2 ᑭᒋᐅᑭᒫᒃ 4 - ᐅᒋᐺ ᑭᒋᒪᓯᓇᐃᑲᓐᐃᓬᐋᐃᔕ ᑮᐐᒋᐋᒡ ᑮᐗᔑᑴᐗᓐ 1 ᐯᔑᒃ ᑕᔥ ᐃᑴ ᑳᑮ ᐅᓈᐯᒥᒡ ᐃᓂ ᑫᓅᑕᒪᐙᓂᒡ ᑭᔐᒪᓂᑑᓐ, ᐅᑮ ᐃᔑ ᔖᑯᐙᓈᓐ ᐃᓬᐋᐃᔕᐗᓐ Elisha ᐁᑮ ᐃᑭᑐᒡ, ᑳᑮ ᐊᓄᑮᑕᐎᑭᐸᓐ ᓴ ᓂᓈᐯᒻ ᑮᐃᔥᒀ ᐱᒫᑎᓯ, ᑭᑭᑫᓂᒫ ᐄᑐᒃ ᑳᑮᐊᓄᑮᑕᐎᒃ ᐁᑮ ᑯᑖᓀᓂᒫᒡ ᑳᑎᐯᒋᑫᓂᒡ᙮ ᐃᓇᔥᑫ ᑕᔥ ᐃᓂ ᐃᓂᓂᐗᓐ ᑳᑮ ᒪᓯᓇᐊᒪᐙᒡ ᐅᑮ ᐱ ᓈᓯᑲᐙᓂ ᐁᐐ ᒫᒌᓈᓂᒡ ᑳᓃᔑᓂᒡ ᓂᑯᓯᓴᐞ ᐁᐐ ᐊᐗᑳᓈᓂᒡ, ᒦ ᐃᒫ ᐗᐅᒋ ᑎᐸᐊᒫᓱᓂᒡ, ᐅᑮᐃᓈᓐ᙮ 2 ᐃᓬᐋᐃᔕ ᑕᔥ ᐅᑮᐃᓈᓐ ᐃᓂ ᐃᑴᐗᓐ, ᐋᓃᓐ ᑕᔥ ᑫᐃᔑ ᐐᒋᐃᓈᓐ, ᑕᑲ ᓴ ᐐᑕᒪᐎᔑᓐ ᐌᑯᓀᓐ ᐁᔮᔭᓐ ᑭᐙᑳᐃᑲᓂᕽ᙮ ᒦᔥ ᐅᐅ ᑳᐃᑯᒡ ᐃᓂ ᐃᑴᐗᓐ, ᓃᓐ ᑳᐸᒦᑕᐎᓈᓐ ᑳᐐᓐ ᓴ ᑫᑰᓐ ᓂᑕᔮᓰᓐ, ᒦ ᐁᑕᑯ ᐯᔑᒃ ᐅᒨᑕᔮᐱᒃ ᐱᒥᑌ ᐁᔮᔮᓐ, ᐅᑮᐃᑰᓐ᙮ 3 ᒦᑕᔥ ᐃᓬᐋᐃᔕ ᑳᐃᓈᒡ, ᐊᑕ ᐙᐸᒻ ᑭᐐᒋᑖᒫᑲᓇᒃ ᒋᐊᐎᐋᓱᒪᑣ ᑳᐱᔑᔑᒀᓂᑭᓐ ᐅᒨᑕᔮᐱᑰᓐ᙮ ᑫᑯ ᐐᓐ ᐸᑮ ᐁᑕ ᐊᐎᐋᓱᑫᓐ᙮ 4 ᒦᑕᔥ ᐃᔑ ᐲᑎᑫᑲᓐ ᑭᐙᑳᐃᑲᓐ ᒋᐐᒌᐗᑣ ᑭᑯᓯᓴᒃ, ᑭᐸᐊᒨᑲᓐ ᐃᑕᔥ ᑭᑎᔥᒀᑌᒻ᙮ ᒦᑕᔥ ᐃᐃ ᑭᐱᒥᑌᒻ ᐃᔑ ᐲᒋ ᓰᑭᓇᒨᑲᓐ ᐃᐃᒫ ᑲᑭᓇ ᐅᒨᑕᔮᐱᑯᕽ; ᑫᓂ ᒨᔥᑭᓀᐸᑑᔭᓐ ᐃᑕᔥ ᐅᐱᒣ ᐊᓂ ᐊᑑᑲᓐ, ᐅᑮᐃᓈᓐ᙮ 5 ᒦᑕᔥ ᑳᐃᔑᒋᑫᒡ ᐊᐊ ᐃᑴ ᐁᑮ ᐲᑎᑫᒡ ᐅᐙᑳᐃᑲᓂᕽ ᑕᑯ ᐅᑯᓯᓴᐞ᙮ ᐅᑮ ᐊᓂ ᒨᔥᑭᓀᐸᑑᓇᓐ ᑕᔥ ᐅᒨᑕᔮᐱᑰᓐ ᒥᓂᒃ ᐃᑯ ᐅᑯᓯᓴᐞ ᑳᐲᑕᒫᑯᒡ᙮ 6 ᐊᐲ ᑕᔥ ᑲᑭᓇ ᑳᒨᔥᑭᓀᐲᓂᑭᓐ ᐃᓂ ᐅᒨᑕᔮᐱᑰᓐ, ᒦᔥ ᑳᐃᓈᒡ ᐅᑯᓯᓴᓐ, ᑫᔮᐱ ᑯᑕᒃ ᐅᒨᑕᔮᐱᑰᓐ ᐲᑑᓐ᙮ ᒦᑕᔥ ᑳᐃᑯᒡ, ᒦ ᐅᔕ ᐃ ᑲᑭᓇ ᑮᒑᑭᓭᑭᓐ ᐅᒨᑕᔮᐱᑰᓐ᙮ ᒦᑕᔥ ᐃᐃ ᐁᑮ ᒑᑭᑲᐎᕽ ᐱᒥᑌ᙮ 7 ᐊᐊ ᑕᔥ ᐃᑴ ᐅᑮ ᐊᑕ ᐙᐸᒫᓐ ᐃᓂ ᐃᓬᐋᐃᔕᐗᓐ ᑭᔐᒪᓂᑑ ᐅᑎᓂᓃᒪᓐ ᐁᑮ ᐐᑕᒪᐙᒡ᙮ ᐃᓬᐋᐃᔕ ᑕᔥ ᐅᑮᐃᓈᓐ ᐃᓂ ᐃᑴᐗᓐ, ᒫᒑᓐ ᑕᔥ ᐊᐎ ᐊᑖᐙᑫᓐ ᐃᐃ ᐱᒥᑌ, ᒦᑕᔥ ᒋᑎᐸᐊᒪᓐ ᐃᐃ ᑳᒪᓯᓇᐃᑫᔭᓐ᙮ ᒦᓂᒃ ᑕᔥ ᑫᐃᔥᑯᓭᒡ ᔔᓂᔮ, ᒦ ᓴ ᐊᐌ ᑫᐅᑖᑎᓯᔭᓐ, ᑭᑯᓯᓴᒃ ᑲᔦ᙮ ᐃᓬᐋᐃᔕ ᔑᑾ ᑳᐌᓅᑎᓯᒡ ᐃᑴ 8 ᐋᐱᑎᕽ ᑕᔥ ᐃᓬᐋᐃᔕ Elisha ᑮᐱ ᑕᑯᔑᓐ ᐊᔮᐎᓐ ᔔᓇᒻ Shunem ᐁᒋᑳᑌᓂᒃ ᐁᔑᑖᓂᐗᓂᓂᒃ᙮ ᐃᑴᐗᓐ ᓴ ᐃᐃᒫ ᑮᐃᔑᑖᐗᓐ ᐐᑫ ᐁᑮ ᐌᓅᑎᓯᓂᒡ᙮ ᒦᐗᓐ ᑕᔥ ᐃᓂ ᐃᑴᐗᓐ ᑳᑮ ᑲᑳᓱᒥᑯᒡ ᐁᐐ ᐊᔕᒥᑯᒡ᙮ ᐁᑕᓯᕽ ᑕᔥ ᐃᑯ ᐃᐃᒫ ᑳᐱᒥ ᐊᔮᒡ, ᒦ ᓴ ᐃᒫ ᑳᐃᔑ ᐲᑎᑫᒡ ᐁᑮ ᐐᓯᓂᒡ᙮ 9 ᐊᐊ ᑕᔥ ᐃᑴ ᐅᑮᐃᓈᓐ ᐅᓈᐯᒪᓐ, ᓂᑫᒋᐋ ᐃᓴ ᐗᐊ ᐃᓂᓂ ᑳᓂᑖ ᐅᑎᓯᓇᕽ ᑭᔐᒪᓂᑑᓐ ᐁᐅᑎᓂᓃᒥᑯᒡ᙮ 10 ᑕᑲ ᓴ ᐅᔑᑕᒪᐙᑖ ᐃᔥᐱᒥᑲᒋᑲᓀᔅ ᓂᐯᐎᑲᒥᑰᔅ ᐌᑎ ᐗᑭᑕᐸᒃ᙮ ᓂᐯᐎᓈᒃ ᑕᔥ ᑲᔦ ᐊᑖᐙᑖ ᑫᔑ ᓂᐹᒡ, ᑑᐳᐎᓈᒃ ᐃᑕᔥ ᑲᔦ, ᑌᓴᐱᐎᓐ, ᐙᓴᑯᓀᒋᑲᓐ ᑲᔦ ᐊᑖᐙᑖ᙮ ᐃᓇᔥᑫ ᑕᔥ ᐅᑎᓯᓇᕽ, ᒦ ᐃᒫ ᑫᔑ ᓂᐹᒡ᙮ 11 ᐋᐱᑎᕽ ᑕᔥ ᐁᑮᔑᑲᓂᓂᒃ ᐃᓬᐋᐃᔕ ᑮᐱ ᑕᑯᔑᓐ, ᒦᔥ ᐃᐃᒫ ᑳᐃᔑ ᐲᑎᑫᒡ ᐃᔥᐱᒥᑲᒋᑲᓂᕽ ᓂᐯᐎᑲᒥᑰᔅ ᑳᑮ ᐃᔑ ᐅᔑᑕᒪᐎᓐᒡ, ᐁᑮ ᐊᓉᔑᕽ᙮ 12 ᒦᑕᔥ ᐃᓬᐋᐃᔕ ᐁᑮ ᑲᓅᓈᒡ ᐯᒦᑖᑯᒡ ᑲᐁᓰ Gehazi ᐁᔑᓂᑳᓱᓂᒡ ᐁᑮᐃᓈᒡ, ᐊᑐᒻ ᐊᐊ ᔔᓀᒦᐎᑴ ᒋᐲᔖᒡ᙮ ᒦᔥ ᑳᑮ ᐃᔑ ᑲᓅᓈᓂᒡ᙮ ᐃᓂ ᑕᔥ ᐃᑴᐗᓐ ᑮᐱ ᓃᐸᐎᐗᓐ ᐁᔑᐊᔮᒡ᙮ 13 ᒦᔥ ᐃᓬᐋᐃᔕ ᑳᐃᓈᒡ ᑲᐁᓰᐗᓐ, ᑕᑲ ᑲᑴᒋᒻ ᐊᐊ ᐃᑴ ᐋᓃᓐ ᒣᔥᑾᒡ ᑫᑑᑕᐗᑭᑎᐸᓐ ᐅᐅ ᐁᑭᒋ ᐊᓄᑮᒡ ᐁᒥᓄᑑᑕᐎᓇᕽ᙮ ᓂᓇᑕᐌᓂᒥᒃ ᐃᓇ ᒋᑲᓅᒋᑫᑕᒪᐗᒃ, ᒋᑲᓅᓂᒪᒃ ᑭᒋᐅᑭᒫᓐ, ᑯᒫ ᑲᔦ ᒦᑳᓱᐎ ᔑᒫᑲᓂᔒᐎᑭᒫᓐ᙮ ᐃᓂ ᑕᔥ ᐃᑴᐗᓐ ᐅᐅ ᑮᐃᔑ ᓇᑴᑕᒨᓐ, ᑲᑭᓇ ᓴ ᑫᑰᓐ ᓂᑕᔮᓐ ᑳᓅᑌᓭᔮᓐ ᐅᐅᒫ ᑳᔑ ᐐᒋᑖᒪᒀ ᓃᒋᐱᒫᑎᓰᒃ, ᑮᐃᑭᑐᐗᓐ᙮ 14 ᒦᑕᔥ ᐃᓬᐋᐃᔕ ᑳᐃᑭᑐᒡ, ᐋᓃᓐ ᑕᔥ ᐃᓈ ᑫᑮ ᐃᔑ ᐐᒋᐃᑎᐸᓐ? ᑲᐁᓰᐗᓐ ᑕᔥ ᑮᐃᑭᑐᐗᓐ, ᑳᐐᓐ ᑮᐅᑯᓯᓯᓰ, ᐅᓈᐯᒪᓐ ᑲᔦ ᐊᑭᐌᓰᐎᐗᓐ᙮ 15 ᐃᓬᐋᐃᔕ ᑕᔥ ᑮᐃᑭᑐ, ᐊᑐᒻ ᐊᐊ ᐃᑴ᙮ ᐊᐲ ᑕᔥ ᑳᐊᑐᒥᒥᓐᒡ, ᐃᔥᒀᑌᕽ ᑕᔥ ᑮᓃᐸᐎᐗᓐ᙮ 16 ᒦᑕᔥ ᐃᓬᐋᐃᔕ ᑳᐃᓈᒡ ᐃᓂ ᐃᑴᐗᓐ, ᐅᐅ ᓴ ᐊᐲ ᒦᓇᐙ ᐊᓂ ᐅᒋᒋᓭᒃ, ᒋᑕᑯᓈᐙᓱᔭᓐ ᒋᐅᑯᓯᓯᔭᓐ᙮ ᒦᔥ ᐃᓂ ᐃᑴᐗᓐ ᑳᐃᑯᒡ, ᑕᑲ ᑫᑯ ᑮᐗᓂᒧᑕᐎᔑᑫᓐ, ᑭᔐᒪᓂᑑ ᐄᑐᒃ ᑭᑑᑎᓂᓃᒥᒃ, ᐅᑮᐃᑰᓐ᙮ 17 ᒦᑕᔥ ᐊᐊ ᐃᑴ ᑮᐊᓂ ᑭᑭᔥᑲᐙᐗᓱᒡ ᑸᐎᓭᓴᓐ ᐁᑮ ᓂᑖᐎᑭᓂᒡ ᐊᐲ ᐁᐅᒋᒋᓭᓂᒃ ᐃᓬᐋᐃᔕᐗᓐ ᑳᑮᐃᑯᐸᓐ ᒋᐅᓃᒑᓂᓯᒡ᙮ 18 ᐃᐃᐌ ᑕᔥ ᑳᐊᓂ ᐅᐱᑭᒡ ᐊᐊ ᑸᐎᓭᔅ ᐋᐱᑎᕽ ᐁᑮᔑᑲᓂᓂᒃ ᐅᑮ ᐊᑕ ᐙᐸᒫᓐ ᐅᑌᑌᓐ ᑳᑮ ᐐᒌᐙᓂᒡ ᐅᒪᓂᔑᑫᐞ᙮ 19 ᒦᑕᔥ ᑳᐃᓈᒡ ᐅᑌᑌᓐ, ᐁᑕᑕᐌ ᓂᑌᐎᑴᓭ! ᐅᑌᑌᓐ ᑕᔥ ᐅᑮᐃᓈᓂ ᐅᑕᓄᑮᐋᑲᓂᓂ, ᐃᔑᐎᓂᒃ ᑳᔑ ᐊᔮᓂᒡ ᐅᒫᒫᓐ᙮ 20 ᒦᑕᔥ ᐊᐊ ᐊᓄᑮᐋᑲᓐ ᑳᐃᔑ ᐅᑖᐱᓈᒡ ᐃᓂ ᑸᐎᓭᓴᓐ ᐁᑮ ᐃᔑᐎᓈᒡ ᐁᔑᐊᔮᓂᒡ ᐅᒫᒫᓂ᙮ ᐊᐊ ᑕᔥ ᑸᐎᓭᔅ ᐁᑮ ᒥᒋᒥᓂᑯᒡ ᐅᒫᒫᓐ ᐅᒌᑾᓂᓃᕽ ᐲᓂᔥ ᐁᑮ ᓈᐗᑴᓂᒃ, ᒦᔥ ᐲᓂᔥ ᑳᐃᔑ ᓂᐳᒡ᙮ 21 ᒦᑕᔥ ᐊᐊ ᐃᑴ ᑳᐃᔑ ᐊᒀᑕᐌᐎᓈᒡ ᐅᑯᓯᓴᓐ ᐁᑮ ᐊᐎ ᐸᑭᑎᓈᒡ ᐅᓂᐯᐎᓂᓃᕽ ᐃᓬᐋᐃᔕᐗᓐ ᐁᔑ ᓂᑖ ᓂᐹᓂᒡ ᑭᔐᒪᓂᑑᓐ ᐌᑎᓂᓃᒥᑯᓂᒡ᙮ ᐅᑮ ᑭᐸᐋᓐ ᑕᔥ ᐃᔥᒀᑌᒻ ᒦᔥ ᑳᐃᔑ ᒫᒑᒡ᙮ 22 ᒦᔥ ᑳᑮ ᐊᑐᒫᒡ ᐅᓈᐯᒪᓐ ᐁᑮᐃᓈᒡ, ᑕᑲ ᐲᒋᓂᔕᐅ ᐯᔑᒃ ᐊᓄᑮᐋᑲᓐ, ᐯᔑᒃ ᑲᔦ ᒫᔑᒥᑕᑎᒻ, ᐁᐐ ᐊᑕ ᐙᐸᒪᒃ ᑭᔐᒪᓂᑑᓐ ᐌᑎᓂᓃᒥᑯᒡ, ᐁᐲᓯᑳᔮᓐ ᐃᑯ ᓂᑲ ᐱᑮᐌ, ᐅᑮᐃᓈᓐ᙮ 23 ᒦᔥ ᑳᐃᑯᒡ, ᐌᑯᓀᓐ ᑕᔥ ᓅᑯᒻ ᑳᑮᔑᑲᒃ ᐙᐅᒋ ᐃᔖᔭᓐ? ᑳᐐᓐ ᐄᑐᒃ ᒪᔑ ᐊᓉᐲᐎ ᑮᔑᑲᓯᓅᓐ, ᑳᐐᓐ ᑲᔦ ᒪᔑ ᐅᔥᑲᑰᒋᓂᓰ ᑎᐱᑭᑮᓯᔅ ᑳᐃᔑ ᓂᑖ ᐎᑾᑎᓈᓂᐗᕽ, ᐅᑮᐃᑰᓐ᙮ ᐊᐊ ᑕᔥ ᐃᑴ ᑮᐃᔑ ᓇᑴᑕᒻ, ᒦ ᑯ ᐃᐌ ᐱᓵᓐ ᐃᑯ᙮ 24 ᒦᑕᔥ ᑳᐃᔑ ᐊᓅᑮᒡ ᒋᐅᓇᐱᓂᒥᓐᒡ ᐃᓂ ᒫᔑᒥᑕᑎᒨᓐ ᐁᑮᐃᓈᒡ ᐊᓄᑮᐋᑲᓇᓐ, ᐊᐤ, ᒫᒑᓐ, ᑫᑯ ᐐᓐ ᓂᔑᒃ ᐱᒥ ᐊᔮᑫᓐ ᓃᓐ ᐅᒋ, ᐹᓂᒫ ᓴ ᑲᓅᓂᓈᓐ ᓂᔑᒃ ᐱᒥ ᐊᔮᑲᓐ᙮ 25 ᒦᑕᔥ ᑳᐃᔑ ᒫᒑᒡ ᐊᐊ ᐃᑴ ᐁᑮ ᐊᑕ ᐙᐸᒫᒡ ᐃᓬᐋᐃᔕᐗᓐ ᐌᑎ ᑳᑮ ᐃᔑᐊᔮᓂᒡ ᑭᒋ ᐃᔥᐸᑎᓈᕽ ᑲᕒᐊᒣᓬ Carmel ᐁᒋᑳᑌᓂᒃ᙮ ᓃᔮᒃ ᑕᔥ ᑭᔐᒪᓂᑑᓐ ᐌᑎᓂᓃᒥᑯᒡ ᐅᑮ ᐙᐸᒫᓐ ᐃᓂ ᐃᑴᐗᓐ ᐁᐱᓈᑯᓯᓂᒡ᙮ ᒦᔥ ᑳᑮᐃᓈᒡ ᑲᐁᓰᐗᓐ ᐯᒦᑖᑯᒡ, ᐃᓇᔥᑫ ᓇ ᐊᐌ ᔔᓀᒦᐎᑴ ᑳᐱᓈᑯᓯᒡ᙮ 26 ᑕᑲ ᐊᑕ ᓇᑭᔥᑲᐤ, ᒦᑕᔥ ᐃᔑ ᑲᑴᒋᒫᑲᓐ, ᑭᒥᓄᐊᔮ ᓇ? ᑭᓈᐯᒻ ᐃᓇ ᒥᓄᐊᔮ? ᑭᓃᒑᓂᔅ ᐃᓇ ᑲᔦ ᒥᓄᐊᔮ? ᒦᔥ ᑳᑮ ᐃᑭᑐᓂᒡ ᐃᓂ ᐃᑴᐗᓐ, ᐁᔭᐞ, ᓂᒥᓄᓭ᙮ 27 ᐊᐲ ᑕᔥ ᐃᓂ ᐃᑴᐗᓐ ᑌᑯᔑᓂᓂᒡ ᑭᒋ ᐃᔥᐸᑎᓈᕽ ᐃᐃᒫ ᐁᔑᐊᔮᒡ ᑭᔐᒪᓂᑑ ᐅᑎᓂᓃᒪᓐ, ᒦᔥ ᑳᐃᔑ ᑭᒋᐎᓂᑯᒡ ᐃᐃᒫ ᐅᓯᑖᕽ ᐁᐸᑯᓭᑕᒫᑯᒡ ᑫᑰᓂᓂ᙮ ᑲᐁᓰ ᑕᔥ ᐯᔓ ᑮᐲᔖ ᓂᑯᒋ ᐁᐐ ᐃᔑ ᑳᒋᐌᐱᓈᒡ ᐃᓂ ᐃᑴᐗᓐ᙮ ᐃᓬᐋᐃᔕ ᐅᑮᐃᓈᓐ, ᑫᑯ ᐸᐹᒣᓂᒫᑫᓐ, ᐗᐐᑫ ᐅᔕ ᒥᑯᔥᑳᑌᑕᒻ ᐲᒐᔭᐄ ᐅᐱᒫᑎᓯᐎᓂᕽ᙮ ᑳᑎᐯᒋᑫᒡ ᐅᔕ ᑳᐐᓐ ᒪᔑ ᓂᑭᑫᑕᒨᓂᑯᓰ, ᑳᐐᓐ ᑲᔦ ᒪᔑ ᓂᐐᑕᒫᑯᓰ᙮ 28 ᐃᓂ ᑕᔥ ᐃᑴᐗᓐ ᐅᑮᐃᑰᓐ, ᓂᑑᑭᒫᒻ, ᑭᑮ ᑲᑴᒋᒥᓐ ᐃᓇ ᒋᐊᔮᐗᒃ ᑸᐎᓭᔅ? ᑭᑖᓇᑮᐃᓂᓐ ᐄᑐᒃ ᒋᑮᐗᓂᒧᑕᐎᔑᓯᐗᓐ᙮ 29 ᒦᑕᔥ ᐃᓬᐋᐃᔕ ᑳᐃᓈᒡ ᑲᐁᓰᐗᓐ, ᐃᑾᐱᑑᓐ ᐃᐃ ᑭᑲᔥᑮᑮᐎᓐ, ᒫᒌᑑᓐ ᑲᔦ ᐅᐅ ᓂᒥᑎᑰᒻ, ᒦ ᐃ ᐃᔑ ᒫᒑᓐ᙮ ᑮᔥᐱᓐ ᐊᐎᔭ ᓇᑭᔥᑲᐗᒡ, ᑫᑯ ᐴᔔᐋᑫᓐ᙮ ᑮᔥᐱᓐ ᑕᔥ ᑲᔦ ᐊᐎᔭ ᐴᔔᐃᒃ, ᑫᑯ ᐸᐹᒥᑕᐙᑫᓐ᙮ ᐅᐗᑌᑯᕽ ᑕᔥ ᑸᐎᓭᔅ ᐃᔑ ᒥᒋᒥᓇᒧᐤ ᐃᐃ ᓂᒥᑎᑰᒻ, ᐅᑮᐃᓈᓐ᙮ 30 ᐃᓂ ᓴ ᐃᑴᐗᓐ ᑮᐃᑭᑐᐗᓐ, ᑳᑎᐯᒋᑫᒡ ᒥᓯᐌ ᐁᑎᐯᒋᑫᒡ, ᒦ ᐁᐲᒋ ᑫᒋᓈᐁᑕᒫᓐ ᑳᐐᓐ ᑭᐐ ᓇᑲᓂᓯᓅᓐ᙮ ᒦᔥ ᐃᓬᐋᐃᔕ ᐁᑮ ᐊᓂ ᐱᒥᓂᔕᐙᒡ ᐃᓂ ᐃᑴᐗᓐ᙮ 31 ᑲᐁᓰ ᑕᔥ ᑮᓃᑳᓃ, ᒦᔥ ᑳᐃᔑ ᐊᑑᒡ ᐃᐃ ᒥᑎᑯᓂ ᐅᐗᑌᑾᓃᕽ ᐃᓂ ᑸᐎᓭᓴᓐ᙮ ᑳᐐᓐ ᑕᔥ ᐊᐙᒡ ᐃᑯ ᑮᓅᑖᑎᓰᐗᓐ, ᑳᐐᓐ ᑲᔦ ᑮᐗᑲᐐᓰᐗᓐ᙮ ᒦᔥ ᑳᐃᔑ ᑮᐌᒡ ᐁᑮ ᐊᑕ ᓇᑭᔥᑲᐙᒡ, ᐁᑮ ᐐᑕᒪᐙᒡ ᐃᓬᐋᐃᔕᐗᓐ, ᐊᐊ ᓴ ᑸᐎᓭᔅ ᑳᐐᓐ ᑮᐗᓂᔥᑳᓰ, ᐁᑮᐃᓈᒡ᙮ 32 ᐊᐲ ᑕᔥ ᐃᓬᐋᐃᔕ ᑌᑯᔑᕽ ᐃᐃᒫ ᐙᑳᐃᑲᓂᕽ, ᑌᐺ ᓴ ᑳᐐᓐ ᑮᐱᒫᑎᓯᓰᐗᓐ ᐃᓂ ᑸᐎᓭᓴᓐ ᐁᑮ ᐱᒥᔑᓂᓂᒡ ᐃᐃᒫ ᐅᓂᐯᐎᓂᕽ᙮ 33 ᒦᑕᔥ ᑳᑮ ᐃᔑ ᐲᑎᑫᒡ ᐁᑮ ᑭᐸᐊᕽ ᐃᔥᒀᑌᒻ ᑸᐎᓭᓴᓐ ᐁᑕ ᐃᐃᒫ ᐁᑮ ᐐᒌᐙᒡ, ᒦᔥ ᑳᐃᔑ ᐊᓇᒥᐁᑕᐙᒡ ᑳᑎᐯᒋᑫᓂᒡ᙮ 34 ᒦᑕᔥ ᑳᐃᔑ ᐸᑕᑯᔥᑲᐙᒡ ᐃᓂ ᑸᐎᓭᓴᓐ, ᐁᑮ ᐃᔑᑑᓀᔑᕽ ᐅᑑᓂᓃᕽ, ᐁᑮ ᐃᔑᔥᑮᔑᑴᔑᕽ ᑕᔥ ᑲᔦ ᐅᔥᑮᔑᑯᓃᕽ, ᐁᑮ ᐃᔑᓂᒌᔑᕽ ᐃᑕᔥ ᑲᔦ ᐅᓂᒌᓂᕽ᙮ ᐁᑮ ᐸᑕᑯᔥᑲᐙᒡ ᐃᑕᔥ ᐃᓂ ᑸᐎᓭᓴᓐ ᐲᓂᔥ ᑮᐊᓂ ᑮᔑᐐᔭᐎᐌᐗᓐ᙮ 35 ᒦᑕᔥ ᑳᐃᔑ ᐗᓂᔥᑳᒡ ᐁᑮ ᐋᔮᔕᐎᔥᑳᒡ ᐃᐃᒫ ᐲᑎᒃ ᐁᑮ ᐸᐹᒧᓭᒡ᙮ ᒦᑕᔥ ᒦᓇᐙ ᑳᐃᔑ ᐸᑕᑯᔥᑲᐙᒡ ᑸᐎᓭᓴᓐ᙮ ᒦᔥ ᓃᔣᒋᕽ ᑳᑮ ᐊᓂ ᐋᔨᓂᒧᓂᒡ, ᒦᔥ ᐲᓂᔥ ᑳᐃᔑ ᐊᔨᓈᐱᓂᒡ᙮ 36 ᒦᑕᔥ ᑳᐃᓈᒡ ᑲᐁᓰᐗᓐ, ᐊᑐᒻ ᑕᔥ ᐊᐊ ᔔᓀᒦᐎᑴ᙮ ᒦᑕᔥ ᑳᐃᔑ ᐊᑐᒫᓂᒡ᙮ ᐊᐲ ᑕᔥ ᐁᐱ ᐲᑎᑫᓂᒡ ᐃᓂ ᐃᑴᐗᓐ ᐅᐅ ᐅᑮᐃᓈᓐ, ᐃᓇ ᐗᐊ ᑭᑯᓯᔅ᙮ 37 ᒦᑕᔥ ᑳᐃᔑ ᐲᑎᑫᒡ ᐊᐊ ᐃᑴ ᒥᒋᓴᒃ ᐁᑮ ᐊᓂᒥᑯᐸᓂᐅᒡ ᐁᔑᓯᑌᑳᐸᐎᓂᒡ, ᐁᑮ ᐃᔑ ᒦᑴᒋᐌᑕᕽ᙮ ᒦᔥ ᑳᐃᔑ ᐅᑖᐱᓈᒡ ᐃᓂ ᐅᑯᓯᓴᓐ ᐁᑮ ᐊᓂ ᒫᒑᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society