Coop 38 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᑮᓇᑴᑕᐙᒡ ᒎᐸᓐ 1 ᒎᑉ Job ᑕᔥ ᑳᑎᐯᒋᑫᓂᒡ ᑭᒋ ᐃᔑᐌᐸᓄᕽ ᐅᑮ ᐅᒋ ᑲᓅᓂᑰᓐ, 2 ᐊᐌᓀᓐ ᓴ ᐊ ᑳᓇᑳᔥᑲᐎᒡ ᐅᐅ ᑳᔑ ᐙᐐᑕᒫᑫᐗᒃ ᒋᐃᔑᒋᑫᓈᓂᐗᓂᓂᒃ ᐁᐋᐸᒋᑑᒡ ᐃᔑᑮᔗᐎᓇᓐ ᑫᑰᓐ ᑳᐃᓍᑌᓯᓂᓂᑭᓐ᙮ 3 ᑕᑲ ᐃᓂᓃᐌᑖᑯᓯᓐ ᒋᓃᐸᐎᔭᓐ; ᒋᓇᑴᑕᐎᔭᓐ ᐋᓃᓐ ᐁᔑ ᑲᑴᒋᒥᓈᓐ᙮ 4 ᐋᓃᑎ ᑮᓐ ᑳᐊᔮᔭᓐ ᑮᐅᔑᑑᔮᓐ ᐅᐅ ᐊᑭ ᑳᔑ ᐊᑌᒃ᙮ ᐐᑕᒪᐎᔑᓐ ᑕᔥ ᑮᓐ ᑫᑰᓐ ᑳᑭᑫᑕᒪᓐ᙮ 5 ᐊᐌᓀᓐ ᑕᔥ ᑳᐅᓀᑕᕽ ᐋᓃᓐ ᑫᐃᓂᑯᒀᓂᒃ ᐅᐅ ᐊᑭ? ᐊᐌᓀᓐ ᑕᔥ ᑲᔦ ᑳᑎᐹᐲᑭᓇᕽ, ᑮᓐ ᐄᑐᒃ ᑫᑰᓐ ᑭᑭᑫᑖᓐ᙮ 6 ᐋᑎ ᑕᔥ ᐌᒋ ᑭᒋᐎᔑᓅᐙᒡ ᐃᑭ ᐊᔂᑾᐃᑲᓇᒃ ᐅᐅ ᐊᑭ ᑳᔑ ᐊᑌᒃ? ᐊᐌᓀᓐ ᑕᔥ ᑳᐅᓈᐱᑭᔑᒫᒡ ᐃᓂ ᐊᓯᓃᓐ ᑮᑫᔮᐱᑲᓯᓃᓐ? 7 ᐃᐃ ᐊᐲ ᑮᐲᑖᐸᕽ ᐗᓇᑯᔕᒃ ᑮᒫᒪᐎ ᓂᑲᒧᐙᒡ, ᑲᑭᓇ ᑲᔦ ᑭᒋᑮᔑᑯ ᐊᐎᔭᒃ ᑮᔖᑯᐌᐙᒡ ᑳᐊᐲᒋ ᒥᓉᑕᒧᐙᒡ? 8 ᐊᐌᓀᓐ ᑕᔥ ᑳᑭᐸᐊᑭᐸᓐ ᑭᒋ ᐃᔥᒀᑌᒪᓐ ᐊᐗᔑᒣ ᑭᒋᑲᒦᐎᓂᐱ ᒋᐱ ᐅᒋᒋᐲᓯᓂᓄᒃ ᐊᐲ ᐊᓈᒥᕽ ᐊᑮᕽ ᑮᐅᒋᒋᐗᑭᐸᓐ ᓂᐱ? 9 ᓃᓐ ᐅᔕ ᑳᑮ ᐅᔑᑑᔮᓐ ᐗᑸᓐ ᑫᐋᑲᐗᑰᑌᑭᓐ ᐃᐃᒫ ᑭᒋᑲᒦᕽ, ᑳᔑ ᑲᔥᑮᑎᐱᑲᒃ ᑕᔥ ᑲᔦ ᓂᑮ ᐃᔑ ᑲᔥᑮᑭᓈᓐ᙮ 10 ᓃᓐ ᑲᔦ ᓂᑮ ᐅᓇᑑᓐ ᐋᑎ ᑫᐊᑯ ᓂᐲᑳᒃ ᐃᐃ ᑭᒋᑲᒻ᙮ 11 ᒦᔥ ᑳᐃᑕᒫᓐ ᑭᒋᑲᒻ, ᒦ ᐅᐌ ᒥᓂᒃ ᑫᐱ ᐊᑯᐲᔭᓐ, ᑳᐐᓐ ᐊᐗᔑᒣ ᐅᐅᒫ ᓇᑫ ᑭᑲ ᐲᔖᓰ᙮ ᒦ ᐅᒫ ᐁᒪᔥᑲᐙᔥᑳᔭᓐ ᑫᔑ ᑭᐱᒌᔭᓐ᙮ 12 ᒎᑉ Job, ᐐᑳ ᓇ ᒥᓂᒃ ᑳᑮ ᐱᒫᑎᓯᔭᓐ ᑭᑲᓅᑖᓐ ᑳᑭᔐᐹᐗᑲᒃ? ᑳᐲᑖᐸᕽ ᑲᔦ ᐋᑎ ᐁᔑ ᑎᐯᑖᑾᒃ? 13 ᐐᑳ ᓇ ᑭᑲᓅᑖᓐ ᑳᐲᑖᐸᕽ ᒋᐅᑎᑎᓇᕽ ᐊᑮᓂ? ᒋᐗᑲᐎᐌᐱᓇᕽ ᐊᑮᓂ ᒋᒧᔐ ᐌᐱᓂᑣ ᐅᒪᒋᑑᑕᒨᒃ ᐋᑎ ᐁᔑ ᑳᓱᐙᒡ? 14 ᓵᑳᑌᕽ ᐅᓴ ᑳᐅᒋ ᓇᐃᓈᑾᒃ ᐋᑎ ᐁᔑ ᐸᐲᑾᑎᓈᒃ, ᐋᑎ ᑲᔦ ᐁᔑ ᐸᐸᓴᑎᓈᒃ ᑖᐱᔥᑰ ᐃᔒᑭᓐ ᑳᐱᔅᑮᑭᓂᑳᑌᒃ, ᐁᐃᔑ ᐸᑲᑭᓈᑾᒃ ᑖᐱᔥᑰ ᐙᐱᑲᓂᑳᕽ ᑳᔑ ᒪᓯᓂᒋᑳᑌᒃ ᑳᑭᒋ ᐃᓀᑖᑾᒃ᙮ 15 ᑮᐙᓭᔮᓂᒃ ᐁᑮᔑᑲᓂᓂᒃ ᐅᔕ ᐅᓵᒻ ᐅᐙᓭᔦᑖᓈᐙ ᒣᒑᑎᓯᐙᒡ, ᐅᐗᓇᔥᑴᐃᑰᓈᐙ ᐊᐗᔑᒣ ᓅᒋᑯ ᐋᓇ ᐐ ᐃᔑᒋᑫᐙᒡ᙮ 16 ᐐᑳ ᓇ ᑭᑮ ᐱ ᐊᔮ ᐌᒋ ᒫᒌᒋᐗᕽ ᑭᒋᑲᒻ? ᐐᑳ ᓇ ᑲᔦ ᑭᑐᒋ ᐱᒧᓭ ᐊᔑᒌᑎᒻ᙮ 17 ᐊᐎᔭ ᓇ ᐐᑳ ᑭᐱ ᐙᐸᑕᐃᒃ ᐁᔑ ᐃᔥᒀᑌᒥᐗᕽ ᓂᐳᐎᓐ? ᐐᑳ ᓇ ᑭᐱ ᐙᐸᑖᓐ ᑳᔑ ᐊᑲᐙᑌᓯᕽ ᓂᐳᐎᓐ? 18 ᑯᓂᑫ ᐐᑳ ᑭᑖ ᑌᐱ ᑭᑫᑖᓐ ᐁᓂᑯᒀᒃ ᐅᐅ ᐊᑭ? ᐐᑕᒪᐎᔑᓐ ᑮᔥᐱᓐ ᑭᑫᑕᒪᓐ! 19 ᑭᑭᑫᑖᓐ ᐃᓇ ᐋᑎ ᐌᒌᒪᑲᒃ ᑳᐙᓭᔮᒃ? ᐋᑎ ᑲᔦ ᐌᒌᒪᑲᒃ ᑳᑲᔥᑮᑎᐱᑲᒃ? 20 ᑭᑖ ᐙᐸᑕᐋᑑᓇᓐ ᐃᓇ ᐋᓃᓐ ᒥᓂᒃ ᑫᐃᔖᒪᑲᑭᐸᓀᓐ? ᑭᑖ ᑲᔥᑭᑑᓐ ᐃᓇ ᒋᑮᐌᓂᔕᐊᒪᐸᓐ? 21 ᑫᒋᓈᒡ ᒫᐐᓐ ᑭᑖ ᑲᔥᑭᑑᓐ, ᐋᓃᔥ ᑭᑕᑭᐌᓰᐤ, ᐋᔕ ᑲᔦ ᑭᑮ ᐊᔮᓈᑐᒃ ᐊᑭ ᑮᐅᔑᒋᑳᑌᑭᐸᓐ᙮ 22 ᐐᑳ ᓇ ᑭᐲᑎᑫ ᓂᑕᑖᓱᐎᑲᒥᑰᓐ, ᐁᔑ ᑲᓇᐌᓂᒪᒃ ᑰᓐ, ᓭᓭᑲᓇᓐ ᑲᔦ? 23 ᒦ ᐄᑐᒃ ᑫᔑ ᑾᔮᒌᔮᓐ ᐊᐲ ᐗᓯᑖᐎᓭᓈᓂᐗᕽ, ᐃᔑ ᑮᔑᑲᒃ ᒋᒦᑳᑎᓈᓂᐗᕽ, ᑲᔦ ᑕᔥ ᐅᑎᑎᓂᑎᓈᓂᐗᕽ᙮ 24 ᐐᑳ ᓇ ᑭᐱ ᐊᔮ ᐌᒋ ᒨᑲᐊᕽ ᑮᓯᔅ ᑳᐅᒋ ᓯᓶᐋᑌᒃ? ᐌᑎ ᑲᔦ ᐯᒥ ᐅᒌᒃ ᐃᐃ ᑳᐙᐸᓂᓅᐌᒃ? 25 ᐊᐌᓀᓐ ᐃᑕᔥ ᑳᐃᓈᓂᑫᒡ ᐃᓇᑫ ᑫᔑ ᑭᒥᐗᓂᓂᒃ? ᐊᐌᓀᓐ ᑲᔦ ᑳᐃᔑ ᒦᑲᓈᒋᑫᒡ ᑫᔑ ᐱᓀᓰᐗᓂᓂᒃ? 26 ᐊᐌᓀᓐ ᐃᑕᔥ ᑳᑭᒥᐗᓄᑫᒡ ᐊᐎᔭᓐ ᐁᔑᐊᔮᓯᓂᒃ, ᐁᔑ ᐹᑌᓂᒃ ᑲᔦ ᐊᑮᓂ? 27 ᐊᐌᓀᓐ ᐃᑕᔥ ᑫᑎᐸᐹᐗᑑᒡ ᐅᐅ ᐐᑫ ᑳᐹᑌᓂᒃ ᐊᑭ, ᒋᐅᒋ ᒥᓄ ᓂᑖᐎᑭᓂᓂᑭᓐ ᒪᔥᑯᓰᓐ? 28 ᐅᑌᑌᒦᒪᑲᓐ ᐃᓇ ᑳᑭᒥᐗᕽ? ᐊᐌᓀᔥ ᑳᑮ ᓂᑖᐎᑭᑑᒡ ᑳᔕᑭᐊᔮᒃ? 29 ᑳᓇᑲ ᐊᐌᑴᓇᓐ ᒥᑾᒻ ᐌᒫᒫᑴᓐ? ᐊᐌᓀᔥ ᑳᑮ ᓂᑖᐎᑭᑑᒡ ᑳᓂᑮᑾᑎᕽ? 30 ᐊᐌᓀᓐ ᐃᑕᔥ ᑳᑑᑕᕽ ᓂᐱ ᑳᐅᒋ ᒪᔥᑲᐙᑾᑎᕽ, ᑲᔦ ᑳᐅᒋ ᑲᔥᑲᑎᕽ ᑭᒋᑲᒻ? 31 ᐊᐌᓀᓐ ᐃᑕᔥ ᑫᑲᔥᑭᑑᐸᓐ ᒋᒫᒪᐗᐱᓈᒡ ᑳᐅᑾᑰᒋᓄᐙᒡ ᓂᑯᑣᓱ ᐗᓇᑯᔕᐞ ᐸᓬᐄᐊᑏᔅ Pleiades ᐁᓂᒥᓐᒡ? ᐊᐌᓀᓐ ᐃᑕᔥ ᑫᐋᐸᐙᐸᓐ ᐁᔑ ᐅᑾᐱᓱᓂᒡ ᐗᓇᑯᔕᐞ ᐅᕒᐋᔭᓐ Orion ᑳᐊᑕᐌᒋᑫᓂᒡ ᐁᓂᒥᓐᒡ? 32 ᑭᑖ ᑲᔥᑭᐋᒃ ᐃᓇ ᐗᓇᑯᔕᒃ ᒋᐅᓇᑰᓇᑣᐸᓐ ᐁᔑ ᐯᐸᑳᓂᓭᒃ ᐯᔑᑯ ᐱᐴᓐ? ᒋᐊᑰᓇᑣᐸᓐ ᑲᔦ ᐗᓇᑯᔕᒃ ᑭᒋ ᓃᒫᑯ ᒥᓂᒀᑲᓂᕽ ᐁᓇᑰᒋᓄᐙᒡ, ᓃᒫᑯ ᒥᓂᒀᑲᓀᓯᕽ ᑲᔦ ᐁᓇᑰᒋᓄᐙᒡ᙮ 33 ᑭᑭᑫᑖᓐ ᐃᓇ ᐁᔑ ᐊᓄᑮᒪᑲᒃ ᑮᔑᒃ? ᑭᑖ ᑲᔥᑭᑑᓐ ᐃᓇ ᐃᐃ ᐯᔑᑾᓐ ᒋᐃᔑᓭᑭᐸᓐ ᐅᐅᒫ ᐊᑮᕽ, ᑖᐱᔥᑰ ᑳᔑ ᐊᓄᑮᒪᑲᒃ ᑮᔑᒃ? 34 ᑭᑖ ᑲᔥᑭᑑᓐ ᐃᓇ ᒋᑲᓅᑕᒪᐸᓐ ᐗᑸᓐ, ᒋᐐᑕᒪᐸᓐ ᐋᑎ ᑫᔑ ᑭᒥᐗᓄᑫᒪᑲᑭᐸᓀᓐ? 35 ᑮᓐ ᐃᓇ ᑳᐅᓀᑕᒪᓐ ᐋᓃᑎ ᑫᓂᔑ ᐙᑌᓭᒃ? ᒦ ᓇᐃ ᑫᐃᑯᔭᓐ, ᐋᔕ ᐅᒫ ᓂᑕᔮᒥᓐ ᐁᐐ ᑑᑕᒫᕽ ᐁᑭᑐᔭᓐ? 36 ᐊᐌᓀᓐ ᐃᑕᔥ ᑳᐃᔑᑑᒡ ᐅᑌᐃᒫ ᒋᑲᑮᑖᐌᑕᒨᒪᑲᓂᓂᒃ? ᐊᐌᓀᓐ ᑳᐃᔑᑑᒡ ᓈᑲᑕᐌᒋᑲᓐ ᒋᓂᓯᑐᑕᒨᒪᑲᓂᓂᒃ᙮ 37 ᐊᐌᓀᓐ ᐃᑕᔥ ᑫᑌ ᑲᑮᑖᐌᑕᑭᐸᓐ ᒋᑲᔥᑭᑑᐸᓐ ᒋᐊᑭᑕᕽ ᐗᑸᓐ? ᐊᐌᓀᓐ ᑲᔦ ᑫᐅᐱᒣᓇᑭᐸᓐ ᐗᑸᓐ ᑫᐅᒋ ᑭᒥᐗᓂᓂᑭᐸᓐ, 38 ᑭᒥᐗᓂᓂᒃ ᑫᓂ ᐅᒋ ᒪᔥᑲᐙᓂᒃ ᐹᔥᑭᓀᑲᒥᒃ ᒋᐸᐲᒀᑾᑣᓂᒃ᙮ 39 ᑭᑲᑴ ᒥᑲᒧᐙᓐ ᐃᓇ ᑫᒦᒋᐙᒡ ᒥᔑᐱᔑᐗᒃ, ᒋᑌᐐᓯᓂᐙᒡ ᒥᔑᐱᔒᓴᒃ, 40 ᐊᐲ ᑯᑕ ᑮᑳᓱᐙᒡ ᐅᐙᔑᐙᕽ, ᑮᐊᑲᑑᐙᒡ ᑲᔦ ᐁᔑ ᓴᑭᐊᔮᓂᒃ? 41 ᐊᐌᓀᓐ ᐃᑕᔥ ᐁᔕᒫᒡ ᑳᑳᑭᐗᐞ ᑮᐸᐹᒥ ᐊᔮᓂᒡ ᐁᓅᑌᔅᑲᑌᓂᒡ, ᑳᑳᑭᐌᓴᒃ ᑮᑲᓅᔑᐙᒡ ᐁᐐ ᐐᓯᓂᐙᒡ? ᐃᑭᑐ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society