Coop 41 - ᐅᒋᐺ ᑭᒋᒪᓯᓇᐃᑲᓐ1 ᑭᑖ ᑳᒋᑎᓈ ᓇ ᑭᒋ ᐅᑳᑏᑭᓀᐱᒃ ᒋᐋᐸᒋᑖᐗᑎᐸᓐ ᒀᔥᑴᐱᒋᑲᓀᔅ, ᒋᑕᑯᐱᑖᐗᑎᐸᓐ ᑲᔦ ᐅᑌᓇᓂᐤ ᔑᓅᑖᑲᓐ ᒋᐋᐸᒋᑖᐗᑎᐸᓐ? 2 ᑭᑖ ᑲᔥᑭᑖᐙᓐ ᐃᓇ ᒋᐸᑯᓀᑕᐊᒧᐗᑎᐸᓐ ᐅᔥᑮᔥ ᑫᑕᓇᐱᓇᑎᐸᓐ ᔑᓅᑖᑲᓐ, ᒋᐸᔑᐊᒪᐗᑎᐸᓐ ᑲᔦ ᐅᑖᒥᑲᓐ ᒀᔥᑴᐱᒋᑲᓐ ᒋᐋᐸᒋᑖᐗᑎᐸᓐ? 3 ᑳᐐᓐ ᐃᓇ ᑕᐸᑭᒌᓰ ᒋᐃᓂᒃ ᒋᑰᐹᑌᓂᒪᒡ? ᐌᐌᓂ ᓇ ᒋᓅᑭ ᑲᑲᓅᓂᒃ? 4 ᑭᑖᐃᒃ ᐃᓇ ᐐᑳ ᐯᔑᑾᓐ ᒋᐃᓀᑕᒣᒃ, ᒋᐃᔑ ᐅᑖᐱᓇᑎᐸᓐ ᓀᐱᒡ ᒋᐊᓄᑮᑕᐎᒃ? 5 ᑭᑖ ᑑᑕᐙ ᓇ ᑖᐱᔥᑰ ᑳᔑ ᐊᐗᑳᓱᒡ ᐱᓀᔒᓐᔥ? ᑭᑖ ᓴᑳᐲᑭᓂᒫᓐ ᐃᓇ ᒋᒦᓇᑣᐸᓐ ᐃᑕᔥ ᑭᑖᓂᓴᒃ? 6 ᐅᑕᑖᐌᒃ ᐃᓇ ᐅᑖ ᒣᔥᑯᑑᓈᐙᓐ? ᑕᓀᓈᐗᐆᓂᑎᐗᒃ ᐃᓇ ᐅᑳᑏᑭᓀᐱᑰᓐ ᐊᑖᐌᐙᒡ᙮ 7 ᑭᑖ ᒨᔥᑭᓀ ᐌᐱᓇᒧᐙᓇᓐ ᐃᓇ ᑳᐸᐸᑫᔮᐱᑲᑭᓐ ᒌᐳᐌᐱᓂᑲᓇᓐ ᐅᐐᔭᐎᕽ, ᑯᒫ ᑲᔦ ᐅᑎᒀᓂᕽ ᑭᓅᔐᐎ ᒌᐳᐌᐱᓂᑲᓇᓐ᙮ 8 ᑮᔥᐱᓐ ᓵᒥᓇᒡ, ᑳᐐᓐ ᒦᓇᐙ ᐐᑳ ᑭᑲ ᑯᒋᑑᓰᓐ, ᑳᐐᓐ ᐋᓃᔥ ᑭᑲ ᐗᓃᑫᓰ ᑳᑮ ᐃᔑ ᒦᑳᑎᔦᑭᐸᓐ᙮ 9 ᐊᓂᔖ ᓴ ᐊᐎᔭ ᐃᓀᑕᒻ ᑮᐃᓀᑕᕽ ᒋᔖᑰᒋᐋᐸᓐ; ᑮᒥᒋ ᐙᐸᒥᓐᒡ ᓴ ᒦ ᐃ ᐁᔑ ᑲᐙᓂᒥᓯᕽ᙮ 10 ᐊᐲ ᓴ ᑮᓂᔥᑭᐃᓐᒡ, ᐐᑫ ᓴ ᑲᒀᓂᓴᑫᑖᑯᓯ; ᐊᐌᓀᓐ ᐃᑕᔥ ᐃᓈ ᑫᑲᔥᑭᑑᐸᓐ ᒋᓃᐸᐎᐸᓐ ᓃᓐ ᐁᔑᐊᔮᔮᓐ? 11 ᐊᐌᓀᔥ ᑫᑰᓐ ᑳᒦᔑᒡ ᑫᑮ ᑮᐌ ᑎᐸᐊᒪᐗᑭᐸᓐ᙮ ᑲᑭᓇ ᐅᔕ ᑫᑰᓐ ᐅᐅᒫ ᐊᑮᕽ ᑳᐊᔮᒪᑲᒃ ᓃᓐ ᓂᑎᐯᑖᓐ᙮ 12 ᐃᓇᔥᑫ ᓂᐐ ᑕᔑᑕᒧᐙᓇᓐ ᐅᑳᑕᓐ, ᐁᐐ ᐐᑕᒪᐎᓇᑰᒃ ᑲᔦ ᐋᓃᓐ ᐁᐲᒋ ᒪᔥᑲᐎᓰᒡ, ᐁᐲᒋ ᒥᓄᓈᑯᓯᒡ ᑲᔦ᙮ 13 ᐊᐌᓀᓐ ᐃᑕᔥ ᐃᓈ ᑫᐱᔕᑭᑯᓇᔦᐱᓂᑯᐸᓐ, ᑫᔕᐎᑕᐊᒥᓂᐸᓐ ᐅᒦᑳᓲᐗᔮᓐ᙮ 14 ᐊᐌᓀᓐ ᐃᓴ ᐃᓈ ᑫᑲᔥᑭᑑᓂᐸᓐ ᒋᐹᑭᑖᒥᑲᓀᐱᓂᑯᐸᓐ? ᐐᐱᑕᓐ ᐙᑳᑭᑌᓂᐗᓐ, ᑲᔦ ᑯᑖᓯᓈᑾᓂᓂᐗᓐ᙮ 15 ᐃᓇᔥᑫ ᐅᐱᑾᓂᕽ ᐅᐗᓇᑲᔭᐞ, ᒦ ᓴ ᐃ ᐁᓀᑖᑯᓯᓂᒡ ᑖᐱᔥᑰ ᓇᑳᐃᑲᓇᓐ ᑳᓃᐱᑌᓯᑭᓐ; ᐐᑫ ᐁᐊᔭᔑᒋᔑᓂᓂᒡ᙮ 16 ᐁᐲᒋ ᓴᑲᑯᔑᓂᓂᒡ ᓴ, ᑳᐐᓐ ᐄᑐᒃ ᑲᓇᑫ ᐃᐃᒫ ᑕᐃᔑᓅᐌᓯᓅᓐ ᓇᓴᐗᔭᐄ᙮ 17 ᐁᐲᒋ ᐊᔮᔩᒋᔑᓂᓂᒡ ᓴ ᐅᐱᑾᓂᕽ, ᑳᐐᓐ ᑲᓇᑫ ᑕᑲᔥᑭᒋᑲᓂᐎᓰᐗᐞ ᒋᐸᑾᒋᐱᓂᒥᓐᒡ᙮ 18 ᑮᐋᔨᓂᒧᓭᒡ ᓴ ᒦ ᐃ ᐁᔑ ᐙᐙᓴᑯᓀᓭᓂᒃ; ᐅᔥᑮᔑᑰᓐ ᑲᔦ ᐁᐃᔑᓈᑾᓂᓂᑭᓐ ᑖᐱᔥᑰ ᑮᓯᔅ ᑳᐱᒨᑲᐊᕽ᙮ 19 ᐅᑑᓂᕽ ᑲᔦ ᐅᒋ ᓵᑭᑕᑯᓀᓭᓂ; ᒦ ᑲᔦᐃᒫ ᐌᒋ ᓵᓵᑭᒋᐸᑭᓀᓂᒃ᙮ 20 ᐅᔥᑭᔒᕽ ᓴ ᐅᒋ ᓵᑭᑖᐸᑌᓂ, ᑖᐱᔥᑰ ᐊᑭᒃ ᑳᐅᓱᒡ ᑳᔑ ᐱᔅᑲᓀᑭᓐ ᒪᔥᑯᓯᐗᓐ᙮ 21 ᑮᐸᑭᑕᓈᒧᒡ ᓴ ᒦ ᐃᒫ ᐌᒋ ᒫᒌᑭᔖᔐᓂᒃ, ᐅᑑᓂᕽ ᓴ ᐅᒋ ᓵᑭᑕᑯᓀᓂ᙮ 22 ᐅᑴᑲᓂᕽ ᓴ ᑕᓀᑖᑾᓂᓂ ᒪᔥᑲᐎᓰᐎᓐ, ᓀᑭᔥᑳᑯᒡ ᓴ ᑲᑭᓇ ᐱᓈᓂᒥᓯᐗᐞ᙮ 23 ᐁᔑ ᐊᔮᑸᑕᐎᔕᑫᒡ ᓴ ᐐᑫ ᐊᔩᒋ ᐊᔮᓂ, ᐋᐱᒋ ᐁᒪᔥᑲᐗᔕᑫᒡ, ᑳᐐᓐ ᐗᑲᐎᓭᓯᓂᓂ᙮ 24 ᐅᑌᐞ ᓴ ᑲᔦ ᐊᓯᓃᕽ ᐊᐲᒋ ᒪᔥᑲᐙᓂ, ᑳᐊᐲᒋ ᒪᔥᑲᐎᓰᓂᒡ ᐱᑭᔥᑭᐴᒋᑲᓇᓯᓃᓐ ᐊᓈᒥᕽ ᑳᐋᐸᑎᓯᓂᒡ᙮ 25 ᐊᐲ ᓴ ᑮᐸᓯᑸᒡ, ᒣᔥᑲᐌᑖᑯᓯᓂᒡ ᓴ ᓭᑭᓯᐗᐞ, ᐁᐲᒋ ᓭᑭᓯᓂᒡ ᑳᐐᓐ ᑫᑰᓐ ᐅᑲᔥᑭᑑᓰᓂ ᒋᐃᔑᒋᑫᓂᒡ᙮ 26 ᑳᐐᓐ ᓴ ᐊᔮᓯᓂᓂ ᐸᔑᐸᐃᑫᐎᑯᒫᓐ ᑫᒫᑭᐃᑯᐸᓐ, ᒌᐳᐌᐱᓂᑲᓐ, ᐱᑾᑰᔅ, ᒌᐳᐌᐱᓂᑲᓀᔅ ᑲᔦ ᑲᓇᑫ ᑫᔕᐎᔥᑳᑯᐸᓐ᙮ 27 ᒪᔥᑯᓰᕽ ᓴ ᐅᑎᓀᑖᓐ ᐲᐙᐱᑯᓂ, ᓅᑭᒌᓴᑯᕽ ᑲᔦ ᐅᑎᓀᑖᓐ ᐅᓵᐙᐱᒃ᙮ 28 ᑳᐐᓐ ᓴ ᐅᒫᒌᐸᐃᐙᑕᓰᓇᓐ ᐱᑾᑰᓐ, ᐊᓯᓃᐞ ᑲᔦ ᑳᒎᐌᐸᓀᔥᒀᓂᒥᒡ ᒦ ᐃ ᐁᓀᓂᒫᒡ ᑖᐱᔥᑰ ᐹᑌ ᒪᔥᑯᓰᓐ᙮ 29 ᒪᔥᑯᓰᕽ ᓴ ᐅᑎᓀᑖᓇᓐ ᐸᑲᒫᑲᓐ; ᐅᒥᒋ ᐹᐱᑑᓐ ᓴ ᑮᐊᐸᑭᑕᒪᐎᓐᒡ ᒌᐳᐌᐱᓂᑲᓇᓐ᙮ 30 ᐅᒥᓴᑦ ᓴ ᒦ ᐃ ᐁᔑᓈᑾᓂᓂᒃ ᑖᐱᔥᑰ ᑳᓃᓰᑳᐱᑭᓯᒡ ᐙᐱᑲᓇᑭᒃ; ᐁᐁᔑᓯᓂᓂᒃ ᑳᐲᐃᔖᒡ ᑖᐱᔥᑰ ᐲᑾᑲᒥᑭᐱᒋᑲᓐ ᑳᔑ ᐁᔑᓭᒃ᙮ 31 ᑮᒥᑯᔥᑳᑖᑲᒥᐌᐱᔥᑲᕽ ᓴ ᑭᒋᑲᒻ ᒦ ᓴ ᐃ ᐁᓀᑖᑾᓂᓂᒃ ᑖᐱᔥᑰ ᓂᐱ ᑳᐅᑌᒃ; ᔑᒀᔥ ᑲᔦ ᐊᔭᐴᔥᑭᐲ ᐌᐱᔥᑭᑫ ᑖᐱᔥᑰ ᑳᑭᐸᑳᒃ ᐱᒥᑌ ᑳᐅᑌᒃ᙮ 32 ᐐᑫ ᓴ ᐙᓭᔮᑲᒥᓂᓂ ᑳᐲᐃᔖᒡ, ᑭᒋᑲᒻ ᐁᐲᑌᐙᑲᒥᔥᑲᕽ᙮ 33 ᑳᐐᓐ ᓴ ᐅᐅᒫ ᐊᑮᕽ ᐊᔮᓯᓂᓂ ᒋᐃᓀᑖᑾᓂᓂᒃ ᑳᑎᓄᐎᒡ, ᑫᑰᓐ ᐁᑯᑕᓯᒃ᙮ 34 ᑳᐐᓐ ᐅᐸᐹᐱᓯᔅᑳᐸᒫᓰᓐ ᑳᑭᒋ ᐃᓀᓂᑎᓱᓂᒡ; ᐐᓐ ᐁᑭᒋᐅᑭᒫᐎᒡ ᑳᑕᔑᓂᒡ ᐱᑾᒋ ᐊᔭᐋᐎᔕᐞ, ᐅᑮᐃᑰᓐ ᒎᑉ ᑭᔐᒪᓂᑑᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society