Coop 39 - ᐅᒋᐺ ᑭᒋᒪᓯᓇᐃᑲᓐ1 ᑭᑭᑫᑖᓐ ᐃᓇ ᐊᐲ ᐗᒌᐎ ᒫᓇᑎᑾᒃ ᓀᑖᐎᑭᓈᐗᓱᐙᒡ? ᐐᑳ ᓇ ᑭᐙᐸᒫ ᐱᑾᒋ ᐙᐙᔥᑫᔑ ᐁᓂᑖᐎᑭᓈᐗᓱᒡ? 2 ᑭᑭᑫᑕᒧᐙᓐ ᐃᓇ ᒥᓂᒃ ᑫᑭᔥᑲᐙᐗᓱᐙᒡ? ᑭᑫᑕᒧᐙᓐ ᐃᓇ ᐊᐲ ᓀᑖᐎᑭᓈᐗᓱᐙᒡ? 3 ᐅᒋᒌᑾᓂᑖᐗᒃ ᓴ, ᒦᔥ ᐁᔑ ᓂᑖᐎᑭᐋᐙᒡ ᐅᑕᔭᐋᓯᒥᐙᐞ; ᒦᔥ ᐁᔑ ᐴᓂ ᐐᓴᑫᑕᒧᐙᒡ᙮ 4 ᐅᑕᔭᐋᓯᒥᐙᐞ ᓴ ᑕᔑ ᒪᔥᑲᐎᑭᐗᐞ ᐌᑎ ᒥᔕᐗᑲᒥᒃ; ᑳᐐᓐ ᐱᑮᐌᓰᐗᐞ ᑮᒫᒑᓂᒡ! 5 ᐊᐌᓀᓐ ᓴ ᑳᐸᑭᑎᓈᒡ ᐱᑾᒋ ᒫᔑᒥᑕᑎᒨᐞ ᐱᓵᓐ ᒋᐸᐹᒥ ᐊᔮᓂᒡ? ᐊᐌᓀᓐ ᓴ ᑳᐋᐸᐙᒡ ᐱᓵᓐ ᐃᑕᔥ ᒋᐸᐹᒥᐸᐃᑎᓂᒡ? 6 ᓃᓐ ᓴ ᑳᐸᑭᑎᓇᒀ ᐱᑾᑕᑲᒥᑯᕽ ᒋᑕᔒᑫᐙᒡ, ᑳᐸᑭᑎᓇᒀ ᑲᔦ ᒋᐃᔑᑖᐙᒡ ᐁᔑᐊᔮᓂᒃ ᔒᐎᑖᑲᓇᑭ᙮ 7 ᐅᔒᑫᑖᓈᐙ ᓴ ᐁᔑ ᓂᐹᑗᐎᑕᒧᐎᓐᒡ ᑭᒋ ᐆᑌᓈᑳᕽ, ᑳᐐᓐ ᑕᑲᔥᑭᐋᓰᐗᒃ ᒋᐙᑲᐎᐃᑣᐸᓐ, ᒋᐊᓄᑮᐃᑣᐸᓐ ᑲᔦ᙮ 8 ᐁᔑ ᐊᔭᔮᓂᑭᓐ ᓴ ᐗᒌᓐ ᐃᔑ ᑕᔒᑫ ᐁᐅᑕᒋᑫᒡ ᐁᔑ ᒪᔥᑯᓰᑳᓂᒃ, ᐁᐸᐹ ᓇᓈᑐᓀᐊᕽ ᑫᑰᓐ ᒪᔥᑯᓯ ᐅᓵᐗᔥᒀᓂᒃ ᑫᒦᒋᒡ᙮ 9 ᑕᐃᓀᑕᒻ ᐃᓇ ᐱᑾᒋ ᐱᔑᑭ ᒋᐊᓄᑮᑕᐎᑭᐸᓐ? ᑕᐊᔮ ᓇ ᑭᐱᔑᑮᐎᑲᒥᑯᕽ ᑎᐱᑲᓂᓂᒃ? 10 ᑭᑖ ᑲᔥᑭᐋ ᓇ ᒋᒥᒋᒪᐱᓇᑎᐸᓐ ᔑᓅᑖᑲᓐ ᐋᐸᒋᑖᐗᒡ, ᒋᐱᑭᔥᑲᑲᒥᑭᐱᒋᑫᐸᓐ ᑲᔦ ᒋᐲᓴᑲᒥᑭᐱᒋᑫᐸᓐ ᐸᔥᒀᑲᒥᑳᕽ᙮ 11 ᑭᑖ ᐊᐯᓂᒧᓄᑕᒧᐙᓐ ᐃᓇ ᐊᐊ ᐱᔑᑭ ᐅᑭᒋ ᒪᔥᑲᐎᓰᐎᓐ, ᐐᓐ ᒋᒦᓇᑎᐸᓐ ᑲᑭᓇ ᑭᒪᔥᑲᐗᓄᑮᐎᓇᓐ? 12 ᑭᑖ ᐊᐯᓂᒧᓄᑕᐙ ᓇ ᒋᐲᑑᐸᓐ ᑭᐸᑴᔑᑲᓂᒥᓇᓐ, ᒋᐅᑯ ᐲᑑᐸᓐ ᑲᔦ ᑫᑕᔑ ᐸᐎᑲᓈᒋᑫᐎᓐᒡ? 13 ᐃᓇᔥᑫ ᐁᐲᒋ ᑭᑖᑕᐱ ᓂᑸᑲᓀᐸᓂᐅᒡ ᐊᐊ ᑭᓍᑯᑾᔭᐌᐎ ᑭᔒᐸᑑ ᑭᒋ ᐱᓀᔒᓐᔥ, ᑳᐐᓐ ᐃᑕᔥ ᐊᐊ ᑎᓄ ᐃᔑ ᐱᒥᓭᓰ ᑖᐱᔥᑰ ᒨᔥᑲᐅᓯ᙮ 14 ᒥᑕᑲᒥᒃ ᓴ ᐃᑯ ᐱᓵᓐ ᑕᔑ ᐸᑭᒌ ᐙᐗᓀ ᒥᑖᐗᑳᕽ ᐁᐅᒋ ᑮᔔᓯᓂᓂᑭᓐ, 15 ᐁᑭᑫᑕᓯᒃ ᒫᑭᔖ ᐊᐎᔭᓐ ᒋᑕᑯᑳᑕᒥᓂᒡ, ᑯᒫ ᑲᔦ ᐱᑾᒋᐊᔭᐋᐎᔕᓐ ᒋᔑᑯᔥᑲᒥᓂᒡ᙮ 16 ᑳᐐᓐ ᓴ ᐅᒪᓈᒋᐋᓰᐞ ᐅᓃᒑᓂᓴᐞ ᐁᑑᑕᐙᒡ ᑖᐱᔥᑰ ᐐᓐ ᐁᑎᐱᓇᐌᐎᓯᓯᒃ; ᑫᑰᓐ ᐁᐃᓀᑕᓯᒃ ᐊᓂᔖ ᐄᓴᓐ ᐃᐃ ᑳᑮ ᐊᓄᑮᒡ᙮ 17 ᑳᐐᓐ ᐄᑐᒃ ᐅᑮ ᐃᔑᐃᑯᓰᓐ ᑭᔐᒪᓂᑑᓐ ᒋᑲᑮᑖᐌᑕᕽ, ᑳᐐᓐ ᑲᔦ ᒋᑮ ᒦᓂᑯᒡ ᒋᐅᓂᓯᑐᑕᒧᐎᓂᒡ᙮ 18 ᐊᐲ ᑕᔥ ᐐᓐ ᑮᑌᓯᓂᑸᑖᒡ ᐁᒫᒌᐸᑑᒡ, ᒦ ᓴ ᐃ ᐁᔑ ᐹᐱᐋᒡ ᒥᑕᑎᒨᓐ, ᐯᒥᐗᓀᐸᐃᑯᓂᒡ ᑲᔦ ᐁᐲᒋ ᑭᔒᐸᑑᒡ᙮ 19 ᑮᓐ ᐃᓇ ᑳᑮ ᐃᔑᐊᒡ ᒥᑕᑎᒻ ᒋᒪᔥᑲᐎᓰᒡ, ᑳᑮ ᐃᔑᐊᒡ ᑲᔦ ᒋᒥᓄᓈᑾᓂᓂᒃ ᐅᒦᔑᑴᑲᓈᓐ? 20 ᑮᓐ ᐃᓇ ᑳᐃᔑᐊᒡ ᒋᐃᔥᐱ ᒀᔥᑾᓂᒡ ᑖᐱᔥᑰ ᐸᐸᑭᓀᒃ, ᐌᒋ ᓭᑭᒫᒡ ᐃᓂᓂᐗᓐ ᑮᒪᑗ ᔕᑾᓀ ᓅᑖᑯᓯᒡ? 21 ᐌᒋᑑ ᐱᑯ ᑳᔥᑳᔥᑭᐱᒋᑫ ᐊᑮᕽ ᑳᔑ ᐙᓇᑎᓈᓂᒃ, ᐅᒋ ᒥᓉᑕᒻ ᑲᔦ ᐁᒪᔥᑲᐎᓰᒡ; ᐁᐲᒌᒡ ᓴ ᐃᔑ ᒨᑮᒋᑫ ᐁᑕᔑ ᒦᑳᑎᐎᓐᒡ᙮ 22 ᐅᒥᒋ ᐹᐱᑑᓐ ᓴ ᑯᑖᒋᐎᓐ, ᐁᑭᑫᑕᓯᒃ ᑯᑖᒋᐎᓐ ᑳᐃᒋᑳᑌᓂᒃ; ᑳᐐᓐ ᑲᔦ ᐸᔑᐸᐃᑫᐎᑯᒫᓐ ᐅᔖᑰᑖᒪᐅᑯᓰᓐ᙮ 23 ᒦᑳᓱᐎ ᐋᐸᒋᒋᑲᓇᓐ ᐯᒥᐎᑑᓂᒡ ᐯᒥᐗᓈᓈᒡ ᓴ ᔑᓇᐙᐱᑭᓯᓂᓂᐗᓐ, ᓵᓵᑳᑌᔮᐱᑭᓭᓂᐗᓐ ᑲᔦ ᐁᔑ ᓵᑳᑌᓂᒃ᙮ 24 ᑳᐐᓐ ᓴ ᑯᔥᒀᐙᒋᐊᔮᓰ ᐁᐲᒋ ᐊᓇᒣᑕᕽ, ᑳᐐᓐ ᐅᑲᔥᑭᑑᓰᓐ ᒋᑯᔥᒀᐙᒋᑳᐸᐎᒡ ᐊᐲ ᐁᓅᑖᑾᓂᓂᒃ ᐴᑖᒋᑲᓐ᙮ 25 ᐁᓅᑖᑾᓂᓂᒃ ᐃᑕᔥ ᐴᑖᒋᑲᓐ, ᒦ ᐃ ᐁᔑ ᒪᑗ ᔖᑾᓀ ᓅᑖᑯᓯᒡ ᐁᐃᓂᑖᑯᓯᒡ, ᐊᐤ; ᐙᓴ ᐅᑑᒋ ᒥᓈᑖᓐ ᐁᑕᔑ ᒦᑳᑎᐎᓐᒡ, ᐅᑌᐱᑕᐙᐞ ᑲᔦ ᔑᒫᑲᓂᔒᐎᑭᒫᐞ ᐁᔖᑯᐌᓂᒡ, ᐁᐃᓂᑖᑾᓂᓂᒃ ᑮᒦᑳᑎᐎᓐᒡ᙮ 26 ᑮᓐ ᐃᓇ ᒥᑭᓯ ᐌᒋ ᑭᑫᑕᕽ ᒋᓂᑖ ᐱᒥᓭᒡ, ᐊᐲ ᔖᐗᓄᕽ ᐃᓇᑫ ᑮᐃᔑ ᓂᑸᑲᓀᓂᒡ? 27 ᑮᓐ ᐃᓇ ᐁᑲᓅᓇᒡ ᒥᑭᓯ ᐃᔥᐱᒥᕽ ᑳᐅᒋ ᐱᒫᓯᒨᓄᒡ, ᐌᒋ ᐅᔑᑑᒡ ᑲᔦ ᐅᐗᓯᓱᓐ ᑳᐃᔑ ᐃᔥᐸᑎᓈᓂᒃ? 28 ᐌᑎ ᓴ ᐁᔑ ᐃᔥᐹᐱᑳᓂᒃ ᐃᔑᑖ, ᒦ ᑲᔦ ᐌᑎ ᐁᔮᒡ ᐁᑎᐱᑲᓂᓂᒃ, ᐁᔑ ᑳᒋᑖᐱᑳᓂᒃ ᐁᔑ ᓲᑲᓂᓂᒃ᙮ 29 ᒦ ᓴ ᐌᑎ ᐌᓵᐸᑕᕽ ᑫᒦᒋᒡ; ᐙᓴ ᐁᐅᒋ ᓇᐋᐸᑕᕽ ᑫᓂᑑᒡ᙮ 30 ᐅᓃᒑᓂᓴᐞ ᓴ ᑲᔦ ᐅᒦᒋᓂ ᒥᔅᑸᓂ; ᐁᔮᓂᒃ ᓴ ᑫᑰᓐ ᐁᓂᒋᑳᑌᓂᒃ, ᒦ ᓴ ᐃᐃᒫ ᐁᔮᒡ, ᐅᑮᐃᑰᓐ ᒎᑉ ᑭᔐᒪᓂᑑᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society