2 ᑭᒋᐅᑭᒫᒃ 19 - ᐅᒋᐺ ᑭᒋᒪᓯᓇᐃᑲᓐᐁᓯᑳᔭ ᑮᑲᑴᒋᒫᒡ ᐅᑲᓅᑕᒫᑫᓐ ᐋᐃᓭᔭᐗᓐ (Isaiah 37.1-7) 1 ᐊᐲ ᓴ ᑭᒋᐅᑭᒫ ᐁᓯᑳᔭ ᐅᐅ ᑳᓅᑕᕽ, ᒦ ᓴ ᑳᐃᔑ ᑖᔥᑮᑭᐱᑑᒡ ᐅᑭᑭᔥᑭᑲᓇᓐ ᐁᑮ ᐱᓯᑲᕽ ᐊᓴᐲᐌᑭᓄᐗᔮᓐ ᐁᐲᒋ ᒥᑯᔥᑳᑌᑕᕽ᙮ ᒦᑕᔥ ᑳᐃᔑ ᐃᔖᒡ ᑳᑎᐯᒋᑫᓂᒡ ᐅᑭᒋ ᐊᓇᒥᐁᐎᑲᒥᑯᓃᕽ᙮ 2 ᒦᑕᔥ ᑳᑮ ᐃᔑᓂᔕᐙᒡ ᐃᓬᐋᐃᑲᒪᓐ Eliakim ᓀᔮᓈᑲᒋᑑᓂᒡ ᐅᑭᒫᐎᑲᒥᒃ, ᐃᓂ ᑲᔦ ᔐᑉᓇᐗᓐ Shebna ᐅᔑᐲᐃᑫᐎᓂᓂᐗᓐ, ᐃᐃ ᑲᔦ ᑳᓃᑳᓂᓯᓂᒡ ᐊᓇᒥᐁᐎᑭᒫᐞ᙮ ᐅᑯᐌᓂᐗᒃ ᑲᑭᓇ ᐅᑮ ᑭᑭᔥᑳᓈᐙ ᐊᓴᐲᐌᑭᓄᐗᔮᓇᓐ᙮ ᐅᑮ ᐊᑕ ᐙᐸᒫᐙᓐ ᑕᔥ ᐋᐃᓭᔭᐗᓐ ᑫᓅᑕᒪᐙᓂᒡ ᑭᔐᒪᓂᑑᓐ ᐌᑌᑌᓂᒡ ᐁᒫᔅ Amoz ᐁᓂᒥᓐᒡ᙮ 3 ᒦᔥ ᐅᐅ ᑳᐃᓈᓂᒡ, ᒦ ᓴ ᐅᐌᓂ ᐁᓯᑳᔭ ᐁᑭᑐᒡ, ᓅᑯᒻ ᑳᑮᔑᑲᒃ ᓴ ᐁᑕᑕᐌ ᐗᓯᑖᐌᑖᑾᓐ, ᐁᑭᒋ ᓅᒋᐃᑰᔮᕽ, ᐁᑰᐹᓯᓈᑯᓯᔮᕽ ᑲᔦ᙮ ᑭᑎᔑᓈᑯᓯᒥᓐ ᓴ ᑯ ᑖᐱᔥᑰ ᐃᑴ ᐁᐐ ᓂᑖᐎᑭᓈᐙᓱᒡ ᑳᑌᐊᐲᒌᓯᒃ ᒋᓂᑖᐎᑭᐃᐌᒡ᙮ 4 ᐊᓰᕒᐃᔭᐎ ᑭᒋᐅᑭᒫ ᐄᑐᒃ ᐅᑮ ᐊᓅᓈᓐ ᐅᕒᐊᑉᔕᑫᐗᓐ Rabshakeh ᔑᒫᑲᓂᔒᐎᑭᒫᓐ ᒋᑮᑭᑑᑕᒫᑯᒡ ᐁᑮ ᐱ ᒫᓀᓂᒫᒡ ᐯᒫᑎᓯᓂᒡ ᑭᔐᒪᓂᑑᓐ᙮ ᑫᒋᓈᒡ ᒫᐐᓐ ᑳᑎᐯᒋᑫᒡ ᑭᑭᔐᒪᓂᑑᒻ ᐅᑮ ᓅᑕᐙᑐᑴᓇᐞ ᑲᑭᓇ ᑳᑮ ᐃᑭᑐᓂᒡ, ᐐᓐ ᐃᑕᔥ ᒋᓇᓇᐊᓵᓂᒡ ᐃᐃ ᑳᑮ ᐃᑭᑐᓂᒡ᙮ ᐊᓇᒥᐁᑕᒪᐤ ᐃᑕᔥ ᐃᑭ ᐁᔥᑯᓭᐙᒡ ᒪᔑ ᓀᓵᓯᐎᑣ, ᐅᑮᐃᓈᐙᓐ᙮ 5 ᐊᐲ ᑕᔥ ᐋᐃᓭᔭ Isaiah ᑳᓅᑕᕽ ᑳᐱᐃᑯᒡ ᐁᓯᑳᔭᐗᓐ, 6 ᒦᔥ ᐅᐅ ᑳᐃᔑ ᐐᑕᒪᐙᒡ ᒋᐊᐎᐃᓈᓂᒡ, ᐅᑑᑭᒫᒥᓂ, ᒦ ᓴ ᐅᐌ ᑳᑎᐯᒋᑫᒡ ᐁᑭᑐᒡ, ᑫᑯ ᐅᒋ ᓭᑭᓯᑫᒃ ᐃᐃ ᑳᐃᔑ ᓅᑕᒣᒃ ᐁᑭᑐᓂᒡ ᐁᒪᒋᐃᓈᐱᓀᒥᒥᒡ ᐅᑕᓄᑮᐋᑲᓇᐞ ᐊᐊ ᐊᓰᕒᐃᔭᐎ ᑭᒋᐅᑭᒫ᙮ 7 ᓃᓐ ᓴ ᓂᑲ ᐃᔑᐋ ᐅᑕᒑᑯᕽ ᒋᐃᓂᑕᕽ ᑫᐅᒋ ᑮᐌᒡ ᐅᑕᑮᒥᕽ, ᒦᑕᔥ ᐌᑎ ᑫᔑ ᑑᑕᐗᒃ ᐸᔑᐸᐃᑫᐎᑯᒫᓂᕽ ᒋᐅᒋ ᓂᓯᓐᒡ, ᐅᑮ ᐃᓈᐞ ᒋᐊᐎ ᐃᑭᑐᓂᒡ᙮ ᐊᓰᕒᐃᔭᐎᓂᓂᐗᒃ ᒦᓇᐙ ᑮᑲᑴᓭᑭᑖᑯᓯᐙᒡ (Isaiah 37.8-20) 8 ᐊᐲ ᑕᔥ ᐅᕒᐊᑉᔕᑫ ᐁᓅᑕᕽ ᐊᓰᕒᐃᔭᐎ ᑭᒋᐅᑭᒫᓐ ᐁᑮ ᒪᑗ ᐅᒋ ᒫᒑᓂᒡ ᓬᐁᑭᔥ Lachish ᐆᑌᓈᕽ, ᒦ ᓴ ᑳᐃᔑ ᒫᒑᒡ ᐁᐊᑕ ᐙᐸᒫᒡ, ᒦᔥ ᑌᐺ ᑳᑮ ᒦᑳᓈᓂᒡ ᓬᐃᑉᓇ Libnah ᐆᑌᓈᕽ ᐌᒌᓂᒡ᙮ 9 ᐊᐲ ᓴ ᓭᓈᑲᕒᐃᑉ Sennacherib ᐁᓅᑕᕽ ᐄᒋᐲᐎ ᑭᒋᐅᑭᒫᓐ ᑌᕒᐊᑲ Tirhakah ᐁᔑᓂᑳᓱᓂᒡ, ᐁᐲᔖᓂᒡ ᐁᐐ ᐱ ᒦᑳᓂᑯᒡ, ᒦ ᓴ ᑳᑮ ᐃᔑ ᐃᔑᓂᔕᐙᒡ ᐊᐎᔭᐞ ᐅᐅ ᒋᐊᐎᐃᓈᓂᒡ ᐁᓯᑳᔭᐗᓐ, 10 ᐅᐅ ᓴ ᐃᓈᑫᒃ ᐁᓯᑳᔭ ᑫᒋᐅᑭᒫᐎᒡ ᒎᑕ ᐊᑮᕽ, ᑫᑯ ᓴ ᐸᑭᑎᓂᑎᓱᑫᓐ ᒋᐗᓂᒥᒃ ᑭᔐᒪᓂᑑ ᐁᐯᓂᒧᔭᓐ ᐅᐅ ᐁᐃᓂᒃ, ᑳᐐᓐ ᓴ ᑕᐸᑭᑎᓈᓰ ᐊᓰᕒᐃᔭᐎ ᑭᒋᐅᑭᒫ ᒋᔖᑰᒋᑑᒡ ᒉᕒᐆᓴᓬᐊᒥᓂ᙮ 11 ᑭᓅᑖᓐ ᐄᑐᒃ ᐋᓃᓐ ᐊᓰᕒᐃᔭᐎ ᑭᒋᐅᑭᒫ ᐁᑑᑕᕽ ᑲᑭᓇ ᐊᑮᓐ, ᐐᑫ ᐱᑯ ᐁᓂᔑᐗᓈᒋᑑᒡ᙮ ᑭᑎᓀᑕᒻ ᐃᓇ ᑕᔥ ᑮᓐ ᒋᓈᑕᒫᑰᔭᓐ? 12 ᓂᑫᑌᔭᐋᒥᐸᓃᒃ ᐄᑐᒃ ᐅᑮ ᓂᔑᐗᓈᒋᑑᓈᐙᓐ ᐅᓄ ᐆᑌᓇᐗᓐ ᑯᓴᓐ Gozan, ᐁᕒᐊᓐ Haran, ᐅᕒᐁᓴᑉ Rezeph, ᐃᐃ ᑲᔦ ᐯᒫᑎᓯᓂᒡ ᐄᑎᓂᕽ Eden ᐁᔑᑖᓂᒡ ᑌᓬᐊᓴᕒ Telassar, ᑳᐐᓐ ᐃᑕᔥ ᑲᓇᑫ ᐅᒪᓂᑑᒥᐙᐞ ᒋᑮ ᓈᑕᒫᑯᐙᒡ᙮ 13 ᐋᓃᑎ ᑕᔥ ᐃᑭ ᑭᒋᐅᑭᒫᒃ ᐌᒌᐙᒡ ᐁᒪᑦ Hamath, ᐁᕒᐸᑦ Arpad, ᓭᐸᕒᐯᔨᒻ Sepharvaim, ᐃᓇ Hena, ᐋᐃᐸ Ivvah ᑲᔦ? ᐃᓂᒃ, ᐅᑮᐃᓈᓂ᙮ 14 ᒦᑕᔥ ᑭᒋᐅᑭᒫ ᐁᓯᑳᔭ Hezekiah ᑳᐃᔑ ᐅᑖᐱᓇᕽ ᐃᐃ ᐅᔑᐲᐃᑲᓐ ᑳᑮ ᐲᑑᓂᒡ ᐅᐲᑖᒋᒨᐞ ᐁᑮ ᐊᓇᒥᑑᒡ᙮ ᒦᔥ ᑳᐃᔑ ᐃᔑᐎᑑᒡ ᐅᑭᒋ ᐊᓇᒥᐁᐎᑲᒥᑯᓃᕽ ᑳᑎᐯᒋᑫᓂᒡ ᐁᑮ ᑕᔗᑭᓯᑑᒡ ᐁᓈᓴᒦᓂᒡ᙮ 15 ᒦᑕᔥ ᑳᐃᔑ ᐊᓇᒥᐁᑕᐙᒡ ᑳᑎᐯᒋᑫᓂᒡ ᐁᑮ ᐃᑭᑐᒡ, ᑮᓐ ᑳᑎᐯᒋᑫᔭᓐ, ᐃᔅᕒᐃᔭᓬᐊᒃ ᐌᑭᔐᒪᓂᑑᒥᐙᒡ, ᑫᒋᐅᑭᒫᐗᐱᔭᓐ ᓇᓴᐤ ᐁᔑᐊᔮᐙᒡ ᒉᕒᐊᐲᒃ cherubim, ᑮᓐ ᐄᑐᒃ ᐁᑕ ᑭᑭᔐᒪᓂᑑᐤ ᐁᑎᐯᑕᒪᓐ ᑲᑭᓇ ᐅᑭᒫᐎᐎᓇᓐ ᐅᐅᒫ ᐊᑮᕽ᙮ ᑮᓐ ᑳᑮ ᐅᔑᑑᔭᓐ ᑭᒋᑮᔑᒃ, ᐊᑭ ᑲᔦ᙮ 16 ᐆ ᑌᐯᒋᑫᔭᓐ ᑕᑲ ᐙᐸᒥᔑᓈᒻ ᐅᐅ ᑳᐃᔑᓭᔮᕽ, ᓅᑕᒧᐤ ᑲᔦ ᐋᓃᓐ ᓭᓈᑲᕒᐃᑉ ᐁᑭᑐᒡ ᐁᒪᒋᐃᓈᐱᓀᒥᒃ ᑮᓐ ᑳᑎᐯᒋᑫᐗᒡ᙮ 17 ᑌᐯᒋᑫᔭᓐ, ᑌᐺ ᓴ ᐊᓰᕒᐃᔭᐎ ᑭᒋᐅᑭᒫᒃ ᐅᓂᔑᐗᓈᒋᐋᐙᐞ ᑯᑕᒃ ᐯᒫᑎᓯᓂᒡ, ᐅᑕᑮᒥᓂ ᑲᔦ᙮ 18 ᐅᑮ ᒪᒋᑌ ᐌᐱᓈᐙᐞ ᓴ ᐅᒪᓂᑑᒥᓂ ᐁᑮ ᓂᔑᐗᓈᒋᑕᒪᐙᐙᒡ, ᑳᐐᓐ ᐄᑐᒃ ᑮᒪᓂᑑᐎᓰᐗᐞ᙮ ᑮᒥᑎᑯᐎᐗᐞ ᐄᑐᒃ, ᑮᐊᓯᓃᐎᐗᐞ ᑲᔦ, ᐃᓂᓃᕽ ᐁᑮ ᐅᒋ ᐅᔑᐋᒡ᙮ 19 ᑕᑲ ᓴ ᑕᔥ ᑌᐯᒋᑫᔭᓐ ᓂᑭᔐᒪᓂᑑᒥᓈᓐ, ᓈᑕᒪᐎᔑᓈᒻ ᐅᒋ ᐊᓰᕒᐃᔭᐎ ᑭᒋᐅᑭᒫ᙮ ᒦᑕᔥ ᑲᑭᓇ ᐁᑕᓶᐙᓇᑭᓯᐙᒡ ᐅᐅᒫ ᐊᑮᕽ ᐌᑭᒫᐎᐙᒡ ᒋᑭᑫᑕᒧᐙᒡ, ᑮᓐ ᐁᑕ ᐁᒥᒋ ᐯᔑᑯᔭᓐ, ᐁᑭᔐᒪᓂᑑᐎᔭᓐ, ᑌᐯᒋᑫᔭᓐ, ᑮᐃᑭᑐ᙮ ᐋᐃᓭᔭ ᑳᑮᐃᓈᒡ ᐁᓯᑳᔭᐗᓐ (Isaiah 37.21-38) 20 ᒦᑕᔥ ᐋᐃᓭᔭ ᐌᑌᑌᒡ ᐁᒫᓲᓐ Amoz ᑳᑮ ᐊᓅᑮᒡ ᐅᐅ ᒋᐊᐎ ᐃᓂᒥᓐᒡ ᐁᓯᑳᔭᐗᓐ, ᒦ ᓴ ᐅ ᐁᑭᑐᒡ ᑳᑎᐯᒋᑫᒡ ᐃᔅᕒᐃᔭᓬᐊᒃ ᐌᑭᔐᒪᓂᑑᒥᐙᒡ, ᐁᑮ ᐊᓇᒥᐁᑕᐎᔭᓐ ᓴ ᐅᒋ ᓭᓈᑲᕒᐃᑉ ᐊᓰᕒᐃᔭᐎ ᑭᒋᐅᑭᒫ, ᑭᑮ ᓅᑕᐎᓐ ᓴ᙮ 21 ᒦᑕᔥ ᐅᐅ ᑳᑎᐯᒋᑫᒡ ᐁᓈᒡ, ᐃᐃ ᑭᒋ ᐆᑌᓇ ᒉᕒᐆᓴᓬᐊᒻ ᑭᐹᐱᐃᑯᓐ, ᑭᒫᓀᓂᒥᑯᓐ ᑲᔦ, ᒦᔥ ᑲᔦ ᐁᔑ ᐌᐌᐱᑴᐸᓂᐅᒪᑲᒃ ᐁᒫᒌᐸᐃᐌᔭᓐ! 22 ᐊᐌᓀᓐ ᓴ ᑳᒫᓀᓂᒪᒡ, ᐊᐌᓀᓐ ᑲᔦ ᑳᒪᒋᐃᓈᐱᓀᒪᒡ? ᐊᐌᓀᓐ ᓴ ᑳᑭᔒᐌ ᑲᓅᓇᒡ, ᐊᐌᓀᓐ ᑲᔦ ᑫᒋ ᐃᓀᓂᑎᓲᑲᑕᐗᒡ? ᐊᐊ ᓴ ᑫᑌᑖᑯᓯᒡ ᐃᔅᕒᐃᔭᓬᐄᕽ ᐌᒋ ᑎᐯᑖᑯᓯᒡ! 23 ᑭᑖᐸᒋᐋᒃ ᓴ ᐅᒫᒌᔮᒋᒨᒃ ᐁᒫᓀᓂᒥᔭᓐ, ᓃᓐ ᑌᐯᒋᑫᔮᓐ᙮ ᐅᐅ ᓴ ᑭᑎᑭᑦ, ᑳᐹᑏᓄᐙᒡ ᓴ ᓂᒦᑳᓱᐎ ᐅᑖᐹᓈᑾᒃ ᓂᑲ ᐋᐸᒋᐋᒃ ᒋᐃᔖᔮᓐ ᒫᐗᒡ ᐁᔥᐸᑎᓈᑭᓐ ᐗᒌᓐ ᓬᐁᐸᓇᓐ Lebanon ᐁᔮᑭᓐ᙮ ᓂᑲ ᑲᐗᐙᒃ ᒫᐗᒡ ᐁᔥᐸᑭᓱᐙᒡ ᑮᔥᑳᑎᑰᒃ, ᐅᑭᑲᒃ ᑲᔦ᙮ ᓂᑑᑎᑖᓐ ᑲᔦ ᒫᐗᒡ ᐁᔑ ᓅᐱᒦᐗᕽ, ᒫᐗᒡ ᐁᔑ ᐅᓂᔑᔑᕽ ᑳᐃᔑ ᒥᓍᑴᔮᒃ᙮ 24 ᒦᔥ ᑲᔦ ᐁᑭᑐᔭᓐ, ᓂᑮ ᐙᓂᑳᑖᓇᓐ ᓴ ᐅᑕᐃᐹᓇᓐ ᐃᐃᒫ ᒪᔭᑭ ᐊᑮᕽ, ᑲᔦ ᐁᑮ ᐅᒋ ᒥᓂᑴᔮᓐ ᓂᐱ᙮ ᓂᑮ ᐹᑯ ᐌᐱᔥᑳᓇᓐ ᑲᑭᓇ ᓰᐲᓴᓐ ᐁᔮᑭᓐ ᐄᒋᐸᑮᕽ, ᑭᑎᑭᑦ, ᐅᑮᐃᓈᓐ᙮ 25 ᑳᐐᓐ ᐃᓇ ᑭᑮ ᓅᑕᓰᓐ ᐋᔕ ᐃᐌ ᐁᑮ ᐃᓈᑯᓂᑫᔮᓐ ᒣᐎᔕ? ᒦᑕᔥ ᐃᐃ ᐋᔕ ᐁᐃᔑᒋᑫᔮᓐ᙮ ᑭᑮ ᒦᓂᓐ ᒪᔥᑲᐎᓰᐎᓐ ᒋᔖᑰᒋᑑᔭᓐ ᐃᓂ ᐆᑌᓇᐗᓐ ᑳᐙᑳᔮᐱᑭᓂᑳᑌᑭᓐ ᒋᒥᒋ ᐊᔪᒀᐱᑭᓯᑭᓐ᙮ 26 ᐃᑭᐌᓂᐗᒃ ᐃᐃᒫ ᑳᐃᔑᑖᐙᒡ ᑳᐐᓐ ᑫᑰᓐ ᒋᑮ ᐃᔑ ᓇᓇᑸᐙᒡ ᐁᑮ ᓭᑭᓯᐙᒡ ᐁᑮ ᐗᓈᓂᒥᓯᐙᒡ ᑖᐱᔥᑰ ᑯ ᑳᓂᑖᐎᑭᒋᑳᑌᑭᓐ ᑳᐃᔑ ᐸᔥᒀᒃ, ᑖᐱᔥᑰ ᑯ ᒪᔥᑯᓯᐗᓐ ᐗᑭᒋ ᐙᑳᐃᑲᓐ ᑳᓂᑖᐎᑭᑭᓐ ᑳᓅᑌ ᐹᑌᑭᓐ ᒋᑆ ᑮᔑᑭᑭᓐ ᐅᓵᒻ ᑮᑭᔑᑌᒃ᙮ 27 ᑲᑭᓇ ᐅᔕ ᓂᑭᑫᑖᓇᓐ ᐁᔑᐊᔮᔭᓐ ᐁᔑᒋᑫᔭᓐ, ᐁᔖᔭᓐ, ᑲᔦ ᐁᔑ ᓂᔥᑫᓂᒥᔭᓐ᙮ 28 ᓂᑮ ᓅᑕᒻ ᐁᔑ ᓂᔥᑫᓂᒥᔭᓐ ᑲᔦ ᐁᔑ ᑭᒋ ᐃᓀᓂᑎᓱᔭᓐ᙮ ᒀᔥᑴᐱᒋᑲᓐ ᓂᑲ ᒋᑎᓯᑑᓐ ᑭᔕᑾᓂᕽ, ᐲᐙᐱᒃ ᑭᑲ ᑕᑾᑕᒧᐃᓐ ᑖᐱᔥᑰ ᒥᑕᑎᒻ ᑳᐅᒋ ᒫᒦᓄᐱᒋᑲᓂᐎᒡ ᒋᑮᐌ ᐎᑯᐱᓂᓈᓐ ᒋᐊᓂᔑ ᑮᐌᔭᓐ ᑳᑮ ᐱᐅᒌᔭᓐ, ᑮᐃᑭᑐ ᑳᑎᐯᒋᑫᒡ᙮ 29 ᐋᐃᓭᔭ ᑕᔥ ᐅᑮᐃᓈᓐ ᑭᒋᐅᑭᒫᓐ ᐁᓯᑳᔭᐗᓐ, ᒦ ᐅᐌ ᑫᐅᒋ ᑭᑫᑖᑾᒃ ᐋᓃᓐ ᑫᐃᔑᓭᔭᓐ, ᐅᐅᐌ ᐊᐲ ᑳᐃᔑᓭᒃ ᒦᓇᐙ ᐅᐅᐌ ᐊᐲ ᐊᓂ ᐃᔑᓭᒃ ᑭᑲ ᒦᒋᓐ ᐃᐃ ᑳᓂᑖᐎᑭᕽ ᒥᑕᑲᒥᒃ, ᒦᓇᐙᔥ ᐊᐲ ᐊᓂ ᐃᔑᓭᒃ ᑭᑲ ᑭᑎᑫ ᒋᒪᓂᔕᒪᓐ ᑳᑮ ᑭᑎᑳᑕᒪᓐ ᑲᔦ ᒋᑭᑎᑳᓇᑣ ᔔᒥᓇᒃ ᑫᐊᒶᑣ᙮ 30 ᐃᑭᐌᓂᐗᒃ ᐯᒫᑎᓯᐙᒡ ᒎᑕ ᑳᑎᓄᐎᐙᒡ ᑳᑮ ᐱ ᔖᐾᐙᒡ ᑕᐃᔑᓈᑯᓯᐗᒃ ᑖᐱᔥᑰ ᑭᑎᑳᓐ ᐅᒌᐱᒃ ᑳᑯᑖᐗᑭᕽ ᒋᐅᒋ ᒥᓄᑭᑭᓐ ᒦᓇᓐ᙮ 31 ᐊᐎᔭᒃ ᑲᔦ ᐃᐃᒫ ᒉᕒᐆᓴᓬᐊᒥᕽ ᐃᐃᒫ ᑲᔦ ᓵᔭᓐ ᐃᔥᐸᑎᓈᕽ ᑕᐊᔮᐗᒃ ᑳᑮ ᐱ ᔖᐾᐙᒡ ᐋᓃᔥ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᐁᑮ ᐅᓀᑕᕽ ᐁᐐ ᑑᑕᕽ ᐃᐃᐌ ᒋᐃᔑᓭᓂᒃ᙮ 32 ᒦ ᐅᐌ ᑳᑎᐯᒋᑫᒡ ᐁᑭᑐᒡ ᐃᓂᐌᓂᐗᓐ ᐅᒋ ᑭᒋᐅᑭᒫᓐ ᐊᓰᕒᐃᔭ ᐊᑮᕽ, ᑳᐐᓐ ᐅᑲ ᐲᑎᑫᔥᑲᓰᓐ ᐅᐅ ᐆᑌᓇ, ᑳᐐᓐ ᐊᐙᒡ ᐯᔑᒃ ᐱᑾᒃ ᑕᐃᔑ ᐱᒨᒋᑫᓰ ᐅᐅᒫ᙮ ᑳᐐᓐ ᐊᐎᔭ ᔑᒫᑲᓂᔥ ᑳᑕᑯᓇᕽ ᓇᑳᐃᑲᓂᓂ ᑕᐲᔖᓰ ᒌᑲᔭᐄ ᐅᐅ ᐆᑌᓈᕽ᙮ ᑳᐐᓐ ᐊᐎᔭ ᐅᑲ ᑲᔥᑭᑑᓰᓐ ᒋᐅᔑᑑᒡ ᑫᐅᒋ ᐹᔑᒋᔥᑲᕽ ᐃᐃᐌ ᐙᑳᔮᐱᑭᓂᑲᓐ᙮ 33 ᑕᐊᓂᔑ ᑮᐌ ᐃᐃᐌᓂ ᐯᔑᑾᓐ ᒦᑲᓇ ᑳᑮ ᐱᐅᒋ ᑕᑯᔑᕽ ᐊᐙᒡ ᒋᐲᑎᑫᔥᑲᓯᒃ ᐃᐃ ᐆᑌᓇ, ᓃᓐ ᑳᑎᐯᒋᑫᒡ ᑳᑮᑭᑐᔮᓐ᙮ 34 ᓂᑲ ᓈᑕᒪᐙᑖᓐ ᐅᐅ ᐆᑌᓇ ᒋᓈᑲᒋᑑᔮᓐ, ᓃᓐ ᐃᑯ ᐅᒋ, ᐃᐃᐌ ᑲᔦ ᐅᒋ ᐊᐊ ᓂᑕᓄᑮᐋᑲᓐ ᑌᐱᑦ, ᒦ ᐅᐌ ᐋᐃᓭᔭ ᑳᑮᐃᓈᒡ ᐁᓯᑳᔭᐗᓐ᙮ 35 ᒦᑕᔥ ᐃᐃ ᐁᑎᐱᑲᓂᓂᒃ ᑳᑎᐯᒋᑫᒡ ᐅᑌᒐᓬᐃᒪᓐ ᑮᐃᔖᐗᓐ ᐁᔑ ᑲᐯᔑᓂᒡ ᐊᓰᕒᐃᔭᐎ ᔑᒫᑲᓂᔕᐞ, ᐁᑮ ᓂᓵᓂᒡ ᓂᑯᑣᒃ ᓂᔣᓱᒥᑕᓇᔑᓈᓇᓐ ᑕᓯᕽ ᒥᑖᔂᒃ 185,000᙮ ᐌᔮᐸᓂᓂᒃ ᓴ ᒥᓯᐌ ᑮᒥᒋ ᐲᐎᔑᓅᐞ ᔑᒫᑲᓂᔕᐞ᙮ 36 ᒦᑕᔥ ᓭᓈᑲᕒᐃᑉ ᐊᓰᕒᐃᔭᐎ ᑭᒋᐅᑭᒫ ᑳᐃᔑ ᑲᐎᓄᑫᒡ ᐁᑮ ᑮᐌᒡ, ᓂᓂᐯ Nineveh ᐆᑌᓈᕽ ᐁᑮ ᐃᔑᑖᒡ᙮ 37 ᐋᐱᑎᕽ ᐃᑕᔥ ᐁᑮᔑᑲᓂᓂᒃ ᐁᐊᓇᒥᐁᑕᐙᒡ ᐅᒪᓂᑑᒪᓐ ᓂᔅᕒᐊᒃ Nisroch ᐁᓂᒥᓐᒡ ᐊᓇᒥᐁᐎᑲᒥᑯᕽ, ᓃᔑᓐ ᓴ ᐅᑯᓯᓴᐞ ᐅᑮ ᓂᓯᑰᐞ ᐸᔑᐸᐃᑫᐎᑯᒫᓐ ᐁᑮ ᐋᐸᒋᑑᓂᒡ᙮ ᒦᔥ ᐅᐅ ᑳᐃᔑᓂᑳᓱᓂᒡ ᐊᑕᕒᐊᒥᓬᐁᒃ Adrammelech, ᔕᕒᐄᓴᕒ Sharezer ᐃᑕᔥ᙮ ᐌᑎ ᓴ ᑮᐃᔑ ᑕᐸᓰᐗᒃ ᐊᑮᕽ ᐁᕒᐊᕒᐊᑦ Ararat᙮ ᐃᓂ ᐃᑕᔥ ᐅᑯᓯᓴᓐ ᐁᓴᕒᐋᑕᓐ Esarhaddon ᐁᔑᓂᑳᓱᓂᒡ ᐅᑮ ᓈᐱᔥᑳᑰᓐ ᐁᑮ ᑭᒋᐅᑭᒫᐎᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society