2 ᑭᒋᐅᑭᒫᒃ 24 - ᐅᒋᐺ ᑭᒋᒪᓯᓇᐃᑲᓐᒉᐆᔭᑭᓐ ᒎᑕ ᑭᒋᐅᑭᒫ 8 ᒉᐆᔭᑭᓐ Jehoiachin ᓴ ᒥᑖᔑᓂᔣᓱ 18 ᑮᑕᓱᐱᐴᓉ ᑮᒫᒌ ᑭᒋᐅᑭᒫᐎᒡ᙮ ᓂᓱᑮᓯᔅ ᓴ ᑮᑭᒋᐅᑭᒫᐎ ᐃᐃᒫ ᒉᕒᐆᓴᓬᐊᒥᕽ Jerusalem᙮ ᐅᒫᒫᓐ ᓴ ᓃᐅᔥᑕ Nehushta ᑮᐃᔑᓂᑳᓱᐗᓐ ᑳᑮ ᐅᑖᓂᓯᒥᑯᓂᒡ ᐁᓬᓀᑕᓐ Elnathan ᒉᕒᐆᓴᓬᐊᒥᕽ ᐌᒌᓂᒡ᙮ 9 ᑳᐐᓐ ᓴ ᑾᔭᒃ ᑮᐃᔑᒋᑫᓰ ᐁᓈᓴᒦᓂᒡ ᑳᑎᐯᒋᑫᓂᒡ, ᑖᐱᔥᑰ ᑳᑮ ᐃᔑᒋᑫᓂᒡ ᐅᑌᑌᓐ᙮ 10 ᒦ ᓴ ᐃ ᐊᐲ ᑮᑭᒋᐅᑭᒫᐎᒡ ᑳᑮ ᐲᔖᓂᒡ ᐃᓂ ᓀᐸᑲᓈᓴᕒᐊᓐ Nebuchadnezzar ᐅᔑᒫᑲᓂᔒᐎᑭᒫᒥᓂ ᐃᐃᒫ ᒉᕒᐆᓴᓬᐊᒥᕽ ᐁᑮ ᐙᑳᔥᑲᒥᓂᒡ᙮ 11 ᓀᐸᑲᓈᓴᕒᐊᓐ ᓴ ᑫᐐᓐ ᑮᐲᔖᐗᓐ ᐃᐃᒫ ᒣᒀ ᐅᔑᒫᑲᓂᔒᐎᑭᒫᒥᓂ ᐁᐙᑳᔥᑲᒥᓂᒡ ᒉᕒᐆᓴᓬᐊᒻ ᐆᑌᓈᕽ᙮ 12 ᒦᑕᔥ ᒉᐆᔭᑭᓐ ᒎᑕ Judah ᑭᒋᐅᑭᒫ, ᐅᒫᒫᓐ ᑲᔦ, ᐃᐃ ᑲᔦ ᐅᑕᓄᑮᐋᑲᓇᐞ, ᐅᔑᒫᑲᓂᔒᐎᑭᒫᒪᐞ ᑲᔦ, ᐅᑖᓂᑫᐎᑭᒫᒪᐞ ᑲᔦ ᑳᑮ ᐸᑭᒌᐙᒡ ᐁᔑᐊᔮᓂᒡ ᐹᐱᓬᐊᓂᐎ ᔑᒫᑲᓂᔕᐞ᙮ ᒦ ᓴ ᐃ ᓂᔣᓱ 8 ᐱᐴᓐ ᓀᐸᑲᓈᓴᕒᐊᓐ ᑮᑭᒋᐅᑭᒫᐎᓂᒡ ᐊᐲ ᑮᒫᒌᓂᑯᒡ ᒉᐆᔭᑭᓐ ᑮᑕᑯᓂᑯᒡ᙮ 13 ᒦᑕᔥ ᓀᐸᑲᓈᓴᕒ ᑳᑮ ᒫᒌᑑᒡ ᑲᑭᓇ ᐁᔑ ᐌᓅᑕᓂᓂᒃ ᑭᒋ ᐊᓇᒥᐁᐎᑲᒥᒃ, ᐁᔑ ᐌᓅᑕᓂᓂᒃ ᑲᔦ ᑭᒋᐅᑭᒫᐎᑲᒥᒃ᙮ ᐅᑮ ᒫᒌᑑᓇᓐ ᑲᔦ ᑲᑭᓇ ᔂᓬᐊᒪᓇᓐ Solomon ᑳᑮ ᐅᔑᑑᓂᐸᓐ ᑳᐅᓵᐎ ᔔᓂᔮ ᐙᐱᑯᐗᑭᓐ ᐋᐸᒋᒋᑲᓇᓐ ᐃᐃᒫ ᐅᑭᒋ ᐊᓇᒥᐁᐎᑲᒥᑯᓃᕽ ᑳᑎᐯᒋᑫᓂᒡ, ᐁᑮ ᐃᔑᓭᓂᒃ ᒪᔮ ᑳᑮ ᐃᑭᑐᓂᑯᐸᓀᓐ ᑳᑎᐯᒋᑫᓂᒡ᙮ 14 ᒦᑕᔥ ᑲᔦ ᑳᑮ ᒫᒌᓈᒡ ᐯᒫᑎᓯᓂᒡ ᒉᕒᐆᓴᓬᐊᒥᕽ ᐌᒌᓂᒡ ᐅᑕᑮᒥᕽ ᐁᑮ ᐃᔑᐎᓈᒡ ᒥᑖᒌᕽ ᒥᑖᔂᒃ 10,000 ᐁᑮ ᑕᔑᓂᒡ᙮ ᑲᑭᓇ ᐋᓂᑫᐎᑭᒫᐞ, ᑲᑭᓇ ᑲᔦ ᒦᑳᓱᐎᓂᓂᐗᐞ, ᐃᐃ ᑲᔦ ᓀᑲᒋᑑᓂᒡ ᑫᑰᓐ, ᐲᐙᐱᑯᑫᐎᓂᓂᐗᐞ ᑲᔦ᙮ ᒫᐗᒡ ᓴ ᑫᑎᒫᑭᓯᓂᒡ ᐁᑕ ᐅᑮ ᓇᑲᓈᐞ ᐃᐃᒫ ᐊᑮᕽ ᒋᐊᔮᓂᒡ᙮ 15 ᓀᐸᑲᓈᓴᕒ ᓴ ᐅᑮ ᒫᒌᓈᓐ ᒉᐆᔭᑭᓇᓐ ᐁᑮ ᑕᑯᓈᒡ ᐹᐱᓬᐊᓐ Babylon ᐊᑮᕽ ᐁᑮ ᐃᔑᐎᓈᒡ᙮ ᐅᒫᒫᓂ ᑲᔦ, ᐅᐐᐎᓂ ᑲᔦ, ᐅᑖᓂᑫᐎᑭᒫᒥᓂ ᑲᔦ, ᑳᓃᑳᓂᓯᓂᒡ ᑲᔦ, ᒉᕒᐆᓴᓬᐊᒥᕽ ᐁᑮ ᐅᒋ ᒫᒌᓈᒡ ᐹᐱᓬᐊᓐ ᐊᑮᕽ ᐃᑕᔥ ᐁᑮ ᐃᔑᐎᓈᒡ᙮ 16 ᓃᔣᒋᕽ ᒥᑖᔂᒃ 7,000 ᓴ ᑲᔦ ᑮᑕᔑᐗᐞ ᒦᑳᓱᐎᓂᓂᐗᐞ, ᑕᑯ ᑲᔦ ᒥᑖᔂᒃ 1,000 ᑳᑮ ᓇᑲᒋᑑᓂᒡ ᑫᑰᓐ, ᐲᐙᐱᑯᑫᐎᓂᓂᐗᐞ ᑲᔦ, ᑲᑭᓇ ᓴ ᑯ ᐃᓂᓂᐗᐞ ᒣᓄᐊᔮᓂᒡ ᑫᔑᒫᑲᓂᔒᐎᓂᒡ᙮ ᒦᐗᐞ ᓴ ᐅ ᐹᐱᓬᐊᓐ ᐊᑮᕽ ᑳᑮ ᐃᔑᐎᓈᒡ᙮ 17 ᓀᐸᑲᓈᓴᕒ ᓴ ᐅᑮ ᐃᓇᑭᒫᓐ ᒪᑕᓈᔭᐗᓐ Mattaniah ᒋᑭᒋᐅᑭᒫᐎᓂᒡ ᒋᓈᐱᔥᑲᐙᓂᒡ ᒉᐆᔭᑭᓇᓐ, ᓭᑎᑳᔭ Zedekiah ᓴ ᐅᑮ ᐃᔑ ᐋᒋᓂᑳᓈᓐ᙮ ᒉᐆᔭᑭᓐ ᐄᑐᒃ ᑮᐅᒥᔔᒣᔑ ᒪᑕᓈᔭᐗᓐ᙮ ᓭᑎᑳᔭ ᒎᑕ ᑭᒋᐅᑭᒫ 18 ᓭᑎᑳᔭ ᓴ ᓃᔥᑕᓇᔑᐯᔑᒃ 21 ᑮᑕᓱᐱᐴᓉ ᑮᒫᒌ ᑭᒋᐅᑭᒫᐎᒡ, ᒥᑖᔑᐯᔑᑯᐱᐴᓐ 11 ᓴ ᑮᑭᒋᐅᑭᒫᐎ ᐃᐃᒫ ᒉᕒᐆᓴᓬᐊᒥᕽ᙮ ᐅᒫᒫᓐ ᓴ ᐊᒨᑕᓬ Hamutal ᑮᐃᔑᓂᑳᓱᐗᓐ ᑳᑮ ᐅᑌᑌᓂᒡ ᒉᕒᐊᒫᔭᐗᓐ Jeremiah ᐌᒌᓂᒡ ᓬᐃᑉᓇ Libnah ᑭᒋ ᐆᑌᓈᕽ᙮ 19 ᐐᑫ ᓴ ᓅᒋᑯ ᑮᐃᔑᒋᑫ ᐁᓈᓴᒦᓂᒡ ᑳᑎᐯᒋᑫᓂᒡ, ᐁᑮ ᓈᐱᒋᑫᒡ ᑳᑮ ᐃᔑᒋᑫᓂᒡ ᒉᐆᔭᑭᒪᓐ Jehoiakim᙮ 20 ᒦᑕᔥ ᑳᑎᐯᒋᑫᒡ ᑳᑮ ᐅᒋ ᑑᑕᐙᒡ ᐯᒫᑎᓯᓂᒡ ᒉᕒᐆᓴᓬᐊᒥᕽ ᐁᔮᓂᐸᓐ, ᒎᑕ ᐊᑮᕽ ᑲᔦ, ᓂᑯᒋ ᐁᑮ ᐃᔑ ᐌᐱᓈᒡ ᐋᓃᔥ ᐅᓵᒻ ᐅᑮ ᓂᔥᑭᐃᑰᐞ᙮ ᒦᑕᔥ ᓭᑎᑳᔭ ᑳᑮ ᔕᔒᐱᑕᐙᒡ ᐹᐱᓬᐊᓐ ᑭᒋᐅᑭᒫᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society