2 ᑭᒋᐅᑭᒫᒃ 17 - ᐅᒋᐺ ᑭᒋᒪᓯᓇᐃᑲᓐᐅᔒᔭ ᐃᔥᒀᒡ ᑳᑮᑭᒋᐅᑭᒫᐎᒡ ᐃᔅᕒᐃᔭᓬ ᐊᑮᕽ 1 ᒥᑖᔑᓃᔓᐱᐴᓐ 12 ᑕᔥ ᑳᑭᒋᐅᑭᒫᐎᓂᒡ ᐁᐋᓴᓐ Ahaz ᐌᑎ ᒎᑕ Judah ᐊᑮᕽ, ᒦ ᓴ ᐃ ᐊᐲ ᐅᔒᔭ Hoshea ᐌᑌᑌᒡ ᐄᓬᐊᐗᓐ Elah ᑳᑭᒋᐅᑭᒫᐎᒡ ᐃᐃᒫ ᓴᒣᕒᐃᔭ ᐆᑌᓈᕽ ᐃᔅᕒᐃᔭᓬ ᐊᑮᕽ᙮ ᔖᑲᓱ ᐱᐴᓐ ᓴ ᒥᓂᒃ ᑮᐅᑭᒫᐎ᙮ 2 ᓅᒋᑯ ᑕᔥ ᑮᐃᔑᒋᑫ ᐁᓈᓴᒦᓂᒡ ᑳᑎᐯᒋᑫᓂᒡ, ᑳᐐᓐ ᐃᑯ ᐐᑫ ᑮᐃᔑᒋᑫᓰ ᑳᑮ ᐃᔑᒋᑫᓂᒡ ᐅᑖᓈᕽ ᑳᑮ ᐱ ᐅᑭᒫᐎᓂᒡ᙮ 3 ᑭᒋᐅᑭᒫᓐ ᐃᑕᔥ ᔕᓬᒪᓃᓴᕒ Shalmaneser ᐁᔑᓂᑳᓱᓂᒡ ᐊᓰᕒᐃᔭ Assyria ᐊᑮᕽ ᐌᒌᓂᒡ ᑮᐲᔖᐗᓐ ᐁᑮ ᐱ ᒦᑳᓂᑯᒡ᙮ ᒦᑕᔥ ᑳᐃᔑ ᐸᑭᒌᑕᐙᒡ ᐁᑮ ᑖᑎᐸᐊᒪᐙᒡ ᑖᑭᔅ tax ᔔᓂᔮᓐ᙮ 4 ᒦ ᓴ ᑳᐃᔑᒋᑫᒡ ᐁᑮ ᐃᔑᓂᔕᐙᒡ ᐊᐎᔭᐞ ᐌᑎ ᐄᒋᐸᑮᕽ Egypt ᐁᔑᐊᔮᓂᒡ ᑭᒋᐅᑭᒫᓐ ᓲ So ᐁᔑᓂᑳᓱᓂᒡ, ᒋᑲᓅᓂᒥᓐᒡ ᒋᐐᒋᐃᑯᒡ᙮ ᑮᐴᓂᒋᑫ ᑲᔦ ᑳᑮ ᓂᑖ ᑎᐸᐊᒪᐙᐸᓐ ᐁᑕᓱᐱᐴᓐ ᐊᓰᕒᐃᔭᐎ ᑭᒋᐅᑭᒫᓐ᙮ ᐅᑮ ᑳᒋᑎᓂᑰᓐ ᐃᑕᔥ ᐃᐃ ᐁᐃᔑᒋᑫᒡ, ᒦᔥ ᑳᐃᔑ ᑕᑯᓂᑯᒡ᙮ ᓴᒣᕒᐃᔭ ᑮᑳᒋᑎᓂᑳᑌᒃ 5 ᒦᑕᔥ ᐊᐊ ᐊᓰᕒᐃᔭᐎ ᑭᒋᐅᑭᒫ ᑳᑮ ᐲᔖᒡ ᐃᐃᒫ ᐃᔅᕒᐃᔭᓬ ᐊᑮᕽ ᐁᑮ ᐙᑳᔥᑲᕽ ᓴᒣᕒᐃᔭ ᐆᑌᓇ ᓂᓱᐱᐴᓐ ᒥᓂᒃ᙮ 6 ᒦ ᓴ ᐃ ᔖᑲᓱ ᐱᐴᓐ ᐅᔒᔭᐗᓐ ᑮᑭᒋᐅᑭᒫᐎᓂᒡ ᐊᐲ ᐊᓰᕒᐃᔭᐎ ᑭᒋᐅᑭᒫ ᐅᑮ ᑳᒋᒋᑑᓐ ᓴᒣᕒᐃᔭ ᐆᑌᓇ, ᑮᐃᔑᐎᓈᒡ ᑲᔦ ᐃᔅᕒᐃᔭᓬᐊᐞ ᐌᑎ ᐊᓰᕒᐃᔭ ᐊᑮᕽ᙮ ᐌᑎ ᓴ ᐅᑮ ᐃᔑ ᑲᐯᔑᐋᐞ ᑭᒋ ᐆᑌᓈᕽ ᐁᓬᐊ Halah ᐃᐃᒫ ᑳᐊᔮᒃ ᑯᓴᓐ Gozan ᑳᐃᒋᑳᑌᒃ ᒌᑭ ᓰᐱᕽ ᐁᐸᕒ Habor ᐁᒋᑳᑌᓂᒃ ᑲᔦ ᐁᔑ ᐊᔫᑌᓈᑳᓂᒃ ᒦᑎᔭ Media ᐊᑮᕽ᙮ 7 ᒦᑕᔥ ᐅᐅ ᐃᔅᕒᐃᔭᓬᐊᒃ ᑳᐅᒋ ᐃᔑᓭᐙᒡ ᐅᓵᒻ ᐋᓃᔥ ᑮᒪᒋᑑᑕᒧᒃ ᐁᓈᓴᒦᓂᒡ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ, ᐄᒋᐸᑮᕽ Egypt ᑳᑮ ᐅᒋ ᓵᑭᒋᐎᓂᑯᐙᐸᓐ ᐁᔑ ᒪᔥᑲᐎᓰᓂᒡ ᐯᕒᐆᓐ Pharaoh ᑭᒋᐅᑭᒫᓐ᙮ ᐸᑳᓐ ᑲᔦ ᒪᓂᑑᐞ ᐅᑮ ᐱᒥᓂᔕᐙᐙᐞ, 8 ᑲᔦ ᑕᔥ ᑮᐃᔑᒋᑫᐗᒃ ᐁᔑᒋᑫᓂᒡ ᑯᑕᒃ ᐯᒫᑎᓯᓂᒡ ᐁᔑ ᓅᒋᒋᑫᓂᒡ ᑳᑎᐯᒋᑫᓂᒡ ᑳᑮ ᓵᑭᑖᒪᐙᓂᐸᓐ ᐁᓂᐃᔖᐙᒡ᙮ ᑮᐃᔑᒋᑫᐗᒃ ᑲᔦ ᑳᑮ ᐃᔑ ᐊᓅᑮᓂᐸᓐ ᐃᔅᕒᐃᔭᓬᐃ ᑭᒋᐅᑭᒫᐞ ᒋᐃᔑᒋᑫᐎᓐᒡ᙮ 9 ᐃᔅᕒᐃᔭᓬᐊᒃ ᓴ ᑲᔦ ᑮᑮᒨᒋ ᒪᒋᑑᑕᒧᒃ ᐁᓈᓴᒦᓂᒡ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ ᐁᑮ ᓅᒋᑑᐙᒡ ᑴᔭᑯᓈᑾᓯᓂᓂᒃ᙮ ᒦ ᓴ ᑳᐃᔑᒋᑫᐙᒡ ᐁᑮ ᐅᔑᑑᐙᒡ ᐁᔑ ᐊᔨᔥᐹᓂᒃ ᑫᑕᔑ ᐊᓇᒥᐋᐙᒡ ᐁᔑ ᐊᔭᔮᓂᑭᓐ ᐆᑌᓇᐌᓴᓐ, ᑭᒋ ᐆᑌᓇᐗᓐ ᑲᔦ᙮ 10 ᐋᑎ ᓴ ᐱᑯ ᐁᔑ ᐊᔨᔥᐸᑎᓈᓂᒃ, ᔑᐹᔮᑎᒃ ᑲᔦ ᐁᔑ ᐊᔭᑲᐙᑌᓂᒃ ᐅᑮ ᐃᔑ ᐅᓇᓵᐙᐞ ᐊᓇᒥᐁᑳᓂᐗᓯᓃᐞ, ᐅᑮ ᐸᑕᑭᓈᐙᐞ ᑲᔦ ᐃᑴᐎ ᒪᓂᑑᑳᓇᐞ ᐋᔕᕒᐊ Asherah ᐁᓂᒥᓐᒡ᙮ 11 ᒦᑕᔥ ᐃᐃᒫ ᑳᐃᔑ ᓂᑖ ᒥᓈᓯᑫᐙᒡ ᐁᔑ ᐊᔨᔥᐸᑎᓈᓂᒃ, ᐁᑮ ᐃᔑᒋᑫᐙᒡ ᓀᑖ ᐃᔑᒋᑫᓂᒡ ᑯᑕᒃ ᐯᒫᑎᓯᓂᒡ ᑳᑎᐯᒋᑫᓂᒡ ᑳᑮ ᓵᑭᑖᒪᐙᓂᒡ ᐁᓂᐃᔖᐙᒡ᙮ ᓅᒋᑯ ᓴ ᑮᐃᔑᒋᑫᐗᒃ ᐁᑮ ᐅᒋ ᓂᔥᑭᐋᐙᒡ ᑳᑎᐯᒋᑫᓂᒡ᙮ 12 ᒪᓂᑑᑳᓇᐞ ᓴ ᐅᑮ ᐊᓇᒥᐁᑕᐙᐙᐞ ᐋᓇᐐᓐ ᐋᓇ ᑮᐃᑯᐙᐸᓐ ᑳᑎᐯᒋᑫᓂᒡ, ᑫᑯ ᐃᐃᐌ ᐃᔑᒋᑫᑫᒃ! 13 ᑳᑎᐯᒋᑫᒡ ᓴ ᐅᑖᓇᑮ ᐃᔑᓂᔕᐙᐞ ᑳᑲᓅᑕᒫᑯᒡ, ᐃᐃ ᑲᔦ ᐅᓃᑳᓂ ᐙᐸᒋᑫᐞ ᑳᓃᑳᓂ ᑭᑫᑕᒥᓂᒡ ᑫᐃᔑᐌᐸᓂᓂᒃ ᐅᐅ ᒋᐃᔑ ᐊᔮᒀᒥᒫᓂᒡ ᐯᒫᑎᓯᓂᒡ ᐁᔮᓂᒡ ᒎᑕ Judah ᐊᑮᕽ, ᐃᔅᕒᐃᔭᓬ ᐊᑮᕽ ᑲᔦ᙮ ᒦᔥ ᑳᐃᓈᒡ, ᓇᑲᑕᒧᒃ ᑭᒪᒋᐃᔑᐌᐱᓯᐎᓂᐙᓐ᙮ ᑲᓇᐌᑕᒧᒃ ᓂᑎᓈᑯᓂᑫᐎᓇᓐ, ᓂᑎᑭᑐᐎᓇᓐ ᑲᔦ ᑳᐃᓇᑌᑭᓐ ᑲᑭᓇ ᐅᓇᔓᐌᐎᓂᕽ ᑳᑮ ᐃᓇᒀᐸᓐ ᑭᑫᑌᔭᐋᒥᐙᒃ᙮ ᓂᑕᓄᑮᐋᑲᓇᒃ ᓴ ᑫᓅᑕᒪᐎᐙᒡ ᑲᔦ ᓂᑮ ᐊᓅᓈᐸᓃᒃ ᐅᐅ ᒋᐃᑭᑐᐙᐸᓐ, ᑮᐃᑭᑐ᙮ 14 ᑳᐐᓐ ᐃᑕᔥ ᑮᐱᓯᑕᓰᐗᒃ ᐁᑮ ᐃᔑ ᔖᔒᐱᑕᒧᐙᒡ ᑖᐱᔥᑰ ᐅᑫᑌᔭᐋᒥᐙᐸᓃᐞ ᑳᑮ ᑌᐺᔦᓂᒫᓯᓂᒃ ᑳᑎᐯᒋᑫᓂᒡ ᐅᑭᔐᒪᓂᑑᒥᓂ᙮ 15 ᐅᑮ ᐋᓇᐌᑖᓈᐙ ᓴ ᐅᑎᑭᑐᐎᓂᓂ, ᐃᐃ ᑲᔦ ᐅᑕᔓᑕᒫᑫᐎᓐ ᑳᑮ ᐅᔑᑕᒪᐙᓂᑯᐸᓀᓐ ᐅᑫᑌᔭᐋᒥᐙᐸᓃᐞ᙮ ᑳᐐᓐ ᑲᔦ ᐅᑮ ᐸᐹᐱᓯᑭᑕᓰᓈᐙ ᑳᑮ ᐃᔑ ᐊᔮᒀᒥᒥᑯᐙᒡ᙮ ᐅᑮ ᐱᒥᓂᔕᐙᐙᐞ ᒪᓂᑑᑳᓇᐞ ᑫᑰᓐ ᐁᓀᑖᑯᓯᓯᓂᒃ, ᒦᔥ ᑫᐐᓇᐙ ᑳᐊᓂ ᐃᓀᑖᑯᓯᐙᒡ᙮ ᐅᑮ ᓇᓈᐱᓇᐙᐙᐞ ᐯᒫᑎᓯᓂᒡ ᐙᑳᔭᐄ ᐁᔮᓂᒡ ᐋᓇᐐᓐ ᐁᑮ ᐅᒋᐃᑯᐙᒡ ᑳᑎᐯᒋᑫᓂᒡ ᐃᐃ ᒋᐃᔑᒋᑫᓯᒀ ᐁᔑᒋᑫᓂᒡ᙮ 16 ᐅᑮ ᓇᑲᑖᓈᐙᓐ ᓴ ᑲᑭᓇ ᐁᓈᑯᓂᑫᓂᒡ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ᙮ ᒦᑕᔥ ᑲᔦ ᑳᐃᔑᒋᑫᐙᒡ ᐁᑮ ᓂᑭᓴᒧᐙᒡ ᐲᐙᐱᒃ ᐁᑮ ᐅᒋ ᐅᔑᐋᐙᒡ ᓃᔑᓐ ᐱᔑᑮᐎ ᒪᓂᑑᑳᓇᐞ᙮ ᐅᑮ ᐅᔑᐋᐙᓐ ᐃᑴᐎ ᒪᓂᑑᑳᓇᓐ ᐊᔕᕒᐊ ᐁᓂᒥᓐᒡ᙮ ᑮᐊᓂᒥᑯᑖᐗᒃ ᑲᔦ ᐁᐊᓇᒥᐁᑕᐙᐙᒡ ᑳᐹᑏᓄᓂᒡ ᐗᓇᑯᔕᐞ, ᐃᓂ ᑲᔦ ᐯᓬ Baal ᐁᔑᓂᑳᓱᓂᒡ ᒪᓂᑑᑳᓐ᙮ 17 ᒦᑕᔥ ᑲᔦ ᑳᐃᔑᒋᑫᐙᒡ ᐁᑮ ᒪᒋᑌᐙᐙᒡ ᐅᑯᓯᓯᐙᐞ, ᐅᑖᓂᓯᐙᐞ ᑲᔦ ᐁᑮ ᐸᑭᑎᓈᓱᐙᑫᐙᒡ᙮ ᐅᑮ ᓅᒋᑑᓈᐙ ᑲᔦ ᒪᒫᑖᐎᓯᐎᓐ, ᒥᑌᐎᐎᓐ ᑲᔦ, ᓅᒋᑯ ᐁᑮ ᐃᔑ ᒪᒋᒋᑫᐙᒡ ᐁᓈᓴᒦᓂᒡ ᑳᑎᐯᒋᑫᓂᒡ, ᐃᐃᒫ ᐁᑮ ᐅᒋ ᓂᔥᑭᐋᐙᒡ᙮ 18 ᒦᑕᔥ ᑳᑎᐯᒋᑫᒡ ᑳᑮ ᓂᔥᑭᐃᑯᒡ ᐃᔅᕒᐃᔭᓬᐊᐞ, ᓂᑯᒋ ᐁᑮ ᐃᔑᐌᐱᓈᒡ ᐁᓈᓴᒦᒡ᙮ ᒦ ᓴ ᐁᑕ ᒎᑕᐎᕽ ᐌᑕᑳᓀᓯᓂᒡ ᐃᐃᒫ ᑳᐃᔥᑸᓂᒡ᙮ 19 ᑳᐐᓐ ᐃᑕᔥ ᐃᑯ ᑲᔦ ᒎᑕᐎᕽ ᐌᑕᑳᓀᓯᐙᒡ ᐅᑮ ᑲᓇᐌᑕᓰᓇᐙ ᐁᓈᑯᓂᑫᓂᒡ ᑳᑎᐯᒋᑫᓂᒡ ᐅᑭᔐᒪᓂᑑᒥᐙᓐ᙮ ᒪᔮ ᓴ ᑯ ᑮᐃᔑᒋᑫᐗᒃ ᑳᑮ ᒫᒋᑑᓂᒡ ᐃᔑᒋᑫᐎᓇᓐ ᓀᑖ ᐃᔑᒋᑫᓂᐸᓐ ᐃᔅᕒᐃᔭᓬᐊᐞ᙮ 20 ᒦᑕᔥ ᑳᑎᐯᒋᑫᒡ ᑳᑮ ᐋᓇᐌᓂᒫᒡ ᑲᑭᓇ ᐃᔅᕒᐃᔭᓬᐊᐞ, ᐁᑮ ᓇᓇᐊᓵᒡ ᐱᓵᓐ ᒋᔖᑰᒋᐃᑯᓂᒡ ᑳᔒᑫᓂᒥᑯᓂᒡ᙮ ᒦᔥ ᐃᐃ ᐲᓂᔥ ᑳᑮ ᐅᒋ ᒑᑭ ᐌᐱᓈᒡ ᑫᔮᐱ ᒋᐙᐸᒫᓯᒃ᙮ 21 ᑳᑎᐯᒋᑫᓂᒡ ᐅᑮ ᐅᒋ ᐸᑫᐎᓂᑯᐙᓐ ᐃᔅᕒᐃᔭᓬᐊᒃ ᒎᑕᑳᕽ ᐌᒌᓂᒡ, ᒦᑕᔥ ᐃᐃ ᐃᔅᕒᐃᔭᓬᐊᒃ ᑳᑮ ᑭᒋᐅᑭᒫᐎᐋᐙᒡ ᒉᕒᐆᐴᐊᒪᓐ Jeroboam ᐌᑌᑌᓂᒡ ᓃᐸᑕᓐ Nebat᙮ ᒦᐗᓐ ᐃᑕᔥ ᐃᓂ ᑳᑮ ᐌᐱᐋᓂᒡ ᐃᔅᕒᐃᔭᓬᐊᐞ ᒋᐱᒥᓂᔕᐙᓯᓂᒃ ᑳᑎᐯᒋᑫᓂᒡ, ᐁᑮ ᐌᐱᐋᓂᒡ ᑲᔦ ᒋᑭᒋ ᒪᒋᑑᑕᒥᓂᒡ᙮ 22 ᐃᔅᕒᐃᔭᓬᐊᒃ ᓴ ᑮᐃᔑᒋᑫᐗᒃ ᑲᑭᓇ ᑳᑮ ᐃᔑ ᒪᒋᑑᑕᒥᓂᐸᓐ ᒉᕒᐊᐴᐊᒪᓐ; ᑳᐐᓐ ᑮᐴᓂᒋᑫᓰᐗᒃ᙮ 23 ᒦᑕᔥ ᐲᓂᔥ ᑳᑎᐯᒋᑫᓂᒡ ᓂᑯᒋ ᑳᑮ ᐃᔑ ᐌᐱᓂᑯᐙᒡ ᐁᓈᓴᒦᓂᒡ, ᒦᐞ ᐄᑐᒃ ᐃᐃ ᑳᐃᔑ ᐊᔮᒀᒥᒥᐌᑯᐸᓐ ᑮᑮᑭᑑᑕᒫᑯᒡ ᐅᑕᓄᑮᐋᑲᓇᐞ, ᑳᑲᓅᑕᒫᑯᒡ ᑲᔦ᙮ ᒦᑕᔥ ᐃᔅᕒᐃᔭᓬᐊᒃ ᐅᑕᑮᒥᐙᕽ ᑳᑮ ᐅᒋ ᒫᒌᓂᑣ, ᐁᑮ ᐃᔑᐎᓂᑣ ᐌᑎ ᐊᓰᕒᐃᔭ ᐊᑮᕽ᙮ ᒦᔥ ᐌᑎ ᑫᔮᐱ ᐁᔮᐙᒡ᙮ ᐊᓰᕒᐃᔭᐎᓂᓂᐗᒃ ᑮᑲᐯᔑᐃᑣ ᐃᔅᕒᐃᔭᓬ ᐊᑮᕽ 24 ᒦᑕᔥ ᑳᐃᔑᒋᑫᒡ ᐊᐊ ᐊᓰᕒᐃᔭᐎ ᑭᒋᐅᑭᒫ ᐯᒫᑎᓯᓂᒡ ᐁᑮ ᐅᒋ ᐲᓈᒡ ᐹᐱᓬᐊᓐ Babylon ᐊᑮᕽ ᐆᑌᓈᑳᕽ ᑰᑕ Cuthah, ᐋᐃᐸ Ivvah, ᐁᒪᑦ Hamath, ᓭᐸᕒᐯᔨᒻ Sepharvaim ᐁᒋᑳᑌᓂᑭᓐ ᐁᑮ ᐃᔑ ᑲᐯᔑᐋᒡ ᐆᑌᓈᑳᕽ ᓴᒣᕒᐃᔭ ᐊᑮᕽ ᐁᑮ ᓈᐸᓵᒡ ᐁᔑᐊᔮᓂᐸᓐ ᐃᔅᕒᐃᔭᓬᐊᐞ᙮ ᒦᔥ ᑳᐃᔑ ᑎᐯᑕᒥᓂᒡ ᐃᐃ ᓴᒣᕒᐃᔭ ᐊᑮᕽ ᐁᑮ ᐊᔨᔑᑖᓂᒡ ᐆᑌᓈᑳᕽ᙮ 25 ᐊᐲ ᓴ ᒫᐗᒡ ᐃᑯ ᓂᑕᒻ ᐁᑲᐯᔑᓂᒡ ᐃᐃᒫ, ᑳᐐᓐ ᓴ ᐅᑮᐊᓇᒥᐁᑕᐙᓰᓂ ᑳᑎᐯᒋᑫᓂᒡ᙮ ᒦᑕᔥ ᑳᑎᐯᒋᑫᒡ ᑳᑮ ᐃᔑᓂᔕᐙᒡ ᒥᔑᐱᔑᐗᐞ ᐃᐃᒫ ᒣᑴᔭᐄ ᒋᓂᓵᓂᒡ ᐋᓂᑕ ᐯᒫᑎᓯᓂᒡ᙮ 26 ᒦᑕᔥ ᑳᐃᔑ ᐐᑕᒪᐎᓐᒡ ᐊᓰᕒᐃᔭᐎ ᑭᒋᐅᑭᒫ ᐁᑮᐃᓂᓐᒡ, ᐃᑭ ᓴ ᓈ ᐯᒫᑎᓯᐙᒡ ᑳᑮ ᐃᔑᐎᓇᑣᐸᓐ ᒋᑲᐯᔑᐙᒡ ᐌᑎ ᐆᑌᓈᑳᕽ ᓴᒣᕒᐃᔭ ᐊᑮᕽ, ᑳᐐᓐ ᐅᔕ ᓈ ᐅᑭᑫᑕᓰᓈᐙ ᐋᓃᓐ ᐁᔑ ᐊᑕᐌᑕᒥᓂᒡ ᐃᓂ ᒪᓂᑑᓐ ᐌᑎ ᐊᑮᕽ ᐌᒋ ᑎᐯᑖᑯᓯᓂᒡ᙮ ᐅᑮ ᐃᔑᓂᔕᐙᓂ ᒥᔑᐱᔑᐗᐞ ᐁᔑᐊᔮᐙᒡ, ᑫᓂᓯᑯᐙᒡ, ᑳᐐᓐ ᐋᓃᔥ ᐅᑭᑫᑕᓰᓈᐙ ᐋᓃᓐ ᐁᔑ ᐊᑕᐌᑕᒥᓂᒡ, ᑮᐃᓈ᙮ 27 ᒦᑕᔥ ᐅᐅ ᐊᓰᕒᐃᔭᐎ ᑭᒋᐅᑭᒫ ᑳᐃᓈᑯᓂᑫᒡ, ᑮᐌᓂᔕᐅᒃ ᓴ ᐯᔑᒃ ᐊᓇᒥᐁᐎᑭᒫ ᑳᑮ ᐅᒋ ᐲᓂᑎᐸᓐ ᐌᑎ ᓴᒣᕒᐃᔭ ᐊᑮᕽ ᒋᐊᐎ ᐃᔑᑖᒡ, ᑫᑭᑭᓄᐊᒪᐙᒡ ᐃᐃ ᐯᒫᑎᓯᓂᒡ ᐋᓃᓐ ᐁᔑ ᐊᑕᐌᑕᒥᓂᒡ ᒪᓂᑑᓐ ᐌᑎ ᐌᒋ ᑎᐯᑖᑯᓯᓂᒡ, ᑮᐃᑭᑐ᙮ 28 ᐯᔑᒃ ᐃᑕᔥ ᐃᔅᕒᐃᔭᓬᐃ ᐊᓇᒥᐁᐎᑭᒫ ᓴᒣᕒᐃᔭ ᐊᑮᕽ ᑳᑮ ᐅᒋ ᐲᓂᑎᐸᓐ ᑮᑮᐌ ᐁᑮ ᐃᔑ ᑲᐯᔑᒡ ᐯᑕᓬ Bethel ᐆᑌᓈᕽ᙮ ᒦᑕᔥ ᐊᐊ ᑳᑮ ᑭᑭᓄᐊᒪᐙᒡ ᐯᒫᑎᓯᓂᒡ ᐋᓃᓐ ᑫᔑ ᐊᓇᒥᐁᑕᐎᒥᓐᒡ ᑳᑎᐯᒋᑫᓂᒡ᙮ 29 ᔖᑰᒡ ᐃᑕᔥ ᐁᔑ ᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᑳᑮ ᐱ ᑲᐯᔑᐙᒡ ᓴᒣᕒᐃᔭ ᐊᑮᕽ ᐅᑮ ᐅᔑᐋᐙᐞ ᐅᒪᓂᑑᑳᓂᒥᐙᐞ, ᐁᑮ ᐃᔑ ᐊᓵᐙᒡ ᒪᓂᑑᑳᓂ ᐊᓇᒥᐁᐎᑲᒥᑯᕽ ᐁᔑ ᐊᔨᔥᐸᑎᓈᓂᒃ ᐃᔅᕒᐃᔭᓬᐊᐞ ᑳᑮ ᐅᔑᑑᓂᒡ᙮ 30 ᐃᑭ ᓴ ᐹᐱᓬᐊᓐ ᐌᒌᐙᒡ ᐅᑮ ᐅᔑᐋᐙᓐ ᑫᐅᒪᓂᑑᒥᐙᒡ ᓴᑲᑦ ᐲᓄᑦ Succoth Benoth ᐁᔑᓂᑳᓱᓂᒡ᙮ ᐃᑭ ᑲᔦ ᑰᑕ Cuthah ᐌᒌᐙᒡ ᐅᑮ ᐅᔑᐋᐙᓐ ᑫᐅᒪᓂᑑᒥᐙᒡ ᓀᕒᑲᓬ Nergal ᐁᔑᓂᑳᓱᓂᒡ, ᐃᑭ ᑲᔦ ᐁᒪᑦ Hemath ᐌᒌᐙᒡ ᐅᑮ ᐅᔑᐋᐙᓐ ᑫᐅᒪᓂᑑᒥᐙᒡ ᐊᔒᒪ Ashima ᐁᔑᓂᑳᓱᓂᒡ᙮ 31 ᐃᑭ ᑲᔦ ᐋᐃᐸ Ivvah ᐌᒌᐙᒡ ᐅᑮ ᐅᔑᐋᐙᓐ ᑫᐅᒪᓂᑑᒥᐙᒡ ᓂᐹᔅ Nibhaz, ᑖᕒᑕᒃ Tartak ᑲᔦ ᐁᔑᓂᑳᓱᓂᒡ᙮ ᒦ ᑲᑭᓇ ᑳᑮ ᐅᔑᑕᒫᓱᐙᒡ ᑫᐅᒪᓂᑑᒥᐙᒡ᙮ ᐃᑭᐌᓂᐗᒃ ᑕᔥ ᐐᓐ ᑳᑮ ᐅᒌᐙᒡ ᓭᐸᕒᐯᔨᒻ Sepharvaim ᑮᐸᑭᑎᓈᓱᐙᑫᐗᒃ ᐅᓃᒑᓂᓯᐙᐞ ᑳᐊᒀᑭᓯᑳᑌᒃ ᑎᓄ ᐸᑭᑎᓈᓱᐎᓐ ᐁᐸᑭᑎᓈᓲᑕᒪᐙᐙᒡ ᐅᒪᓂᑑᒥᐙᐞ ᐊᑦᕒᐋᒪᓬᐁᒃ Adrammelech, ᐊᓈᒪᓬᐁᒃ Anammelech ᑲᔦ ᐁᔑᓂᑳᓱᓂᒡ᙮ 32 ᐅᑮ ᑯᑖᓀᓂᒫᓂ ᓴ ᑲᔦ ᑳᑎᐯᒋᑫᓂᒡ, ᔖᑰᒡ ᐃᑕᔥ ᐊᐌᓀᓇᐞ ᐃᑯ ᐅᐐᒋᐱᒫᑎᓰᓂ ᐅᑮ ᐅᒋ ᐅᓇᑭᒫᓂ ᑫᐊᓂ ᐊᓇᒥᐁᐗᓄᑮᒋᑫᓂᒡ ᑳᑮ ᐊᔨᔑ ᐊᓇᒥᐋᐙᒡ ᐁᔑ ᐊᔨᔥᐸᑎᓈᓂᒃ᙮ 33 ᐅᑮ ᑯᑖᓀᓂᒫᓂ ᑲᔦ ᑳᑎᐯᒋᑫᓂᒡ, ᔖᑰᒡ ᐃᑕᔥ ᐅᑮ ᐊᓇᒥᐁᑕᐙᓂ ᐅᒪᓂᑑᒥᓂ ᐁᑮ ᐃᔑᒋᑫᓂᒡ ᑳᑮ ᓂᑖ ᐃᔑᒋᑫᓂᒡ ᐌᑎ ᐅᑕᑮᒥᓃᕽ ᑳᐱᐅᒋ ᐲᒋᑲᓂᐎᓂᒡ᙮ 34 ᒦᑕᔥ ᑫᔮᐱ ᓅᑯᒻ ᑳᑮᔑᑲᓂᓂᒃ ᐁᔑᒋᑫᓂᒡ, ᐁᓅᒋᑑᓂᒡ ᐅᑫᑌ ᐃᔑᒋᑫᐎᓂᓂ᙮ ᑳᐐᓐ ᐅᑕᓇᒥᐁᑕᐙᓯᐙᐙᓐ ᑳᑎᐯᒋᑫᓂᒡ, ᑳᐐᓐ ᐅᑮ ᓇᐃᑕᓰᓈᐙ ᐅᑎᑭᑐᐎᓂᓂ, ᐊᓇᒥᐁᒋᑫᐎᓇᓐ ᑲᔦ ᑳᑮ ᐃᒋᑲᓂᐎᐙᐸᓐ ᒋᑑᑕᒧᐙᒡ᙮ ᑳᐐᓐ ᑲᔦ ᐅᐸᐹᐱᓯᔅᑫᑕᓰᓈᐙ ᐅᑑᓇᔓᐌᐎᓂᓂ, ᐅᑎᓈᑯᓂᑫᐎᓂᓂ ᑲᔦ ᑳᑮ ᐃᔑ ᒦᓈᓂᑯᐸᓀᓐ ᒉᑲᐴᓐ Jacob ᐅᐲᐌᓰᒥᓂ᙮ ᒉᑲᑉ ᐄᑐᒃ ᐃᔅᕒᐃᔭᓬ ᑮᐃᔑᓂᑳᓈᐎᑎᐸᓐ᙮ 35 ᐊᐲ ᑳᑎᐯᒋᑫᒡ ᑮᐅᔑᑕᒪᐙᑯᐸᓀᓐ ᐊᔓᑕᒫᑫᐎᓐ ᐃᔅᕒᐃᔭᓬᐊᐞ, ᐅᐅ ᓴ ᑮᐃᓈᑯᐸᓐ, ᑫᑯ ᐐᓐ ᐸᑳᓐ ᒪᓂᑑᒃ ᐊᓇᒥᐁᑕᐙᑫᒀᓂᒃ; ᑫᑯ ᑲᔦ ᐊᓂᒥᑯᑕᐙᑫᒀᓂᒃ ᒋᐊᓄᑮᑕᐌᒀ; ᑫᑯ ᑲᔦ ᐸᑭᑎᓈᓲᑕᒪᐙᑫᒀᓂᒃ᙮ 36 ᓃᓐ ᐃᓴ ᐁᑕ ᑳᑎᐯᒋᑫᔮᓐ ᑭᑲ ᑯᑖᓀᓂᒥᒻ, ᑭᑲ ᐊᓂᒥᑯᑖᒻ ᐁᓈᓴᒦᔮᓐ, ᑭᑲ ᐸᑭᑎᓈᓲᑕᒪᐎᒻ ᑲᔦ᙮ ᓃᓐ ᐄᑐᒃ ᐄᒋᐸᑮᕽ ᑳᑮ ᐅᒋ ᓵᑭᒋᐎᓂᓇᑰᒃ ᓂᑭᒋ ᒪᔥᑲᐎᓰᐎᓐ ᑮᐋᐸᒋᑑᔮᓐ ᐊᐲ ᑮᔑ ᓂᒥᓂᑫᓂᔮᐹᓐ᙮ 37 ᒨᔕᒃ ᓴ ᑲᔦ ᑭᑲ ᑲᓇᐌᑖᒻ ᓂᑎᑭᑐᐎᓇᓐ, ᐊᓇᒥᐁᒋᑫᐎᓇᓐ ᑲᔦ, ᓂᑑᓇᔓᐌᐎᓇᓐ ᑲᔦ, ᓂᑎᓈᑯᓂᑫᐎᓇᓐ ᑲᔦ ᑳᑮ ᐅᔑᐲᐊᒫᓐ᙮ ᑫᑯ ᐐᓐ ᐸᑳᓐ ᒪᓂᑑᒃ ᑯᑖᓀᓂᒫᑫᒀᓂᒃ᙮ 38 ᑫᑯ ᑲᔦ ᐗᓃᑫᑫᒃ ᐃᐃ ᐊᔓᑕᒫᑫᐎᓐ ᑳᑮ ᐅᔑᑕᒪᐎᓇᑰᒃ, ᑫᑯ ᑲᔦ ᐸᑳᓐ ᒪᓂᑑᒃ ᐱᓯᑕᐙᑫᒀᓂᒃ᙮ 39 ᓃᓐ ᐃᓴ ᐁᑕ ᑌᐯᒋᑫᔮᓐ ᑭᑭᔐᒪᓂᑑᒥᐙ ᑭᑲ ᑯᑖᓀᓂᒥᒻ, ᓃᓐ ᐄᑐᒃ ᑫᓈᑕᒪᐎᓇᑰᒃ ᐁᔑ ᒪᔥᑲᐌᑖᑯᓯᐙᒡ ᑳᔒᑫᓂᒥᓀᒀ, ᐅᑮᐃᓈᐙᓐ᙮ 40 ᑳᐐᓐ ᐃᑕᔥ ᐅᑮ ᐱᓯᑖᑯᓰᐞ᙮ ᔖᑰᒡ ᑳᐐᓐ ᐅᑮ ᐴᓂᑑᓰᓂ ᐅᑫᑌ ᐃᔑᒋᑫᐎᓂᓂ᙮ 41 ᐋᓇ ᓴ ᐐᓐ ᐅᑯ ᐯᒫᑎᓯᐙᒡ ᐁᑮ ᑯᑖᓀᓂᒫᐙᒡ ᑳᑎᐯᒋᑫᓂᒡ, ᔖᑰᒡ ᓴ ᐅᑮ ᐊᓇᒥᐁᑕᐙᐙᐞ ᐅᒪᓂᑑᒥᐙᐞ᙮ ᒦᑕᔥ ᑫᔮᐱ ᓅᑯᒻ ᑳᑮᔑᑲᓂᓂᒃ ᑳᐅᒋ ᐃᔑᒋᑫᓂᒡ ᐅᓃᒑᓂᓯᐙᐞ, ᐅᔑᓯᐙᐞ ᑲᔦ ᐁᓈᐱᒋᑫᓂᒡ ᑳᑮ ᐃᔑᒋᑫᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society