2 ᑭᒋᐅᑭᒫᒃ 13 - ᐅᒋᐺ ᑭᒋᒪᓯᓇᐃᑲᓐᒌᐅᐋᐊᔅ ᑮᑭᒋᐅᑭᒫᐎᒡ ᐃᔅᕒᐃᔭᓬ ᐊᑮᕽ 1 ᓃᔥᑕᓇᔑᓂᓱᐱᐴᓐ 23 ᐃᑕᔥ ᑮᑭᒋᐅᑭᒫᐎᓂᒡ ᒎᐊᔕᓐ Joash ᐌᑎ ᒎᑕ Judah ᐊᑮᕽ ᐌᑌᑌᓂᒡ ᐁᐊᓵᔭᐗᓐ Ahaziah, ᒦ ᓴ ᐃ ᐊᐲ ᒌᐅᐋᐊᔅ Jehoahaz ᐌᑌᑌᒡ ᒌᐆᐗᓐ Jehu ᑳᑮ ᒫᒌ ᑭᒋᐅᑭᒫᐎᒡ ᐃᐃᒫ ᓴᒣᕒᐃᔭ Samaria ᐃᔅᕒᐃᔭᓬ Israel ᐊᑮᕽ᙮ ᒥᑖᔑᓃᔣᓱ ᐊᑭ ᐁᑮ ᑭᒋᐅᑭᒫᐎᒡ᙮ 2 ᓅᒋᑯ ᑮᐃᔑ ᒪᒋᐃᔑᒋᑫ ᐁᓈᓴᒦᓂᒡ ᑳᑎᐯᒋᑫᓂᒡ, ᐁᑮ ᐃᔑᒋᑫᒡ ᑳᑮ ᐃᔑᒋᑫᓂᒡ ᒉᕒᐆᐴᐊᒪᓐ Jeroboam ᐌᑌᑌᓂᒡ ᓃᐸᑕᓐ Nebat᙮ ᐅᑮ ᐌᐱᐋᐞ ᐃᔅᕒᐃᔭᓬᐊᐞ ᒋᒪᒋᑑᑕᒥᓂᒡ; ᑳᐐᓐ ᐃᐃ ᓇᑫ ᑮᐃᔑ ᐴᓂᒋᑫᓰ᙮ 3 ᒦᑕᔥ ᐃᔅᕒᐃᔭᓬᐊᒃ ᑳᑮ ᓂᔥᑭᐋᐙᒡ ᑳᑎᐯᒋᑫᓂᒡ, ᐁᑮ ᐸᑭᑎᓈᓂᒡ ᒋᑭᒋ ᔕᔖᑰᒋᐃᑯᐙᒡ ᓰᕒᔭᐎ ᑭᒋᐅᑭᒫᓐ ᐋᓭᐊᓬ Hazael ᐁᔑᓂᑳᓱᓂᒡ, ᐃᓂ ᑲᔦ ᐅᑯᓯᓯᓂ ᐯᓐᐁᑖᑦ Benhadad ᐁᔑᓂᑳᓱᓂᒡ᙮ 4 ᒦᑕᔥ ᒌᐅᐋᐊᔅ ᑳᑮ ᐊᓇᒥᐁᑕᐙᒡ ᑳᑎᐯᒋᑫᓂᒡ᙮ ᒦᔥ ᑳᐃᔑ ᐱᓯᑖᑯᒡ ᑳᑎᐯᒋᑫᓂᒡ ᐋᓃᔥ ᐅᑮ ᐙᐸᑕᒥᓂ ᐋᓃᓐ ᑳᐃᔑ ᐅᓱᓵᒥᐃᑯᐙᒡ ᐃᓂ ᓰᕒᐃᔭᐎ ᑭᒋᐅᑭᒫᓐ᙮ 5 ᑳᑎᐯᒋᑫᓂᒡ ᐃᑕᔥ ᐅᑮ ᐃᔑᓂᔕᐊᒫᑯᐙᓐ ᐅᓃᑳᓂᓰᓐ ᑫᓈᑕᒫᑯᐙᒡ ᐃᐃ ᐅᒋ ᐁᔑ ᒪᔥᑲᐎᓰᓂᒡ ᓰᕒᐃᔭᐎᓂᓂᐗᐞ᙮ ᒦᑕᔥ ᐱᓵᓐ ᐃᔅᕒᐃᔭᓬᐊᒃ ᑳᐃᔑ ᐊᔨᑖᐙᒡ ᐅᑖᐎᓂᐙᕽ, ᑖᐱᔥᑰ ᑳᑮ ᐱ ᐊᔨᑎᐙᐸᓐ᙮ 6 ᔖᑰᒡ ᐃᑕᔥ ᑳᐐᓐ ᐅᑮ ᓇᑲᑕᓰᓈᐙᓐ ᐅᒪᒋᐃᔑᐌᐱᓯᐎᓂᐙᓐ ᒉᕒᐆᐴᐊᒪᓐ ᑳᑮ ᐃᔑ ᐌᐱᐋᓂᑯᐸᓀᓐ ᐃᔅᕒᐃᔭᓬᐊᐞ ᒋᔑ ᒪᒋᑑᑕᒥᓂᒡ᙮ ᒦ ᑫᔮᐱ ᑳᐃᔑ ᐱᒥᓂᔕᐙᓂᒡ ᐃᓂ ᐃᑴᐎ ᒪᓂᑑᑳᓇᓐ ᐋᔕᕒᐊ Asherah ᐁᓂᒥᓐᒡ ᑫᔮᐱ ᑮᐸᑕᑭᓱᐗᓐ ᐃᐃᒫ ᓴᒣᕒᐃᔭ Samaria ᐆᑌᓈᕽ᙮ 7 ᒌᐅᐋᐊᔅ ᓴ ᐋᐱᒋ ᑮᐸᑮᐎᐗᐞ ᐅᔑᒫᑲᓂᔒᒪᐞ, ᒦ ᐁᑕ ᑳᑕᔑᓂᒡ ᓈᓂᒥᑕᓇ 50 ᐯᒥᐗᓀᐸᐃᑯᓂᒡ, ᒥᑖᓱ 10 ᒦᑳᓱᐎ ᐅᑖᐹᓈᑾᐞ, ᒥᑖᒌᕽ ᒥᑖᔂᒃ 10,000 ᐃᑕᔥ ᑮᑕᔑᐗᐞ ᐅᔑᒫᑲᓂᔒᒪᐞ᙮ ᐃᓂ ᓴ ᓰᕒᐃᔭᐎ ᑭᒋᐅᑭᒫᓐ ᑯᑕᒃ ᐅᑮ ᒑᑭᐋᓂ, ᑖᐱᔥᑰ ᑫᑰᓐ ᑳᐸᐎᓭᒃ ᑳᑕᑕᑯᑳᒋᑳᑌᒃ ᐁᑮ ᑑᑕᐙᓂᒡ᙮ 8 ᑲᑭᓇ ᑕᔥ ᒌᐅᐋᐊᔅ ᑳᑮ ᐃᔑᒋᑫᒡ ᑮᑭᒋᐅᑭᒫᐎᒡ, ᐋᓃᓐ ᑲᔦ ᑳᑮ ᐱ ᐃᔑ ᓲᑳᑎᓯᒡ ᐃᔑ ᐅᔑᐲᐃᑳᑌᓂᐗᓐ ᐃᐃᒫ ᒪᓯᓇᐃᑲᓂᕽ ᐁᔑ ᐅᔑᐲᐃᑳᓱᓂᒡ ᑯᑕᒃ ᐃᔅᕒᐃᔭᓬᐃ ᑭᒋᐅᑭᒫᐞ ᑳᑮ ᐱ ᐊᔨᔑᒋᑫᓂᒡ᙮ 9 ᐁᑮ ᐃᔥᒀ ᐱᒫᑎᓯᒡ ᐃᑕᔥ, ᑮᐃᔑ ᓇᐃᓈ ᐁᔑ ᓇᐃᓂᒥᓐᒡ ᐅᑫᑌᔭᐋᒥᐸᓃᐞ ᐃᐃᒫ ᓴᒣᕒᐃᔭ ᐆᑌᓈᕽ᙮ ᐅᑯᓯᓴᓐ ᓴ ᑕᔥ ᒋᐆᐋᔥ Jehoash ᐁᔑᓂᑳᓱᓂᒡ ᑮᑭᒋᐅᑭᒫᐎᐗᓐ ᐁᑮ ᓈᐱᔥᑳᑯᒡ᙮ ᑭᒋᐅᑭᒫ ᒋᐆᐋᔥ ᐁᑕᔑᓱᒡ 10 ᓂᓯᒥᑕᓇᔑᓃᔣᓱ 37 ᐱᐴᓐ ᐃᑕᔥ ᑳᑭᒋᐅᑭᒫᐎᓂᒡ ᒎᐊᔕᓐ Joash ᐌᑎ ᒎᑕ Judah ᐊᑮᕽ, ᒦ ᓴ ᐃ ᐊᐲ ᒋᐆᐋᔥ Jehoash ᐌᑌᑌᓂᒡ ᒌᐅᐋᐊᓴᓐ Jehoahaz ᑳᑮ ᑭᒋᐅᑭᒫᐎᒡ ᓴᒣᕒᐃᔭ ᐆᑌᓈᕽ ᐃᔅᕒᐃᔭᓬ ᐊᑮᕽ᙮ ᒥᑖᔑᓂᑯᑣᓱ ᐱᐴᓐ ᓴ ᒥᓂᒃ ᑮᑭᒋᐅᑭᒫᐎ᙮ 11 ᓅᒋᑯ ᓴ ᑮᐃᔑ ᒪᒋᑑᑕᒻ ᐁᓈᓴᒦᓂᒡ ᑳᑎᐯᒋᑫᓂᒡ ᐁᑮ ᓇᑲᑕᓯᒃ ᑳᑮ ᐃᔑ ᒪᒋᑑᑕᒥᓂᒡ ᒉᕒᐆᐴᐊᒪᓐ ᐌᑌᑌᓂᒡ ᓃᐸᑕᓐ Nebat, ᑳᑮ ᐃᔑ ᐌᐱᐋᓂᒡ ᐃᔅᕒᐃᔭᓬᐊᐞ ᒋᐃᔑᒋᑫᓂᒡ᙮ ᒦ ᓴ ᐃ ᐋᒋᑯ ᑳᐊᓂ ᐃᔑᒋᑫᒡ᙮ 12 ᑲᑭᓇ ᑕᔥ ᑫᑰᓐ ᑳᑮ ᐃᔑᒋᑫᒡ, ᑲᑭᓇ ᑲᔦ ᑳᐃᔑ ᓲᑭᑌᐁᒡ ᑮᒦᑳᓈᒡ ᑭᒋᐅᑭᒫᓐ ᐁᒪᓵᔭ Amaziah ᐁᔑᓂᑳᓱᓂᒡ ᑫᒋᐅᑭᒫᐎᓂᒡ ᒎᑕ ᐊᑮᕽ, ᐃᔑ ᐅᔑᐲᐃᑳᑌᓂᐗᓐ ᐃᐃᒫ ᒪᓯᓇᐃᑲᓂᕽ ᐁᔑ ᐅᔑᐲᐃᑳᓱᓂᒡ ᑯᑕᒃ ᐃᔅᕒᐃᔭᓬᐃ ᑭᒋᐅᑭᒫᐞ ᑳᑮ ᐱ ᐊᔨᔑᒋᑫᓂᒡ᙮ 13 ᑳᐃᔥᒀ ᐱᒫᑎᓯᒡ ᒌᐅᐋᐊᔅ ᑮᐃᔑ ᓇᐃᓈ ᐃᒫ ᓴᒣᕒᐃᔭ ᐆᑌᓈᕽ ᐁᔑ ᓇᐃᓂᒥᓐᒡ ᐃᔅᕒᐃᔭᓬᐃ ᑭᒋᐅᑭᒫᐞ᙮ ᒉᕒᐆᐴᐊᒪᓐ ᐃᑕᔥ ᐅᑮ ᓈᐱᔥᑳᑰᓐ ᐁᑮ ᑭᒋᐅᑭᒫᐎᓂᒡ᙮ ᐃᓬᐋᐃᔕ ᑮᐃᔥᒀᐱᒫᑎᓯᒡ 14 ᐃᓬᐋᐃᔕ ᓴ ᑮᐋᑯᓯ, ᒦ ᓴ ᐃᐌᓂ ᑳᑮ ᐊᓂ ᓂᓯᑯᒡ᙮ ᒋᐆᐋᔕᓐ Jehoash ᑫᒋᐅᑭᒫᐎᓂᒡ ᐃᔅᕒᐃᔭᓬ ᐊᑮᕽ ᓴ ᑮᐲᔖᐗᓐ ᐁᑮ ᐱ ᐙᐸᒥᑯᒡ, ᒦᔥ ᑳᐃᔑ ᒪᐎᒥᑯᒡ᙮ ᒦᑕᔥ ᑳᐃᑭᑐᓂᒡ, ᓂᑌᑌᕽ ᐁᓀᓂᒥᓈᓐ, ᑮᓐ ᐄᑐᒃ ᑭᒋ ᐅᓈᑕᒫᑫ ᐃᐃᒫ ᐃᔅᕒᐃᔭᓬᐃᑳᕽ, ᑮᐃᑭᑐᐗᓐ᙮ 15 ᒦᑕᔥ ᐃᓬᐋᐃᔕ ᑳᐃᓈᒡ, ᓈᓯᑲᐤ ᒥᑎᒀᑉ, ᐋᓂᑕ ᑲᔦ ᐱᑾᑰᓐ᙮ ᒦᔥ ᑳᐃᔑᒋᑫᓂᒡ᙮ 16 ᐅᑖᐱᓐ ᐊᐊ ᒥᑎᒀᑉ, ᐅᑮᐃᓈᓐ ᐃᓂ ᐃᔅᕒᐃᔭᓬᐃ ᑭᒋᐅᑭᒫᓐ᙮ ᐊᐲ ᐌᑖᐱᓈᓂᒡ, ᒦ ᓴ ᐃᓬᐋᐃᔕ ᑳᐃᔑ ᓵᒥᓈᒡ ᐅᓂᒌᓂᕽ᙮ 17 ᒦᑕᔥ ᑳᐃᓈᒡ, ᐹᑭᓇᓐ ᐃᐃ ᐙᓭᒋᑲᓐ ᐁᔮᒃ ᐙᐸᓄᕽ ᐃᓇᑫ᙮ ᑮᐃᔑᒋᑫᐗᓐ ᐃᑕᔥ᙮ ᒦᔥ ᑳᐃᓈᒡ, ᐊᐤ, ᐱᒧᒋᑫᓐ! ᒦᑕᔥ ᑭᒋᐅᑭᒫᓐ ᑳᐃᔑ ᐱᒧᒋᑫᓂᒡ᙮ ᐃᓬᐋᐃᔕ ᑕᔥ ᑮᐃᑭᑐ, ᒦ ᓴ ᐃ ᐁᓍᑌᒃ ᐃᐃ ᐱᑾᒃ ᑳᑎᐯᒋᑫᓂᒡ ᐅᐱᑾᒃ ᑫᐅᒋ ᔖᑰᒋᐊᑣ ᓰᕒᐃᔭ Syria ᐊᑮᕽ ᐁᔮᐙᒡ! ᐐᑫ ᓴ ᑯ ᑭᑲ ᒑᑭᐋᒃ ᐌᑎ ᐁᐯᒃ Ahpek ᐁᒋᑳᑌᓂᒃ, ᐅᑮᐃᓈᓐ᙮ 18 ᒦᑕᔥ ᑳᐊᓂᐃᓈᒡ ᑭᒋᐅᑭᒫᓐ ᒋᐅᑖᐱᓇᒥᓂᒡ ᐃᓂ ᐱᑾᑰᓐ᙮ ᑳᐅᑖᐱᓇᒥᓂᒡ ᐃᑕᔥ ᒦ ᐃ ᑳᐃᓈᒡ, ᐸᑭᑌᐊᓐ ᐃᓴ ᒥᑕᑲᒥᒃ! ᓂᓯᕽ ᐃᑕᔥ ᐅᑮ ᐸᑭᑌᐊᒥᓂ, ᒦᔥ ᐃᐃ ᒥᓂᒃ᙮ 19 ᒦᑕᔥ ᑳᑮ ᓂᔥᑳᑎᓯᒡ ᐊᐊ ᐃᓬᐋᐃᔕ ᐌᑎᓂᓃᒥᑯᒡ ᑭᔐᒪᓂᑑᓐ ᐁᑮᐃᓈᒡ, ᓈᓂᕽ ᐅᔕ, ᑯᒫ ᑲᔦ ᓂᑯᑣᒋᕽ ᑭᑖᑮ ᐸᑭᑌᐊᓐ ᐃᐃ ᒥᑕᑲᒥᒃ᙮ ᒦᑕᔥ ᐃᐃ ᒋᑮ ᔖᑰᒋᐊᑣᐸᓐ ᓰᕒᐃᔭᐎᓂᓂᐗᒃ, ᐐᑫ ᒋᑮ ᒑᑭᐊᑣᐸᓐ᙮ ᓂᓯᕽ ᐃᑕᔥ ᐁᑕ ᑭᑲ ᔖᑰᒋᐋᒃ, ᐅᑮᐃᓈᓐ᙮ 20 ᒦᑕᔥ ᐃᓬᐋᐃᔕ ᑳᐃᔑ ᐃᔥᒀ ᐱᒫᑎᓯᒡ ᐁᑮ ᓇᐃᓂᓐᒡ ᑲᔦ᙮ ᐁᑕᓱ ᐊᑭ ᓴ ᑮᓂᑖ ᑕᑯᔑᓅᐞ ᐃᐃᒫ ᐃᔅᕒᐃᔭᓬ ᐊᑮᕽ ᐃᓂᓂᐗᐞ ᐁᐱ ᐲᑾᑲᒥᑭᓯᓂᒡ ᒨᐗᑉ Moab ᐊᑮᕽ ᐌᒌᓂᒡ᙮ 21 ᒦᑕᔥ ᐋᐱᑎᕽ ᐃᔅᕒᐃᔭᓬᐊᒃ ᐁᐐ ᓇᐃᓈᐙᒡ ᐃᓂᓂᐗᓐ, ᑫᑕᑕᐎᓐ ᐅᑮ ᐙᐸᒫᐙᐞ ᐃᐃ ᐯᒥ ᒪᒫᔒᓂᒡ, ᒦᔥ ᑳᐃᔑ ᐲᒋ ᐌᐱᓈᐙᒡ ᐃᓂ ᑳᐐ ᓇᐃᓈᐙᐸᓐ ᐃᐃᒫ ᐃᓬᐋᐃᔕᐗᓐ ᐁᔑ ᓇᐃᓂᒥᓐᒡ᙮ ᐊᐲ ᐁᓵᒥᔥᑲᒥᓂᒡ ᐃᓬᐋᐃᔕᐗᓐ ᐅᑲᓂᓂ, ᒦ ᐃ ᑳᐃᔑ ᑮᐌ ᐱᒫᑎᓯᓂᒡ, ᒦᓇ ᐁᑮ ᐊᓂᔑ ᓃᐸᐎᓂᒡ᙮ ᐃᔅᕒᐃᔭᓬᐊᒃ ᑮᒦᑳᓂᑯᐙᒡ ᓰᕒᐃᔭᐎᓂᓂᐗᐞ 22 ᒥᓂᒃ ᐃᑕᔥ ᒋᐆᐋᔥ ᑳᑭᒋᐅᑭᒫᐎᒡ ᐐᑫ ᓴ ᐅᑮ ᐅᓱᓵᒥᐃᑰᓐ ᐃᓂ ᑭᒋᐅᑭᒫᓐ ᐊᓭᐊᓬᐗᓐ ᓰᕒᐃᔭ ᐊᑮᕽ ᐌᒌᓂᒡ᙮ 23 ᐃᔅᕒᐃᔭᓬᐊᒃ ᓴ ᑕᔥ ᐅᑮ ᒥᓄᑑᑖᑯᐙᓐ ᑳᑎᐯᒋᑫᓂᒡ ᐁᑮ ᑰᐹᑌᓂᒥᑯᐙᒡ ᐁᑮ ᓈᑲᑕᐌᓂᒥᑯᐙᒡ ᐅᒋ ᐃᐃ ᑳᑮ ᐃᔑ ᐊᔓᑕᒪᐙᓂᑯᐸᓀᓐ ᐁᐸᕒᐊᐋᒪᓐ, ᐋᐃᓯᑰᓐ, ᑲᔦ ᒉᑲᐴᓐ᙮ ᐲᓂᔥ ᐃᑕᔥ ᐅᐅ ᐃᔑ ᐊᐲ ᑳᐐᓐ ᐃᓀᑕᓰᐗᓐ ᒋᓂᔑᐗᓈᒋᐃᑣ, ᒋᐗᓃᑫᓄᑖᑯᐙᒡ ᑲᔦ᙮ 24 ᐊᓭᐊᓬ ᓴ ᑕᔥ ᑮᐃᔥᒀ ᐱᒫᑎᓯᒡ, ᐅᑯᓯᓴᓐ ᐯᓐ ᐁᑖᑦ Ben-hadad ᐁᔑᓂᑳᓱᓂᒡ ᑮᑭᒋᐅᑭᒫᐎᐗᓐ᙮ 25 ᒋᐆᐋᔥ ᐃᑕᔥ ᐅᑮ ᑮᐌ ᒪᑲᒫᓐ ᐯᓐᐁᑖᑕᓐ ᐆᑌᓇᐗᓐ ᐃᔅᕒᐃᔭᓬ ᐊᑮᕽ ᐌᒋ ᑎᐯᑖᑾᓂᓂᑭᓐ᙮ ᐯᓐᐁᑖᑦ ᐄᑐᒃ ᑮᒪᑲᒫᑯᐸᓐ ᒌᐅᐋᐊᓴᓐ ᐅᓄ ᐆᑌᓇᐗᓐ ᒣᒀ ᑮᑭᒋᐅᑭᒫᐎᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society