2 ᑭᒋᐅᑭᒫᒃ 6 - ᐅᒋᐺ ᑭᒋᒪᓯᓇᐃᑲᓐᐙᑳᑾᑣᐱᒃ ᑮᐋᐳᔥᑲᒋᐲᓭᒃ 1 ᐃᓬᐋᐃᔕ Elisha ᓴ ᐅᑮᐃᑰᐞ ᐌᑸᓄᓂᒡ ᐅᑲᓅᑕᒫᑫᐞ, ᐅᓵᒻ ᓴ ᐊᑳᓯᓐ ᐃᐃᒫ ᑳᔑ ᐐᒋᑖᒥᑰᔭᓐ᙮ 2 ᑕᑲ ᐸᑭᑎᓂᔑᓈᒻ ᒋᐃᔖᔮᕽ ᒞᕒᑕᓐ Jordan ᓰᐱᕽ ᐁᑕᔑᔮᕽ ᒋᒪᓈᑎᑴᔮᕽ ᑭᒋ ᒥᑎᑰᒃ, ᒋᐅᔑᑕᒫᓱᔮᕽ ᑫᐃᔑᑖᔮᕽ, ᐁᑮᐃᑯᒡ᙮ ᐊᐤ, ᐱᓵᓐ ᐃᔖᒃ, ᐅᑮ ᐃᓈᐞ᙮ 3 ᒦᑕᔥ ᐯᔑᒃ ᑳᐃᑯᒡ, ᑕᑲ ᐐᒌᐎᔑᓈᒻ ᑭᑕᓄᑮᐋᑲᓇᒃ ᐁᑎᓄᐎᔮᕽ᙮ ᒦᔥ ᑳᐃᓈᒡ ᐁᐐ ᐐᒌᐙᒡ᙮ 4 ᒦᑕᔥ ᐃᐃ ᑳᐊᓂ ᐃᔑ ᐐᒌᐙᒡ᙮ ᐊᐲ ᓴ ᐌᑎᑕᒧᐙᒡ ᒞᕒᑕᓐ ᓰᐱᕽ, ᒦ ᓴ ᑳᐃᔑ ᒫᒌ ᑲᐗᐙᓂᒡ ᒥᑎᑰᐞ᙮ 5 ᐯᔑᒃ ᐃᑕᔥ ᐁᑲᐗᐙᓂᒡ ᒥᑎᑰᓐ, ᑮᑮᒋᒀᑯᓭᓂ ᐙᑳᑾᑣᐱᑯᓂ, ᐁᑮ ᐸᑯᐲᓭᓂᒃ᙮ ᒦᔥ ᑳᐃᔑ ᔖᑯᐌᓂᒡ, ᐋ, ᓂᑑᑭᒫᒻ! ᓂᑕᐎᐋᓱᓐ ᓴ ᐃᐃ! ᑮᐃᑭᑐᐗᓐ᙮ 6 ᐃᓬᐋᐃᔕ ᓴ ᑭᔐᒪᓂᑑᓐ ᐌᑎᓂᓃᒥᑯᒡ ᐅᑮ ᐃᔑ ᑲᑴᒋᒫᓐ, ᐋᑎ ᑳᐃᔑ ᐸᑯᐲᓭᒃ? ᒦᔥ ᑳᐃᔑ ᑭᑭᓄᐊᒫᑯᒡ ᐋᑎ ᑳᐃᔑ ᐸᑯᐲᓭᓂᒃ᙮ ᐃᓬᐋᐃᔕ ᓴ ᐅᑮ ᑮᔥᑲᐋᓐ ᒥᑎᒃ ᐁᑮ ᐃᔑ ᐸᑯᐲ ᐌᐱᓇᕽ ᐃᐃᒫ᙮ ᒦᑕᔥ ᑳᑮ ᐋᐳᔥᑲᒋᐲᓭᓂᒃ ᐃᐃ ᐙᑳᑾᑣᐱᒃ᙮ 7 ᒦᔥ ᐅᐅ ᑳᐃᓈᒡ, ᐊᐤ ᑕᔥ ᐅᑖᐱᓇᓐ᙮ ᒦᔥ ᑳᐃᔑ ᓃᒥᓂᑫᓂᓂᒡ ᐁᑮ ᐅᑖᐱᓇᒥᓂᒡ᙮ ᓰᕒᐃᔭ ᔑᒫᑲᓂᔕᒃ ᑮᔖᑰᒋᐃᑣ 8 ᐊᐊ ᑕᔥ ᓰᕒᐃᔭᐎ ᑭᒋᐅᑭᒫ Syria ᐅᑮ ᒦᑳᓈᐞ ᐃᔅᕒᐃᔭᓬᐊᐞ Israel᙮ ᒦᔥ ᑳᐃᔑ ᑲᑴᒋᒫᒡ ᐅᑖᓂᑫᐎᑭᒫᒪᐞ, ᐌᑎ ᓴ ᐱᑯ ᐋᑎ ᑭᑲ ᐃᔑ ᑲᐯᔑᒥᓐ, ᐅᑮ ᐃᓈᐞ᙮ 9 ᐃᓬᐋᐃᔕ ᑕᔥ ᐌᑎᓂᓃᒥᑯᒡ ᑭᔐᒪᓂᑑᓐ ᑮᐊᓅᑮᐞ ᐅᐅ ᒋᐊᐎᐃᓂᒥᓐᒡ ᐃᔅᕒᐃᔭᓬᐃ ᑭᒋᐅᑭᒫᓐ, ᑫᑯ ᐌᑎ ᐃᓇᑫ ᐱᒥᐃᔖᑫᒃ, ᓰᕒᐃᔭᐎᓂᓂᐗᒃ ᐅᔕ ᐌᑎ ᐃᔖᐗᒃ, ᑮᐃᒋᑲᓂᐎᐗᓐ᙮ 10 ᒦᑕᔥ ᐃᔅᕒᐃᔭᓬᐃ ᑭᒋᐅᑭᒫ ᐊᐎᔭᓐ ᐅᑮ ᐃᔑᓂᔕᐙᓐ ᒋᐊᑕ ᑭᑫᑕᒥᓂᒡ ᐌᑎ ᐊᔮᐎᓂᕽ ᑳᑮ ᐃᔑ ᐐᑕᕽ ᐌᑎᓂᓃᒥᑯᒡ ᑭᔐᒪᓂᑑᓐ᙮ ᐊᔮᐲ ᓴ ᐃᓬᐋᐃᔕ ᐅᐅ ᐅᑮ ᐃᔑ ᐊᔮᒀᒥᒫᓐ ᑭᒋᐅᑭᒫᓐ, ᒦᔥ ᑳᐃᔑ ᑲᓇᐌᓂᑎᓱᓂᒡ ᐁᔖᓂᒡ᙮ 11 ᐐᑫ ᑕᔥ ᑮᓂᔥᑳᑎᓯ ᓰᕒᐃᔭᐎ ᑭᒋᐅᑭᒫ, ᐁᑮ ᐊᑐᒫᒡ ᐅᑖᓂᑫᐎᑭᒫᒪᐞ, ᑕᑲ ᐐᑕᒪᐎᔑᒃ ᐊᐌᓀᓐ ᑮᓇᐙ ᑳᐐᒌᐌᒃ ᐃᔅᕒᐃᔭᓬᐃ ᑭᒋᐅᑭᒫ! ᐁᑮᐃᓈᒡ᙮ 12 ᒦᑕᔥ ᐯᔑᒃ ᑳᑮᐃᑯᒡ ᐅᑕᓄᑮᐋᑲᓇᓐ, ᓂᑑᑭᒫᒥᓈᓐ, ᑳᐐᓐ ᐃᐃ ᑳᑕᔑᔮᕽ ᓂᑖ ᐃᔑᒋᑫᓰᒥᓐ! ᐊᐊ ᐄᑐᒃ ᐃᓬᐋᐃᔕ ᑳᑲᓅᑕᒪᐙᒡ ᑭᔐᒪᓂᑑᓐ ᐁᔮᒡ ᐃᔅᕒᐃᔭᓬ ᐊᑮᕽ, ᑳᐐᑕᒪᐙᒡ ᐃᔅᕒᐃᔭᓬᐃ ᑭᒋᐅᑭᒫᓐ ᐋᓃᓐ ᐁᑭᑐᐗᒡ ᑳᔑ ᓂᐹᔭᓐ, ᐅᑮᐃᑰᓐ᙮ 13 ᒦᑕᔥ ᐅᐅ ᑳᐃᑭᑐᒡ, ᒫᒑᒃ ᐊᑕ ᑭᑫᑕᒧᐙᒃ ᐋᑎ ᐁᔮᑴᓐ, ᐁᐐ ᑳᒋᑎᓇᒃ! ᑮᐃᑭᑐ᙮ ᑮᐱ ᐐᑕᒪᐙ ᑕᔥ ᐌᑎ ᑑᑕᓐ Dothan ᐊᔮᐎᓂᕽ ᐁᐊᔮᓂᒡ᙮ 14 ᒦᑕᔥ ᑳᐃᔑ ᐃᔑᓂᔕᐙᒡ ᐌᑎ ᓃᐱᐗᐞ ᔑᒫᑲᓂᔕᐞ, ᒦᑳᓱᐎ ᐅᑖᐹᓈᑾᐞ, ᒥᑕᑎᒨᐞ ᑲᔦ ᐁᑎᐱᑲᓂᓂᒃ᙮ ᒦᔥ ᑳᐃᔑ ᐙᑳᔥᑲᒥᓂᒡ ᐃᐃ ᐆᑌᓈᓂ᙮ 15 ᐐᐸ ᑕᔥ ᑭᑭᔐᑉ ᑮᐗᓂᔥᑳᐗᓐ ᐃᓬᐋᐃᔕ ᐅᑕᓄᑮᐋᑲᓇᓐ ᐁᑮ ᓵᑲᐊᒥᓂᒡ, ᒦᔥ ᑳᑮ ᐙᐸᒫᓂᒡ ᐁᐹᑏᓄᓂᒡ ᔑᒫᑲᓂᔕᐞ, ᒦᑳᓱᐎ ᐅᑖᐹᓈᑾᐞ, ᒥᑕᑎᒨᐞ ᑲᔦ ᐁᐙᑳᔥᑲᒥᓂᒡ ᐆᑌᓇ᙮ ᒦᔥ ᑳᐃᑯᒡ, ᓂᑑᑭᒫᒻ, ᐋᓃᓐ ᐃᑕᔥ ᐃᓈ ᑫᐃᔑᒋᑫᔭᕽ? 16 ᒦᑕᔥ ᐅᐅ ᐃᓬᐋᐃᔕ ᑳᐃᓈᒡ, ᑫᑯ ᓭᑭᓯᑫᓐ! ᓇᐗᒡ ᐅᔕ ᑮᓇᐎᓐᑦ ᐹᑏᓄᐗᒃ ᑳᐐᒌᐎᓇᒀ, ᐊᐲᒡ ᐐᓐ ᐃᑭᐌᓂᐗᐞ ᑳᐐᒌᐎᑯᐙᒡ, ᐅᑮᐃᓈᓐ᙮ 17 ᒦᔥ ᑳᐃᔑ ᐊᓇᒥᐋᒡ, ᑳᑎᐯᒋᑫᔭᓐ ᑑᑕᐤ ᒋᐙᐱᒡ᙮ ᒦᑕᔥ ᑳᑮ ᐙᐱᐃᑯᒡ ᑳᑎᐯᒋᑫᓂᒡ ᐅᐅ ᐁᑮ ᐃᔑᓇᕽ, ᐅᑮ ᐙᐸᒫᐞ ᐁᔑ ᐱᑾᑎᓈᓂᒃ ᐁᒨᔥᑭᓀ ᐊᔮᓂᒡ ᒥᑕᑎᒨᐞ, ᒦᑳᓱᐎ ᐅᑖᐹᓈᑾᐞ ᑲᔦ ᐁᐃᔥᑯᑌᐎᓂᒡ ᐁᐙᑳᔥᑳᑯᒡ ᐃᓬᐋᐃᔕ᙮ 18 ᐊᐲ ᐁᐱ ᓈᓯᑳᑯᒡ ᓰᕒᐃᔭᐎ ᔑᒫᑲᓂᔕᐞ, ᒦ ᓴ ᐃᓬᐋᐃᔕ ᑳᐃᔑ ᐊᓇᒥᐁᑕᐙᒡ ᑳᑎᐯᒋᑫᓂᒡ, ᑕᑲ ᑑᑕᐤ ᐅᑯ ᐃᓂᓂᐗᒃ ᒋᐙᐱᓯᒀ! ᒦᑕᔥ ᑳᑑᑕᐙᓂᒡ ᐃᐃ ᐃᓂᓂᐗᐞ ᒋᐙᐱᓯᓂᒃ, ᐃᓬᐋᐃᔕ ᑳᑮ ᐃᔑ ᑲᑴᑗᒡ᙮ 19 ᒦᑕᔥ ᐅᐅ ᐃᓬᐋᐃᔕ ᑳᐃᓈᒡ, ᑳᐐᓐ ᐄᑐᒃ ᐐᓐ ᐅᐅ ᒦᑲᓇ ᐁᑐᓀᐊᒣᒃ, ᑳᐐᓐ ᑲᔦ ᐅᐅ ᐋᐗᓯᓅᓐ ᐆᑌᓇ! ᐱᒥᓂᔕᐅᔑᒃ, ᑭᑲ ᐃᔑᐎᓂᓂᓂᒻ ᐃᑕᔥ ᐊᐊ ᐃᓂᓂ ᑳᐊᑐᓀᐌᒃ, ᐅᑮ ᐃᓈᐞ᙮ ᒦᔥ ᑳᐃᔑ ᐃᔑᐎᓈᒡ ᓴᒣᕒᐃᔭ Samaria ᐆᑌᓈᕽ᙮ 20 ᑳᐃᔥᒀ ᐲᑎᑫᐎᓈᒡ ᐃᑕᔥ ᐃᐃᒫ ᐆᑌᓈᕽ, ᒦᔥ ᐃᓬᐋᐃᔕ ᑳᐃᑭᑐᒡ, ᑳᑎᐯᒋᑫᔭᓐ, ᑕᑲ ᑑᑕᐤ ᐅᑯ ᐃᓂᓂᐗᒃ ᒋᐙᐱᐙᒡ, ᑮᐃᑭᑐ᙮ ᒦᑕᔥ ᑳᑎᐯᒋᑫᓂᒡ ᑳᐃᔑ ᐙᐱᐋᓂᒡ ᐃᐃ ᐃᓂᓂᐗᐞ᙮ ᐁᐃᓈᐱᓂᒡ ᐃᑕᔥ, ᐅᑮ ᐙᐸᑕᒥᓂ ᐁᐊᔮᓂᒡ ᐲᑎᒃ ᐃᐃᒫ ᐆᑌᓈᕽ ᓴᒣᕒᐃᔭ᙮ 21 ᐊᐲ ᓴ ᐃᔅᕒᐃᔭᓬᐃ ᑭᒋᐅᑭᒫᓐ ᐁᐙᐸᒫᓂᒡ, ᒦ ᓴ ᑳᐃᑯᒡ ᐃᓬᐋᐃᔕ, ᓂᑲ ᓂᓵᒃ ᐃᓇ ᓂᑑᑭᒫᒻ ᓂᑲ ᓂᓵᒃ ᐃᓇ? ᐅᑮᐃᑰᓐ᙮ 22 ᒦᑕᔥ ᐅᐅ ᑳᐃᓈᒡ, ᑫᑯ ᓂᓵᑫᓐ᙮ ᑳᐐᓐ ᐄᑐᒃ ᑭᑖ ᓂᓵᓰᒃ ᐃᓂᓂᐗᒃ ᑫᑳᒋᑎᓇᑣᐸᓐ ᑮᒦᑳᑎᕽ᙮ ᐊᔕᒻ ᒦᒋᒻ ᒋᐐᓯᓂᐙᒡ, ᒥᓇᐞ ᑲᔦ, ᐸᑭᑎᓈᑲᓐ ᐃᑕᔥ ᒋᓂ ᑮᐌᐙᒡ, ᒋᐃᔖᐙᒡ ᐁᔑᐊᔮᓂᒡ ᐅᑑᑭᒫᒥᐙᓐ, ᐅᑮᐃᓈᓐ᙮ 23 ᒦᑕᔥ ᐊᐊ ᐃᔅᕒᐃᔭᓬᐃ ᑭᒋᐅᑭᒫ ᑳᐃᔑ ᑭᒋ ᐐᑾᑫᒡ ᐁᑮ ᐊᔕᒫᒡ᙮ ᐁᐃᔥᒀ ᐐᓯᓂᓂᒡ ᐃᑕᔥ, ᐁᐃᔥᒀ ᒥᓂᑴᓂᒡ ᑲᔦ ᒦ ᐃ ᑳᐃᔑ ᑮᐌᓂᔕᐙᒡ ᒋᐃᔖᓂᒡ ᐁᔑᐊᔮᓂᒡ ᐅᑑᑭᒫᒥᓂ᙮ ᑳᐐᓐ ᐃᑕᔥ ᒦᓇᐙ ᓰᕒᐃᔭᐎ ᔑᒫᑲᓂᔕᐞ ᑮᐅᒋ ᐲᔖᓰᐗᐞ ᒋᐱ ᒥᑯᔥᑳᒋᐃᑯᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society