Coop 4 - ᐅᒋᐺ ᑭᒋᒪᓯᓇᐃᑲᓐᓂᑕᒻ ᑮᑲᑲᓅᓂᑎᐙᒡ 1 ᒦᑕᔥ ᐅᐅ ᐁᓬᐃᐹᔅ Eliphaz ᑏᒪᓐ Teman ᐊᑮᕽ ᐌᒌᒡ ᑳᐃᑭᑐᒡ, 2 ᑮᔥᐱᓐ ᓴ ᐊᐎᔭ ᐐᑲᓅᓂᒃ, ᑭᑖ ᔕᔒᐯᓂᒫ ᓇ? ᐊᐌᓀᓐ ᓴ ᓈ ᑫᑲᔥᑭᑑᐸᓐ ᒋᑮᑭᑐᓯᑭᐸᓐ? 3 ᓃᐱᐗᐞ ᓴ ᐊᐎᔭᒃ ᑭᐱ ᑭᑭᓄᐊᒪᐙᒃ, ᐁᑮ ᐱ ᒪᔥᑲᐎᓰᐊᑣ ᒣᒉᑖᑯᓯᐙᒡ! 4 ᐁᑭᑐᐗᒡ ᓴ ᑲᔦ ᑭᑑᒋ ᓲᑫᑕᒧᐋᒃ, ᑭᑑᒋ ᐐᒋᐋᒃ ᑲᔦ ᐃᑭ ᑳᑮ ᓃᓇᒥᑳᐸᐎᐙᒡ᙮ 5 ᑮᓐ ᐃᑕᔥ ᓅᑯᒻ ᒫᔑᓭᐎᓐ ᐁᐅᑎᓯᑯᔭᓐ, ᐐᑫ ᓴ ᑭᐸᑭᑌᑕᒻ ᐁᒨᔑᑑᔭᓐ, ᒦ ᐃ ᐐᑫ ᐁᔑ ᐸᑭᑌᑕᒪᓐ᙮ 6 ᑭᔐᒪᓂᑑ ᐄᑐᒃ ᑭᑕᓇᒥᐁᑕᐙ, ᑭᐱᒫᑎᓯᐎᓐ ᑫᑰᓐ ᐁᐃᔑ ᐊᓈᒣᑖᑾᓯᓄᑭᐸᓐ; ᑭᑖ ᐅᒋ ᐊᔮᓐ ᑌᐺᔦᓂᑎᓱᐎᓐ, ᐸᑯᓭᓂᒧᐎᓐ ᑲᔦ? 7 ᑕᑲ ᓴ ᑲᑴ ᒫᒥᑲᐎᓐ, ᒋᐐᑕᒪᐸᓐ ᐊᐎᔭ ᒪᔑ ᒣᒫᔒᓯᒃ ᒋᓂᔑᐗᓈᑎᓯᒡ? ᐐᑳ ᓇ ᐊᐎᔭ ᐅᑾᔭᒀᑎᓯ ᓂᔑᐗᓈᑎᓯ? 8 ᐁᔑ ᐙᐸᑫᔮᓐ ᓴ, ᐃᑭ ᓴ ᐯᒫᑎᓯᐙᒡ ᐁᓀᑖᑾᓂᓂᒃ ᑖᐱᔥᑰ ᐁᐱᑭᔥᑲᑲᒥᑭᐱᑑᐙᒡ ᒪᒋᑫᑰᓐ, ᑫᑎᑳᑕᒧᐙᒡ ᐃᑕᔥ ᒫᔑᓭᐎᓐ, ᒦ ᓴ ᐃ ᓇᑫ ᑫᔑ ᒪᓂᔑᑫᐙᒡ᙮ 9 ᑭᔐᒪᓂᑑᓐ ᓴ ᐅᓂᔥᑳᑎᓯᐎᓐ ᓅᑎᓄᕽ ᐃᓀᑖᑾᓂᓂ, ᒦᔥ ᐃᐃᒫ ᐁᔑ ᓂᔑᐗᓈᒋᐋᒡ᙮ 10 ᒥᔑᐱᔑᐗᒃ ᓴ ᑕᓅᑖᑯᓯᐗᒃ, ᑕᓀᑭᒧᐗᒃ ᑲᔦ, ᔖᑰᒡ ᐃᑕᔥ ᐐᐱᑎᐙᓐ ᑕᐴᐴᑯᓭᓂᐗᓐ᙮ 11 ᒦᑕᔥ ᒥᔑᐱᔑᐤ ᐁᔑ ᓂᐳᒡ ᑫᑰᓐ ᑮᓂᑑᓯᒃ, ᒦᔥ ᓅᔐ ᒥᔑᐱᔑᐤ ᐅᓃᒑᓂᓴᐞ ᐁᔑ ᐲᐌᓭᓂᒡ᙮ 12 ᑫᑰᓐ ᓴ ᓂᑮ ᐱ ᑮᒨᒋ ᐐᑕᒫᑰ, ᐊᑳᐙ ᓂᑮ ᓅᑖᓐ ᑳᐊᐲᒋ ᐊᑳᐙ ᓅᑖᑾᒃ᙮ 13 ᑖᐱᔥᑰ ᓴ ᑳᑮᐗᔥᑴᑾᔑᕽ ᐁᑎᐱᑲᒃ, ᐊᐲ ᑮᓂᐹᓂᐗᕽ, 14 ᒦ ᓴ ᑳᑮ ᓭᑭᓯᔮᓐ, ᐁᑮ ᓂᓂᑳᓂᒥᓯᔮᓐ, ᒦᔥ ᑲᑭᓇ ᓂᑲᓇᓐ ᑳᑮ ᐗᑲᐎᓭᑭᓐ᙮ 15 ᒦᑕᔥ ᓂᔑᑳᒡ ᑳᐱᒥᓅᐌᒃ ᑳᑮ ᓵᒦᑴᔥᑳᑯᔮᓐ, ᒦᔥ ᓂᒦᔖᑯᓇᐙᓇᓐ ᑳᑮ ᐸᑕᑭᑌᑭᓐ᙮ 16 ᒦᔥ ᑳᐃᔑ ᑭᐱᒋᔥᑳᒃ, ᑳᐐᓐ ᓴ ᓂᑮ ᑭᑫᑕᓰᓐ ᐌᑯᑐᑴᓐ ᐄᑐᒃ ᐃᐃ᙮ ᒦᑕᔥ ᑳᑮ ᐊᔖᐙᓯᓈᑾᒃ ᐁᑲᓇᐙᐸᑕᒫᓐ, ᒦᔥ ᑳᑮ ᓅᑕᐗᒃ ᐊᐎᔭ ᓂᔑᒃ ᐁᑮᑭᑐᒡ, 17 ᓇᐗᒡ ᓇ ᐊᐎᔭ ᑕᑾᔭᑯ ᐱᒫᑎᓯ ᐊᐲᒡ ᐐᓐ ᑭᔐᒪᓂᑑᓐ? ᓇᐗᒡ ᐃᓇ ᐃᓂᓂ ᑕᐯᑫᑖᑯᓯ ᐊᐲᒡ ᐐᓐ ᐃᓂ ᑳᑮ ᐅᔑᐃᑯᒡ? 18 ᐃᓇᔥᑫ ᑳᐐᓐ ᑭᔐᒪᓂᑑ ᐅᑌᐺᔦᓂᒫᓰᐞ ᐅᑕᓄᑮᐋᑲᓇᐞ ᑭᒋᑮᔑᑯᕽ ᐁᔮᓂᒡ, ᐅᑌᒐᓬᐃᒪᐞ ᑲᔦ ᐁᐊᔑᑕᑭᑕᒪᐙᒡ ᐁᔑ ᒪᒫᔒᓂᒡ, 19 ᐋᓃᓐ ᐃᑕᔥ ᐃᓈ ᑌᑾᒡ ᑫᔑ ᑌᐺᔦᓂᒫᐸᓐ ᐊᔕᔥᑮᕽ ᐁᓀᑖᑯᓯᓂᒡ, ᐹᔥᑭᓀᑲᒥᑯᕽ ᑳᑮ ᐅᒋ ᐅᔑᐃᒥᓐᒡ? ᓇᐗᒡ ᒋᐌᑎᓯᒡ ᒋᔑᑯᓂᑲᓂᐎᒡ ᑖᐱᔥᑰ ᒣᒣᑾᔅ᙮ 20 ᒫᑭᔖ ᐃᓂᓂ ᑕᐱᒫᑎᓯ ᑭᔐᐹᐗᑲᓂᓂᒃ, ᑳᐐᓐ ᐃᑕᔥ ᑕᑭᑫᑖᑾᓯᓂᓂ ᐄᓴᓐ ᓂᐳᒡ ᒋᑆ ᐅᓈᑯᔑᓂᓂᒃ, ᒦᔥ ᑫᔑ ᓀᐱᒋ ᓂᐳᒡ᙮ 21 ᒦ ᓴ ᐁᓀᑖᑯᓯᒡ ᑖᐱᔥᑰ ᐸᒀᓀᑲᒥᒃ ᑳᐋᐸᐃᑳᑌᒃ ᐌᒋ ᒥᒋᒪᐱᑌᒃ, ᒦᔥ ᐁᔑᓂᐳᒡ, ᐁᐊᔮᓯᒃ ᑲᑮᑖᐌᑕᒧᐎᓐ ᐄᓴᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society