑕᑲᒥᑯᕽ ᐲᓂᔥ ᐌᑎ ᓬᐁᐸᓇᓐ Lebanon ᐊᑮᕽ, ᐲᓂᔥ ᐃᑕᔥ ᐌᑎ ᐃᔫᐸᕒᐁᑏᔅ Euphrates ᓰᐱᕽ, ᐲᓂᔥ ᐌᑎ ᑭᒋᑲᒦᕽ ᓂᑳᐲᐊᓄᕽ ᐃᓇᑫ᙮ 25 ᑳᐐᓐ ᓴ ᐊᐎᔭ ᑭᑲ ᔖᑰᒋᐃᑯᓰᐙ; ᑳᑮ ᐃᔑ ᐊᔓᑕᒪᐎᓀᒃ ᓴ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑕᐃᔑᒋᑫ ᐋᓃᑎ ᐱᑯ ᑫᐃᔖᔦᒃ ᒋᐃᔑᐋᒡ ᒋᑯᓯᒥᓀᒃ ᐃᐃ ᐯᒫᑎᓯᓂᒡ ᒥᓯᐌ ᐃᐃᒫ ᐊᑮᕽ ᐁᔮᓂᒡ᙮ 26 ᓅᑯᒻ ᐃᑕᔥ ᑳᑮᔑᑲᒃ ᑭᐸᑭᑎᓇᒪᐎᓂᓂᒻ ᒋᐅᓀᑕᒣᒃ ᐌᑯᓀᓐ ᐁᑕᐌᑕᒣᒃ, ᑯᒫ ᒋᔕᐌᑖᑯᓯᔦᒃ, ᑯᒫ ᑲᔦ ᒋᒪᒐᑭᒥᑰᔦᒃ᙮ 27 ᑭᑲ ᔕᐌᑖᑯᓯᒻ ᐃᓴ ᑕᔥ ᑮᔥᐱᓐ ᓇᐃᑕᒧᐌᒃ ᐅᑑᓇᔓᐌᐎᓇᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᒦᓂᓇᑰᒃ ᓅᑯᒻ ᑳᑮᔑᑲᒃ᙮ 28 ᑭᑲ ᒪᒐᑭᒥᑰᒻ ᐃᑕᔥ ᐐᓐ ᑮᔥᐱᓐ ᓇᐃᑕᒧᐙᓯᐌᒃ ᐅᑑᓇᔓᐌᐎᓇᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᓇᑲᑕᒣᒃ ᓅᑯᒻ ᑳᑮᔑᑲᒃ ᑳᐃᓂᓇᑰᒃ ᒋᐃᔑᒋᑫᔦᒃ, ᐃᔑ ᐱᒥᓂᔕᐌᒀ ᑕᔥ ᑯᑕᒃ ᒪᓂᑑᒃ ᑳᑮ ᑭᑫᓂᒫᓯᐌᒀ᙮ 29 ᐊᐲ ᑕᔥ ᐊᓂ ᐃᔑᓭᓂᒃ ᑳᑎᐯᒋᑫᒡ ᐃᔑᐎᓂᓀᒃ ᐃᐃᒫ ᐊᑮᕽ, ᐊᓂ ᐲᑎᑫᔥᑳᔦᒃ ᐃᑕᔥ ᐁᐐ ᑎᐱᓇᐌᐎᓯᔦᒃ, ᐃᐃ ᓴ ᑕᔥ ᔕᐌᑖᑯᓯᐎᓐ ᐃᐃᒫ ᐗᒌᕽ ᑮᕒᐋᐃᓯᒻ Gerizim ᐁᒋᑳᑌᒃ ᑭᑲ ᐃᔑ ᐐᑖᒻ, ᐃᐃ ᑕᔥ ᐐᓐ ᒪᒐᑭᒥᑰᐎᓐ ᐃᐃᒫ ᐄᐸᓬ Ebal ᐗᒌᕽ ᑭᑲ ᐃᔑ ᐐᑖᒻ᙮ 30 ᐃᓂ ᓴ ᐗᒌᓐ ᐊᑳᒥᕽ ᒞᕒᑕᓐ Jordan ᓰᐱᕽ ᐃᔑᐊᔮᐗᓐ, ᐌᑎ ᓇᑫ ᑳᔑ ᐸᑭᔑᒧᒡ ᑮᓯᔅ, ᐁᔑᐊᔮᐙᒡ ᑫᓇᓐ ᑳᑎᓄᐎᐙᒡ Canaanites᙮ ᒦᐗᒃ ᐄᑐᒃ ᐃᑭ ᑳᐃᔑᑖᐙᒡ ᐊᔮᐎᓂᕽ ᐋᕒᐊᐸ Arabah ᒌᑲᔭᐄ ᐁᔑᐊᔮᓂᒡ ᑫᑌᑖᑯᓯᓂᒡ ᒥᑎᑰᐞ ᒨᕒᐁ Moreh ᐁᒋᑳᑌᓂᒃ, ᓇᐹᒋᓇᑫ ᐁᔑᐊᔮᓂᒃ ᑭᓬᑲᓬ Gilgal ᐊᔮᐎᓐ᙮ 31 ᒦᑕᔥ ᐃᐃ ᐋᔕ ᐁᐐ ᐋᔕᐎᔥᑳᔦᒃ ᐃᐃ ᒞᕒᑕᓐ ᓰᐱ ᒋᑎᐱᓇᐌᐎᓯᔦᒃ ᐃᐃ ᐊᑭ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᒦᓂᓀᒃ᙮ ᑮᓇᐙ ᑕᔥ ᐃᑯ ᑭᑲ ᑎᐱᓇᐌᐎᓯᒻ, ᒋᐃᔑᑖᔦᒃ ᐃᐃᒫ᙮ 32 ᐋᐱᒋ ᑕᔥ ᑭᑲ ᐊᔮᒀᒥᓯᒻ ᒋᓇᐃᑕᒣᒃ ᑲᑭᓇ ᐃᑭᑐᐎᓇᓐ, ᐃᓈᑯᓂᑫᐎᓇᓐ ᑲᔦ ᓅᑯᒻ ᑳᑮᔑᑲᒃ ᑳᐐᑕᒪᐎᓇᑰᒃ, ᒨᓯᔅ ᐅᑮ ᐃᓈᐞ ᐯᒫᑎᓯᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society