Coop 3 - ᐅᒋᐺ ᑭᒋᒪᓯᓇᐃᑲᓐᒎᑉ ᑳᑮᐃᔑᒥᒌᓇᐌᓯᒡ 1 ᑫᑲᐲ ᑕᔥ ᒎᑉ Job ᑮᐅᒋ ᒫᒌ ᑲᑭᑐ, ᐁᑮ ᒪᒋᐃᑕᕽ ᐊᐲ ᐁᑮᔑᑲᓂᓂᒃ ᑳᑮ ᓂᑖᐎᑭᑯᐸᓀᓐ᙮ 2 ᒦ ᓴ ᐅᐌᓂ ᑳᐃᑭᑐᒡ, 3 ᑕᑲ ᑕᐗᓃᑫᓄᑌ ᐊᐲ ᐁᑮᔑᑲᒃ ᑳᑮ ᓂᑖᐎᑭᔮᓐ, ᐃᐃ ᑲᔦ ᐁᑎᐱᑲᒃ ᑮᐃᑭᑐᓈᓂᐗᓂᑯᐸᓀᓐ, ᑸᐎᓭᔅ ᓴ ᑮᓂᑖᐎᑭ᙮ 4 ᐃᐃᐌ ᑳᑮ ᑮᔑᑲᓄᑯᐸᓀᓐ ᑕᑲ ᑕᑲᔥᑮᑎᐱᑭᒋᑳᑌ, ᑕᑲ ᑲᔦ ᑭᔐᒪᓂᑑ ᐃᔥᐱᒥᕽ ᑳᐊᔮᒡ ᑳᐐᓐ ᐅᑲ ᐸᐹᐱᓯᔅᑫᑕᓰᓐ᙮ ᑕᑲ ᑲᔦ ᑳᐐᓐ ᑕᐙᓭᔮᓯᓅᓐ᙮ 5 ᑕᑲ ᑲᔦ ᐃᐃ ᐊᐲ ᐁᑮᔑᑲᒃ ᑳᑮ ᓂᑖᐎᑭᐙᐹᓀᓐ ᑕᑲᔥᑮᑎᐱᑲᓐ, ᐐᑫ ᑕᓰᐱᔅᑳᑌᑖᑾᓐ, ᑕᑲ ᑲᔦ ᐗᐐᑫ ᑕᓂᑾᑾᓐ, ᑕᑲ ᑲᔦ ᑳᑲᔥᑮᑎᐱᑲᒃ ᐅᑲ ᔖᑰᒋᔥᑳᓐ ᑳᐙᓭᔮᓂᒃ᙮ 6 ᐃᐃ ᑕᔥ ᐁᑎᐱᑲᒃ ᐊᐲ ᑳᑮ ᓂᑖᐎᑭᐙᐹᓀᓐ, ᑕᑲ ᐃᐃᒫ ᑳᔑ ᑲᔥᑮᑎᐱᑲᒃ ᑕᔑ ᐗᓂᓭ᙮ ᑕᑲ ᑲᔦ ᑳᐐᓐ ᑕᑕᑾᑭᑌᓯᓅᓐ ᐃᐃᒫ ᑳᔑ ᑕᑾᑭᑌᑭᓐ ᒥᓂᒃ ᐃᓂ ᑳᑎᐱᑲᑭᓐ ᐯᔑᑯᐱᐴᓐ᙮ ᑕᑲ ᑲᔦ ᑳᐐᓐ ᐃᐃᒫ ᐁᑕᓱᑮᓯᓱᕽ ᑕᔑ ᑕᑾᑭᑌᓯᓅᓐ᙮ 7 ᐃᐃ ᓴ ᐁᑎᐱᑲᒃ ᑳᑮ ᓂᑖᐎᑭᐙᐹᓀᓐ, ᑕᑲ ᐐᑫ ᑕᒪᔕᔥᒀᐌᑖᑾᓐ, ᑕᑲ ᑲᔦ ᑳᐐᓐ ᑕᒥᓉᑕᒧᐗᓯᓈᓂᐗᓐ᙮ 8 ᑕᑲ ᐃᑭ ᑳᒪᒫᑖᐎᓯᐙᒡ ᐅᑲ ᒪᒋᐃᑖᓈᐙ ᐃᐃ ᐁᑮᔑᑲᓂᓂᒃ ᑳᑮ ᓂᑖᐎᑭᐙᐹᓀᓐ᙮ ᐃᑭᐌᓂᐗᒃ ᑳᑲᔥᑭᐋᐙᒡ ᑭᒋ ᐅᑳᑏᑭᓀᐱᑰᓐ ᐁᐙᑲᐎᐋᐙᒡ᙮ 9 ᑕᑲ ᑲᔦ ᑭᔐᐹ ᐗᓇᑯᔕᒃ ᑳᐐᓐ ᑕᓵᑳᓯᑫᓰᐗᒃ, ᑳᐐᓐ ᑲᔦ ᑕᓀᐱᒋ ᐲᑖᐸᓯᓅᓐ᙮ ᑕᑲ ᑲᔦ ᑳᐐᓐ ᐃᐃ ᑳᑎᐱᑲᒃ ᑕᐐ ᐲᑖᐸᓯᓅᓐ᙮ 10 ᑕᑲ ᑕᒪᒋᐃᒋᑳᑌ ᑳᑮ ᑎᐱᑲᓄᑯᐸᓀᓐ ᑮᓂᑖᐎᑭᐙᐹᓀᓐ᙮ ᒦ ᐄᑐᒃ ᐃᐃ ᐊᐲ ᑳᑮ ᐃᔑ ᒧᔐᓂᑰᐙᐹᓀᓐ ᑳᔑ ᐊᔮᒃ ᒫᔑᓭᐎᓐ, ᒫᓀᑕᒧᐎᓐ ᑲᔦ᙮ 11 ᐊᐯᔥ ᐃᓈ ᐲᒐᔭᐄ ᓂᒫᒫ ᐅᒥᓴᑖᕽ ᐃᔑ ᓂᐳᔮᐹᓐ, ᑯᒫ ᑲᔦ ᑮᓂᑖᐎᑭᔮᓐ ᐃᔑ ᓂᐳᔮᐹᓐ᙮ 12 ᑳᓇᑲ ᐌᑯᑐᑴᓂᓂ ᓂᒫᒫ ᑳᐅᒋ ᓂᑖᐎᑭᐃᑯᐸᓀᓐ, ᐌᑯᑐᑴᓂᓂ ᑲᔦ ᑳᐅᒋ ᓅᓂᐃᑯᐸᓀᓐ᙮ 13 ᑮᔥᐱᓐ ᓴ ᐃᐃ ᐊᐲ ᐃᔑ ᓂᐳᔮᐹᓐ, ᐃᓇᔥᑫ ᐋᔕ ᐅᐅ ᐃᔑ ᐊᐲ ᓂᑖᑮ ᐱᒥᔑᓐ, ᑳᐐᓐ ᓂᑖᑮ ᓅᑖᑎᓰ᙮ ᒋᑮ ᓇᓂᐹᔮᐹᓐ, ᒋᑮ ᐊᔭᓉᔑᓈᐹᓐ ᐃᑕᔥ ᑲᔦ᙮ 14 ᓂᑖᑮ ᐐᑖᑯᔑᓅᒫᒃ ᑳᑮ ᑭᒋᐅᑭᒫᐎᐙᐸᓐ, ᐃᑭ ᑲᔦ ᑳᑮ ᒫᒦᓄᒥᐌᐙᒡ ᐅᐅᒫ ᐊᑮᕽ, ᐃᑭᐌᓂᐗᒃ ᑲᔦ ᑳᑮ ᓂᑖ ᐅᔑᑕᒫᓱᐙᒡ ᑳᑮ ᐲᑯᔥᑳᓂᑭᓐ ᑭᒋ ᐃᔑ ᒫᒌᐎᓇᓐ᙮ 15 ᑯᒫ ᑲᔦ ᐃᑭ ᓂᑖᑮ ᐐᑖᑯᔑᓅᒫᒃ ᑳᐐ ᐊᓂ ᑭᒋᐅᑭᒫᐎᐙᐸᓐ ᑳᑮ ᐊᔮᐙᐙᒡ ᐅᓵᐎ ᔔᓂᔮᓐ, ᑳᑮ ᒨᔥᑭᓇᐋᐙᒡ ᐙᐹᐱᑯ ᔔᓂᔮᓐ ᐅᐙᑳᐃᑲᓂᐙᕽ᙮ 16 ᑯᒫᔥ ᑲᔦ ᓂᑖᑮ ᐃᔑᓈᑯᔅ ᐊᐱᓅᒌᔕᒃ ᑎᓄ ᑳᐱᒫᑎᓯᓯᒀ ᑳᓵᑭᑖᐱᓀᐙᒡ ᐊᐱᓅᒌᔕᒃ ᐐᑳ ᑳᐙᐸᑕᓯᒀ ᑳᐙᓭᔮᓂᒃ᙮ 17 ᐌᑎ ᓴ ᑳᔑ ᐊᔮᐙᒡ ᑳᓂᐳᐙᒡ, ᒦ ᓴ ᐃ ᐌᑎ ᐅᒪᒑᑎᓰᒃ ᑫᔑ ᐴᓂ ᒪᒋᑑᑖᑫᐙᒡ, ᒦ ᑲᔦ ᐌᑎ ᑳᐊᔦᑯᓯᐙᒡ ᑫᔑ ᐊᓉᐱᐙᒡ᙮ 18 ᒦ ᓴ ᑲᔦ ᐌᑎ ᑕᑯᓂᑲᓇᒃ ᑳᒥᓉᑕᒧᐙᒡ, ᑳᐐᓐ ᑲᔦ ᐊᐗᔑᒣ ᐅᓅᑕᐙᓯᐙᐙᐞ ᑳᑕᑯᓂᑯᐙᒡ ᒋᑭᒋ ᑲᓅᓂᑯᐙᒡ᙮ 19 ᒦ ᓴ ᑲᔦ ᐌᑎ ᐁᔮᐙᒡ ᑳᑭᒋ ᐃᓀᑖᑯᓯᐙᒡ, ᐃᑭ ᑲᔦ ᑳᑭᒋ ᐃᓀᑖᑯᓯᓯᒀ᙮ ᐃᑭ ᓴ ᑲᔦ ᑳᑲᒀᑕᑲᓄᑮᐃᑣ ᑳᐐᓐ ᒦᓇᐙ ᐅᑎᐯᓂᒥᑯᓰᐙᐞ ᐅᑑᑭᒫᒥᐙᐞ᙮ 20 ᐌᑯᓀᓂᓂ ᑕᔥ ᒫᓄ ᐃᓂᓂᐗᒃ ᐌᒋ ᒦᓂᑣ ᐱᒫᑎᓯᐎᓐ ᑮᑲᒀᑕᑭ ᐱᒫᑎᓯᐙᒡ? ᐃᑭ ᑕᔥ ᑲᔦ ᐌᒋ ᒦᓂᑣ ᐱᒫᑎᓯᐎᓐ ᑳᑲᒀᑕᑭᑑᐙᒡ ᐅᑕᒑᑯᐙᕽ? 21 ᐃᑭ ᑕᔥ ᑳᐊᑕᐌᑕᒧᐙᒡ ᒋᓂᐳᐙᒡ, ᑳᐐᓐ ᓴ ᓂᐳᓰᐗᒃ, ᓇᐗᒡ ᐁᐊᑐᓀᐊᒧᐙᒡ ᓂᐳᐎᓐ, ᐊᐲᒡ ᐐᓐ ᐌᓅᑎᓯᐎᓐ᙮ 22 ᐹᓂᒫ ᓴ ᑮᓂᐳᐙᒡ ᑮᐃᔥᒀ ᓂᑾᐅᑣ ᒦ ᓴ ᐃ ᐸᔦᔥ ᒋᒥᓉᑕᒧᐙᒡ᙮ 23 ᐌᑯᓀᓂᓂ ᑕᔥ ᐌᒋ ᒦᓂᓐᒡ ᐱᒫᑎᓯᐎᓐ ᐊᐊ ᐃᓂᓂ ᑳᑭᑫᓂᒫᓯᐎᓐᒡ ᐋᑎ ᐃᓇᑫ ᐁᔑ ᒫᒌᔥᑳᒡ, ᑭᔐᒪᓂᑑᓐ ᑳᐙᑳᔥᑳᑯᒡ? 24 ᒋᑮ ᐐᓯᓂᔮᐹᓐ ᐃᑕᔥ, ᒣᔥᑾᒡ ᐃᓴ ᓂᑮ ᒨᑯᓀ, ᑖᐱᔥᑰ ᓂᐱ ᑳᐱᒥᒋᐗᕽ ᒦ ᐃ ᐁᔑᓈᑾᒃ ᑮᒪᐎᔮᓐ᙮ 25 ᐃᐃ ᓴ ᑳᑮ ᑯᑕᒫᐹᓐ ᓂᑮ ᐅᑎᓯᑰᓐ, ᐃᐃ ᑲᔦ ᑳᑮ ᑲᒀᓂᓴᑫᑕᒫᐹᓐ, ᒦ ᐃ ᑳᐃᔑᐊᔮᔭᓐ᙮ 26 ᑳᐐᓐ ᓴ ᐱᓵᓐ ᓂᑕᔮᓰ, ᑳᐐᓐ ᑲᔦ ᓂᑯᔅᒀᐙᑌᑕᓰ᙮ ᑳᐐᓐ ᑲᔦ ᓂᑕᔮᓰᓐ ᐊᓉᐱᐎᓐ, ᒦᔦᑕᑯ ᐗᓯᑖᐎᓭᐎᓐ ᐁᔮᔮᓐ, ᑮᐃᑭᑐ ᒎᑉ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society