Coop 40 - ᐅᒋᐺ ᑭᒋᒪᓯᓇᐃᑲᓐ1 ᑳᑎᐯᒋᑫᒡ ᑕᔥ ᐅᑮᐃᓈᓐ ᒎᐸᓐ Job, 2 ᐊᐎᔭ ᓇ ᐅᑖ ᐊᔮᓐ ᑫᑰᓂᓂ ᑫᔑ ᐊᓈᒥᒫᐸᓐ ᑳᒫᐗᒋ ᒪᔥᑲᐎᓰᓂᒡ ᑭᔐᒪᓂᑑᓐ ᒋᑾᔭᑯᒫᐸᓐ? ᑕᑲ ᓴ ᑳᐊᓈᒥᒫᒡ ᑭᔐᒪᓂᑑᓐ, ᐐᓐ ᐃᑯ ᐅᑲ ᓇᑴᑕᐙᓐ᙮ 3 ᒎᑉ ᐃᑕᔥ ᐅᑮ ᐃᔑ ᓇᑴᑕᐙᓐ ᑳᑎᐯᒋᑫᓂᒡ, 4 ᐃᓇᔥᑫ ᓴ ᓃᓐ ᑳᐐᓐ ᑫᑰᓐ ᓂᑕᐲᑌᑖᑯᓯᓰ, ᐋᓃᓐ ᐃᑕᔥ ᓃᓐ ᑫᔑ ᓇᑴᑕᐎᓈᐹᓐ? ᒦ ᐅᔕ ᐃ ᑳᐅᒋ ᑭᐳᓇᒫᓐ ᓂᑑᓐ ᑫᑰᓐ ᒋᐃᑭᑐᓯᐙᓐ᙮ 5 ᐋᔕ ᐅᔕ ᐋᐱᑎᕽ ᓂᑖᓇᑮ ᑮᑭᑦ, ᑳᐐᓐ ᓴ ᓂᑮ ᓇᑴᑕᓰ᙮ ᒥᓴᐙ ᑯ ᓃᔑᕽ ᐋᓇ ᑮᑭᑐᔭᓐ, ᑳᐐᓐ ᑫᑰᓐ ᐊᐗᔑᒣ ᓂᑕ ᐃᑭᑐᓰ, ᐅᑮᐃᓈᓐ᙮ 6 ᒦᑕᔥ ᑭᒋ ᓅᑎᓂᕽ ᒎᑉ ᐅᑮ ᐅᒋ ᑲᓅᓂᑰᓐ ᑳᑎᐯᒋᑫᓂᒡ, 7 ᑕᑲ ᐃᓂᓃᐌᑖᑯᓯᓐ ᒋᓃᐸᐎᔭᓐ, ᑭᐐ ᑲᑴᒋᒥᓐ ᐅᔕ ᑫᑰᓐ, ᑭᑲ ᓇᑴᑕᐎᔥ ᐃᑕᔥ᙮ 8 ᑭᐐ ᑲᑴ ᐋᓂᔑᑑᓐ ᐃᓇ ᐌᐌᓂ ᐊᐎᔭ ᑳᐃᓈᑯᓇᒃ? ᒦ ᓇ ᐃ ᓅᒋᑯ ᐌᒋᐃᔑᔭᓐ ᐌᐌᓂ ᐁᑑᑖᑫᓯᐙᓐ, ᑮᓐ ᑕᔥ ᐁᐐ ᐅᒋ ᒥᓋᑭᒥᑰᔭᓐ? 9 ᑳᐊᐲᒋ ᒪᔥᑲᐎᓰᒡ ᐃᓇ ᑭᔐᒪᓂᑑ ᑭᑕᐲᒌ? ᐱᓀᓰᕽ ᐃᓇ ᑭᑎᓉ ᑮᑮᑭᑐᔭᓐ ᑖᐱᔥᑰ ᑭᔐᒪᓂᑑ ᑳᐃᓉᒡ? 10 ᑕᑲ ᓴ ᐃᔑᑯᓇᔦᐃᑎᓱᓐ ᒋᑭᑭᔥᑲᒪᓐ ᑭᒋ ᐃᓀᑖᑯᓯᐎᓐ, ᒋᒥᓄᓈᑯᓯᔭᓐ ᑲᔦ᙮ ᐃᔑᐃᑎᓱᓐ ᑕᔥ ᑲᔦ ᒋᑭᑌᑖᑯᓯᔭᓐ, ᒋᑭᒋᐅᑭᒫᐌᑖᑯᓯᔭᓐ ᑲᔦ᙮ 11 ᑕᑲ ᓴ ᑕᔥ ᑲᓇᐙᐸᒻ ᐃᑭ ᑳᑭᒋ ᐃᓀᓂᑎᓱᐙᒡ, ᓂᔥᑳᑎᓰᑲᑕᐤ ᒋᑕᐸᓭᓂᒧᐊᑣ᙮ 12 ᑲᓇᐙᐸᒻ ᑲᑭᓇ ᑳᑭᒋ ᐃᓀᓂᑎᓱᐙᒡ, ᐃᔑᐞ ᐃᑕᔥ ᒋᑕᐸᓭᓂᑎᓱᐙᒡ; ᒋᔑᑯᔥᑲᐗᑣᐸᓐ ᐅᒪᒑᑎᓰᒃ ᐋᑎ ᑳᔑ ᓃᐸᐎᐙᒡ᙮ 13 ᒋᐃᔑ ᓂᑾᐗᑣᐸᓐ ᑲᑭᓇ ᐃᐃᒫ ᐊᓈᒪᑲᒥᒃ, ᒋᐃᔑ ᐊᑾᐱᓇᑣᐸᓐ ᑲᔦ ᑳᑕᓇᑮᓂᒡ ᑳᓂᐳᓂᒡ᙮ 14 ᒦ ᓴ ᑕᔥ ᐄᓴᓐ ᐅᐅ ᑫᐃᓂᓈᓐ, ᑮᓐ ᐄᓴᓐ ᐃᑯ ᑭᑖ ᑲᔥᑭᑑᓐ ᒋᐱᒫᒋᐃᑎᓱᔭᐸᓐ, ᐅᑮᐃᑰᓐ᙮ 15 ᐃᓇᔥᑫ ᑲᓇᐙᐸᒻ ᐊᐊ ᑳᑯᑖᓯᓈᑯᓯᒡ ᐊᔭᐋᐎᔥ ᐱᐄᒪᑦ behemoth ᑳᐃᔑᓂᑳᒋᑲᓂᐎᒡ, ᒦ ᐄᑐᒃ ᐊᐊ ᑳᑮ ᑕᑯ ᐅᔑᐊᒃ ᑮᐅᔑᐃᓈᓐ᙮ ᒪᔥᑯᓰᓐ ᓴ ᐅᒦᒋᓇᓐ ᑖᐱᔥᑰ ᐱᔑᑭ᙮ 16 ᐁᑕᑕᐌ ᓴ ᒪᔥᑲᐎᓰ ᐅᐐᔭᐎᕽ, ᐅᒥᓴᑖᕽ ᐃᓴ ᑲᔦ ᐃᓇᑫ ᐃᔑ ᒪᔥᑲᐎᓰ᙮ 17 ᑖᐱᔥᑰ ᓴ ᑮᔥᑳᑎᒃ ᑳᔑ ᐌᐌᐹᔑᒡ, ᒦ ᓴ ᐃ ᐅᓱᐤ ᐁᔑᓈᑾᓂᓂᒃ, ᐅᒌᑕᑌᔮᐲᓐ ᓴ ᐅᑆᒥᕽ ᐐᑫ ᓴᑯᓯᓂᓂᐗᓐ᙮ 18 ᐅᑲᓇᓐ ᓴ ᐃᓀᑖᑾᓂᓂᐗᓐ ᑖᐱᔥᑰ ᑳᐐᐹᐱᑲᒃ ᐅᓵᐙᐱᒃ, ᐅᐸᑫᓯᐎᓇᓐ ᑲᔦ ᐲᐙᐱᑯᕽ ᐃᓀᑖᑾᓂᓂᐗᓐ᙮ 19 ᒦ ᓴ ᐊᐌ ᒫᐗᒡ ᒣᔮᒪᑳᑌᑖᑯᓯᒡ ᑲᑭᓇ ᑳᑕᔑᐙᒡ ᐊᔭᐋᐎᔕᒃ! ᑳᑮ ᐅᔑᐃᑯᒡ ᓴ ᐁᑕ ᐅᑖ ᔖᑰᒋᐃᑰᓐ᙮ 20 ᑳᒦᒋᒡ ᓴ ᐗᒌᕽ ᑕᔑ ᓂᑖᐎᑭᓂᓂ, ᒦᔥ ᐃᐃᒫ ᐊᔭᐋᐎᔕᒃ ᐁᑕᔑ ᐅᑕᒥᓄᐙᒡ᙮ 21 ᐁᔑ ᓴᑭᑯᐹᓂᒃ ᓴ ᐃᔑ ᐱᒥᔑᓐ, ᐁᔑ ᐊᔭᓴᓃ ᐊᔮᓂᒃ ᐁᔑ ᒪᔥᑮᑯᓈᑾᓂᓂᒃ ᐁᐃᔑ ᑳᓱᒡ᙮ 22 ᐁᔑ ᐊᔭᑲᐙᑌᑯᐹᓂᒃ ᓴ ᐃᔑ ᑳᓱ; ᐐᑯᐲᐙᑎᑰᐞ ᐊᔮᐗᐞ ᐙᑳᐊᔭᐄ ᑳᔑ ᐊᔮᒡ ᑳᔑ ᐸᓯᓰᐲᓯᐗᓂᓂᒃ᙮ 23 ᑳᐐᓐ ᐅᑯᑕᓰᓐ ᑮᑭᔒᒋᐗᓂᓂᒃ ᓰᐱ, ᑳᐐᓐ ᑲᓇᑫ ᒋᒥᑯᔥᑳᒋᐊᔮᒡ ᒞᕒᑕᓐ ᓰᐱ ᑮᐃᔑᒋᐗᓂᓂᒃ ᐅᑑᓂᕽ᙮ 24 ᐊᐎᔭᓐ ᐃᓇ ᐅᑖ ᑳᒋᑎᓂᑰᓐ ᐊᐲ ᐊᔕᐙᐱᒡ? ᐊᐎᔭᓐ ᐃᓇ ᐅᔥᑭᔒᕽ ᐃᓇᑫ ᐅᑖᔑ ᐸᑯᓀᑕᐅᑰᓐ ᑫᑕᓇᐱᓂᑯᒡ? |
Ojibwe Shorter Bible (Syllabic Script) © 2008 Canadian Bible Society
Canadian Bible Society