Coowel 3 - ᐅᒋᐺ ᑭᒋᒪᓯᓇᐃᑲᓐᑭᔐᒪᓂᑑ ᒋᑎᐹᑯᓈᒡ ᑲᑭᓇ ᐯᒫᑎᓯᓂᒡ 1 ᒦᔥ ᐁᑭᑐᒡ ᑳᑎᐯᒋᑫᒡ, ᐃᐃ ᑕᔥ ᐊᐲ ᑮᔑᑲᒃ, ᒦ ᓴ ᐃ ᒋᑮᐌ ᓈᐸᑑᔮᓐ ᐁᔑ ᒥᓄᓭᑭᐸᓐ ᒎᑕ Judah ᐊᑭ, ᐃᐃ ᑲᔦ ᑭᒋ ᐆᑌᓇ ᒉᕒᐆᓴᓬᐊᒻ Jerusalem᙮ 2 ᒦᑕᔥ ᒋᒫᐗᑑᓇᒀ ᑲᑭᓇ ᑳᑕᓶᐙᓇᑭᓯᐙᒡ ᐯᒫᑎᓯᐙᒡ ᒋᐲᓇᒀ ᐃᐃᒫ ᒉᐆᔕᐹᑦ Jehoshaphat ᐸᓴᑎᓈᕽ᙮ ᒦᔥ ᐃᐃᒫ ᑫᐃᔑ ᑎᐹᑯᓇᒀ ᐋᓃᓐ ᑳᑮ ᑑᑕᐙᐙᒡ ᑌᐱᓇᐌᐎᓰᒥᒪᒃ ᓂᐱᒫᑎᓰᒪᐞ ᐃᔅᕒᐃᔭᓬᐊᐞ᙮ ᐅᑮ ᐅᓶᔮᒧᑮᓈᐙᐞ ᐄᑐᒃ ᓂᐱᒫᑎᓰᒪᐞ ᐁᔑ ᐊᔭᔮᓂᒡ ᐸᑳᓉᐙᓐ ᐯᒫᑎᓯᓂᒡ, ᐁᑮ ᓀᓈᐎᓇᒧᐙᒡ ᐃᔅᕒᐃᔭᓬᐊᑭ ᓂᑕᑮᒥᓂ᙮ 3 ᒦᔥ ᑳᑮ ᐊᐸᑭᒋᑫᐙᒡ ᑫᐅᒋ ᑭᑫᑕᒧᐙᒡ ᐋᓃᓐ ᑫᑑᑕᐙᐙᒡ ᓂᐱᒫᑎᓰᒪᐞ᙮ ᐅᑮ ᐊᑖᐙᑫᓈᐙᐞ ᑸᐎᓭᓴᐞ, ᐃᑴᓭᓴᐞ ᑲᔦ ᒋᒥᑕᓄᑮᐃᒥᓐᒡ ᒣᔥᑾᒡ ᒋᒦᓂᑣ ᐱᔑᒀᒋᑴᐗᐞ, ᔔᒥᓈᐴᓂ ᑲᔦ᙮ 4 ᐋᓃᓐ ᐃᑕᔥ ᐃᓈ ᑫᑴ ᑑᑕᐎᔦᒃ ᑕᔭᕒ Tyre ᐆᑌᓈᕽ ᐁᔮᔦᒃ, ᓵᐃᑕᓐ Sidon ᐆᑌᓈᕽ ᑲᔦ, ᐱᓬᐃᔅᑎᔭ Philistia ᐊᑮᕽ ᑲᔦ ᐁᔮᔦᒃ? ᑫᑰᓐ ᐃᓇ ᑭᑲᑴ ᑮᐌ ᑎᐸᐊᒪᐎᒻ? ᑮᔥᐱᓐ ᐃᑕᔥ ᐃᐃ ᐁᔑᒋᑫᐌᑴᓐ, ᐋᐱᒋ ᓴ ᓂᑲ ᑭᑖᑕᐲ ᓃᓐ ᒋᑮᐌ ᑎᐸᐊᒪᐎᓇᑰᒃ! 5 ᑭᑮ ᒫᒌᓈᐙ ᐄᑐᒃ ᓂᐙᐹᐱᑯ ᔔᓂᔮᒻ, ᓂᑑᓵᐎ ᔔᓂᔮᒻ ᑲᔦ, ᑭᑮ ᒫᒌᑑᒻ ᑳᑎᐱᓇᐌᐎᓯᔮᓐ ᐌᓅᒋ ᑫᑰᓇᓐ ᐁᑮ ᐃᔑᐎᑑᔦᒃ ᑭᑕᓇᒥᐁᐎᑲᒥᑯᐙᕽ᙮ 6 ᑭᑮ ᐊᑖᐙᑫᒻ ᑲᔦ ᐯᒫᑎᓯᐙᒡ ᒎᑕ ᐊᑮᕽ ᐌᒌᐙᒡ, ᒉᕒᐆᓴᓬᐊᒻ ᑲᔦ ᐌᒌᐙᒡ ᑲᕒᐄᑲᒃ Greeks ᐁᑮ ᐊᑖᒥᓀᒀ᙮ ᒦᔥ ᑳᑮ ᐅᒋ ᐃᔑᒋᑫᔦᒃ ᐯᔓ ᒋᐊᔮᓯᒀ ᐅᑕᑮᒥᐙᕽ᙮ 7 ᒦᔥ ᐙᐃᔑᒋᑫᔮᓐ ᐁᐐ ᐅᒋ ᐲᓇᒀ ᐋᓃᑎ ᑳᑮ ᐃᔑ ᐊᑖᐙᑫᔦᑭᐸᓐ, ᐁᐐ ᑮᐌ ᑎᐸᐊᒪᐎᓇᑰᒃ ᐋᓃᓐ ᑳᑮ ᑑᑕᐌᒀᐸᓐ᙮ 8 ᓂᑲ ᐃᔑ ᐊᑖᐙᑫᓇᒃ ᐃᑕᔥ ᑭᑯᓯᓯᐙᒃ, ᑭᑖᓂᓯᐙᒃ ᑲᔦ ᐁᔑᐊᔮᓂᒡ ᐯᒫᑎᓯᓂᒡ ᒎᑕ ᐊᑮᕽ ᐌᒌᓂᒡ᙮ ᒦᑕᔥ ᒎᑕ ᐌᒌᓂᒡ ᑫᓂᔑ ᐋᓂᑫ ᐊᑖᐙᑳᓂᑯᐙᒡ ᐁᔑᐊᔮᓂᒡ ᓭᐲᔭᓐ Sabeans ᐁᓂᒥᓐᒡ ᐙᓴ ᐊᑮᕽ ᐁᔮᓂᒡ᙮ ᓃᓐ ᑳᑎᐯᒋᑫᔮᓐ ᐅᔕ ᐅᐅ ᑳᐃᑭᑐᔮᓐ᙮ 9 ᒦ ᓴ ᐅᐌ ᐸᐹ ᐐᑕᒫᑫᒃ ᒣᑴᔭᐄ ᐁᔑᐊᔮᐙᒡ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ: ᐅᔒᑖᒃ ᒋᐐ ᒦᑳᓱᔦᒃ! ᐊᒪᒋᐃᑯᒃ ᑳᓲᑫᑖᑯᓯᐙᒡ ᐃᓂᓂᐗᒃ᙮ ᑕᑲ ᑲᑭᓇ ᒦᑳᓱᐎᓂᓂᐗᒃ ᑕᐲᔖᐗᒃ ᒋᐁᐯᒦᐙᒡ ᒋᒪᐎᓀᐃᑫᐙᒡ᙮ 10 ᐸᔑᐸᐃᑫᐎᑯᒫᓂᕽ ᓴ ᐃᓈᐱᑲᑲᓈᑕᒧᒃ ᑭᐲᑾᑲᒥᑭᐱᒋᑲᓂᐙᓐ, ᒌᐳᐌᐱᓂᑲᓂᕽ ᑲᔦ ᐃᓈᐱᑲᑲᓈᑕᒧᒃ ᑭᑭᑎᑳᓂ ᒨᔣᑲᓂᐙᓐ᙮ ᑕᑲ ᒣᒉᑖᑯᓯᐙᒡ ᑕᐃᑭᑐᐗᒃ ᐁᓲᑫᑖᑯᓯᐙᒡ᙮ 11 ᐌᔩᑉ ᐲᔖᒃ, ᑲᑭᓇ ᑮᓇᐙ ᐙᑳᔭᐄ ᐁᔮᔦᒃ ᑳᐯᐸᑳᓉᐙᓇᑭᓯᔦᒃ, ᐅᑯ ᐲᔖᒃ ᑳᔑ ᐸᓴᑎᓈᒃ᙮ ᑮᓐ ᑌᐯᒋᑫᔭᓐ, ᑕᑲ ᐃᔑᓂᔕᐅ ᑭᔑᒫᑲᓂᔒᒪᒃ ᑳᓲᑫᑖᑯᓯᐙᒡ᙮ 12 ᒦᔥ ᐁᔑᓈᑾᓂᓂᒃ ᑳᑕᓶᐙᓇᑭᓯᐙᒡ ᐯᒫᑎᓯᐙᒡ ᑕᑾᔮᒌᐗᒃ ᒋᐲᔖᐙᒡ ᒉᐆᔕᐹᑦ Jehoshaphat ᐸᓴᑎᓈᕽ ᑫᔑ ᑎᐹᑯᓂᑎᐎᓐᒡ, ᒦᔥ ᐌᑎ ᑫᔑ ᓇᒪᑕᐱᔮᓐ ᒋᑎᐹᑯᓇᒀ ᑲᑭᓇ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᒥᓯᐌ ᐙᑳᔭᐄ ᐁᔮᐙᒡ᙮ 13 ᐁᑕᑕᐌ ᐹᑏᓇᑎᓂᓂᐗᓐ ᐅᒪᒋᐃᔑᐌᐱᓯᐎᓂᐙᓐ, ᑲᐎᔓ ᑖᐱᔥᑰ ᐸᑴᔑᑲᓂᒥᓇᓐ ᑳᑭᔥᑭᔑᑳᑌᑭᓐ, ᔑᑯᔥᑲᐤ ᑖᐱᔥᑰ ᔔᒥᓇᒃ ᑳᔑ ᔑᑯᔥᑲᐎᑣ᙮ ᐁᒨᔥᑭᓀᐙᒡ ᑳᔑ ᒫᒫᑯᔥᑲᐎᑣ ᐁᐋᒥᐲᐙᒡ ᐊᑑᐹᓂᕽ, ᐁᑕᑕᐌ ᐅᔕ ᐹᑏᓇᑎᓂᓂᐗᓐ ᐅᒪᒋᐃᔑᐌᐱᓯᐎᓂᐙᓐ᙮ 14 ᐁᑕᑕᐌ ᐅᔕ ᑕᑭᒋ ᐹᑏᓄᐗᒃ ᐯᒫᑎᓯᐙᒡ ᐁᐊᔮᐙᒡ ᐸᓴᑎᓈᕽ ᐅᓀᑕᒧᐎᓂᕽ ᐁᒋᑳᑌᓂᒃ᙮ ᒦ ᓴ ᐌᑎ ᑳᑎᐯᒋᑫᒡ ᐅᑮᔑᑲᓄᒻ ᐋᔕ ᑫᑳ ᑳᐐ ᐃᔑ ᑮᔑᑲᓂᓂᒃ᙮ 15 ᑮᓯᔅ, ᑎᐱᑭᑮᓯᔅ ᑲᔦ ᑕᓂ ᑲᔥᑮᑎᐱᑭᓯᐗᒃ, ᐗᓇᑯᔕᒃ ᑲᔦ ᑳᐐᓐ ᑕᓵᑳᓯᑫᓰᐗᒃ ᐃᐃ ᐊᐲ᙮ ᑭᔐᒪᓂᑑ ᒋᔕᐌᓂᒫᒡ ᐅᐱᒫᑎᓰᒪᐞ 16 ᑳᑎᐯᒋᑫᒡ ᐃᓴ ᓵᔭᓂᕽ ᑕᔑ ᑯᑖᓂᑖᑯᓯ, ᒉᕒᐆᓴᓬᐊᒥᕽ ᐁᑕᔑ ᐱᓀᓰᐎᑖᑯᓯᒡ, ᒦᔥ ᐊᑭ, ᑮᔑᒃ ᑲᔦ ᐁᔑ ᓂᓂᑭᓭᓂᒃ᙮ ᐐᓐ ᐃᑕᔥ ᐃᑯ ᐅᑲ ᐋᑲᐎᔥᑲᐙᐞ ᐅᐱᒫᑎᓰᒪᐞ ᒋᓈᑕᒪᐙᒡ᙮ 17 ᒦᑕᔥ ᒋᑭᑫᑕᒣᒃ ᓃᓐ ᑌᐯᒋᑫᔮᓐ ᐁᑭᔐᒪᓂᑑᐎᔮᓐ, ᐁᐃᔑᑖᔮᓐ ᓵᔭᓂᕽ, ᓂᐗᒌᒥᕽ ᑳᔑ ᑎᐱᓇᐌᐎᓯᔮᓐ ᐁᑕᓀᑖᑯᓯᔮᓐ᙮ ᒉᕒᐆᓴᓬᐊᒻ ᐆᑌᓇ ᓴ ᑕᑭᑌᒋᑳᑌ ᓃᓐ ᐁᑎᐱᓇᐌᐎᓯᔮᓐ; ᑳᐐᓐ ᒦᓇᐙ ᐐᑳ ᒣᔭᑭᓯᐙᒡ ᐅᑲ ᔖᑰᒋᑑᓰᓈᐙ᙮ 18 ᒦᑕᔥ ᐃᐃ ᐊᐲ ᑭᒋ ᐗᒌᑳᕽ ᐅᔥᑭ ᔔᒥᓈᐳ ᒋᐅᒋᒋᐗᕽ, ᒎᒎᔖᐳ ᑲᔦ ᐁᔑ ᐸᐲᑾᑎᓈᒃ ᒋᐊᔪᒋᒋᐗᕽ᙮ ᒥᓯᐌ ᓴ ᑳᔑ ᐸᐸᓴᑎᓈᒃ ᑕᔑ ᐸᐱᒥᒋᐗᓐ ᓂᐱ ᒎᑕ ᐊᑮᕽ᙮ ᐃᐃ ᓴ ᓂᐱ ᑫᐱᒥᒋᐗᕽ ᑕᐅᒋᒋᐗᓐ ᑳᑎᐯᒋᑫᒡ ᐅᑕᓇᒥᐁᐎᑲᒥᑯᕽ ᒋᒨᔥᑭᓀᐲᒃ ᐸᓴᑎᓈ ᐊᑫᔕ ᐁᒋᑳᑌᒃ᙮ 19 ᐃᐃ ᑕᔥ ᐐᓐ ᐄᒋᐸᑭ ᐱᑾᑕᑲᒥᑯᕽ ᑕᓂ ᐃᓀᑖᑾᓐ, ᐄᑕᒻ ᐊᑭ ᑲᔦ ᑕᓂ ᒪᔕᔥᒀ, ᐅᓵᒻ ᐋᓃᔥ ᑳᐐᓐ ᐅᑮ ᒪᓈᒋᐋᓯᐙᐙᐞ ᒎᑕ ᐊᑮᕽ ᐌᒌᓂᒡ, ᐁᑮ ᓂᓵᐙᒡ ᑫᑰᓐ ᐁᓀᑖᑯᓯᓯᓂᒃ᙮ 20-21 ᓃᓐ ᓴ ᓂᑲ ᓇᐊᒋᑫᑕᒪᐙᒃ ᑳᑮ ᓂᓯᑣ; ᑳᐐᓐ ᓂᑲ ᒪᓈᒋᐋᓰᒃ ᐃᑭ ᑫᑰᓐ ᑳᔑ ᐊᓈᒣᑖᑯᓯᐙᒡ᙮ ᐃᐃ ᑕᔥ ᐐᓐ ᒎᑕ ᐊᑭ, ᐃᐃ ᑲᔦ ᒉᕒᐆᓴᓬᐊᒻ ᑭᒋ ᐆᑌᓇ ᓀᐱᒡ ᐃᑯ ᑕᓂ ᑖᓄᑌᐗᓐ, ᓃᓐ ᑳᑎᐯᒋᑫᔮᓐ ᐃᑕᔥ ᓂᑲ ᐃᔑᑖ ᐗᒌᕽ ᓵᔭᓂᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society