Coop 1 - ᐅᒋᐺ ᑭᒋᒪᓯᓇᐃᑲᓐᒎᑉ ᑮᓅᒋᐃᑯᒡ ᐅᓇᓇᑳᓂᐌᓐ 1 ᑮᐊᔮ ᓴ ᐃᓂᓂ ᐊᑮᕽ ᐊᔅ Uz ᑳᑮ ᐃᔑᓂᑳᑌᓂᒃ, ᒎᑉ Job ᐁᑮ ᐃᔑᓂᑳᓱᒡ᙮ ᑳᐐᓐ ᓴ ᐊᐙᒡ ᑫᑰᓐ ᑮᐃᔑ ᐊᓈᒣᑖᑯᓯᓰ᙮ ᐐᑫ ᑲᔦ ᑮᑾᔭᒀᑎᓯ, ᐅᑮ ᑯᑖᓀᓂᒫᓐ ᑲᔦ ᑭᔐᒪᓂᑑᓐ᙮ ᑳᐐᓐ ᑲᔦ ᐅᑮ ᐸᐹᐱᓯᔅᑫᑕᓰᓐ ᒪᒋᑫᑰᓐ᙮ 2 ᑮᓃᔣᒋᐗᐞ 7 ᐅᑯᓯᓴᐞ, ᐅᑖᓂᓴᐞ ᑮᓂᓯᐗᐞ 3᙮ 3 ᓃᐱᐗᐞ ᓴ ᑲᔦ ᐅᑮ ᑎᐯᓂᒫᐞ ᐊᐗᑳᓇᐞ᙮ ᓃᔣᒋᕽ ᒥᑖᔂᒃ 7,000 ᒫᓇᒑᓂᔕᐞ, ᓂᓯᕽ ᒥᑖᔂᒃ 3,000 ᐱᒀᐎᑲᓀ ᒥᑕᑎᒨᐞ, ᒥᑖᔂᒃ 1,000 ᐱᔑᑭᐗᐞ, ᓈᓍᒃ 500 ᓅᔐ ᒫᔑᒥᑕᑎᒨᐞ᙮ ᑮᐹᑏᓄᐗᐞ ᑲᔦ ᐅᑕᓄᑮᐋᑲᓇᐞ᙮ ᐗᐊ ᓴ ᐃᓂᓂ ᐐᑫ ᒫᐗᒡ ᑮᑭᒋ ᐌᓅᑎᓯ ᐙᐸᓄᕽ ᐃᓇᑫ ᐊᐲᒡ ᐐᓐ ᐃᐃ ᑯᑕᒃ ᐃᓂᓂᐗᐞ᙮ 4 ᒎᑉ ᑕᔥ ᐅᑯᓯᓴᐞ ᑮᓂᑖ ᒣᒣᔥᑾᒋ ᐐᑾᑎᐗᐞ, ᐁᑮ ᐊᑐᒫᓂᒡ ᐅᑕᐌᒫᓂ ᐁᑮ ᐐᒋ ᐐᓯᓃᒥᑯᓂᒡ, ᐁᑮ ᐐᒋ ᒥᓂᑴᒥᑯᓂᒡ ᑲᔦ᙮ 5 ᐊᐲ ᑕᔥ ᐁᑮ ᐃᔑᓭᓂᒃ ᐁᐃᔥᒀ ᐐᑾᑎᓈᓂᐗᓂᓂᒃ, ᒎᑉ ᓴ ᐐᐸ ᑭᑭᔐᑉ ᑮᐗᓂᔥᑳ᙮ ᒦᔥ ᑳᑮ ᐸᑭᑎᓈᓲᑕᒪᐙᒡ ᑳᐊᒀᑭᓯᑳᑌᓂᑭᓐ ᑎᓄ ᒥᓂᒃ ᓴ ᑯ ᑳᑮ ᑕᔑᓂᒡ, ᐁᑮ ᐃᓍᑕᕽ ᐁᑮ ᐯᑭᐋᒡ ᐅᓃᒑᓂᓴᐞ᙮ ᒦ ᓴ ᐃ ᑳᐃᑭᑐᒡ, ᒫᑭᔖ ᓴ ᑳᒪᒋᐃᔑᒋᑫᐙᑴᓐ, ᒫᑭᔖ ᑲᔦ ᑳᒪᒋᐃᓇᐱᓀᒫᐙᑴᓐ ᑭᔐᒪᓂᑑᓐ ᐅᑌᐃᐙᕽ᙮ ᒦ ᓴ ᐅ ᒎᑉ ᑳᓂᑖ ᐃᔑᒋᑫᒡ᙮ 6 ᐊᐲ ᑕᔥ ᐁᐃᔑ ᑮᔑᑲᓂᓂᒃ ᐃᑭ ᑭᒋᑮᔑᑯ ᐊᐎᔭᒃ ᑮᓂᑖ ᐊᑕ ᐙᐸᒫᐙᒡ ᑭᔐᒪᓂᑑᓐ ᐁᓈᓴᒦᓂᒡ, ᑫᐐᓐ ᓴ ᓭᑕᓐ ᐅᓇᓇᑳᓂᐌ ᑮᐱ ᑕᑸ᙮ 7 ᒦᑕᔥ ᑳᑎᐯᒋᑫᒡ ᑳᐃᓈᒡ ᐅᓇᓇᑳᓂᐌᓐ, ᐋᑎ ᑮᓐ ᐃᓈ ᑳᐱᐅᒋ ᑕᑯᔑᓇᓐ? ᐅᑮ ᐃᔑ ᑲᑴᒋᒫᓐ᙮ ᒦᔥ ᐅᐅ ᐅᓇᓇᑳᓂᐌᓐ ᑳᐃᔑ ᓇᑴᑖᑯᒡ, ᐌᑎ ᓴ ᓂᐱ ᐅᒌ ᐊᑮᕽ ᑳᔑ ᓂᑖ ᐸᐹᒧᓭᔮᓐ, ᑳᔑ ᓂᑖ ᐋᔮᔕᐎᔥᑳᔮᓐ, ᐅᑮᐃᑰᓐ᙮ 8 ᒦᑕᔥ ᑳᑎᐯᒋᑫᒡ ᑳᑮᐃᓈᒡ ᐅᓇᓇᑳᓂᐌᓐ, ᑭᑑᒋ ᓈᓈᑲᑕᐙᐸᒫ ᓇ ᓂᑕᓄᑮᐋᑲᓐ ᒎᑉ? ᑳᐐᓐ ᓴ ᐊᐎᔭ ᐃᐃᒫ ᐊᑮᕽ ᐃᔑᐊᔮᓰᐗᓐ ᐃᐃ ᑳᐃᔑᐊᔮᒡ᙮ ᑳᐐᓐ ᐊᐙᒡ ᑫᑰᓂᓂ ᐃᔑ ᐊᓈᒣᑖᑯᓯᓰ, ᐐᑫ ᑲᔦ ᑾᔭᒀᑎᓯ᙮ ᐅᑯᑖᓀᓂᒫᓐ ᑲᔦ ᑭᔐᒪᓂᑑᓐ, ᑳᐐᓐ ᑲᔦ ᐅᐸᐹᐱᓯᔅᑫᑕᓰᓐ ᒪᒋᑫᑰᓐ, ᐅᑮᐃᓈᓐ᙮ 9 ᒦᔥ ᐅᐅ ᐅᓇᓇᑳᓂᐌᓐ ᑳᐃᔑ ᓇᑴᑖᑯᒡ, ᐃᔑ ᐊᓂᔖ ᓇ ᒎᑉ ᐅᑖ ᑯᓵᓐ ᑭᔐᒪᓂᑑᓐ? 10 ᒦ ᐄᑐᒃ ᐁᑑᑕᐗᒡ ᐁᐙᑳ ᒣᓂᑲᓈᑯᑲᑕᐗᒡ ᐁᑲᓇᐌᓂᒪᒡ᙮ ᐃᐃ ᑲᔦ ᑲᑭᓇ ᐅᑖᐎᓂᕽ ᑳᐅᒌᓂᒡ, ᑲᑭᓇ ᑲᔦ ᐅᑕᔭᐄᒪᓐ, ᒥᓯᐌ ᓴ ᑯ ᑭᑑᒋ ᑲᓇᐌᓂᒫ᙮ ᑭᒥᓄᓭᐋ ᑲᔦ ᐋᓃᓐ ᐃᑯ ᐁᔑᒋᑫᒡ, ᐅᑕᐗᑳᓇᐞ ᑲᔦ ᐊᐗᔑᒣ ᐁᐊᓂ ᐹᑏᓄᓂᒡ ᐃᐃᒫ ᐅᑕᑮᒥᕽ᙮ 11 ᑕᑲ ᓴ ᐅᑖᐱᓇᒪᐤ ᑲᑭᓇ ᑫᑰᓂᓂ ᑳᐊᔮᒡ, ᐃᓇᔥᑫ ᑕᔥ ᑭᑲ ᒪᒋᐃᓈᐱᓀᒥᒃ ᐁᓈᓴᒦᐗᒡ! ᐅᑮᐃᑰᓐ᙮ 12 ᒦᔥ ᑳᑎᐯᒋᑫᒡ ᑳᐃᓈᒡ ᐅᓇᓇᑳᓂᐌᓐ, ᐊᐤ, ᑲᑭᓇ ᓴ ᑫᑰᓂᓂ ᑳᐊᔮᒡ ᑭᑲ ᑲᔥᑭᑖᐙᓐ ᐙᑑᑕᒧᐗᒡ ᒋᑑᑕᒧᐗᒡ᙮ ᑫᑯ ᑕᔥ ᐐᓐ ᐸᐹᒣᑕᒧᐙᑫᓐ ᐊᐊ ᐃᓂᓂ ᐅᐱᒫᑎᓯᐎᓐ, ᒦ ᐃ ᑳᐃᓈᒡ᙮ ᒦᔥ ᐅᓇᓇᑳᓂᐌᓐ ᑳᐃᔑ ᓇᑲᓂᑯᒡ᙮ ᒎᑉ ᐅᓃᒑᓂᓴᐞ ᑮᒑᑭᐃᒥᓐᒡ, ᐅᐌᓅᑎᓯᐎᓐ ᑲᔦ ᑮᐅᑖᐱᓇᒪᐎᓐᒡ 13 ᐋᐱᑎᕽ ᓴ ᐁᑮᔑᑲᓂᓂᒃ ᒎᑉ ᐅᓃᒑᓂᓴᐞ ᑮᑕᔑ ᐐᑾᑎᐗᐞ ᐅᑖᐎᓂᓃᕽ ᐃᓂ ᒫᐗᒡ ᓭᓰᑭᓯᓂᒡ ᐅᑯᓯᓴᓐ᙮ 14 ᐊᐎᔭᓐ ᑕᔥ ᑮᐲᑖᒋᒧᐸᑑᐗᓐ ᒎᑉ ᐁᔑᐊᔮᒡ ᐁᑮ ᐱᐃᑯᒡ, ᐃᑭ ᓴ ᐱᔑᑭᐗᒃ ᒣᒀ ᒥᔕᐗᑲᒥᒃ ᐁᐊᓄᑮᐊᑭᑣ, ᒫᔑᒥᑕᑎᒨᒃ ᑲᔦ ᐯᔓ ᐃᐃᒫ ᐁᑕᔑ ᐐᓯᓂᐙᒡ᙮ 15 ᐃᑭ ᓴ ᓭᐲᔭᓐ Sabeans ᑳᑎᓄᐎᐙᒡ ᐃᓂᓂᐗᒃ ᓂᑮ ᒦᑳᓂᑯᓈᓂᒃ, ᐅᑮ ᒫᒌᓈᐙᐞ ᑲᔦ ᐊᐗᑳᓇᐞ᙮ ᐅᑮ ᓂᓵᐙᐞ ᑲᔦ ᐊᓄᑮᐋᑲᓇᐞ, ᓃᓐ ᑕᔥ ᐁᑕ ᓂᑮ ᔖᐾ ᒋᐱ ᑎᐹᒋᒧᔮᓐ, ᐅᑮ ᐱᐃᑰᓐ᙮ 16 ᒣᒀ ᑕᔥ ᐁᑳᑮᑭᑐᓂᒡ ᐃᓂ ᑳᑮ ᐲᑖᒋᒧᓂᒡ, ᒦᓇᐙ ᓴ ᐯᔑᒃ ᑯᑕᒃ ᑮᐸᑲᒥᐸᑑᐗᓐ ᐁᑮ ᐃᓈᒋᒧᓂᒡ, ᑮᔑᑯᕽ ᓴ ᐃᔥᑯᑌ ᑮᐱᐅᒋ ᓈᔑᓭ, ᒦᔥ ᐃᐃᒫ ᒫᓇᒑᓂᔕᒃ, ᐊᓄᑮᐋᑲᓇᒃ ᑲᔦ ᑳᐃᔑ ᐊᒀᑭᓱᐙᒡ᙮ ᓃᓐ ᑕᔥ ᐁᑕ ᓂᑮ ᔖᐾ ᒋᐐᑕᒪᐎᓈᓐ ᐋᓃᓐ ᑳᐃᓇᑲᒥᑲᒃ, ᑮᐃᑭᑐᐗᓐ᙮ 17 ᒣᒀ ᑕᔥ ᐁᑳᑮᑭᑐᓂᒡ ᐃᓂ, ᒦᓇᐙ ᓴ ᐯᔑᒃ ᑯᑕᒃ ᐊᐎᔭᓐ ᑮᐸᑲᒥᐸᑑᐗᓐ ᒎᑉ ᐁᔑᐊᔮᒡ ᐁᑮᐃᑯᒡ, ᑮᓂᓶᐙᓇᑭᓯᐗᒃ ᓴ ᐃᓂᓂᐗᒃ ᑳᓬᑏᔭ Chaldea ᐊᑮᕽ ᐌᒌᐙᒡ ᐁᑮ ᐱ ᑕᑯᔑᓄᐙᒡ ᐁᑮ ᒫᒌᓈᐙᒡ ᐱᒀᐎᑲᓀ ᒥᑕᑎᒨᐞ, ᒦᑕᔥ ᑲᔦ ᑳᐃᔑ ᓂᓵᐙᒡ ᐊᓄᑮᐋᑲᓇᐞ᙮ ᓃᓐ ᐃᓴ ᐁᑕ ᓂᑮ ᔖᐾ ᒋᐐᑕᒪᐎᓈᓐ ᐋᓃᓐ ᑳᐃᓇᑲᒥᑲᒃ, ᐅᑮᐃᑰᓐ᙮ 18 ᒋᑆ ᑮᔖᒋᒧᓂᒡ ᑕᔥ ᐃᓂ, ᐋᔕ ᒦᓇᐙ ᑯᑕᒃ ᐊᐎᔭᓐ ᑮᐸᑲᒥᐸᑑᐗᓐ ᐅᐅ ᐁᑮᐃᑯᒡ, ᑭᓃᒑᓂᓴᒃ ᓴ ᒣᒀ ᐁᐐᑾᑎᐙᒡ, ᐁᐐᓯᓂᐙᒡ, ᐁᒥᓂᑴᐙᒡ ᑲᔦ ᐌᑎ ᐅᑖᐎᓂᕽ ᒫᐗᒡ ᑳᓴᓰᑭᓯᒡ; 19 ᐐᑫ ᓴ ᑮᑭᒋ ᐸᑲᒫᓂᒪᓐ, ᑳᔑ ᐸᔥᒀᒃ ᐁᑮ ᐅᑖᓂᒪᒃ᙮ ᒦᑕᔥ ᑳᑮ ᑳᒋᒋᐌᐸᓯᕽ ᐃᐃ ᐙᑳᐃᑲᓐ ᑳᔑ ᑲᑮᑫᔮᒃ, ᒦᔥ ᐃᐃ ᑳᐃᔑ ᑲᐎᓭᒃ᙮ ᑲᑭᓇ ᑕᔥ ᐃᐃᒫ ᐲᑎᒃ ᐅᔥᑲᔭᐋᒃ ᑳᑮ ᐊᔮᐙᒡ ᑮᐋᐱᓯᑰᓱᐗᒃ᙮ ᓃᓐ ᑕᔥ ᐁᑕ ᓂᑮ ᔖᐾ, ᒦᔥ ᐅᐅ ᑳᐅᒋ ᐐᑕᒪᐎᓈᓐ, ᐅᑮᐃᑰᓐ᙮ 20 ᒦᑕᔥ ᒎᑉ ᑳᐃᔑ ᐸᓯᑸᒡ ᐁᑮ ᑖᔥᑮᑭᐱᑑᒡ ᐅᑲᔥᑮᑮᐎᓐ᙮ ᒦᔥ ᑲᔦ ᑳᐃᔑ ᑲᔥᑭᐹᑑᒡ ᐅᑎᒀᓐ ᑳᐊᐲᒋ ᒥᒌᓇᐌᓯᒡ ᐁᑮ ᐊᓂᒥᑯᑖᒡ ᒥᑕᑲᒥᒃ᙮ ᑭᔐᒪᓂᑑᓐ ᑕᔥ ᐅᑮ ᐊᓇᒥᐁᑕᐙᓐ᙮ 21 ᒦᑕᔥ ᐅᐅ ᑳᐃᑭᑐᒡ, ᑳᐐᓐ ᓴ ᑫᑰᓐ ᓂᑮ ᐊᔮᓰᓐ ᑮᓂᑖᐎᑭᔮᓐ, ᒦ ᑲᔦ ᐃᐃ ᓇᑫ ᑫᔑ ᓂᐳᔮᓐ᙮ ᑳᑎᐯᒋᑫᒡ ᐅᔕ ᑫᑰᓂᓂ ᒦᑭᐌ, ᐐᓐ ᑲᔦ ᑫᑰᓂᓂ ᐅᑖᐱᓇᒫᑫ᙮ ᑕᑲ ᓴ ᑳᑎᐯᒋᑫᒡ ᐅᐐᓱᐎᓐ ᑕᒦᑴᒋᐌᑖᑾᓂᓂ, ᑮᐃᔑ ᐊᓇᒥᐋ᙮ 22 ᐅᐅ ᑕᔥ ᑲᑭᓇ ᒎᑉ ᐁᑮ ᐃᔑᓭᒡ, ᑳᐐᓐ ᓴ ᑮᒪᒋᑑᑕᓰ, ᑳᐐᓐ ᑲᔦ ᑭᔐᒪᓂᑑᓐ ᐅᑮ ᐊᓈᒥᒫᓰᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society