2 ᑭᒋᐅᑭᒫᒃ 22 - ᐅᒋᐺ ᑭᒋᒪᓯᓇᐃᑲᓐ

ᒍᓵᔭ ᑮᑭᒋᐅᑭᒫᐎᐃᓐᒡ

¹ ᒍᓵᔭ Josiah ᓴ ᑮᓂᔣᓱᐱᐴᓉ 8 ᑮᒫᒌ ᑭᒋᐅᑭᒫᐎᒡ ᐃᐃᒫ ᒎᑕ ᐊᑮᕽ᙮ ᓂᓯᒥᑕᓇᔑᐯᔑᑯᐱᐴᓐ 31 ᓴ ᒉᕒᐆᓴᓬᐊᒥᕽ Jerusalem ᑮᑕᔑ ᑭᒋᐅᑭᒫᐎ᙮ ᐅᒫᒫᓐ ᑕᔥ ᒉᑖᐃᑕ Jedidah ᑮᐃᔑᓂᑳᓱᐗᓐ, ᑳᑮ ᐅᑖᓂᓯᒥᑯᓂᒡ ᐊᑌᔭ Adaiah ᑳᑮ ᐃᔑᓂᑳᓱᓂᒡ, ᐴᔅᑳᑦ Bozkath ᐆᑌᓈᕽ ᑳᑮ ᐅᒌᓂᒡ᙮

² ᑾᔭᒃ ᓴ ᑮᐃᔑᒋᑫ ᒍᓵᔭ ᐁᓈᓴᒦᓂᒡ ᑳᑎᐯᒋᑫᓂᒡ, ᑮᐃᔑ ᐱᒫᑎᓯ ᑲᔦ ᒥᓯᐌ ᓇᑫ ᑳᑮ ᐃᔑ ᐱᒫᑎᓯᓂᒡ ᑌᐱᑑᓐ David ᐅᑫᑌᔭᐋᒪᓐ᙮ ᐐᑫ ᐅᑮ ᐱᒥᓂᔕᐊᒪᐙᓐ ᐅᑎᓈᑯᓂᑫᐎᓂᓂ ᑳᑎᐯᒋᑫᓂᒡ ᐁᑮ ᐃᔑ ᐸᑫᓯᒃ᙮

ᑮᒥᑭᑳᑌᒃ ᒪᓯᓇᐃᑲᓐ ᐅᓇᔓᐌᐎᓐ ᐁᔑᐅᔑᐲᐃᑳᑌᒃ

³ ᐁᐊᓂ ᐊᔨᔑᓭᓂᒃ ᑕᔥ ᒥᑖᔑᓂᔣᓱ 18 ᐱᐴᓐ ᒍᓵᔭ Josiah ᑮᐱ ᐱᒥᑭᒫᐎᒡ, ᐅᑮ ᐃᔑᓂᔕᐙᓐ ᐅᑑᔑᐲᐃᑫᐎᓂᓃᒪᓐ ᔐᐸᓐ Shaphan ᐁᔑᓂᑳᓱᓂᒡ ᒋᐃᔖᓂᒡ ᑭᒋ ᐊᓇᒥᐁᐎᑲᒥᑯᕽ᙮ ᐅᑌᑌᓂ ᑕᔥ ᐋᓴᓬᐋᔭ Azaliah, ᐅᒥᔔᒥᓯᓂ ᑕᔥ ᒦᔕᓬᐊᒻ Meshullam ᑮᐃᔑᓂᑳᓱᐗᓐ᙮

⁴ ᒦᔥ ᐅᐅ ᑳᐃᓈᒡ, ᒫᒑᓐ ᐊᑕ ᐙᐸᒻ ᐃᓬᑳᔭ Hilkiah ᑭᒋ ᐊᓇᒥᐁᐎᑭᒫ ᐌᑎ ᑳᔑ ᐊᔮᒡ ᑳᑎᐯᒋᑫᓂᒡ ᐅᐙᑳᐃᑲᓂᓃᕽ᙮ ᐅᐐ ᓴᑲᑲᑭᒫᓐ ᐅᔕ ᔔᓂᔮᓐ ᑳᑮ ᒫᐗᑑᓈᓂᒡ ᐃᐃ ᐃᔥᒀᑌᕽ ᑳᑲᓇᐌᑕᒥᓂᒡ, ᑳᑮ ᐸᑭᑎᓂᑫᐋᓂᒡ ᐯᒫᑎᓯᓂᒡ ᐁᐱ ᐲᑎᑫᓂᒡ᙮

⁵ ᐐᑕᒪᐤ ᓴ ᒋᒦᓈᒡ ᔔᓂᔮᓐ ᐃᐃ ᐃᓂᓂᐗᐞ ᑳᑲᓇᐙᐸᑕᒥᓂᒡ ᐊᓄᑮᐎᓐ ᑭᒋ ᐊᓇᒥᐁᐎᑲᒥᑯᕽ, ᒦᔥ ᐃᐃᒫ ᑫᐅᒋ ᑎᐸᐊᒪᐙᓂᒡ ᐃᐃ ᐃᓂᓂᐗᐞ ᑳᐗᐌᔑᑑᓂᒡ ᑭᒋ ᐊᓇᒥᐁᐎᑲᒥᑯᓂ ᑮᐲᑯᔥᑳᓂᒃ᙮

⁶ ᒋᑎᐸᐊᒪᐙᒡ ᑲᔦ ᒥᑎᑯᓈᐯᐞ, ᑳᐙᑳᐃᑫᓂᒡ, ᑳᐅᓈᐱᑭᓂᑫᓂᒡ ᑲᔦ᙮ ᒋᐊᑖᐌᐙᒡ ᑲᔦ ᓇᐸᑭᓴᑰᐞ, ᐊᓯᓃᐞ ᑲᔦ ᑫᐋᐸᑎᓯᓂᒡ ᐗᐌᔑᒋᑳᑌᓂᒃ ᑭᒋ ᐊᓇᒥᐁᐎᑲᒥᑯᓂ᙮

⁷ ᐃᑭ ᓴ ᐃᓂᓂᐗᒃ ᑳᓈᓈᑲᒋᑑᐙᒡ ᐅᐅ ᐊᓄᑮᐎᓐ ᑳᐐᓐ ᒣᒬᒡ ᐐᓇᐙ ᑕᓈᓈᑲᒋᐋᓰᐗᒃ ᐋᓃᓐ ᐁᑑᑕᐙᐙᒡ ᔔᓂᔮᓐ, ᐋᓃᔥ ᐗᐐᑫ ᑾᔭᒃ ᑌᐺᔦᑖᑯᓯᐗᒃ, ᑮᐃᑭᑐ᙮

⁸ ᐃᓬᑳᔭ ᑭᒋ ᐊᓇᒥᐁᐎᑭᒫ ᑕᔥ ᐅᑮᐃᓈᓐ ᔐᐸᓇᓐ Shaphan ᐅᔑᐲᐃᑫᐎᓂᓂᐗᓐ, ᓂᑮ ᒥᑳᓐ ᓴ ᐃ ᒪᓯᓇᐃᑲᓐ ᑳᔑ ᐅᔑᐲᐃᑳᑌᒃ ᐅᓇᔓᐌᐎᓐ ᐃᐃᒫ ᐲᑎᒃ ᑳᑎᐯᒋᑫᒡ ᐅᐙᑳᐃᑲᓂᕽ᙮ ᒦᔥ ᐃᓬᑳᔭ ᑳᐃᔑ ᒦᓈᒡ ᔐᐸᓇᓐ ᐃᐃ ᒪᓯᓇᐃᑲᓐ᙮ ᒦᔥ ᑳᐃᔑ ᐊᓇᒥᑑᓂᒡ᙮

⁹ ᒦᑕᔥ ᐅᔑᐲᐃᑫᐎᓂᓂ ᔐᐸᓐ ᑳᑮ ᐊᑕ ᐙᐸᒫᒡ ᑭᒋᐅᑭᒫᓐ ᐁᑮ ᐐᑕᒪᐙᒡ ᐋᓃᓐ ᑳᐃᔑ ᐙᐸᑕᕽ ᐁᑮ ᐃᑭᑐᒡ, ᑭᑕᓄᑮᐋᑲᓇᒃ ᓴ ᐅᑮ ᑎᐸᐃᑳᑫᓈᐙᓐ ᐃᓂ ᔔᓂᔮᓐ ᑭᒋ ᐊᓇᒥᐁᐎᑲᒥᑯᕽ ᑳᑮ ᐊᔮᓂᒡ ᐁᑮ ᒦᓈᐙᒡ ᐊᓄᑮᐎᓂᓂᐗᐞ, ᐃᐃ ᑲᔦ ᑳᓈᓈᑲᒋᑑᓂᒡ ᐊᓄᑮᐎᓐ ᑭᒋ ᐊᓇᒥᐁᐎᑲᒥᑯᕽ᙮

¹⁰ ᒦᑕᔥ ᑲᔦ ᔐᐸᓐ ᑳᐃᓈᒡ ᑭᒋᐅᑭᒫᓐ, ᐃᓬᑳᔭ ᑭᒋ ᐊᓇᒥᐁᐎᑭᒫ ᓂᑮ ᒦᓂᒃ ᐅᐅ ᒪᓯᓇᐃᑲᓐ᙮ ᒦᔥ ᔐᐸᓐ ᑳᐃᔑ ᐊᓇᒥᑑᒡ ᐃᐃᒫ ᐁᔑᐊᔮᓂᒡ ᑭᒋᐅᑭᒫᓐ᙮

¹¹ ᐊᐲ ᑕᔥ ᑭᒋᐅᑭᒫ ᑳᓅᑕᕽ ᐋᓃᓐ ᐁᔑᐲᐃᑳᑌᓂᒃ ᐅᓇᔓᐌᐎᓐ ᐃᐃᒫ ᒪᓯᓇᐃᑲᓂᕽ, ᒦ ᓴ ᑳᐃᔑ ᑖᔥᑮᑭᐱᑑᒡ ᐅᑭᑭᔥᑭᑲᓇᓐ ᐁᐲᒋ ᒥᑯᔥᑳᑌᑕᕽ᙮

¹² ᒦᑕᔥ ᑭᒋᐅᑭᒫ ᑳᐃᔑ ᐊᓅᓈᒡ ᐃᓬᑳᔭᐗᓐ ᑭᒋ ᐊᓇᒥᐁᐎᑭᒫᓐ, ᐃᓂ ᐋᐊᐃᑲᒪᓐ Ahikam ᐌᑯᓯᓯᒥᑯᓂᒡ ᔐᐸᓇᓐ, ᐃᓂ ᑲᔦ ᐊᒃᐸᕒᐊᓐ Achbor ᐌᑯᓯᓯᒥᑯᓂᒡ ᒫᐃᑫᔭᐗᓐ Micaiah, ᐃᓂ ᑲᔦ ᔐᐸᓇᓐ ᐅᔑᐲᐃᑫᐎᓂᓂᐗᓐ, ᐃᓂ ᑲᔦ ᐊᓭᔭᐗᓐ Asaiah ᑭᒋᐅᑭᒫ ᑳᑮ ᐸᒥᐃᑯᒡ ᐁᑮᐃᓈᒡ,

¹³ ᒫᒑᒃ ᐊᑕ ᑲᑴᒋᒥᒃ ᑳᑎᐯᒋᑫᒡ, ᐁᑲᑴᑗᑕᒪᐎᔮᕽ, ᐅᑯ ᑲᔦ ᑲᑭᓇ ᐯᒫᑎᓯᐙᒡ ᐅᐅᒫ ᑳᐊᔮᐙᒡ ᒎᑕ Judah ᐊᑮᕽ, ᐁᐐ ᑭᑫᑕᒧᐗᑭᒡ ᐋᓃᓐ ᐁᔑᐲᐃᑳᑌᓂᒃ ᐃᐃ ᒪᓯᓇᐃᑲᓐ ᑳᑮ ᒥᑭᑳᑌᓂᒃ᙮ ᐐᑫ ᐅᔕ ᑭᑭᒋ ᓂᔥᑭᐋᓈᑐᒃ ᑳᑎᐯᒋᑫᒡ, ᐅᓵᒻ ᐋᓃᔥ ᑭᑫᑌᔭᐋᒥᓈᓂᒃ ᑳᐐᓐ ᐅᑮ ᐱᓯᑕᓰᓈᐙ ᐋᓃᓐ ᐁᔑᐲᐃᑳᑌᓂᒃ ᐅᐅ ᒪᓯᓇᐃᑲᓐ, ᑳᐐᓐ ᑲᔦ ᑭᑮ ᑑᑕᒫᑯᓰᓈᓂᒃ ᑲᑭᓇ ᑳᐃᔑᐲᐃᑳᑌᓂᒃ ᐅᐅ ᒪᓯᓇᐃᑲᓐ᙮

¹⁴ ᐃᑭᐌᓂᐗᒃ ᑕᔥ ᐃᓂᓂᐗᒃ, ᐃᓬᑳᔭ, ᐋᐊᐃᑲᒻ Ahikam, ᐊᒃᐸᕒ Achbor, ᐊᐊ ᑲᔦ ᐊᓭᔭ Asaiah ᐅᑮ ᐊᑕ ᑲᓅᓈᐙᓐ ᐃᓂ ᐃᑴᐗᓐ ᑳᑮ ᑲᓅᑕᒪᐙᓂᒡ ᑭᔐᒪᓂᑑᓐ ᐋᓬᑕ Huldah ᐁᔑᓂᑳᓱᓂᒡ᙮ ᐅᓈᐯᒪᓐ ᑕᔥ ᐊᐊ ᐃᑴ ᔖᓬᐊᒻ Shallum ᑮᐃᔑᓂᑳᓱᐗᓐ, ᐅᑮ ᑲᓇᐌᑕᒥᓂ ᐊᓇᒥᐁ ᑭᑭᔥᑭᑲᓇᓐ ᑳᑮ ᐅᑌᑌᓂᒡ ᑎᒃᐸ Tikvah, ᑳᑮ ᐊᓂ ᐅᑌᑌᓂᒡ ᐅᕒᐋᔥ Harhas ᑳᑮ ᐃᔑᓂᑳᓱᓂᒡ᙮ ᒉᕒᐆᓴᓬᐊᒥᕽ Jerusalem ᑕᔥ ᐃᓇᑫ ᑳᑮ ᐃᔑ ᐅᔥᑭ ᑲᐯᔑᐎᓐᒡ ᑮᐃᔑᑖᐗᓐ ᐃᓂ ᐃᑴᐗᓐ᙮ ᐅᑮ ᐐᑕᒪᐙᐙᓐ ᐋᓃᓐ ᑳᑮ ᐃᓇᑲᒥᑲᓂᓂᒃ᙮

¹⁵ ᐋᓬᑕᐗᓐ ᑕᔥ ᐅᑮᐃᑯᐙᓐ, ᒦ ᐅᔕ ᐅ ᐁᑭᑐᒡ ᑳᑎᐯᒋᑫᒡ ᐌᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ Israel, ᐐᑕᒪᐤ ᐃᑭ ᐃᓂᓂᐗᒃ ᑳᐱ ᐃᔑᓂᔕᐅᑣ ᑳᔑ ᐊᔮᔭᓐ᙮

¹⁶ ᐅᐅ ᐁᐃᑭᑐᒡ ᑳᑎᐯᒋᑫᒡ, ᓂᐐ ᓇᓇᐊᑑᓐ ᓴ ᐃ ᒉᕒᐆᓴᓬᐊᒻ ᑭᒋ ᐆᑌᓇ, ᐃᑭ ᑲᔦ ᑲᑭᓇ ᐃᐃᒫ ᐆᑌᓈᕽ ᑳᐃᔑᑖᐙᒡ, ᒋᐃᔑᐌᐱᓯᐙᒡ ᒪᔮ ᐱᑯ ᑲᑭᓇ ᑳᐃᔑᐲᐃᑳᑌᓂᒃ ᐃᐃ ᒪᓯᓇᐃᑲᓐ ᑳᑮ ᐊᓇᒥᑑᒡ ᐊᐊ ᒎᑕᐎ ᑭᒋᐅᑭᒫ᙮

¹⁷ ᐅᓵᒻ ᐋᓃᔥ ᓂᑮ ᐌᐱᓂᑰᒃ ᐃᔅᕒᐃᔭᓬᐊᒃ, ᐸᑳᓂ ᒪᓂᑑᐞ ᑲᔦ ᐅᒥᓈᓴᒪᐙᐙᐞ, ᒦᔥ ᐃᐃ ᑳᑮ ᐅᒋ ᓂᔥᑭᐃᐙᒡ ᐋᒋᑯ ᐅᓂᒌᐙᕽ ᐁᑮ ᐅᒋ ᐅᔑᐋᐙᒡ ᒪᓂᑑᑳᓇᐞ᙮ ᐐᑫ ᑕᔥ ᓂᓂᔥᑭᐃᑯᓐ ᐃᐃ ᐆᑌᓇ ᒉᕒᐆᓴᓬᐊᒻ, ᑳᐐᓐ ᑲᔦ ᓅᑕᐞ ᓂᐐ ᐊᐲᒋ ᑭᑖᓱᓰ᙮

¹⁸ ᐊᐊᐌ ᑕᔥ ᐐᓐ ᒎᑕᐎ ᑭᒋᐅᑭᒫ, ᒦ ᓴ ᐅ ᐁᐃᓇᒃ ᓃᓐ ᑳᑎᐯᒋᑫᐗᒃ, ᑳᑭᔐᒪᓂᑑᑲᑕᐎᒪᒃ ᐃᔅᕒᐃᔭᓬᐊᐞ, ᐁᑮ ᐱᓯᑕᒪᓐ ᓴ ᐃ ᑳᐃᔑᐲᐃᑳᑌᒃ ᒪᓯᓇᐃᑲᓐ,

¹⁹ ᐁᑴᑳᑎᓯᔭᓐ, ᐁᑕᐸᓭᓂᑎᓱᔭᓐ ᑲᔦ ᐁᓈᓴᒦᔮᓐ, ᐁᑖᔥᑮᑭᐱᑑᔭᓐ ᑲᔦ ᑭᑭᑭᔥᑭᑲᓇᓐ, ᐁᒪᐎᔭᓐ ᑲᔦ ᐊᐲ ᑳᓅᑕᒪᓐ ᐁᐐ ᓇᓇᐊᑑᔮᓐ ᐃᐃ ᐆᑌᓇ ᒉᕒᐆᓴᓬᐊᒻ, ᐃᑭ ᑲᔦ ᑲᑭᓇ ᐃᐃᒫ ᑳᐱᒫᑎᓯᐙᒡ᙮ ᐗᐐᑫ ᐅᔕ ᐁᐐ ᓂᔑᐗᓈᒋᒋᑳᑌᑭᐸᓐ, ᐯᒫᑎᓯᐙᒡ ᑫᐊᐱᑕᒧᐙᒡ ᐊᐲ ᒪᒋᑮᔗᐙᒡ᙮ ᓂᑮ ᓅᑖᓐ ᓴ ᑮᓐ ᐃᐃ ᑳᑮ ᐃᔑ ᐊᓇᒥᐁᑕᐎᔭᓐ᙮

²⁰ ᐃᐌ ᑕᔥ ᑳᐐ ᐃᔑ ᓇᓇᐊᑑᔮᓐ ᐃᐃ ᑭᒋ ᐆᑌᓇ ᒉᕒᐆᓴᓬᐊᒻ ᑳᐐᓐ ᑕᐃᔑᐌᐸᓯᓅᓐ ᐹᓂᒫ ᑮᐃᔥᒀ ᐱᒫᑎᓯᔭᓐ᙮ ᐱᓵᓐ ᓴ ᑮᓐ ᐌᐌᓂ ᑭᑲ ᓂᑉ᙮ ᒦ ᓴ ᐃ ᐁᓇᒃ ᒍᓵᔭ ᑭᒋᐅᑭᒫ, ᐃᑭᑐ ᑳᑎᐯᒋᑫᒡ, ᐅᑮᐃᑯᐙᓐ᙮ ᒦᑕᔥ ᐃᑭ ᐃᓂᓂᐗᒃ ᑳᐃᔑ ᑮᐌᐙᒡ ᐁᑮ ᐊᐎ ᐐᑕᒪᐙᐙᒡ ᒍᓵᔭᐗᓐ ᐋᓃᓐ ᑳᑮᐃᓂᑣ᙮