Coop 42 - ᐅᒋᐺ ᑭᒋᒪᓯᓇᐃᑲᓐᒎᑉ ᑮᐋᑌᑕᕽ 1 ᒎᑉ Job ᑕᔥ ᐅᑮ ᐃᔑ ᓇᑴᑕᐙᓐ ᑳᑎᐯᒋᑫᓂᒡ, 2 ᑌᐯᒋᑫᔭᓐ, ᓂᑭᑫᑖᓐ ᐅᔕ ᑲᑭᓇ ᑫᑰᓐ ᐁᑲᔥᑭᑑᔭᓐ ᒋᐃᔑᒋᑫᔭᓐ᙮ ᐃᐃ ᑲᔦ ᑳᐐ ᐃᔑᒋᑫᔭᓐ ᑳᐐᓐ ᐊᐎᔭ ᐅᑖ ᑲᔥᑭᑑᓰᓐ ᒋᑭᐱᑎᓂᑭᐸᓐ᙮ 3 ᑭᑎᔑ ᑲᑴᒋᒥᔥ ᐃᑕᔥ ᐌᑯᓀᓐ ᐌᒋ ᑲᔥᑭᑌᐁᔮᓐ ᒋᐊᑕ ᐋᓉᑕᒫᓐ ᐃᐃ ᑮᓐ ᑳᔑ ᑲᑮᑖᐌᑕᒪᓐ, ᓃᓐ ᐃᑕᔥ ᐐᓐ ᐁᐊᔦᔖᐙᑎᓯᓯᐙᓐ᙮ ᓂᑮ ᑕᔑᑖᓇᓐ ᓴ ᐃᓂ ᑫᑰᓇᓐ ᑳᓂᓯᑐᑕᓯᐙᓐ, ᑫᑰᓇᓐ ᑳᒫᒪᑳᑌᑖᑾᑭᓐ ᓃᓐ ᑳᑭᑫᑕᓯᐙᓐ᙮ 4 ᑭᑮ ᑲᓅᔥ ᐄᑐᒃ ᒋᐱᓯᑕᐎᓈᓐ ᒣᒀ ᑮᓐ ᐁᑮᑭᑐᔭᓐ, ᒋᓇᑴᑕᐎᓈᓐ ᑕᔥ ᑲᔦ ᑭᑮ ᐃᔑ ᑲᓅᓂᔥ᙮ 5 ᐅᑖᓈᕽ ᓴ ᐐᓐ, ᑯᑕᒃ ᐁᑕ ᑳᑮ ᐐᑕᒪᐎᐙᒡ ᑫᑰᓂᓂ ᑳᑮ ᐅᒋ ᑭᑫᓂᒥᓈᓐ, ᓅᑯᒻ ᑕᔥ ᐐᓐ ᓂᔥᑮᔑᑯᕽ ᐃᑯ ᑭᑑᒋ ᐙᐸᒥᓐ᙮ 6 ᐁᑕᑕᐌ ᑕᔥ ᓂᒣᓂᔐᑕᒻ ᐃᐃ ᑲᔦ ᑳᑮ ᐃᑭᑐᔮᓐ᙮ ᒦᑕᔥ ᐃᐃ ᑳᐅᒋ ᓇᒪᑕᐱᔮᓐ ᑳᔑ ᐹᔥᑭᓀᓭᒃ, ᐃᐃᒫ ᑲᔦ ᐊᑲᑲᔐᕽ ᐁᑮ ᐋᑌᑕᒫᓐ᙮ ᐁᑕᔑᑌᓂᒃ ᐋᓃᓐ ᒎᑉ ᑳᑮᐃᔑᑮᐌᒥᓄᓭᐃᑯᒡ ᑳᑎᐯᒋᑫᓂᒡ 7 ᑳᑎᐯᒋᑫᒡ ᑕᔥ ᑳᐃᔥᒀᐃᓈᒡ ᐅᐅ ᒎᐸᓐ, ᒦᔥ ᑳᐃᔑ ᑲᓅᓈᒡ ᐃᓂ ᐁᓬᐃᐹᓴᓐ Eliphaz ᐁᑮᐃᓈᒡ, ᐁᑕᑕᐌ ᑭᓂᔥᑭᐃᔥ, ᐃᑭ ᑲᔦ ᓃᔑᓐ ᑳᐐᒌᐎᒀ, ᐋᓃᔥ ᑳᐐᓐ ᑾᔭᒃ ᑭᑎᓈᒋᒥᓰᒻ ᑖᐱᔥᑰ ᐐᓐ ᒎᑉ ᓂᑕᓄᑮᐋᑲᓐ ᑾᔭᒃ ᑳᔑ ᐃᓈᒋᒥᒡ᙮ 8 ᓅᑯᒻ ᑕᔥ ᒫᒌᓂᑾᒃ ᓃᔣᓱ 7 ᐋᐯ ᐱᔑᑮᓴᒃ, ᓃᔣᓱ 7 ᑲᔦ ᐋᐯ ᒫᓇᒑᓂᔕᒃ, ᒋᐃᔑᐎᑕᐌᒃ ᓂᑕᓄᑮᐋᑲᓐ ᒎᑉ, ᒦᑕᔥ ᐃᑭ ᑫᐋᐸᒋᐁᒀ ᒋᐸᑭᑎᓈᓲᑕᒫᓱᔦᒃ᙮ ᒎᑉ ᓂᑕᓄᑮᐋᑲᓐ ᑕᔥ ᑭᑲ ᐊᓇᒥᐁᑕᒫᑯᐙ᙮ ᐐᓐ ᐄᑐᒃ ᐁᑕ ᓂᑲ ᓅᑕᒧᐙᓐ ᑫᔑ ᐊᓇᒥᐁᑕᐎᒡ, ᑳᐐᓐ ᑕᔥ ᑭᑲ ᑑᑕᐎᓯᓅᓂᓂᒻ ᑳᔑ ᑲᔥᑭᑕᒫᓱᔦᒃ ᐃᐃ ᐅᒋ ᑳᑮ ᐃᔑ ᑲᑮᐹᒋᒋᑫᔦᒃ᙮ ᑳᐐᓐ ᓴ ᑾᔭᒃ ᑌᐺ ᑭᑮ ᐃᓈᒋᒥᓰᒻ ᑖᐱᔥᑰ ᐐᓐ ᐗᐊ ᓂᑕᓄᑮᐋᑲᓐ ᒎᑉ ᑳᑮ ᐃᓈᒋᒥᒡ᙮ 9 ᒦᑕᔥ ᐁᓬᐃᐹᔅ, ᐱᓬᑖᑦ Bildad ᐊᐊ ᑲᔦ ᓲᐸᕒ Zophar ᐁᔑᓂᑳᓱᐙᒡ ᑳᐃᔑᒋᑫᐙᒡ ᑳᑮᐃᑯᐙᒡ ᑳᑎᐯᒋᑫᓂᒡ᙮ ᑳᑎᐯᒋᑫᒡ ᑕᔥ ᐅᑮ ᓅᑕᐙᓐ ᒎᐸᓐ ᑳᑮ ᐃᔑ ᐊᓇᒥᐁᑖᑯᒡ᙮ 10 ᒎᑉ ᑕᔥ ᑳᐃᔥᒀ ᐊᓇᒥᐁᑕᒪᐙᒡ ᐅᓵᑭ ᐐᒌᐙᑲᓇᐞ, ᒦᔥ ᑳᑎᐯᒋᑫᓂᒡ ᑳᐃᔑ ᑮᐌ ᒥᓄᓭᐃᑯᒡ᙮ ᓃᔑᕽ ᓴ ᒥᓂᒃ ᑮᐊᐲᒋ ᐌᓅᑎᓯ ᐊᐲᒡ ᐐᓐ ᐅᑖᓈᕽ ᑳᑮ ᐊᐲᒋ ᐌᓅᑎᓯᐸᓐ᙮ 11 ᑲᑭᓇ ᑕᔥ ᐐᒋᑭᐌᔭᐞ, ᐅᑕᐌᒫᐞ ᑲᔦ, ᑲᑭᓇ ᑲᔦ ᐅᑖᓈᕽ ᑳᑮ ᑭᑫᓂᒥᑯᒡ ᐅᑮ ᐱᐊᑕ ᐙᐸᒥᑰᐞ ᐁᑮ ᐐᒋ ᐐᓯᓃᒥᑯᒡ ᐅᑖᐎᓂᕽ᙮ ᒦᑕᔥ ᑳᑑᑖᑯᒡ ᐁᑮ ᑲᑴ ᐐᒋᐃᑯᒡ, ᐁᑮ ᑲᑴ ᒥᓉᑕᒧᐃᑯᒡ ᑲᔦ ᐃᐃ ᑲᑭᓇ ᑳᑮ ᐃᔑ ᐗᓯᑖᐎᓭᐃᑯᒡ ᑳᑎᐯᒋᑫᓂᒡ᙮ ᐁᑕᔑᓂᒡ ᑲᔦ ᐅᑮ ᒦᓂᑯᐞ ᔔᓂᔮᓐ, ᐅᓵᐎ ᔔᓂᔮ ᐙᐱᑯᐎ ᓈᐱᓂᒌᐱᓱᓇᐞ ᑲᔦ᙮ 12 ᒦᑕᔥ ᐃᐃ ᐊᑯᓈᒃ ᑳᑎᐯᒋᑫᓂᒡ ᑳᑮ ᒥᓄᓭᐃᑯᒡ, ᐊᐲᒡ ᐐᓐ ᐅᑖᓈᕽ ᑳᑮ ᐊᐲᒋ ᒥᓄᓭᐸᓐ᙮ ᒎᑉ ᓴ ᐅᑮ ᑎᐯᓂᒫᐞ ᒥᑖᔑᓃᐎᕽ ᒥᑖᔂᒃ 14,000 ᒫᓇᒑᓂᔕᐞ, ᓂᑯᑣᒋᕽ ᒥᑖᔂᒃ 6,000 ᐱᒀᐎᑲᓀ ᒥᑕᑎᒨᐞ᙮ ᓃᔑᕽ ᒥᑖᔂᒃ 2,000 ᐱᔑᑭᐗᐞ, ᒥᑖᔂᒃ 1,000 ᑲᔦ ᓅᔐ ᒫᔑᒥᑕᑎᒨᐞ᙮ 13 ᑮᓃᔣᒋᐗᐞ ᐃᑕᔥ ᐅᑯᓯᓴᐞ, ᐅᑖᓂᓴᐞ ᑲᔦ ᑮᓂᓯᐗᐞ᙮ 14 ᓂᑕᒻ ᑕᔥ ᑳᑮ ᓂᑖᐎᑭᓂᒡ ᐅᑖᓂᓴᓐ ᒌᒫᐃᒪ Jemimah ᐅᑮ ᐃᔑᓂᑳᓈᓐ, ᐃᐃᒫᔥ ᐃᑯ ᑳᑮ ᐊᓂ ᐅᒌᓂᒡ ᑫᓵᔭ Keziah ᐅᑮ ᐃᔑᓂᑳᓈᓐ᙮ ᐃᓂ ᑕᔥ ᐃᑯ ᐃᔥᒀᒡ ᑳᑮ ᐊᓂ ᐅᒌᓂᒡ ᑫᕒᐊᓐ ᐊᐸᒃ Keren-Happuch ᐅᑮ ᐃᔑᓂᑳᓈᓐ᙮ 15 ᐃᐃᒫ ᓴ ᒥᓯᐌ ᐊᑮᕽ, ᐅᑖᓂᓴᐞ ᓴ ᒫᐗᒡ ᑮᐅᓂᔑᔑᐗᐞ ᐋᐲᒡ ᐐᓐ ᑯᑕᒃ ᐃᐃ ᐃᑴᐗᐞ᙮ ᒎᑉ ᑲᔦ ᐅᑮ ᒦᓈᐞ ᐅᑖᓂᓴᐞ ᐯᔑᑾᓐ ᒥᓂᒃ ᒋᑎᐱᓇᐌᐎᓯᓂᒡ ᐅᑕᔭᐄᒪᓐ ᑖᐱᔥᑰ ᒥᓂᒃ ᑳᑮ ᐃᔑ ᒦᓈᒡ ᐅᑯᓯᓴᐞ᙮ 16 ᑫᔮᐱ ᑕᔥ ᐅᐅ ᐃᔑ ᐊᐲ ᓂᑯᑣᒃ ᓃᒥᑕᓇ 140 ᑕᓱᐱᐴᓐ ᑮᐊᓂ ᐱᒫᑎᓯ᙮ ᐅᑮᐙᐸᒫᐞ ᓴ ᐅᑯᓯᓴᐞ, ᐆᔑᓴᐞ, ᐅᑖᓂᑰᐱᓴᐞ ᑲᔦ᙮ 17 ᐐᑫ ᓴ ᑮᑭᒋ ᐊᑭᐌᓰᐎ ᑮᐃᔥᒀ ᐱᒫᑎᓯᒡ᙮ ᑮᑌᐃᔑᒋᑫ ᒥᓂᒃ ᑳᑮ ᐃᔑ ᒦᓂᑰᐎᓯᒡ ᐁᑕᓱ ᑮᔑᒃ ᒋᑮ ᐃᔑᒋᑫᐸᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society