2 ᑭᒋᐅᑭᒫᒃ 18 - ᐅᒋᐺ ᑭᒋᒪᓯᓇᐃᑲᓐᐊᐲ ᑮᔖᑰᒋᒋᑳᑌᒃ ᓴᒣᕒᐃᔭ 1 ᓂᓯᐱᐴᓐ ᓴ ᑳᑭᒋᐅᑭᒫᐎᓂᒡ ᐌᑎ ᐃᔅᕒᐃᔭᓬ ᐊᑮᕽ ᐅᔒᔭᐗᓐ Hoshea ᐌᑌᑌᓂᒡ ᐄᓬᐊᐗᓐ Elah, ᒦ ᓴ ᐃ ᐁᓯᑳᔭ Hezekiah ᐌᑌᑌᒡ ᐁᐋᓴᓐ Ahaz ᑳᑮ ᒫᒌ ᑭᒋᐅᑭᒫᐎᒡ ᐃᐃᒫ ᒎᑕ ᐊᑮᕽ᙮ 2 ᓃᔥᑕᓇᔑᓈᓇᓐ 25 ᓴ ᑮᑕᓱᐱᐴᓉ ᑮᑭᒋᐅᑭᒫᐎᒡ᙮ ᓃᔥᑕᓇᔑᔖᑲᓱ 29 ᑕᓱᐱᐴᓐ ᓴ ᒉᕒᐆᓴᓬᐊᒥᕽ Jerusalem ᑮᑕᔑ ᑭᒋᐅᑭᒫᐎ᙮ ᐅᒫᒫᓐ ᓴ ᐊᐹᐃᒐ Abijah ᑮᐃᔑᓂᑳᓱᐗᓐ ᑳᑮ ᐅᑌᑌᓂᒡ ᓭᑲᕒᐋᔭᐗᓐ Zechariah᙮ 3 ᑾᔭᒃ ᐃᓴ ᑮᐃᔑᒋᑫ ᐁᓯᑳᔭ ᐁᓈᓴᒦᓂᒡ ᑳᑎᐯᒋᑫᓂᒡ ᑖᐱᔥᑰ ᑳᑮ ᐃᔑᒋᑫᓂᒡ ᐅᑫᑌᔭᐋᒥᐸᓃᓐ ᑌᐱᑑᓐ᙮ 4 ᐅᑮ ᓂᔑᐗᓈᒋᑑᓇᓐ ᓴ ᐁᐃᔥᐸᑎᓈᓂᑭᓐ, ᑳᑮ ᓂᑖ ᑕᔑ ᐊᓇᒥᐋᕽ, ᐅᑮ ᐲᑯᓈᐞ ᑲᔦ ᐊᓯᓃᐞ ᐯᑕᑭᓱᓂᒡ ᐁᓇᒥᐁᐌᓂᒥᒥᓐᒡ, ᐅᑮ ᑮᔥᑲᐙᐞ ᑲᔦ ᐯᑕᑭᓱᓂᒡ ᐃᑴᐎ ᒪᓂᑑᑳᓇᐞ ᐋᔕᕒᐊ Asherah ᐁᓂᒥᓐᒡ᙮ ᐅᑮ ᐱᑭᔥᑲᐙᓐ ᑲᔦ ᐅᓵᐙᐱᑯᐎ ᑭᓀᐱᑯᑳᓇᓐ ᒨᓯᓲᓐ Moses ᑳᑮ ᐅᔑᐋᓂᑯᐸᓀᓐ, ᐋᓃᔥ ᐲᓂᔥ ᐃᐃ ᐃᔑᐊᐲ ᐃᔅᕒᐃᔭᓬᐊᐞ Israel ᐅᑮ ᒥᓈᓴᒪᐙᓂ ᐃᓂ ᑭᓀᐱᑯᑳᓇᓐ᙮ ᓃᐅᔥᑕᓐ Nehushtan ᓴ ᑮᐃᔑᓂᑳᓂᒫᐗᓐ᙮ 5 ᐁᓯᑳᔭ ᐅᑮ ᑌᐺᔦᓂᒫᓐ ᓴ ᑳᑎᐯᒋᑫᓂᒡ, ᐌᑭᔐᒪᓂᑑᒥᓂᒡ ᐃᔅᕒᐃᔭᓬᐊᐞ᙮ ᑳᐐᓐ ᓴ ᐐᑳ ᐊᐎᔭᓐ ᐃᐃ ᓇᑫ ᐅᑖᓈᕽ ᑮᐱ ᐃᓀᑖᑯᓯᓰᐗᓐ ᑳᑮ ᐃᔑ ᑭᒋᐅᑭᒫᐎᒡ ᑳᐐᓐ ᑲᔦ ᑮᓂ ᐃᔥᒀ ᐊᔮᒡ᙮ 6 ᐅᑮ ᑭᒋᐌᓂᒫᓐ ᓴ ᑳᑎᐯᒋᑫᓂᒡ, ᑳᐐᓐ ᐅᑮ ᐴᓂᑑᓰᓐ ᐁᐱᒥᓂᔕᐙᒡ᙮ ᐅᑮ ᓇᐃᑕᒧᐙᓇᓐ ᑲᑭᓇ ᐅᑎᓈᑯᓂᑫᐎᓂᓂ ᑳᑎᐯᒋᑫᒡ ᑳᑮ ᒦᓈᑯᐸᓀᓐ ᒨᓯᓲᓐ᙮ 7 ᒦᔥ ᐃᐃ ᑳᑮ ᐅᒋ ᐐᒌᐎᑯᒡ ᑳᑎᐯᒋᑫᓂᒡ, ᑮᒥᓄᓭ ᑲᔦ ᐋᓃᓐ ᐃᑯ ᑳᐃᔑᒋᑫᒡ᙮ ᐅᑮ ᓇᑳᔥᑲᐙᓐ ᐊᓰᕒᐃᔭᐎ ᑭᒋᐅᑭᒫᓐ Assyria, ᑳᐐᓐ ᑲᔦ ᐅᑮ ᐊᓄᑮᑕᐙᓰᓐ᙮ 8 ᐅᔫᑌᓈᓯᑳᕽ ᓴ ᑲᔦ ᑭᒋ ᐆᑌᓈᑳᕽ ᑳᐙᑳᐋᑖᐱᑭᓂᑳᑌᒃ ᐅᑮ ᑕᔑ ᔖᑰᒋᐋᐞ ᐱᓬᐃᔅᑏ Philistines ᑳᑎᓄᐎᓂᒡ ᐌᑎ ᑲᔦ ᑫᓴ Gaza ᐆᑌᓈᕽ, ᐙᑳᔭᐄ ᑲᔦ ᐊᑮᕽ᙮ 9 ᓃᐎᐱᐴᓐ ᑕᔥ ᐁᓯᑳᔭ Hezekiah ᑮᑭᒋᐅᑭᒫᐎᒡ; ᐊᐊ ᓴ ᑫᒋᐅᑭᒫᐎᒡ ᐅᔒᔭ Hoshea ᐁᔑᓂᑳᓱᒡ, ᒦ ᐃ ᑫᐐᓐ ᓃᔣᓱ 7 ᐱᐴᓐ ᑮᐅᑭᒫᑲᑕᕽ ᐃᐃ ᐃᔅᕒᐃᔭᓬ ᐊᑮᓂ᙮ ᒦᑕᔥ ᐃᐃ ᐊᐲ ᒫᒪᐎ ᑭᒋᐅᑭᒫᓐ ᔕᓬᒪᓃᓴᕒ Shalmaneser ᐁᔑᓂᑳᓱᓂᒡ, ᓰᕒᐃᔭ Syria ᐊᑮᕽ ᐁᐅᒌᓂᒡ ᑳᑮ ᐙᑳᔥᑲᒥᓂᒡ ᐃᐃ ᓴᒣᕒᐃᔭ Samaria ᐆᑌᓇ᙮ 10 ᓂᓱᐱᐴᓐ 3 ᑕᔥ ᐁᐊᓂ ᐃᔑᓭᓂᒃ, ᒦ ᓴ ᑳᐃᔑ ᔖᑰᒋᑑᓂᒡ ᐌᐌᓂ ᓴᒣᕒᐃᔭ ᐆᑌᓇ᙮ ᒦᑕᔥ ᐁᓯᑳᔭ ᓂᑯᑣᓱ 6 ᐱᐴᓐ ᐁᑮ ᑭᒋᐅᑭᒫᐎᒡ, ᔖᑲᓱ 9 ᐱᐴᓐ ᑕᔥ ᐐᓐ ᐊᐊ ᐅᔒᔭᐗᓐ Hoshea ᑮᑭᒋᐅᑭᒫᐎᐗᓐ ᐃᐃᒫ ᐃᔅᕒᐃᔭᓬ ᐊᑮᕽ᙮ ᒦ ᓴ ᐃ ᐊᐲ ᑮᔖᑰᒋᒋᑳᑌᒃ ᐃᐃ ᓴᒣᕒᐃᔭ ᐆᑌᓇ᙮ 11 ᐊᐊ ᑕᔥ ᓰᕒᐃᔭ ᑭᒋᐅᑭᒫ ᐅᑕᑮᒥᓃᕽ ᐅᑮ ᒫᒌᓈᐞ ᐃᔅᕒᐃᔭᓬᐊᐞ ᐁᑮ ᐅᒋ ᒫᒌᓈᒡ, ᐁᑮ ᐃᔑᐎᓈᒡ ᓰᕒᐃᔭ ᐊᑮᕽ᙮ ᐋᓂᑕ ᓴ ᐁᓬᐊ Halah ᐆᑌᓈᕽ ᐅᑮ ᐃᔑ ᑲᐯᔑᐋᐞ᙮ ᐋᓂᑕ ᑕᔥ ᒌᑭ ᓰᐱᕽ ᐊᕒᐸᕒ Habor ᐁᔑᓂᑳᑌᓂᒃ ᑭᒋ ᐆᑌᓈᕽ ᑯᓴᓐ Gozan ᐁᔑᓂᑳᑌᓂᒃ, ᐋᓂᑕ ᑲᔦ ᐅᑮ ᐃᔑ ᑲᐯᔑᐋᐞ ᐆᑌᓈᕽ ᒦᑎᔭ Media ᐊᑮᕽ᙮ 12 ᒦᑕᔥ ᐅᐅ ᑳᑮ ᐅᒋ ᐃᔑᓭᐙᒡ ᐋᓃᔥ ᐅᓵᒻ ᑳᐐᓐ ᐅᑮ ᓇᐃᑕᐙᓯᐙᐙᓐ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ᙮ ᐅᑮ ᐲᑯᓈᓈᐙ ᓴ ᑳᑮ ᐃᔑ ᐊᔓᑕᒪᐙᑯᐸᓀᓐ, ᐅᑮ ᐲᑯᓈᓈᐙ ᑲᔦ ᑳᑮ ᐃᓈᑯᓂᑫᓂᒡ ᒨᓯᓲᓐ Moses ᑳᑮ ᐊᓄᑮᐃᑯᓂᒡ ᑳᑎᐯᒋᑫᓂᒡ᙮ ᑳᐐᓐ ᓴ ᑯ ᑮᐱᓯᑕᓰᐗᒃ, ᑳᐐᓐ ᑮᐃᔑᒋᑫᓰᐗᒃ ᑳᑮᐃᓂᑣ᙮ ᑮᑲᑴᓭᑭᒫᐗᒃ ᐊᐎᔭᒃ ᒉᕒᐆᓴᓬᐊᒥᕽ ᑳᐊᔮᐙᒡ 13 ᒥᑖᔑᓃᐎᐱᐴᓐ ᐃᑕᔥ ᐁᓯᑳᔭ ᑳᑭᒋᐅᑭᒫᐎᒡ, ᐊᓰᕒᐃᔭᐎ ᑭᒋᐅᑭᒫᓐ ᓭᓈᑲᕒᐃᑉ Sennacherib ᐁᔑᓂᑳᓱᓂᒡ ᐅᑮ ᐱ ᒦᑳᑖᒥᓂ ᐃᐃᒫ ᒎᑕ ᐊᑮᕽ ᑲᑭᓇ ᐆᑌᓇᐗᓐ ᑳᑮ ᓲᑭᒋᑳᑌᓂᑭᓐ᙮ ᒦᔥ ᑳᐃᔑ ᑳᒋᒋᑑᓂᒡ᙮ 14 ᒦᑕᔥ ᐁᓯᑳᔭ ᑳᑭᒋᐅᑭᒫᐎᒡ ᒎᑕ ᐊᑮᕽ, ᐅᐅ ᑳᑮ ᐊᓅᑮᒡ ᒋᐊᐎᐃᓂᒥᓐᒡ ᓭᓈᑲᕒᐃᐴᓐ ᑳᑮ ᐊᔮᓂᒡ ᓬᐁᑭᔥ Lachish ᐆᑌᓈᕽ, ᓂᑮ ᒪᒫᔒ ᐄᓴᓐ᙮ ᑕᑲ ᒦ ᐃ ᐃᔑ ᐴᓂᐃᔑᓐ, ᑭᑲ ᑎᐸᐊᒪᐎᓐ ᓴ ᐋᓃᓐ ᐃᑯ ᒥᓂᒃ ᐁᑕᐌᑕᒪᓐ, ᐅᑮᐃᓈᓐ᙮ ᒦᔥ ᑳᐃᑯᒡ ᒋᑎᐸᐊᒪᐙᒡ ᓃᔥᑕᓇᐗ ᒥᑖᔂᒃ 20,000 ᑕᓱ ᑎᐹᐲᔥᑰᒋᑲᓐ ᐙᐹᐱᑯ ᔔᓂᔮ ᐙᐱᑰᓐ ᔑᑾ ᓃᔑᓐ ᒥᑖᔂᒃ 2,000 ᑕᓱ ᑎᐹᐲᔥᑰᒋᑲᓐ ᐅᓵᐎ ᔔᓂᔮ ᐙᐱᑰᓐ᙮ 15 ᒦᑕᔥ ᐁᓯᑳᔭ ᑳᑮ ᒦᓈᒡ ᑲᑭᓇ ᐙᐹᐱᑯ ᔔᓂᔮ ᐙᐱᑰᓐ ᐁᔮᓂᒡ ᐃᐃᒫ ᑳᑎᐯᒋᑫᓂᒡ ᐅᑭᒋ ᐊᓇᒥᐁᐎᑲᒥᑯᓃᕽ, ᐁᑮ ᒦᓈᒡ ᑲᔦ ᑲᑭᓇ ᐁᔑ ᐌᓅᑕᓂᓂᒃ ᑭᒋᐅᑭᒫᐎᑲᒥᒃ᙮ 16 ᐅᑮ ᐸᑾᑎᓈᓐ ᑲᔦ ᔔᓂᔮ ᐙᐱᑰᓐ ᑳᑮ ᐊᓵᑯᐸᓀᓐ ᐃᔥᒀᑌᕽ, ᐃᔥᒀᑌᒫᑎᑯᑳᕽ ᑲᔦ ᐁᔮᓂᑭᓐ ᐃᐃᒫ ᑳᑎᐯᒋᑫᓂᒡ ᐅᑭᒋ ᐊᓇᒥᐁᐎᑲᒥᑯᓃᕽ᙮ ᒦᔥ ᑳᐃᔑ ᒦᓈᒡ ᐊᓰᕒᐃᔭᐎ ᑭᒋᐅᑭᒫᓐ᙮ 17 ᒦᑕᔥ ᐊᐊ ᐊᓰᕒᐃᔭᐎ ᑭᒋᐅᑭᒫ ᑳᑮ ᐲᒋᓂᔕᐙᒡ ᓂᓯᓐ 3 ᐅᑖᓂᑫᐎᑭᒫᒪᐞ ᐅᐅ ᐁᔑᓂᑳᓱᓂᒡ, ᑕᕒᑕᓐ Tartan, ᐅᕒᐊᑉᓴᕒᐃᔅ Rabsaris, ᐃᓂ ᑲᔦ ᐅᕒᐊᑉᔕᑫ Rabshakeh᙮ ᓬᐁᑭᔥ Lachish ᐆᑌᓈᕽ ᑮᐱ ᐅᒌᐗᐞ ᐁᑮ ᐱ ᑕᑯ ᐐᒌᐙᓂᒡ ᓃᐱᐗᐞ ᔑᒫᑲᓂᔕᐞ ᒉᕒᐆᓴᓬᐊᒥᕽ ᐁᑮ ᐱᔑ ᑕᑯᔑᓂᓂᒡ ᐁᔑᐊᔮᒡ ᐁᓯᑳᔭ᙮ ᐊᐲ ᓴ ᑌᑯᔑᓄᐙᒡ ᐃᐃᒫ ᑮᐃᔑ ᑲᐯᔑᐗᒃ ᐁᑎᐯᑕᒧᐙᒡ ᒦᑲᓇ ᑳᐱᒪᒧᓂᓂᒃ ᑳᐃᔒᑭᓄᑫᓂᒡ ᑳᔑ ᐊᓄᑮᓂᒡ᙮ ᒦ ᐅᐌ ᒌᑲᔭᐄ ᓰᐲᓯᑳᓐ ᑳᐱ ᐅᒋᒋᐗᕽ ᑳᐃᔑ ᐙᔑᐲᔮᒃ ᐁᔑᐊᔮᓂᒃ᙮ 18 ᑮᒪᑗ ᐃᑭᑐᐗᒃ ᑕᔥ ᐁᐊᑕᐌᓂᒫᐙᒡ ᑭᒋᐅᑭᒫᓐ ᒋᐲᔖᓂᒡ᙮ ᐅᑮ ᐱ ᓈᓯᑳᑯᐙᓐ ᐃᓬᐋᔭᑭᒪᓐ Eliakim ᑳᓈᑲᒋᑑᓂᒡ ᐅᑭᒫᐎᑲᒥᒃ ᐌᑌᑌᓂᒡ ᐃᓬᑳᔭ Hilkiah, ᔐᐸᐗᓐ Shebna ᐅᔑᐲᐃᑫᐎᓂᓂᐗᓐ, ᐃᓂ ᑲᔦ ᒎᐊ Joah ᑫᓇᐌᑕᒥᓂᒡ ᑫᑰᓐ ᐁᔑ ᐅᔑᐲᐃᑳᑌᓂᒃ ᐌᑌᑌᓂᒡ ᐁᓴᑉ Asaph᙮ 19 ᒦᑕᔥ ᐅᐅ ᑳᒪᑗ ᐃᑭᑐᒡ ᐅᕒᐊᑉᔕᑫ, ᐅᐅ ᓴ ᐃᓂᒃ ᐁᓯᑳᔭ, ᒦ ᓴ ᐅᐌᓂ ᒫᐗᒡ ᑭᒋᐅᑭᒫ, ᐊᓰᕒᐃᔭᐎ ᑭᒋᐅᑭᒫ ᐁᑭᑐᒡ, ᐌᑯᓀᓐ ᐃᑕᔥ ᐁᐯᓂᒧᓄᑕᒣᒃ ᐅᐅ ᑳᑫᒋᓈᐅᔦᒃ? 20 ᑭᑎᑭᑦ ᐄᑐᒃ ᐁᐊᔮᔭᓐ ᐋᓃᓐ ᐁᔑ ᒦᑳᓱᔭᓐ, ᐁᐊᔮᔭᓐ ᑲᔦ ᔑᒫᑲᓂᔒᐎ ᒪᔥᑲᐎᓰᐎᓐ᙮ ᐊᓂᔖ ᐄᑐᒃ ᐃᐃ ᑳᐃᑭᑐᔭᓐ᙮ ᐊᐌᓀᓐ ᐃᑕᔥ ᐁᐯᓂᒧᔭᓐ ᐅᐅ ᑳᐱᓯᔅᑫᓂᒥᓯᐗᓐ? 21 ᑭᐸᑯᓭᓂᒫᒃ ᓴ ᐄᒋᐸᑮᕽ Egypt ᐌᒌᐙᒡ ᒋᐐᒋᐃᓀᒀ, ᒦ ᐃ ᐄᑐᒃ ᑫᐃᓀᑖᑾᑭᐸᓐ ᑖᐱᔥᑰ ᒪᔥᑯᓯ ᑳᐋᐸᑕᒃ ᑮᓴᑲᐅᕽ, ᒋᐲᑯᓭᑭᐸᓐ ᐊᐎᔭ ᒋᐸᑕᑭᓂᒌᔑᑭᐸᓐ᙮ ᒦᐞ ᐄᑐᒃ ᐁᑑᑕᐙᐙᒡ ᐊᐎᔭᓐ ᑲᑭᓇ ᐁᐯᓂᒧᓄᑖᑯᐙᒡ, ᐅᑮᐃᓈᓐ᙮ 22 ᒦᔥ ᑳᓂ ᐃᑭᑐᒡ, ᑮᔥᐱᓐ ᐃᑕᔥ ᐅᐅ ᐃᔑᔭᓐ, ᑳᑎᐯᒋᑫᒡ ᓂᑭᔐᒪᓂᑑᒥᓈᓐ ᓴ ᓂᑕᐯᓂᒧᓄᑕᐙᓈᓐ, ᒦᐗᓐ ᐄᑐᒃ ᐃᓂ ᐁᓯᑳᔭ ᑳᑮ ᐲᑯᓇᕽ ᐁᔑ ᐊᔨᔥᐸᑎᓈᓂᒃ ᐁᑕᔑ ᐊᓇᒥᐁᑕᐎᒥᓐᒡ ᑳᑎᐯᒋᑫᓂᒡ, ᐁᔑ ᐸᑭᑎᓈᓲᑕᒪᐎᒥᓐᒡ ᑲᔦ, ᐅᐅ ᑕᔥ ᐁᐃᑭᑐᒡ, ᐅᐅᒫ ᐁᔑ ᐸᑭᑎᓈᓱᕽ ᐁᐊᔮᒃ ᒉᕒᐆᓴᓬᐊᒥᕽ, ᒦ ᓴ ᐃᒫ ᑫᑕᔑ ᐊᓇᒥᐁᑕᐌᒃ ᑳᑎᐯᒋᑫᒡ᙮ 23 ᑕᑲ ᓴ ᑮᓇᐙ ᐃᓀᑕᒧᒃ ᒋᐐᒋ ᐃᓀᑕᒨᒣᒃ ᓂᑑᑭᒫᒻ ᐊᓰᕒᐃᔭᐎ ᑭᒋᐅᑭᒫ ᑭᑲ ᒦᓂᓂᓂᒻ ᓴ ᓃᔑᕽ ᒥᑖᔂᒃ 2,000 ᒥᑕᑎᒨᒃ, ᑮᔥᐱᓐ ᑯᑕ ᐊᔮᐌᒀ ᐃᓂᓂᐗᒃ ᑫᐱᒥᐗᓀᐸᐃᑯᐙᒡ᙮ 24 ᑳᐐᓐ ᐄᑐᒃ ᒥᓴᐙ ᑭᑖ ᔖᑰᒋᐋᓰ ᒫᐗᒡ ᒣᒉᑖᑯᓯᒡ ᐊᓰᕒᐃᔭᐎ ᐋᓂᑫᐎᑭᒫ, ᔖᑰᒡ ᐃᑕᔥ ᐁᐊᐯᓂᒧᔦᒃ ᐄᒋᐲᐎᓂᓂᐗᒃ ᒋᐃᔑᓂᔕᐊᒪᐎᓀᒀ ᒦᑳᓱᐎ ᐅᑖᐹᓈᑾᐞ, ᑫᐅᑖᐸᐃᐌᓂᒡ ᑲᔦ! 25 ᒦ ᓇ ᐃ ᐁᓀᑕᒣᒃ ᐅᐅ ᑳᐱ ᒦᑳᑕᒫᓐ, ᑳᐱ ᓂᔑᐗᓈᒋᑑᔮᓐ ᑲᔦ ᐅᐅᒫ ᑭᑕᑮᒥᐙ ᐁᐐᒋᐃᓯᒃ ᑳᑎᐯᒋᑫᒡ? ᐐᓐ ᐄᑐᒃ ᐃᑯ ᑳᑮ ᑲᓅᔑᒡ ᒋᐲᔖᐗᒃ ᐅᐅᒫ ᐊᑮᕽ ᒋᐱ ᓂᔑᐗᓈᒋᑑᐗᒃ, ᐃᓂᒃ! ᑮᐃᑭᑐ ᐅᕒᐊᑉᔕᑫ᙮ 26 ᒦᑕᔥ ᐅᐅ ᐃᓬᐋᔭᑭᒻ, ᔐᑉᓇ, ᐊᐊ ᑲᔦ ᒎᐊ ᑳᑮᐃᓈᐙᒡ ᐃᓂ ᐅᕒᐊᑉᔕᑫᐗᓐ Rabshakeh, ᐁᕒᐊᒣᐃᒃ Aramaic ᐃᔑᑮᔗᐎᓐ ᓴ ᐋᐸᒋᑑᓐ ᐅᐅ ᑳᑲᓅᔑᔮᕽ, ᓃᓇᐎᓐᑦ ᑭᑕᓄᑮᐋᑲᓇᒃ ᐁᓀᓂᑎᓱᔮᕽ, ᒦ ᓴ ᐃᐌ ᓀᓯᑐᑕᒫᕽ᙮ ᑫᑯ ᐐᓐ ᐄᐸᕒᐆᐎ ᐃᔑᑮᔗᐎᓐ ᐋᐸᒋᑑᑫᓐ ᐱᓯᑕᒨᒃ ᐅᔕ ᐃᑭ ᐙᑳᔮᐱᑭᓂᑲᓂᕽ ᐁᔮᐙᒡ, ᐅᑮᐃᓈᐙᓐ᙮ 27 ᒦᑕᔥ ᐅᐅ ᑳᐃᑯᐙᒡ ᐅᕒᐊᑉᔕᑫᐗᓐ, ᑭᑎᓀᑖᒻ ᐃᓇ ᑮᓀᑕᐙ, ᐊᐊ ᑲᔦ ᑭᒋᐅᑭᒫ ᐁᐅᒋ ᐲᒋᓂᔕᐅᓇᑭᒡ ᓂᑑᑭᒫᒥᓈᓐ ᐅᓄ ᒋᐐᑕᒫᑰᔦᒃ? ᐃᑭ ᐅᔕ ᑲᔦ ᑳᑲᓅᓇᑭᑣ ᐁᔮᐙᒡ ᐙᑳᔮᐱᑭᓂᑲᓂᕽ, ᑫᐊᓂ ᒦᒌᐙᒡ ᐅᒨᐎᐙᓐ, ᑫᒥᓂᑴᐙᒡ ᑲᔦ ᐅᔑᑭᐎᓂᐙᓐ! 28 ᒦᑕᔥ ᐅᐅ ᑳᒪᑗ ᐃᑭᑐᓂᒡ ᐃᓂ ᐋᓂᑫᐎᑭᒫᓐ ᐄᐸᕒᐆᐎ ᐃᔑᑮᔗᐎᓐ ᐁᑮ ᐋᐸᒋᑑᓂᒡ, ᓅᑕᒧᐙᒃ ᐁᑭᑐᒡ ᒫᐗᒡ ᑫᒋᐅᑭᒫᐎᒡ ᐊᓰᕒᐃᔭᐎ ᑭᒋᐅᑭᒫ! 29 ᒦ ᓴ ᐅᐌᓂ ᐁᓂᓀᒃ, ᑫᑯ ᐸᑭᑎᓈᑫᒃ ᐁᓯᑳᔭ ᒋᐗᓂᒥᓀᒃ, ᑳᐐᓐ ᐄᑐᒃ ᐅᑲ ᑲᔥᑭᑑᓰᓐ ᒋᓈᑕᒪᐎᓀᒃ ᐁᔑ ᒪᔥᑲᐎᓰᐗᒃ᙮ 30 ᑫᑯ ᑲᔦ ᑭᑲ ᑲᔥᑭᒥᑯᓰᐙ ᐁᐃᓂᓀᒃ ᒋᑌᐺᔦᓂᒥᒣᒃ ᒋᓈᑕᒪᐎᓂᒣᒃ ᑳᑎᐯᒋᑫᓂᒡ ᐊᐲ ᐅᐅ ᐃᑭᑐᒡ, ᑳᑎᐯᒋᑫᒡ ᓴ ᑌᐺ ᑭᑲ ᓈᑕᒫᑯᓈᓐ; ᑳᐐᓐ ᓴ ᑕᐸᑭᑎᓈᓰ ᐊᐊ ᑭᒋᐅᑭᒫ ᒋᔖᑰᒋᑑᒡ ᐅᐅ ᐆᑌᓇ᙮ 31 ᑫᑯ ᐱᓯᑕᐙᑫᒃ ᐁᓯᑳᔭ! ᒦ ᓴ ᐅᐌᓂ ᑭᒋᐅᑭᒫ ᐊᓰᕒᐃᔭ ᐊᑮᕽ ᐁᑭᑐᒡ, ᑕᑲ ᐃᓀᑕᒧᒃ ᒋᒥᓄ ᐐᒌᐎᔦᒃ, ᐱᓵᓐ ᐱᓵᑲᐊᒧᒃ᙮ ᒦᑕᔥ ᑲᑭᓇ ᐁᑕᔑᔦᒃ ᒋᐅᑕᒋᑫᔦᒃ ᐁᔑ ᑭᑎᑳᓀᒀ ᔔᒥᓇᒃ, ᑲᔦ ᑭᒦᓈᑎᑰᒥᐙᒃ, ᒋᐅᒋ ᒥᓂᑴᔦᒃ ᑲᔦ ᑭᑑᑕᐃᐹᓂᐙᕽ᙮ 32 ᓃᓐ ᐃᑕᔥ ᐊᐲ ᓂᑲ ᐲᔖ ᒋᐃᔑᐎᓂᓇᑰᒃ ᐊᑮᕽ ᐃᓀᑖᑾᒃ ᑖᐱᔥᑰ ᑭᑕᑮᐙᕽ᙮ ᒦ ᓴ ᐌᑎ ᐁᔑ ᓂᑖᐎᑭᑭᓐ ᐸᑴᔑᑲᓂᒥᓇᓐ ᑫᐅᒋ ᐅᔑᐃᓐᒡ ᐸᑴᔑᑲᓐ, ᐁᔑᐊᔮᑭᓐ ᐁᔑ ᑭᑎᑳᓱᐙᒡ ᔔᒥᓇᒃ ᑫᐅᒋ ᐅᔑᒋᑳᑌᓂᒃ ᐅᔥᑭ ᔔᒥᓈᐳ, ᐁᔑᐊᔮᐙᒡ ᑲᔦ ᐋᓬᐃᑉ ᑎᓄᐙᑎᑰᒃ, ᐋᒨᐎ ᓰᓯᐹᑾᑦ ᑲᔦ ᐁᔑᐊᔮᒃ᙮ ᒦᑕᔥ ᐃᐃᒫ ᑫᑕᔑ ᐱᒫᑎᓯᔦᒃ᙮ ᑫᑯ ᑕᔥ ᐱᓯᑕᐙᑫᒃ ᐁᓯᑳᔭ, ᑭᑲ ᐗᓂᐎᓂᑯᐙ ᐄᑐᒃ ᐅᐅ ᑮᐃᓂᓀᒃ, ᑳᑎᐯᒋᑫᒡ ᓴ ᑭᑲ ᓈᑕᒫᑯᓈᓐ᙮ 33 ᑯᑕᒃ ᐊᐎᔭᒃ ᐯᒫᑎᓯᐙᒡ ᐃᓇ ᐅᑖ ᑲᔥᑭᑑᓂ ᐅᒪᓂᑑᒥᐙᐞ ᒋᔖᐾᑑᓂᒡ ᐅᑕᑮᒥᐙ ᐊᐲ ᑮᒦᑳᓂᑯᐙᒡ ᐊᓰᕒᐃᔭᐎ ᑭᒋᐅᑭᒫᓐ? 34 ᐋᓃᑎ ᑕᔥ ᐃᑭ ᒪᓂᑑᒃ ᐌᒋ ᑎᐯᑖᑯᓯᐙᒡ ᐆᑌᓈᑳᕽ ᐁᒋᑳᑌᓂᑭᓐ, ᐁᒪᑦ Hamath, ᐁᕒᐸᑦ Arpad, ᓭᐸᕒᐯᔨᒻ Sepharvaim, ᐃᓇ Hena, ᐋᐃᐸ Ivvah? ᐊᐎᔭ ᓇ ᐅᑮ ᑲᔥᑭᑑᓐ ᒋᓈᑕᒪᐙᑕᕽ ᓴᒣᕒᐃᔭ ᐊᑭ? 35 ᐋᓇᐲ ᓴ ᒪᓂᑑ ᐊᑮᑳᕽ ᐌᒋ ᑎᐯᑖᑯᓯᐙᒡ ᑫᔥᑭᑑᐙᒡ ᒋᓈᑕᒪᐙᑕᒧᐙᒡ ᐅᑕᑮᒥᐙᓐ ᓃᓐ ᐅᒋ? ᐋᓃᓐ ᐃᑕᔥ ᐃᓈ ᑳᑎᐯᒋᑫᓂᒡ ᑫᔑ ᑲᔥᑭᑑᐸᓐ ᒋᓈᑕᒪᐙᑕᕽ ᒉᕒᐆᓴᓬᐊᒻ ᓃᓐ ᐅᒋ? ᐃᑭᑐ ᐊᓰᕒᐃᔭᐎ ᑭᒋᐅᑭᒫ, ᐅᑮᐃᑯᐙᐞ᙮ 36 ᐯᒫᑎᓯᐙᒡ ᓴ ᑳᐐᓐ ᑮᓅᑖᑎᓰᐗᒃ, ᑫᑰᓐ ᐁᑮ ᐃᔑ ᓇᑴᑕᓯᒀ ᐋᓃᔥ ᑭᒋᐅᑭᒫᓐ ᐅᑮᐃᑯᐙᓐ ᐃᐃ ᒋᐃᔑᒋᑫᐙᒡ᙮ 37 ᒦᑕᔥ ᐊᐊ ᐃᓬᐋᔭᑭᒻ, ᐌᑌᑌᒡ ᐃᓬᑳᔭᐗᓐ, ᑳᓈᑲᒋᑑᒡ ᐅᑭᒫᐎᑲᒥᒃ, ᔐᑉᓇ ᑲᔦ ᐅᔑᐲᐃᑫᐎᓂᓂ, ᒎᐊ ᑲᔦ, ᐌᑌᑌᒡ ᐁᓴᐸᓐ ᑳᓈᑲᒋᑑᒡ ᒪᓯᓇᐃᑲᓇᓐ, ᑮᐃᔖᐗᒃ ᐁᑮ ᐊᑕ ᐙᐸᒫᐙᒡ ᐁᓯᑳᔭᐗᓐ, ᐁᑮ ᑖᔥᑮᑭᐱᑑᐙᒡ ᐅᑭᑭᔥᑭᑲᓂᐙᓐ᙮ ᒦᔥ ᑳᐃᔑ ᐐᑕᒪᐙᐙᒡ ᑳᑮ ᐃᑭᑐᓂᒡ ᐃᓂ ᐅᕒᐊᑉᔕᑫᐗᓐ Rabshakeh ᒦᑳᓱᐎᑭᒫᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society