2 ᑭᒋᐅᑭᒫᒃ 23 - ᐅᒋᐺ ᑭᒋᒪᓯᓇᐃᑲᓐᒍᓵᔭ ᑮᐊᓅᑮᒡ ᒋᓂᔑᐗᓈᒋᒋᑳᑌᓂᒃ ᒪᓂᑑᑫᐎᓇᓐ 1 ᑭᒋᐅᑭᒫ ᑕᔥ ᐅᑮ ᐊᑐᒫᐞ ᐁᔑᐊᔮᒡ ᐃᐃ ᑲᑭᓇ ᑳᓃᑳᓂᓯᓂᒡ ᐃᐃᒫ ᒎᑕ Judah ᐊᑮᕽ, ᐃᐃᒫ ᑲᔦ ᑭᒋ ᐆᑌᓈᕽ ᒉᕒᐆᓴᓬᐊᒥᕽ Jerusalem᙮ 2 ᑭᒋᐅᑭᒫ ᓴ ᑕᔥ ᑮᐃᔖ ᑭᒋ ᐊᓇᒥᐁᐎᑲᒥᑯᕽ ᐁᑮ ᐐᒌᐎᑯᒡ ᑲᑭᓇ ᐃᓂᓂᐗᐞ ᒎᑕ ᐊᑮᕽ ᐌᒌᓂᒡ, ᐃᐃ ᑲᔦ ᑲᑭᓇ ᒉᕒᐆᓴᓬᐊᒥᕽ ᐌᒌᓂᒡ᙮ ᐃᐃ ᑲᔦ ᐊᓇᒥᐁᐎᑭᒫᐞ, ᐅᑮᑭᑑᑕᒫᑫᐞ ᑲᔦ, ᑲᑭᓇ ᑲᔦ ᐯᒫᑎᓯᓂᒡ ᑳᑮ ᑭᑎᒫᑭᓯᓂᒡ, ᑳᑮ ᐌᓅᑎᓯᓂᒡ ᑲᔦ᙮ ᒦᑕᔥ ᑳᐃᔑ ᐊᓇᒥᑕᒪᐙᒡ ᐃᐃ ᒪᓯᓇᐃᑲᓐ ᐅᑕᔓᑕᒫᑫᐎᓐ ᑳᑮ ᐃᔑ ᐅᔑᐲᐃᑳᑌᓂᒃ ᑳᑮ ᒥᑭᑳᑌᓂᒃ ᐃᐃᒫ ᑭᒋ ᐊᓇᒥᐁᐎᑲᒥᑯᕽ᙮ 3 ᐃᐃᒫ ᓴ ᑳᑮ ᐅᒋ ᐋᔀᑭᑌᓂᒃ ᐙᑳᐃᑲᓐ ᑮᐃᔑ ᓃᐸᐎ, ᒦᔥ ᐃᐃᒫ ᑳᐃᔑ ᐊᔓᑕᕽ ᐁᓈᓴᒦᓂᒡ ᑳᑎᐯᒋᑫᓂᒡ ᐁᐐ ᐱᒥᓂᔕᐙᒡ᙮ ᐁᐐ ᑲᓇᐌᑕᕽ ᑲᔦ ᐅᑎᓈᑯᓂᑫᐎᓂᓂ, ᐅᑑᓇᔓᐌᐎᓂᓂ, ᐅᑎᑭᑐᐎᓂᓂ ᑲᔦ᙮ ᒥᓯᐌ ᐱᑯ ᐅᑌᐃᕽ, ᐅᑕᒑᑯᕽ ᑲᔦ ᐁᐐ ᐅᒋ ᐃᔑᒋᑫᒡ ᑳᑮ ᐃᓇᑌᓂᒃ ᐃᐃᒫ ᐅᑕᔓᑕᒫᑫᐎᓐ ᑳᑮ ᐃᔑᐲᐃᑳᑌᓂᒃ ᐃᐃᒫ ᒪᓯᓇᐃᑲᓂᕽ᙮ ᑲᑭᓇ ᓴ ᑲᔦ ᐯᒫᑎᓯᐙᒡ ᑮᐊᔓᑕᒨᒃ ᑫᐐᓇᐙ ᐁᐐ ᑲᓇᐌᑕᒧᐙᒡ ᐃᐃ ᐊᔓᑕᒫᑫᐎᓐ᙮ 4 ᑭᒋᐅᑭᒫ ᑕᔥ ᐅᑮ ᐃᓈᑯᓈᓐ ᑭᒋ ᐊᓇᒥᐁᐎᑭᒫᓐ, ᐃᓂ ᑲᔦ ᑳᐐᒌᐎᑯᓂᒡ, ᐃᐃ ᑲᔦ ᑳᑮ ᓈᑲᒋᑑᓂᒡ ᐃᔥᒀᑌᒻ ᒋᐅᒋ ᓵᑭᓯᑑᓂᒡ ᐃᐃᒫ ᑭᒋ ᐊᓇᒥᐁᐎᑲᒥᑯᕽ ᑲᑭᓇ ᑫᑰᓇᓐ ᑳᑮ ᐅᔑᑕᒪᐎᒥᓐᒡ ᐃᐃ ᒪᓂᑑᑳᓇᐞ ᐯᓬ Baal, ᐋᔕᕒᐊ Asherah ᑲᔦ ᑳᑮ ᐃᔑᓂᑳᓂᒥᓐᒡ, ᐃᓂ ᑲᔦ ᑫᑰᓇᓐ ᑳᑮ ᐅᒋ ᐊᓇᒥᐁᑕᐎᒥᓐᒡ ᐗᓇᑯᔕᐞ᙮ ᐃᐃᒫ ᑕᔥ ᐊᑾᒌᕽ ᐆᑌᓈᕽ ᒉᕒᐆᓴᓬᐊᒥᕽ ᐯᔓ ᑮᑕᕒᐊᓐ Kidron ᑳᑮ ᐃᔑ ᐸᓴᑎᓈᓂᒃ, ᒦ ᓴ ᐃᒫ ᑳᑕᔑ ᐊᒀᑭᓴᕽ ᐃᓂᐌᓂᐗᓐ᙮ ᐃᔥᒀᑭᔐᓐ ᑕᔥ ᐅᑮ ᐃᔑᐎᑑᓇᓐ ᐌᑎ ᐆᑌᓈᕽ ᐯᑕᓬ Bethel ᑳᑮ ᐃᒋᑳᑌᓂᒃ᙮ 5 ᒦᑕᔥ ᑲᔦ ᑳᐃᔑ ᐴᓇᓄᑮᐋᒡ ᒪᓂᑑᑫᐎ ᐊᓇᒥᐁᐎᑭᒫᐞ ᑳᑮ ᐅᓇᑭᒥᑯᐙᑯᐸᓀᓐ ᒎᑕᐎ ᑭᒋᐅᑭᒫᐞ ᒋᒥᓈᓯᑫᓂᒡ ᐃᐃᒫ ᑳᑮ ᐃᔑ ᓂᑖ ᐸᑭᑎᓈᓱᐎᓐᒡ ᐆᑌᓈᕽ ᒎᑕ ᐊᑮᕽ, ᐃᐃᒫ ᑲᔦ ᒉᕒᐆᓴᓬᐊᒥᕽ᙮ ᒦᐗᐞ ᐃᑕᔥ ᐃᐃ ᑳᓂᑖ ᒥᓈᓴᒪᐙᓂᒡ ᒪᓂᑑᑳᓇᓐ ᐯᓬ ᑳᑮ ᐃᔑᓂᑳᓂᒥᓐᒡ, ᑮᓯᓲᓐ ᑲᔦ, ᑎᐱᑭᑮᓯᓲᓐ ᑲᔦ, ᑳᐊᔫᑾᑰᒋᓄᐙᒡ ᑲᔦ ᐗᓇᑯᔕᒃ, ᐗᓇᑯᔕᒃ ᑲᔦ ᑮᔑᑯᕽ ᑳᐊᔮᓂᒡ᙮ 6 ᐅᑮ ᐅᒋ ᓵᑭᓯᐋᓐ ᑲᔦ ᐃᑴᐎ ᒪᓂᑑᑳᓇᓐ ᐋᔕᕒᐊ ᑳᑮ ᐃᔑᓂᑳᓂᒥᓐᒡ ᐃᐃᒫ ᑭᒋ ᐊᓇᒥᐁᐎᑲᒥᑯᕽ ᐁᑮ ᐃᔑᐎᓈᒡ ᐌᑎ ᑮᑕᕒᐊᓐ ᐁᔑ ᐸᓴᑎᓈᓂᒃ ᐊᑾᒌᕽ ᒉᕒᐆᓴᓬᐊᒥᕽ᙮ ᒦᑕᔥ ᐌᑎ ᑳᑕᔑ ᐊᒀᑭᔂᒡ, ᐗᐐᑫ ᑲᔦ ᐁᑮ ᐲᓯᐴᓈᒡ, ᒦᔥ ᑳᐃᔑ ᐲᐎᐌᐱᓇᕽ ᐃᐃ ᑳᑮ ᐲᓯᐴᑑᒡ ᐃᐃᒫ ᑳᑮ ᐃᔑ ᓇᐃᓂᒥᓐᒡ ᑳᑕᐸᓭᑖᑯᓯᓂᒡ᙮ 7 ᐅᑮ ᐲᑯᐱᑑᓇᓐ ᑕᔥ ᑲᔦ ᑳᑮ ᐃᔑᑖᓂᒡ ᐃᐃ ᐃᓂᓂᐗᐞ ᑳᑮ ᐱᔑᒀᒋᒋᑫᓂᒡ ᐃᐃᒫ ᐲᒋ ᐊᓇᒥᐁᐎᑲᒥᑯᕽ, ᒦᔥ ᑲᔦ ᐃᐃᒫ ᐃᑴᐗᐞ ᑳᑕᔑ ᐃᔒᑭᓄᑫᓂᒡ ᑳᑮ ᐋᐸᑕᓂᓂᑭᓐ ᑮᐊᓇᒥᐁᑕᐎᒥᓐᒡ ᐃᑴᐎ ᒪᓂᑑᑳᓇᓐ ᐋᔕᕒᐊᐗᓐ ᐁᓂᒥᓐᒡ᙮ 8 ᐅᑮ ᐲᓈᐞ ᑕᔥ ᑲᔦ ᑲᑭᓇ ᐊᓇᒥᐁᐎᑭᒫᐞ ᑳᑮ ᐅᒌᓂᒡ ᐆᑌᓈᕽ ᒎᑕ ᐊᑮᕽ; ᒦᔥ ᑳᐃᔑ ᓂᔑᐗᓈᒋᑑᒡ ᑳᑮ ᓂᑖ ᑕᓇᑲᒥᑭᓯᓂᒡ ᑮᒥᓈᓯᑫᓂᒡ᙮ ᐃᐃᒫ ᑕᔥ ᐆᑌᓈᕽ ᑮᐸ Geba ᐁᒋᑳᑌᓂᒃ ᑮᐅᒋ ᒫᒌᑖ ᐲᓂᔥ ᐌᑎ ᐲᐊᕒᔒᐸ Beersheba ᐁᒋᑳᑌᓂᒃ᙮ ᐅᑮ ᓂᔑᐗᓈᒋᑑᓇᓐ ᑲᔦ ᑳᑮ ᐃᔑ ᐸᑭᑎᓈᓱᐎᓐᒡ ᒌᑲᔭᐄ ᐃᔥᒀᑌᒻ ᑳᑮ ᐅᔑᑑᒡ ᒑᔓᐙ ᐅᓇᔓᐌᐎᑭᒫ, ᓇᒪᑎᓂᑭᕽ ᐃᓇᑫ ᑳᐃᔑᐊᔮᒃ ᑭᒋ ᐃᔥᒀᑌᒻ᙮ 9 ᐃᑭ ᑕᔥ ᐐᓐ ᑎᓄ ᐊᓇᒥᐁᐎᑭᒫᒃ ᑳᐐᓐ ᑮᐸᑭᑎᓈᓰᐗᒃ ᒋᑕᓇᓄᑮᐙᒡ ᐃᐃᒫ ᑳᑮ ᐃᔑ ᐸᑭᑎᓈᓱᐎᓐᒡ ᑭᒋ ᐊᓇᒥᐁᐎᑲᒥᑯᕽ, ᔖᑰᒡ ᐃᑕᔥ ᐅᑮ ᐐᒋ ᐐᓯᓃᒫᐙᐞ ᑯᑕᒃ ᐊᓇᒥᐁᐎᑭᒫᐞ ᑮᐊᒸᓂᒡ ᐸᑴᔑᑲᓇᓐ ᐌᐱᓯᑲᓂᐎᓯᓂᒃ᙮ 10 ᑭᒋᐅᑭᒫ ᒍᓵᔭ ᓴ ᑲᔦ ᐅᑮ ᓂᔑᐗᓈᒋᑑᓐ ᑑᐸᑦ Topheth ᐁᒋᑳᑌᓂᒃ ᑳᑮ ᓂᑖ ᑕᔑ ᐊᓇᒥᐁᐎᒋᑫᓂᒡ ᐁᔑᐊᔮᓂᒃ ᐃᓇᒻ ᐸᓴᑎᓈᕽ Hinnom Valley᙮ ᒦᑕᔥ ᑳᐅᒋ ᑑᑕᕽ ᐊᐎᔭᓐ ᒋᐸᑭᑎᓈᓱᐙᑫᓯᓂᒃ ᐅᑖᓂᓯᓂ, ᑯᒫ ᑲᔦ ᐅᑯᓯᓯᓂ ᒋᐸᑭᑎᓇᒪᐙᓯᓂᒃ ᒨᓬᐁᒃ ᐁᓂᒥᓐᒡ ᒪᓂᑑᑳᓇᓐ᙮ 11 ᐅᑮ ᐋᒋᐎᓈᐞ ᑲᔦ ᒥᑕᑎᒨᐞ ᑳᑮ ᐊᓯᒥᑎᐸᓐ ᐁᔑ ᐃᔥᒀᑌᒥᐗᓂᓂᒃ ᐅᑕᓇᒥᐁᐎᑲᒥᑯᓃᕽ ᑳᑎᐯᒋᑫᓂᒡ᙮ ᒦᐗᐞ ᐄᑐᒃ ᐅᐅ ᒥᑕᑎᒨᐞ ᒎᑕᐎ ᑭᒋᐅᑭᒫᒃ ᑳᑮ ᐃᑭᑐᐙᑯᐸᓀᓐ ᑮᓯᓱᕽ ᐁᐅᒋ ᑎᐯᑖᑯᓯᓂᒡ᙮ ᐅᑮ ᓴᑲᐙᐞ ᑲᔦ ᐅᑖᐹᓈᑾᐞ ᐃᐃᒫ ᑳᑮ ᐋᐸᑎᓯᓂᒡ᙮ ᒦᐗᐞ ᓴ ᐅᐅ ᑳᑮ ᐊᔮᓂᒡ ᐃᐃᒫ ᐁᔑ ᐐᐱᒋᑳᑌᓂᒃ ᑭᒋ ᐊᓇᒥᐁᐎᑲᒥᑯᕽ ᒌᑭᐃᔥᒀᓐᑦ, ᐯᔓ ᑳᑮ ᐃᔑᑖᓂᒡ ᐃᓂ ᓀᑕᓐ ᒥᓬᐁᒃ Nathan Melech ᐁᓂᒥᓐᒡ ᐅᑭᒫᓐ᙮ 12 ᐅᑮ ᐲᑯᐱᑑᓇᓐ ᓴ ᑲᔦ ᐁᔑ ᐸᑭᑎᓈᓱᐎᓐᒡ ᑳᑮ ᐅᔑᑑᓂᑯᐸᓀᓐ ᒎᑕᐎ ᑭᒋᐅᑭᒫᐞ ᐗᑭᑕᐸᒃ ᐸᑫᒋᑲᓂᕽ ᑳᑮ ᐃᔑᐊᔮᓂᒡ ᐁᐋᔅ Ahaz ᑳᑮᐃᓂᒥᓐᒡ᙮ ᐅᑮ ᒫᒌᑑᓇᓐ ᑲᔦ ᐁᔑ ᐸᑭᑎᓈᓱᐎᓐᒡ ᒪᓈᓴᐗᓐ Manasseh ᑳᑮ ᐅᔑᑑᓂᑯᐸᓀᓐ ᐃᐃᒫ ᐁᔑ ᓃᔓ ᐐᐹᑯᓂᑳᑌᓂᒃ ᐅᑕᓇᒥᐁᐎᑲᒥᑯᓃᕽ ᑳᑎᐯᒋᑫᓂᒡ, ᐌᑎ ᑕᔥ ᐅᑮ ᐃᔑ ᐱᑭᔥᑲᐋᓇᓐ ᐁᑮ ᐃᔑ ᐌᐱᓇᕽ ᑮᑕᕒᐊᓐ ᐸᓴᑎᓈᕽ Kidron Valley᙮ 13 ᐅᑮ ᓂᔑᐗᓈᑌᑖᑯᑑᓇᓐ ᑲᔦ ᐃᔥᐹᐱᑭᓂᑲᓇᓐ ᐁᔮᓂᑭᓐ ᐙᐸᓄᕽ ᐃᓇᑫ ᒉᕒᐆᓴᓬᐊᒥᕽ, ᔖᐗᓄᕽ ᐃᓇᑫ ᐱᑾᑎᓈᕽ ᐋᓬᐃᑉ ᑭᑎᑳᓈᑎᑯᑲᕽ ᑳᐃᔑᓂᑳᑌᒃ, ᔂᓬᐊᒪᓇᓐ Solomon ᑳᑮ ᐅᔑᑑᓂᑯᐸᓀᓐ ᐃᔅᕒᐃᔭᓬᐃ ᑭᒋᐅᑭᒫᓐ᙮ ᒦᐞ ᐄᑐᒃ ᐃᐃᒫ ᑳᑮ ᑕᔑ ᐊᓇᒥᐁᑕᐎᒥᓐᒡ ᑳᑲᒀᓂᓴᑫᑖᑯᓯᓂᒡ ᐃᑴᐎ ᒪᓂᑑᑳᓇᓐ ᐋᔅᑕᑎ Ashtoreth ᐁᓂᒥᓐᒡ ᓵᐃᑕᓐ Sidon ᑳᐅᒌᓂᒡ ᐅᒪᓂᑑᒥᓂ᙮ ᐃᓂᔥ ᑲᔦ ᑮᒧᔥ Chemosh ᐁᓂᒥᓐᒡ ᐅᒪᓂᑑᒥᓂ ᒨᐗᑉ Moab ᐊᑮᕽ ᐌᒌᓂᒡ, ᐃᓂ ᑲᔦ ᐅᒪᓂᑑᑳᓂᓂ ᐁᒪᓐ Ammon ᐌᒌᓂᒡ ᒨᓬᐁᒃ Molech ᐁᓂᒥᓐᒡ᙮ 14 ᒍᓵᔭ ᑕᔥ ᑲᔦ ᐅᑮ ᐲᑾᐙᐞ ᐊᓇᒥᐁᐌᑖᑯᓯᓂᒡ ᐊᓯᓃᐞ ᑳᐸᑕᑭᓱᓂᒡ, ᐅᑮ ᑲᐗᐙᐞ ᑲᔦ ᒥᑎᑯᐎ ᒪᓂᑑᑳᓇᐞ ᐋᔐᕒᐊ ᐁᓂᒥᓐᒡ᙮ ᒌᐯᑲᓇᓐ ᓴ ᑕᔥ ᐅᑮ ᐋᐸᒋᑑᓇᓐ ᒥᓯᐌ ᐁᑮ ᐋᑾᓇᐊᕽ ᒥᑕᑲᒥᒃ ᑳᑮ ᐃᔑᐊᔮᓂᑭᐸᓀᓐ ᒪᓂᑑᑫᐎᓇᓐ᙮ 15 ᐅᑮ ᐲᑯᐱᑑᓐ ᓴ ᑲᔦ ᐁᔑ ᐸᑭᑎᓈᓱᐎᓐᒡ, ᐃᐃ ᑲᔦ ᐃᔥᐹᐱᑭᓂᑲᓐ ᐁᔮᓂᒃ ᐯᑕᓬ Bethel ᐆᑌᓈᕽ᙮ ᒦᐞ ᐄᑐᒃ ᐃᐃ ᑳᑮ ᐅᔑᑑᓂᐸᓐ ᒉᕒᐆᐴᐊᒪᓐ Jeroboam ᐌᑌᑌᓂᒡ ᓃᐸᑦ Nebat, ᑳᑮ ᑲᔥᑭᐋᓂᒡ ᐃᔅᕒᐃᔭᓬᐊᐞ Israel ᒋᒪᒋᑑᑕᒥᓂᒡ᙮ ᐐᑫ ᓴ ᐅᑮ ᓂᔑᐗᓈᒋᐋᐞ ᐊᓯᓃᐞ ᑳᐋᐸᑎᓯᓂᒡ, ᐁᑮ ᐱᑭᔥᑭᐴᓈᒡ ᒋᐹᔥᑭᓀᓭᓂᒡ᙮ ᐅᑮ ᒑᑭᔂᓐ ᑲᔦ ᒪᓂᑑᑳᓇᓐ ᐯᑕᑭᓱᓂᒡ ᐋᔕᕒᐊ ᐁᓂᒥᓐᒡ᙮ 16 ᐁᐊᔨᓈᐱᒡ ᓴ ᑕᔥ ᐅᑮ ᐙᐸᑖᓇᓐ ᓇᐃᓂᑏᐎᑲᒥᑰᓐ ᐁᔮᓂᑭᓐ ᐋᓴᒪᑎᓈᒃ᙮ ᒦᑕᔥ ᑳᑮ ᓵᑭᓯᑑᒡ ᐅᑲᓂᒫᓐ ᐁᑮ ᒑᑭᓴᕽ ᐁᔑ ᐸᑭᑎᓈᓱᐎᓐᒡ᙮ ᒦ ᓴ ᐅᐅᐌᓇᑫ ᑳᐃᔑ ᐗᓈᑌᑖᑯᑑᒡ ᐃᐃ ᐁᔑ ᐸᑭᑎᓈᓱᐎᓐᒡ, ᐁᑮ ᐃᔑᓭᓂᒃ ᒪᔮ ᑳᑮ ᐃᑭᑐᓂᑯᐸᓀᓐ ᑳᑎᐯᒋᑫᓂᒡ ᑮᐋᐸᒋᐋᓂᑯᐸᓀᓐ ᑫᓅᑕᒫᑯᓂᒡ ᒣᐎᔕ᙮ 17 ᒦᑕᔥ ᑭᒋᐅᑭᒫ ᑳᐃᑭᑐᒡ ᐁᐙᐸᑕᕽ ᓇᐃᓂᑏᐎᑲᒥᒃ, ᐊᐌᓀᓐ ᐃᑕᔥ ᐐᓐ ᐃᐃ ᐅᓇᐃᓂᑰᐎᑲᒥᒃ? ᒦᔥ ᑳᐃᑭᑐᓂᒡ ᐯᒫᑎᓯᓂᒡ ᐃᐃᒫ ᐁᔮᓂᒡ, ᒦ ᓴ ᐃᐌᓂ ᐅᓇᐃᓂᑰᐎᑲᒥᒃ ᐅᑲᓅᑕᒫᑫ ᒎᑕ ᐊᑮᕽ ᑳᑮ ᐅᒌᒡ᙮ ᒦᐞ ᐄᑐᒃ ᐊᐊ ᑳᑮ ᐃᑭᑐᑯᐸᓀᓐ ᒋᐃᔑᓭᓂᒃ ᐅᐅ ᑳᑑᑕᒧᐗᒡ ᐁᔑ ᐸᑭᑎᓈᓱᐎᓐᒡ, ᑮᐃᓈ᙮ 18 ᒦᑕᔥ ᑳᐃᑭᑐᒡ, ᑫᑯ ᐐᓐ ᐃᐃ ᐸᐹᒣᑕᑫᒃ, ᑫᑯ ᒥᑯᔥᑳᒋᑑᐙᑫᒃ ᐅᑲᓇᓐ, ᑮᐃᑭᑐ᙮ ᑳᐐᓐ ᑮᐸᐹᒣᒋᑳᑌᓯᓂᓂᐗᓐ ᐃᓂ ᐅᑲᓇᓐ, ᐃᓂ ᑲᔦ ᐅᑮᑭᑑᑕᒫᑫᓐ ᑳᑮ ᐅᒌᓂᒡ ᓴᒣᕒᐃᔭ Samaria ᐊᑮᕽ᙮ 19 ᐃᐃ ᓴ ᑳᑮ ᐃᔑᒋᑫᒡ ᐃᐃᒫ ᐯᑕᓬ ᐆᑌᓈᕽ, ᒦ ᓴ ᒍᓵᔭ Josiah ᑳᐃᔑ ᐲᑯᐱᑑᒡ ᐙᑳᐃᑲᓇᓐ ᐁᔮᓂᑭᓐ ᐃᔥᐹᐱᑭᓂᑲᓂᕽ ᑳᑮ ᐅᔑᑑᓂᑯᐸᓀᓐ ᐃᔅᕒᐃᔭᓬᐃ ᑭᒋᐅᑭᒫᐞ ᒥᓯᐌ ᓴᒣᕒᐃᔭ Samaria ᐊᑮᕽ᙮ ᒦ ᐃ ᐋᓃᔥ ᐃᐃᒫ ᑳᐅᒋ ᓂᔥᑭᐋᐙᒡ ᑳᑎᐯᒋᑫᓂᒡ᙮ 20 ᑲᔦ ᐅᑮ ᓂᓵᐞ ᐃᐃᒫ ᐁᔑ ᐸᑭᑎᓈᓱᐎᓐᒡ ᑲᑭᓇ ᒪᓂᑑᑫᐎ ᐊᓇᒥᐁᐎᑭᒫᐞ ᑳᐃᔑᐊᔮᒃ ᐃᔥᐹᐱᑭᓂᑲᓐ, ᐁᑮ ᒑᑭᓴᕽ ᐊᐎᔭ ᐅᑲᓂᓂ ᐃᐃᒫ ᐁᔑ ᐸᑭᑎᓈᓱᐎᓐᒡ᙮ ᒦᑕᔥ ᒉᕒᐆᓴᓬᐊᒥᕽ ᑳᐊᓂ ᐃᔑ ᑮᐌᒡ᙮ ᒍᓵᔭ ᑮᑲᓇᐌᑕᕽ ᐱᒫᒋᐃᑰᐎ ᐐᑾᑎᐎᓐ 21 ᒦᑕᔥ ᑭᒋᐅᑭᒫ ᒍᓵᔭ ᑳᑮ ᐃᓈᑯᓈᒡ ᑲᑭᓇ ᐯᒫᑎᓯᓂᒡ, ᑑᑕᐎᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᒋᐱᒫᒋᐃᑰᐎ ᐐᑾᑏᐗᑲᒥᑭᓯᔦᒃ ᒋᐃᔑᒋᑫᔦᒃ ᐁᔑᓯᕽ ᒪᓯᓇᐃᑲᓂᕽ ᐊᔓᑕᒫᑫᐎᓐ ᐁᔑ ᐅᔑᐲᐃᑳᑌᒃ, ᐅᑮ ᐃᓈᐞ᙮ 22 ᑳᐐᓐ ᓴ ᐐᑳ ᐅᐅ ᑎᓄ ᐱᒫᒋᐃᑰᐎ ᐐᑾᑏᐗᑲᒥᑭᓯᐎᓐ ᑮᐱ ᐃᔑᒋᑳᓂᐗᓯᓅᓐ ᐊᑯᓈᒃ ᐅᓈᑯᓂᑫᒃ ᑮᐱ ᐅᓈᑯᓈᐙᒡ ᐃᔅᕒᐃᔭᓬᐊᐞ, ᑮᐱ ᐊᔮᐙᒡ ᑲᔦ ᐃᔅᕒᐃᔭᓬᐃ ᑭᒋᐅᑭᒫᒃ, ᒎᑕ ᑭᒋᐅᑭᒫᒃ ᑲᔦ᙮ 23 ᒥᑖᔑᓂᔣᓱ 18 ᐱᐴᓐ ᓴ ᑳᑭᒋᐅᑭᒫᐎᒡ ᒍᓵᔭ, ᒦ ᓴ ᐃ ᑳᐃᔑᒋᑫᐙᒡ ᐁᑮ ᐱᒫᒋᐃᑰᐎ ᐐᑾᑏᐗᑲᒥᑭᓯᐙᒡ ᐃᐃᒫ ᒉᕒᐆᓴᓬᐊᒥᕽ ᑳᑎᐯᒋᑫᓂᒡ ᐅᒋ᙮ ᑫᑰᓇᓐ ᒍᓵᔭ ᑳᑮᐋᒋᑑᒡ 24 ᒦᑕᔥ ᑲᔦ ᑳᐊᓂ ᐃᔑᒋᑫᒡ ᑫᓅᓈᓂᒡ ᓀᐳᓂᒡ, ᐊᒑᑾᐞ ᑲᔦ ᐁᑮ ᑭᐱᑎᓈᒡ, ᒪᓂᑑᑳᓇᐞ ᑲᔦ ᐁᔮᓂᒡ ᐙᑳᐃᑲᓂᑳᕽ ᑫᔮᐱ ᒋᐋᐸᑎᓯᓯᓂᓂᒃ, ᒪᓂᑑᑳᓇᐞ ᐃᑯ ᑲᔦ, ᑲᑭᓇ ᓴ ᑫᑰᓐ ᑳᓈᑾᓂᓂᑭᓐ ᑫᒀᓂᓴᑫᑖᑾᓂᓂᑭᓐ ᐃᐃᒫ ᒎᑕ ᐊᑮᕽ, ᐃᐃᒫ ᑲᔦ ᒉᕒᐆᓴᓬᐊᒥᕽ᙮ ᒦᔥ ᑳᑮ ᐅᒋ ᐃᔑᒋᑫᒡ ᒋᑎᐱᓭᓂᒃ ᒪᔮ ᐁᔑᐲᐃᑳᑌᓂᒃ ᒪᓯᓇᐃᑲᓐ ᐁᔑ ᐅᔑᐲᐃᑳᑌᓂᒃ ᐅᓇᔓᐌᐎᓐ ᑳᑮ ᒥᑲᒥᓂᒡ ᐊᓇᒥᐁᐎᑭᒫᓐ ᐌᑎ ᐅᑭᒋ ᐊᓇᒥᐁᐎᑲᒥᑯᓃᕽ ᑳᑎᐯᒋᑫᓂᒡ᙮ 25 ᑳᐐᓐ ᓴ ᐐᑳ ᐆᑖᓇᕽ ᑭᒋᐅᑭᒫᓐ ᐃᐃ ᑮᐱ ᐃᔑᐊᔮᓰᐗᓐ ᑳᑮ ᐃᔑᐊᔮᒡ, ᑳᐐᓐ ᑲᔦ ᐊᐎᔭᓐ ᑮᐊᓂ ᐃᔑᐊᔮᓰᐗᓐ᙮ ᐁᓂᑯᑯᑌᐁᒡ ᐃᑯ, ᐅᑕᒑᑯᕽ ᑲᔦ, ᐁᑯ ᑲᔥᑭᑑᒡ ᐃᑯ ᑲᔦ ᐁᑮ ᑑᑕᕽ ᑲᑭᓇ ᐁᔑᓯᓂᓂᒃ ᒨᓯᓲᓐ Moses ᐅᑑᓇᔓᐌᐎᓂᓂ᙮ 26 ᔖᑰᒡ ᐃᑕᔥ ᑳᐐᓐ ᑳᑎᐯᒋᑫᒡ ᑮᐋᑌᑕᓰ ᒋᐴᓀᑕᕽ ᑳᑮ ᐃᔑ ᓂᔥᑭᐃᑯᒡ ᒎᑕ ᐊᑮᕽ ᐁᔮᓂᒡ ᐯᒫᑎᓯᓂᒡ, ᐅᓵᒻ ᐋᓃᔥ ᒪᓈᓴᐗᓐ Manasseh ᒥᓯᐌ ᐅᑮ ᐃᔑ ᑲᑳᒋᐃᑰᓐ ᒋᓂᔥᑳᑎᓯᒡ᙮ 27 ᒦᑕᔥ ᑳᑮ ᐃᑭᑐᒡ ᑳᑎᐯᒋᑫᒡ, ᓂᑯᒋ ᓴ ᓂᑲ ᐃᔑ ᐌᐱᓈᒃ ᐁᓈᓴᒦᐗᒃ ᒎᑕ ᐊᑮᕽ ᐌᒌᐙᒡ, ᑖᐱᔥᑰ ᑳᑮ ᑑᑕᐗᒀ ᐃᔅᕒᐃᔭᓬ ᐊᑮᕽ ᐁᔮᐙᐸᓐ᙮ ᒦᔥ ᑲᔦ ᒋᐋᓇᐌᑕᒫᓐ ᐃᐃ ᑭᒋ ᐆᑌᓇ ᒉᕒᐆᓴᓬᐊᒻ ᑳᑮ ᐅᓀᑕᒫᐹᓐ, ᐅᐅ ᑲᔦ ᑭᒋ ᐊᓇᒥᐁᐎᑲᒥᒃ ᑳᑮ ᐃᑭᑐᔮᐹᓐ, ᒦ ᓴ ᐃᐌ ᓂᐐᓱᐎᓐ ᐁᑕᓀᑖᑾᒃ, ᑮᐃᑭᑐ᙮ ᒍᓵᔭ ᑮᐴᓂᑭᒋᐅᑭᒫᐎᒡ 28 ᑲᑭᓇ ᓴ ᑳᑮ ᐃᔑᒋᑫᒡ ᒣᒀ ᐁᑭᒋᐅᑭᒫᐎᒡ ᐃᐃᒫ ᐃᔑ ᐅᔑᐲᐃᑳᑌᓂᐗᓐ ᒪᓯᓇᐃᑲᓂᕽ ᐁᔑ ᐅᔑᐲᐃᑳᓱᐙᒡ ᑳᑮ ᐱ ᐊᔨᑎᐙᒡ ᒎᑕ ᑭᒋᐅᑭᒫᒃ᙮ 29 ᒣᒀ ᓴ ᑮᑭᒋᐅᑭᒫᐎᒡ, ᐄᒋᐸᑮᕽ ᐌᒌᓂᒡ ᑭᒋᐅᑭᒫᓐ ᓃᑯ Neco ᐁᔑᓂᑳᓱᓂᒡ ᑮᐲᔖᐗᓐ ᐃᐃᒫ ᐃᔫᐸᕒᐁᑏᔅ Euphrates ᓰᐱᕽ ᐁᑮ ᐲᓈᓂᒡ ᐅᔑᒫᑲᓂᔒᒥᓂ ᐁᐐ ᐐᒋᐋᓂᒡ ᐊᓰᕒᐃᔭ ᑭᒋᐅᑭᒫᓐ᙮ ᒦᑕᔥ ᒍᓵᔭ ᑳᑮ ᑲᑴ ᑭᐱᑎᓈᒡ ᐁᑮ ᒦᑳᓈᒡ᙮ ᒦᔥ ᑳᑮ ᓂᓯᑯᒡ ᐌᑎ ᒣᑭᑑ Megiddo ᐁᒋᑳᑌᓂᒃ᙮ 30 ᐅᑕᓄᑮᐋᑲᓇᐞ ᐃᑕᔥ ᐅᑮ ᐴᓯᑑᓂ ᐅᑖᐹᓈᑯᕽ ᐅᐐᔭᐤ ᐁᑮ ᐃᔑ ᑮᐌᐎᑑᓂᒡ ᒉᕒᐆᓴᓬᐊᒥᕽ, ᐁᑮ ᐃᔑ ᓇᐃᓂᑯᒡ ᐁᔑ ᓇᐃᓂᒥᓐᒡ ᐃᔅᕒᐃᔭᓬᐃ ᑭᒋᐅᑭᒫᐞ᙮ ᐯᒫᑎᓯᐙᒡ ᓴ ᒎᑕ ᐊᑮᕽ ᐌᒌᐙᒡ ᐅᑮ ᐅᓈᐸᒫᐙᓐ ᒍᓵᔭᐗᓐ ᐅᑯᓯᓯᓂ ᒎᐋᐊᔅ Joahaz ᐁᔑᓂᑳᓱᓂᒡ ᐁᑮ ᑭᒋᐅᑭᒫᐎᐋᐙᒡ ᒋᓈᐱᔥᑲᐙᓂᒡ ᐅᑌᑌᓂ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society