2 ᑭᒋᐅᑭᒫᒃ 25 - ᐅᒋᐺ ᑭᒋᒪᓯᓇᐃᑲᓐᓀᐸᑲᓈᓴᕒ ᑮᔖᑰᒋᑑᒡ ᒉᕒᐆᓴᓬᐊᒻ ᑭᒋᐆᑌᓈᓂ 1 ᔖᑲᓱ 9 ᐱᐴᓐ ᑕᔥ ᒥᓂᒃ ᐋᔕ ᑮᑭᒋᐅᑭᒫᐎᒡ ᓭᑎᑳᔭ Zedekiah, ᒥᑖᓱᑮᓯᓲᓐ ᐁᐱᒪᑭᓱᓂᒡ, ᐁᒥᑖᓱᑯᓇᑳᓂᒃ; ᒦ ᓴ ᐃ ᐊᐲ ᓀᐸᑲᓈᓴᕒ Nebuchadnezzar ᑳᑮ ᑭᒋᐅᑭᒫᐎᒡ ᐹᐱᓬᐊᓐ Babylon ᐊᑮᕽ ᑳᑮ ᐲᓈᒡ ᑲᑭᓇ ᐅᔑᒫᑲᓂᔒᒪᐞ ᐁᑮ ᐙᑳᔥᑲᕽ ᒉᕒᐆᓴᓬᐊᒻ Jerusalem ᑭᒋ ᐆᑌᓈᓂ᙮ ᐙᑳᔭᐄ ᑲᔦ ᐁᑮ ᐅᔑᑑᐙᒡ ᐗᐅᒋ ᑲᑴ ᔖᑰᒋᑣᐙᒡ᙮ 2 ᐲᓂᔥ ᑕᔥ ᒥᑖᔑᐯᔑᑯᐱᐴᓐ 11 ᓭᑎᑳᔭ ᑮᑭᒋᐅᑭᒫᐎᒡ, ᑮᑳᐯ ᐙᑳᔥᑭᑳᑌᓂᒃ ᒉᕒᐆᓴᓬᐊᒻ᙮ 3 ᓃᐎᑮᓯᓲᓐ ᑕᔥ ᐁᐱᒪᑭᓱᓂᒡ, ᔖᑲᓱ ᑮᔑᒃ ᐁᐃᔑᓭᓂᒃ ᐃᐃ ᐯᔑᑾᓐ ᐁᐱᐴᓂᓂᒃ, ᐗᐐᑫ ᑮᑭᒋ ᑲᒀᑕᑫᑖᑾᓐ ᐃᐃᒫ ᒉᕒᐆᓴᓬᐊᒥᕽ ᐋᓃᔥ ᑳᐐᓐ ᒦᒋᒻ ᐋᐲᒋᑯ ᑮᐊᔮᓯᓅᓐ ᐃᐃᒫ ᐊᑮᕽ ᑫᑮ ᒦᒋᐙᐸᓐ ᐯᒫᑎᓯᐙᒡ᙮ 4 ᒦᑕᔥ ᐃᐃ ᐊᐲ ᑳᑮ ᐲᑾᐃᑳᑌᒃ ᑭᒋ ᐆᑌᓇ ᒉᕒᐆᓴᓬᐊᒻ ᐙᑳᔮᐱᑭᓂᑲᓐ, ᑲᑭᓇ ᓴ ᐃᔅᕒᐃᔭᓬᐃᐎ ᔑᒫᑲᓂᔕᒃ ᑮᒫᒌᐸᐃᐌᐗᒃ ᐁᑎᐱᑲᓂᓂᒃ᙮ ᑮᐅᒋ ᓵᑭᒋᐸᐃᐌᐗᒃ ᑳᑮ ᐃᔑ ᐲᑕᐙᐱᑭᓂᑳᑌᓂᒃ ᐃᓇᑫ ᑭᒋᐅᑭᒫᓐ ᑳᑮ ᐃᔑ ᓂᑖ ᑭᑎᑫᓂᒡ᙮ ᐋᓇ ᓴ ᐐᓐ ᐹᐱᓬᐊᓂᐎ ᔑᒫᑲᓂᔕᐞ ᐁᑮ ᐙᑳᔥᑲᒥᓂᒡ ᐃᐃ ᑭᒋ ᐆᑌᓈᓂ, ᐌᑎ ᓴ ᐱᑾᑕᑲᒥᒃ ᐁᕒᐊᐸ Arabah ᐁᒋᑳᑌᓂᒃ ᑮᐊᐸᐃᐌᐗᒃ᙮ 5 ᐹᐱᓬᐊᓂᐎ ᔑᒫᑲᓂᔕᒃ ᑕᔥ ᐅᑮ ᐱᒥᓂᔕᐙᐙᓐ ᑭᒋᐅᑭᒫᓐ, ᐌᑎ ᑕᔥ ᑳᑮ ᐃᔑ ᐸᔥᒀᓂᒃ ᒌᑲᔭᐄ ᒉᕒᐊᑯ Jericho ᒦ ᓴ ᐃ ᐌᑎ ᑳᐃᔑ ᐊᑎᒫᐙᒡ᙮ ᑲᑭᓇ ᓴ ᐅᔑᒫᑲᓂᔒᒥᓂ ᐯᐸᑳᓐ ᑮᐊᐸᐃᐌᐗᐞ ᐁᑮ ᓇᑲᒋᐸᐃᑯᒡ᙮ 6 ᐅᑮ ᑳᒋᑎᓈᐙᓐ ᑕᔥ ᐃᓂ ᑭᒋᐅᑭᒫᓐ ᓭᑎᑳᔭᐗᓐ᙮ ᐌᑎ ᑕᔥ ᐅᕒᐃᑉᓬᐊ Riblah ᐆᑌᓈᕽ ᑳᑮ ᐃᔑᐊᔮᓂᒃ, ᐅᑮ ᐃᔑᐎᓈᐙᓐ ᑭᒋᐅᑭᒫᓐ ᓀᐸᑲᓈᓴᕒᐊᓐ ᑳᑮ ᐃᔑᐊᔮᓂᒡ᙮ ᐊᐊ ᑕᔥ ᑭᒋᐅᑭᒫ ᐅᑮ ᐅᓈᑯᓈᓐ ᐃᓂ ᑭᒋᐅᑭᒫᓐ ᑳᑮ ᐲᑕᒪᐎᓐᒡ᙮ 7 ᒦᑕᔥ ᐌᑎ ᓭᑎᑳᔭ ᑳᐃᔑ ᓂᒋᑲᓂᐎᓂᒡ ᐅᑯᓯᓴᐞ ᐁᓈᓴᒦᒡ, ᒦᑕᔥ ᑳᐃᔑ ᑭᒑᐸᐅᓐᒡ, ᓴᑳᐹᓀᔮᐲᓐ ᐁᐋᐸᑕᓂᓂᑭᓐ ᐁᒪᒫᒋᑾᐱᓱᒡ ᐁᑮ ᐃᔑᐎᒋᑲᓂᐎᒡ ᐹᐱᓬᐊᓐ ᐊᑮᕽ᙮ ᑮᓂᔑᐗᓈᒋᒋᑳᑌᒃ ᑭᒋ ᐊᓇᒥᐁᐎᑲᒥᒃ (Jeremiah 52.12-33) 8 ᒥᑖᔑᔖᑲᓱ 19 ᐱᐴᓐ ᐃᑕᔥ ᓀᐸᑲᓈᓴᕒ Nebuchadnezzar ᑮᑭᒋᐅᑭᒫᐎᒡ ᐹᐱᓬᐊᓐ Babylon ᐊᑮᕽ, ᓈᓄᑮᓯᓲᓐ ᐁᐱᒪᑭᓱᓂᒡ, ᐁᓃᔣᓱᑮᔑᑾᑳᓂᒃ 7, ᑎᐱᓇᐌ ᑳᑮ ᐊᓄᑮᑖᑯᒡ ᓀᐴᓴᕒᐁᑕᓐ Nebuzaradan ᑳᑮ ᐃᔑᓂᑳᓱᓂᒡ ᑳᑮ ᓈᑲᒋᐋᓂᒡ ᐅᑲᓇᐌᒋᑫᐞ ᑮᐲᔖᐗᓐ ᐃᐃᒫ ᑭᒋ ᐆᑌᓈᕽ ᒉᕒᐆᓴᓬᐊᒥᕽ Jerusalem᙮ 9 ᒦᑕᔥ ᐊᐊ ᐃᓂᓂ ᑳᑮ ᓴᑲᐊᕽ ᑭᒋ ᐊᓇᒥᐁᐎᑲᒥᑯᓂ, ᑭᒋᐅᑭᒫᓐ ᑲᔦ ᐅᐙᑳᐃᑲᓂᓂ, ᑲᑭᓇ ᑲᔦ ᓴ ᑯ ᐙᑳᐃᑲᓇᓐ ᐃᐃᒫ ᒉᕒᐆᓴᓬᐊᒥᕽ, ᐃᓂ ᑲᔦ ᐙᑳᐃᑲᓇᓐ ᑳᑮ ᑭᒋ ᐃᓀᑖᑾᓂᓂᑭᓐ᙮ 10 ᐃᓂ ᓴ ᔑᒫᑲᓂᔕᐞ ᓀᐴᓴᕒᐁᑕᓐ ᑳᑮ ᐐᒌᐎᑯᒡ ᐅᑮ ᐲᑯᐱᑑᓂ ᐃᐃ ᑳᑮ ᐃᔑ ᐙᑳᔮᐱᑭᓂᑳᑌᓂᒃ ᐃᐃ ᒉᕒᐆᓴᓬᐊᒻ᙮ 11 ᐯᒫᑎᓯᓂᒡ ᑕᔥ ᑳᑮ ᐃᔥᑯᐸᐃᐌᓂᒡ, ᓃᐱᐗᐞ ᑲᔦ ᑳᑮ ᓈᒋᐸᐃᐙᓈᓂᒡ ᐃᓂ ᐹᐱᓬᐊᓂᐎ ᑭᒋᐅᑭᒫᓐ, ᒦᐗᐞ ᓴ ᐃ ᓀᐴᓴᕒᐁᑕᓐ ᑲᑭᓇ ᑳᑮ ᐃᔑᐎᓈᒡ ᐌᑎ ᐹᐱᓬᐊᓐ ᐊᑮᕽ᙮ 12 ᐅᑮᓇᑲᓈᐞ ᐃᑕᔥ ᐐᓐ ᒫᐗᒡ ᐃᑯ ᑳᑭᑎᒫᑭᓯᓂᒡ ᐃᐃᒫ ᑳᑮ ᐅᒌᓂᒡ ᐊᑮᕽ ᒋᓈᑲᒋᑑᓂᒡ ᑳᑮ ᐃᔑ ᑭᑎᑳᓂᒥᓐᒡ ᔔᒥᓇᐞ, ᐃᓂ ᑲᔦ ᑭᑎᑫᐗᑲᒥᑰᓐ᙮ 13 ᐹᐱᓬᐊᓂᐎ ᔑᒫᑲᓂᔕᒃ ᑕᔥ ᐅᑮ ᐱᑭᔥᑲᐙᐙᐞ ᐃᐃ ᑳᑮ ᐅᓵᐙᐱᑯᐎᓂᒡ ᑭᒋ ᐊᓯᓃᐞ ᑳᑮ ᐸᑕᑭᓱᓂᒡ, ᐃᐃ ᑲᔦ ᑌᓵᑾᐃᑲᓂᓂ, ᐃᐃ ᑲᔦ ᑳᑮ ᐅᓵᐙᐱᑯᐗᓂᓂᒃ ᓂᐲᓂ ᑳᑮ ᐃᔑ ᐊᑌᓂᒃ ᑳᑮ ᐊᔮᓂᒃ ᐲᑎᒃ ᑭᒋ ᐊᓇᒥᐁᐎᑲᒥᑯᕽ᙮ ᐹᐱᓬᐊᓐ ᐊᑮᕽ ᑕᔥ ᐅᑮ ᐃᔑᐎᑑᓈᐙ ᐃᐃ ᐅᓵᐙᐱᑯᓂ᙮ 14 ᐊᑭᑾᐞ, ᐃᔅᐯᑌᓴᐞ ᑲᔦ, ᐙᓴᑯᓀᒋᑲᓂ ᐋᐸᒋᒋᑲᓇᓐ ᑲᔦ, ᐁᒥᒀᓀᓴᐞ ᑲᔦ, ᑲᑭᓇ ᓴ ᑯ ᑳᑮ ᐅᓵᐙᐱᑲᓂᓂᑭᓐ ᐅᓈᑲᓇᓐ ᑳᑮ ᐋᐸᑕᓂᓂᑭᓐ ᐃᐃᒫ ᑭᒋ ᐊᓇᒥᐁᐎᑲᒥᑯᕽ ᑮᐸᒦᑑᐙᒡ᙮ 15 ᓀᐴᓴᕒᐁᑕᓐ ᑕᔥ ᐅᑮ ᒫᒌᑑᓇᓐ ᑳᑮ ᐃᔑ ᒥᓈᓯᑫᕽ, ᐅᓈᑲᓀᓴᓐ ᑲᔦ ᑳᑮ ᐅᒋ ᐅᔑᒋᑳᑌᓂᑭᓐ ᐅᓵᐎ ᔔᓂᔮ ᐙᐱᑯᕽ, ᐙᐹᐱᑯ ᔔᓂᔮ ᐙᐱᑯᕽ ᑲᔦ᙮ 16 ᐃᐃ ᑕᔥ ᓃᔑᓐ 2 ᐊᓯᓃᐞ ᑳᑮ ᐸᑕᑭᓱᓂᒡ, ᐃᐃᐌᓂ ᓂᐲᓂ ᑳᑮ ᐃᔑ ᐊᑌᓂᒃ ᐃᐃ ᑲᔦ ᑌᓵᑾᐃᑲᓂᓂ ᔂᓬᐊᒪᓐ Solomon ᑳᑮ ᐅᔑᑑᑯᐸᓀᓐ ᒋᐊᑌᓂᒃ ᐃᐃᒫ ᑭᒋ ᐊᓇᒥᐁᐎᑲᒥᑯᕽ, ᐃᐃ ᓴ ᐅᓵᐙᐱᑯᓂ ᐃᐃᒫ ᑳᑮ ᐅᒌᓂᒃ ᑳᐐᓐ ᑮᑲᔥᑭᒋᑳᑌᓯᓅᓐ ᒋᑎᐹᐲᔥᑰᑌᓂᒃ ᑳᐊᐲᑎᓂᑾᓂᓂᒃ᙮ 17 ᐊᐊ ᑕᔥ ᐯᔑᒃ ᐊᓯᓐ ᑳᑮ ᐸᑕᑭᓱᒡ ᓃᔥᑕᓇᔑᓃᔣᓱᒥᓯᑦ 27 ᑮᐊᐲᑕᑭᓱ᙮ ᐌᑎ ᐃᔥᐱᒥᕽ ᐅᓵᐙᐱᒃ ᑳᑮ ᐃᔑ ᒪᒪᓯᓂᒋᑳᑌᒃ ᓃᐎᒥᓯᑦ ᐋᐱᑕ ᑮᐊᐲᑖᓂ᙮ ᐃᐃᐌ ᑕᔥ ᐃᔥᐱᒥᕽ ᑳᑮ ᐅᓵᐙᐱᑲᒃ ᑭᔑᐹᔭᐄ ᑮᒪᓯᓂᓯᓅᓐ ᑫᑰᓇᓐ ᑳᓂᑖᐎᑭᑭᓐ᙮ ᐊᐊ ᓴ ᑯᑕᒃ ᑳᑮ ᐸᑕᑭᓱᒡ ᐊᓯᓐ, ᒦ ᐯᔑᑾᓐ ᑳᐃᔑᓈᑯᓯᒡ᙮ ᐯᒫᑎᓯᐙᒡ ᒎᑕ ᐊᑮᕽ ᑳᐅᒌᐙᒡ ᑮᒫᒌᓂᑣ (Jeremiah 52.24-27) 18 ᓀᐴᓴᕒᐁᑕᓐ Nebuzaradan ᓴ ᑲᔦ ᐅᑮ ᑕᑯ ᒫᒌᓈᐞ ᐁᑮ ᐐ ᑭᐸᐙᒡ ᑭᒋ ᐊᓇᒥᐁᐎᑭᒫᓐ ᓰᕒᐁᔭ Seraiah ᐁᔑᓂᑳᓱᓂᒡ, ᓭᐸᓈᔭᐗᓐ Zephaniah ᑲᔦ ᑳᑮ ᐊᓂᑫ ᐊᓇᒥᐁᐎᑭᒫᐎᓂᒡ; ᐃᐃ ᑲᔦ ᓂᓯᓐ 3 ᑳᑮ ᓈᓈᑲᒋᑑᓂᒡ ᐃᔥᒀᑌᒻ ᐃᐃᒫ ᑭᒋ ᐊᓇᒥᐁᐎᑲᒥᑯᕽ᙮ 19 ᐅᑮ ᐅᑎᓈᓐ ᐃᓂᓂᐗᓐ ᑳᑮ ᑎᐯᓂᒫᓂᒡ ᔑᒫᑲᓂᔕᐞ, ᓈᓇᓐ 5 ᑲᔦ ᐃᓂᓂᐗᐞ ᑳᑮ ᐊᓂ ᐐᑕᒪᐙᓂᒡ ᑭᒋᐅᑭᒫᓐ ᐋᓃᓐ ᑫᓂ ᐃᔑᒋᑫᓂᒡ᙮ ᐅᑮ ᑕᑯ ᒫᒌᓈᓐ ᑲᔦ ᐅᔑᐲᐃᑫᐎᓂᓂᐗᓐ ᑳᑮ ᓈᓈᑲᒋᐋᓂᒡ ᐃᓂᓂᐗᐞ ᑫᔑᒫᑲᓂᔒᐎᓂᒡ, ᓂᑯᑣᓯᒥᑕᓇ 60 ᑲᔦ ᐊᐎᔭᐞ ᑳᑮ ᐊᔮᓂᒡ ᐃᐃᒫ ᑭᒋ ᐆᑌᓈᕽ᙮ 20 ᓀᐴᓴᕒᐁᑕᓐ ᑕᔥ ᑳᑮ ᑎᐯᓂᒫᒡ ᐅᑲᓇᐌᒋᑫᐞ ᐅᑮ ᐃᔑᐎᓈᐞ ᐅᐅ ᑲᑭᓇ ᐌᑎ ᐅᕒᐃᑉᓬᐊ Riblah ᐆᑌᓈᕽ, ᐁᒪᑦ ᐊᑮᕽ Hamath ᑳᑮ ᐃᒋᑳᑌᓂᒃ, ᐁᔑᐊᔮᓂᒡ ᑭᒋᐅᑭᒫᓐ ᓀᐸᑲᓈᓴᕒᐊᓐ Nebuchadnezzar᙮ 21 ᒦᑕᔥ ᑳᐃᓈᑯᓂᑫᓂᒡ ᒋᓂᓯᒥᓐᒡ ᐃᐃ ᐃᓂᓂᐗᐞ᙮ ᐃᐃ ᑕᔥ ᒎᑕ ᑳᐅᒋ ᑎᐯᑖᑯᓯᓂᒡ ᑮᒫᒌᒋᑲᓂᐎᐗᐞ ᐃᐃᒫ ᐅᑕᑮᒥᐙᐞ ᑖᐱᔥᑰ ᑕᑯᓂᑲᓇᐞ᙮ ᑫᑕᓬᐋᔭ ᑮᐅᓇᑭᒥᓐᒡ ᒋᐅᑭᒫᑲᑕᕽ ᒎᑕ ᐊᑮᓂ (Jeremiah 40.7-9; 41.1-3) 22 ᓀᐸᑲᓈᓴᕒ Nebuchadnezzar ᑕᔥ ᑳᑮ ᑭᒋᐅᑭᒫᐎᒡ ᐹᐱᓬᐊᓐ Babylon ᐊᑮᕽ ᐅᑮ ᐅᓇᑭᒫᓐ ᑫᑕᓬᐋᔭᐗᓐ Gedaliah ᒋᐅᑭᒫᑲᑕᐙᓂᒡ ᐯᒫᑎᓯᓂᒡ ᑳᑮ ᓇᑲᓂᒥᓐᒡ ᒎᑕ Judah ᐊᑮᕽ᙮ ᑫᑕᓬᐋᔭ ᓴ ᐋᐊᐃᑲᒻ Ahikam ᑮᐃᔑᓂᑳᓱᐗᓐ ᐅᑌᑌᓐ, ᐅᒥᔔᒥᓴᓐ ᑕᔥ ᔐᐸᓐ Shaphan ᑮᐃᔑᓂᑳᓱᐗᓐ᙮ 23 ᐊᐲ ᑕᔥ ᐃᑭ ᒎᑕᐎ ᔑᒫᑲᓂᔒᐎᑭᒫᒃ, ᔑᒫᑲᓂᔕᒃ ᑲᔦ ᐁᓅᑕᒧᐙᒡ ᓀᐸᑲᓈᓴᕒᐊᓐ ᐁᑮ ᐅᓈᐸᒫᓂᒡ ᑫᑕᓬᐋᔭᐗᓐ ᒋᐅᑭᒫᑲᑕᒥᓂᒡ ᒎᑕ ᐊᑮᓂ, ᒦ ᓴ ᑳᑮ ᐃᔑ ᐊᑕ ᐙᐸᒫᐙᒡ ᐌᑎ ᒥᔅᐸ Mizpah ᐆᑌᓈᕽ᙮ ᐃᔥᒣᔭᓬ Ishmael ᐌᑌᑌᒡ ᓀᑕᓈᔭᐗᓐ Nethaniah, ᒍᐋᓇᓐ Johanan ᐌᑌᑌᒡ ᑲᕒᐄᔭᓐ Kareah, ᓰᕒᐁᔭ ᐌᑌᑌᒡ ᑕᓅᒣᑕᓐ Tanumeth ᓀᑐᐸ Netophah ᑳᑮ ᐅᒌᓂᒡ, ᐊᐊ ᑲᔦ ᒉᐋᓴᓈᔭ Jaazaniah ᐌᑌᑌᒡ ᒣᐊᑲ ᐌᒌᓂᒡ Maacathite, ᒦᐗ ᐅᑯ ᐃᓂᓂᐗᒃ, ᐅᑎᓂᓃᒥᐙᐞ ᑲᔦ ᑳᑮ ᐊᑕ ᐙᐸᒫᐙᒡ ᑫᑕᓬᐋᔭᐗᓐ᙮ 24 ᑫᑕᓬᐋᔭ ᑕᔥ ᑮᐊᐱᒧ ᐁᑮ ᐐᑕᒪᐙᒡ ᐅᐅ ᐃᓂᓂᐗᐞ, ᑫᑯ ᑯᓵᑫᒀᓂᒃ ᐹᐱᓬᐊᓂᐎᑭᒫᒃ; ᐱᓵᓐ ᓴ ᐅᐅᒫ ᐊᑮᕽ ᐃᔑ ᑲᐯᔑᒃ, ᒋᐊᓄᑮᑕᐌᒃ ᐹᐱᓬᐊᓂᐎ ᑭᒋᐅᑭᒫ, ᒦᔥ ᐃᐃ ᒋᒥᓄᓭᔦᒃ᙮ 25 ᓃᔣᓱ ᑮᓯᔅ ᑕᔥ ᐁᐊᓂ ᐃᔑᓭᓂᒃ ᐊᐊ ᓴ ᐃᔥᒣᔭᓬ ᑳᑮ ᐅᑕᑳᓀᓯᒡ ᑳᑮ ᐱᐅᒋ ᐊᔮᓂᑫᐎᑭᒫᐎᓂᒡ, ᐅᑌᑌᓐ ᓀᑕᓈᔭ Nethaniah ᑳᑮ ᐃᔑᓂᑳᓱᓂᒡ, ᐅᒥᔔᒥᓴᓐ ᑕᔥ ᐃᓬᐃᔕᒪ Elishama ᑮᐃᔑᓂᑳᓱᐗᓐ᙮ ᐃᔥᒣᔭᓬ ᐅᑮ ᐱ ᐐᒌᐙᐞ ᒥᑖᓱ ᐃᓂᓂᐗᐞ ᒎᑕ ᐊᑮᕽ ᐌᒌᓂᒡ ᐁᑮ ᓂᓵᐙᒡ ᑫᑕᓬᐋᔭᐗᓐ᙮ ᐋᓂᑕ ᑲᔦ ᒎᑕᐎᓂᓂᐗᐞ, ᐃᐃ ᑲᔦ ᐹᐱᓬᐊᓃᐎᓂᓂᐗᐞ ᐅᑮ ᑕᑯ ᓂᓵᐙᐞ ᑳᑮ ᐐᒌᐙᓂᒡ ᑫᑕᓬᐋᔭᐗᓐ ᐌᑎ ᐆᑌᓈᕽ ᒥᔅᐸ Mizpah᙮ 26 ᑲᑭᓇ ᑕᔥ ᐯᒫᑎᓯᐙᒡ, ᑳᑮ ᑭᑎᒫᑭᓯᐙᒡ, ᑳᑮ ᐌᓅᑎᓯᐙᒡ ᑲᔦ, ᐃᑭ ᑲᔦ ᔑᒫᑲᓂᔒᐎᑭᒫᒃ ᐄᒋᐸᑮᕽ Egypt ᑮᐊᐸᐃᐌᐗᒃ, ᐋᓃᔥ ᐅᑮ ᑯᓵᐙᐞ ᐹᐱᓬᐊᓃᐎᓂᓂᐗᐞ᙮ ᒉᐆᔭᑭᓐ ᑮᐸᑭᑎᓂᓐᒡ ᒋᓵᑲᐊᕽ ᑳᑮᐃᔑᑭᐸᐅᓐᒡ (Jeremiah 52.31-34) 27 ᓂᓯᒥᑕᓇᔑᓃᔣᓱ 37 ᐱᐴᓐ ᐁᑮ ᐅᒋᒋᓭᓂᒃ ᐋᔕ ᒥᓂᒃ ᒉᐆᔭᑭᓐ Jehoiachin ᒎᑕᐎ ᑭᒋᐅᑭᒫ ᑳᑮ ᐃᔑᐎᒋᑲᓂᐎᑯᐸᓀᓐ ᐹᐱᓬᐊᓐ ᐊᑮᕽ᙮ ᒦ ᓴ ᐃ ᐊᐲ ᐄᐸᓬ ᒦᕒᐆᑖᒃ Evil-Merodach ᑳᑮ ᐊᓂ ᑭᒋᐅᑭᒫᐎᒡ᙮ ᑭᒋᐅᑭᒫ ᑕᔥ ᐅᑮ ᐸᑭᑎᓈᓐ ᒉᐆᔭᑭᓇᓐ ᒋᓵᑲᐊᒥᓂᒡ ᐁᔑ ᑭᐸᐅᒥᓐᒡ ᒥᑖᓱᑮᓯᓲᓐ ᐁᐱᒪᑭᓱᓂᒡ, ᓃᔥᑕᓇᔑᓃᔣᓱ 27 ᑮᔑᒃ ᐁᐃᔑᓭᓂᒃ᙮ 28 ᐌᐌᓂ ᓴ ᐅᑮ ᑲᑲᓅᓈᓐ ᒉᐆᔭᑭᓇᓐ, ᓇᐗᒡ ᐅᑮ ᐃᓇᓵᓐ ᒋᑭᒋ ᐃᓀᑖᑯᓯᓂᒡ ᐊᐲᒡ ᐐᓐ ᐃᐃ ᑯᑕᒃ ᑭᒋᐅᑭᒫᐞ ᑳᑮ ᐲᒋᑲᓂᐎᓂᑯᐸᓀᓐ ᐃᐃᒫ ᐹᐱᓬᐊᓐ ᐊᑮᕽ᙮ 29 ᒉᐆᔭᑭᓐ ᑕᔥ ᑮᐸᑭᑎᓈ ᒋᑮᒋᑯᔥᑲᕽ ᑭᐸᐅᑏᐎ ᑭᑭᔥᑭᑲᓇᓐ, ᒥᓂᒃ ᑕᔥ ᑳᑮ ᐱᒫᑎᓯᒡ ᑭᒋᐅᑭᒫᓐ ᓴ ᐅᑮ ᐐᑑᐸᒫᓐ ᐅᑕᑑᐳᐎᓈᑯᓃᕽ ᐁᑮ ᐅᑕᒋᑫᒡ᙮ 30 ᐁᑕᓱᑮᔑᒃ ᓴ ᑭᒋᐅᑭᒫᓐ ᐅᑮ ᒦᓂᑰᓐ ᔔᓂᔮᓐ ᒥᓂᒃ ᐃᑯ ᑳᑮ ᐱᒫᑎᓯᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society