1 ᑭᒋᐅᑭᒫᒃ 5 - ᐅᒋᐺ ᑭᒋᒪᓯᓇᐃᑲᓐᔂᓬᐊᒪᓐ ᑮᐃᓀᑕᕽ ᐁᐐᐅᔑᑑᒡ ᑭᒋ ᐊᓇᒥᐁᐎᑲᒥᒃ 1 ᐊᐲ ᓴ ᐋᐃᕒᐃᒻ Hiram ᑫᒋᐅᑭᒫᐎᒡ ᑕᔭᕒ Tyre ᐁᓅᑕᕽ ᔂᓬᐊᒪᓇᓐ Solomon ᐁᑮ ᐅᓀᓂᒥᒥᓐᒡ ᒋᑭᒋᐅᑭᒫᐎᓂᒡ ᒋᓈᐱᔥᑲᐙᓂᒡ ᑌᐱᑑᓐ ᐅᑌᑌᓂ, ᒦ ᓴ ᑳᐃᔑ ᐃᔑᓂᔕᐙᒡ ᐋᓂᑫᐎᑭᒫᐞ᙮ ᐋᐃᕒᐃᒻ ᐄᑐᒃ ᐅᑮ ᓵᑭ ᐐᒌᐙᑯᐸᓐ ᑌᐱᑑᓐ᙮ 2 ᔂᓬᐊᒪᓐ ᐃᑕᔥ ᐅᐅ ᑮᐃᔑ ᐊᓅᑮ ᒋᐊᐎᐃᓂᒥᓐᒡ ᐋᐃᕒᐃᒨᓐ, 3 ᑭᑭᑫᑖᓐ ᐄᑐᒃ ᒥᓯᐌ ᐙᑳᔭᐄ ᐁᑮ ᐅᒋ ᒦᑳᒋᑲᓂᐎᒡ ᓂᑌᑌᐸᓐ ᑌᐱᑦ᙮ ᒦᑕᔥ ᑳᐅᒋ ᑕᐎᓭᓯᒃ ᒋᑮ ᐅᔑᑑᐸᓐ ᑭᒋ ᐊᓇᒥᐁᐎᑲᒥᒃ ᑫᑕᓀᑖᑾᓂᓂᒃ ᐅᐐᓱᐎᓂᓂ ᑳᑎᐯᒋᑫᓂᒡ ᐅᑭᔐᒪᓂᑑᒪᓐ᙮ ᑳᐐᓐ ᐄᑐᒃ ᒪᔑ ᑳᑎᐯᒋᑫᓂᒡ ᐅᑮ ᐃᔑᐃᑯᓰᓐ ᒋᔖᑰᒋᐋᒡ ᑳᑮ ᔒᑫᓂᒥᑯᒡ᙮ 4 ᐃᓇᔥᑫ ᑕᔥ ᓅᑯᒻ ᑳᑎᐯᒋᑫᒡ ᓂᑭᔐᒪᓂᑑᒻ ᓂᑮ ᐃᔑ ᒦᓂᒃ ᒥᓯᐌ ᐙᑳᔭᐄ ᒋᐊᔮᒪᑲᓂᓂᒃ ᐱᓵᓐ ᒋᐐᒌᑎᓈᓂᐗᓂᓂᒃ᙮ ᑳᐐᓐ ᐊᐎᔭ ᐊᔮᓰ ᒋᔒᑫᓂᒥᒡ, ᑳᐐᓐ ᑲᔦ ᒋᐊᔮᒃ ᓂᔑᐗᓈᑕᑲᒥᑭᓯᐎᓐ᙮ 5 ᒦᑕᔥ ᐁᓀᑕᒫᓐ ᓃᓐ ᐁᐐ ᐅᔑᑑᔮᓐ ᑭᒋ ᐊᓇᒥᐁᐎᑲᒥᒃ ᑫᑕᓀᑖᑾᓂᓂᒃ ᐅᐐᓱᐎᓐ ᑳᑎᐯᒋᑫᒡ ᓂᑭᔐᒪᓂᑑᒻ᙮ ᐋᓃᔥ ᑳᑎᐯᒋᑫᒡ ᐅᐅ ᑮᐃᓈᑯᐸᓐ ᑳᑮ ᐅᑌᑌᐗᒃ ᑌᐱᑑᓐ, ᐊᐊ ᓴ ᑭᑯᓯᔅ ᑫᐸᑭᑎᓇᒃ ᒋᓇᒪᑕᐱᒡ ᑭᑑᑭᒫᐗᐱᐎᓂᕽ ᑫᓈᐱᔥᑲᐎᒃ ᒦ ᓴ ᐊᐌ ᑫᐅᔑᑑᒡ ᑭᒋ ᐊᓇᒥᐁᐎᑲᒥᒃ ᑫᑕᓀᑖᑾᓂᓂᒃ ᓂᐐᓱᐎᓐ᙮ 6 ᑕᑲ ᓴ ᑕᔥ ᐃᓈᑯᓂᑫᓐ ᒋᑮᔥᑲᐊᒫᑰᔮᓐ ᑮᔥᑳᑎᑰᒃ ᐌᑎ ᓬᐁᐸᓇᓐ Lebanon ᐊᑮᕽ᙮ ᓂᑎᓂᓃᒪᒃ ᓴ ᐅᑲ ᐐᑕᓄᑮᒫᐙᐞ ᑭᑎᓂᓃᒪᐞ; ᑭᑲ ᑎᐸᐊᒪᐎᓐ ᑲᔦ ᒋᑎᐸᐊᒪᐗᑣ ᑭᑎᓂᓃᒪᒃ ᒥᓂᒃ ᐃᑯ ᑮᓐ ᑫᐃᓀᑕᒪᓐ᙮ ᑭᑭᑫᑖᓐ ᐄᑐᒃ ᑲᔦ ᓂᑎᓂᓃᒪᒃ ᐋᐱᒋ ᐁᓇᑲᒋᑑᓯᒀ ᒋᑮᔥᑲᐋᑴᐙᒡ, ᐁᐊᔨᔒᓯᒀ ᑳᔑ ᓇᑲᒋ ᑮᔥᑲᐋᑴᓂᒡ ᓵᐃᑕᓐ Sidon ᐌᒌᓂᒡ᙮ 7 ᐊᐲ ᑕᔥ ᐋᐃᕒᐃᒻ ᐁᓅᑕᕽ ᔂᓬᐊᒪᓇᓐ ᐁᑭᑐᓂᒡ, ᐐᑫ ᐅᑮ ᒥᓍᐸᑖᓐ ᐁᑮ ᐃᑭᑐᒡ, ᑕᑲ ᑕᒦᑴᒋᐌᓂᒫ ᑳᑎᐯᒋᑫᒡ ᓅᑯᒻ ᑳᑮᔑᑲᓂᓂᒃ᙮ ᐅᑮ ᐃᔑ ᒦᓈᓐ ᐄᑐᒃ ᑌᐱᑑᓐ ᑫᑮᑖᐌᑕᒥᓂᒡ ᐅᑯᓯᓯᓂ ᒋᐅᑭᒫᑲᑕᐙᓂᒡ ᑫᒋ ᐃᓀᑖᑯᓯᓂᒡ ᐃᔅᕒᐃᔭᓬᐊᐞ Israel, ᑮᐃᑭᑐ᙮ 8 ᒦᑕᔥ ᑳᑮ ᐊᓅᑮᒡ ᐅᐅ ᒋᐃᓂᒥᓐᒡ ᔂᓬᐊᒪᓇᓐ, ᓂᑮ ᐅᑎᓯᑰᓐ ᐃᐃ ᑳᑮ ᐱᐃᔑᔭᓐ᙮ ᑲᑭᓇ ᓴ ᓂᑲ ᐃᔑᒋᑫ ᐁᔑ ᐊᑕᐌᑕᒪᓐ ᒋᐅᑎᓇᒪᐎᓈᓐ ᑮᔥᑳᑎᑰᒃ, ᐅᑭᑳᑕᑰᒃ ᑲᔦ᙮ 9 ᓂᑎᓂᓃᒪᒃ ᓬᐁᐸᓇᓐ ᐊᑮᕽ ᐅᑲ ᐅᒋ ᓈᓯᐲᐎᓈᐙᐞ ᒥᑎᑰᐞ ᒋᐃᔑᐎᓈᐙᒡ ᑭᒋᑲᒦᕽ᙮ ᒦᑕᔥ ᐌᑎ ᑫᔑ ᐅᑾᐱᓈᐙᒡ ᒋᐸᑯᐲᐙᐙᒡ ᑭᒋᑲᒦᕽ ᒋᐃᓈᑎᑲᐆᓈᐙᒡ ᐋᑎ ᐱᑯ ᐁᔑ ᐊᑕᐌᑕᒪᓐ᙮ ᒦᔥ ᐌᑎ ᑫᔑ ᐋᐸᐅᑣ, ᑭᑎᓂᓃᒪᒃ ᓴ ᑕᔥ ᐐᓇᐙ ᐅᑲ ᐊᓂ ᑕᔒᑲᐙᐙᐞ᙮ ᑭᑲᑴᒋᒥᓐ ᐃᑕᔥ ᑲᔦ ᒋᐃᔑᒋᑫᔭᓐ ᐁᔑ ᑲᑴᒋᒥᓈᓐ, ᒋᐊᔕᒪᑣ ᓂᑎᓂᓃᒪᒃ, ᑲᔦ ᓂᐙᑳᐃᑲᓂᕽ ᐁᔮᐙᒡ, ᐅᑮᐃᓈᓐ᙮ 10 ᒦᑕᔥ ᐋᐃᕒᐃᒻ ᑳᑮ ᐅᑎᓇᒪᐙᒡ ᔂᓬᐊᒪᓇᓐ ᑮᔥᑳᑎᑰᐞ, ᐅᑭᑳᑎᑰᐞ ᑲᔦ ᒥᓂᒃ ᓴ ᑯ ᐁᑕᐌᓂᒫᒡ᙮ 11 ᔂᓬᐊᒪᓐ ᐃᑕᔥ ᐅᑮ ᒦᓈᓐ ᐋᐃᕒᐃᒨᓐ ᓂᑯᑣᒃ ᑕᓯᕽ ᒥᑖᔂᒃ 100,000 ᑕᓲᔥᑭᒧᑦ ᐸᑴᔑᑲᓂᒥᓇᓐ, ᑲᔦ ᑕᔥ ᓂᑯᑣᒃ ᒥᑖᓱ ᑕᓯᕽ ᒥᑖᔂᒃ 110,000 ᑕᓱ ᑎᐸᐆᐹᓐ ᐱᒥᑌᓂ ᐁᑕᓱ ᐱᐴᓐ᙮ 12 ᑳᑎᐯᒋᑫᓂᒡ ᐃᑕᔥ ᐅᑮ ᒦᓂᑯᓐ ᑲᑮᑖᐌᑕᒧᐎᓐ, ᐁᑮ ᐃᔑᒋᑫᓂᒡ ᑳᐃᔑ ᐊᔓᑕᒫᑯᐸᓐ᙮ ᔂᓬᐊᒪᓐ ᓴ ᑮᒥᓄ ᐐᒌᑎᐗᒃ ᐋᐃᕒᐃᒨᓐ, ᒦᔥ ᒥᒋᓃᔥ ᑳᐃᓀᑕᒧᐙᒡ ᐱᓵᓐ ᒋᐐᒌᑎᐙᒡ᙮ 13 ᑭᒋᐅᑭᒫ ᔂᓬᐊᒪᓐ ᓴ ᐅᑮ ᐅᑖᐱᓈᐞ ᓂᓯᒥᑕᓇ ᑕᓯᕽ ᒥᑖᔂᒃ 30,000 ᐃᓂᓂᐗᐞ ᑫᐊᓄᑮᓂᒡ, ᒥᓯᐌ ᐁᑮ ᐅᑎᓈᒡ ᐃᔅᕒᐃᔭᓬᐊᑮᕽ᙮ 14 ᐊᑐᓈᐃᕒᐊᒨᓐ Adoniram ᐃᑕᔥ ᐅᑮ ᐃᓇᓵᓐ ᒋᓈᑲᒋᐋᓂᒡ ᐅᐅ ᐃᓂᓂᐗᐞ᙮ ᓂᓶᔭᒃ ᓴ ᐅᑮ ᐃᔑ ᓀᓈᐎᓈᐞ ᒣᒥᑖᒌᕽ ᒥᑖᔂᒃ 10,000 ᐁᑮ ᑕᔑᓂᒡ᙮ ᐯᔑᑴᐙᓐ ᓴ ᐯᔑᑯᑮᓯᔅ ᐅᑮ ᐃᔑᓂᔕᐙᐞ ᓬᐁᐸᓇᓐ ᒋᐊᐎ ᐊᓄᑮᓂᒡ᙮ ᓃᔗᐙᓐ ᐃᑕᔥ ᓃᔓᑮᓯᔅ ᑮᐊᔮᐗᐞ ᐅᑖᐎᓂᓃᕽ᙮ ᒦᐃᓇᑫ ᑳᐃᔑ ᒣᒣᔥᑯᒌᓂᒡ᙮ 15 ᔂᓬᐊᒪᓐ ᐃᑕᔥ ᑲᔦ ᓂᔣᓱᒥᑕᓇ ᑕᓯᕽ ᒥᑖᔂᒃ 80,000 ᑮᑕᔑᐗᐞ ᐃᓂᓂᐗᐞ ᑳᑮ ᑮᔥᑳᐱᑲᐃᑫᓂᒡ᙮ ᓃᔣᓱᒥᑕᓇ ᑕᓯᕽ ᒥᑖᔂᒃ 70,000 ᑕᔥ ᑮᑕᔑᐗᐞ ᐃᓂᓂᐗᐞ ᑳᑮ ᐱᒥᐎᒋᑫᓂᒡ᙮ 16 ᓂᓯᒥᑕᓇᐊᔑᓂᓯᓐ ᑕᔂᒃ 3,300 ᓴ ᑮᑕᔑᐗᐞ ᐃᓂᓂᐗᐞ ᑳᑮ ᑲᓇᐙᐸᑕᒥᓂᒡ ᐊᓄᑮᐎᓐ, ᑳᑮ ᐊᓂ ᐐᑕᒫᑫᓂᒡ ᐋᓃᓐ ᑫᐃᔑᒋᑫᓈᓂᐗᓂᓂᒃ᙮ 17 ᑭᒋᐅᑭᒫ ᑕᔥ ᐁᑮ ᐃᔑ ᐊᓅᑮᒡ, ᒦ ᓴ ᑳᐃᔑ ᑮᔥᑳᐱᑲᐅᒥᓐᒡ ᑭᒋ ᐊᓯᓃᐞ ᑳᒥᓍᐱᑭᓯᓂᒡ ᐁᑮ ᐅᔑᐃᒥᓐᒡ ᑫᓂᑕᒫᐱᑭᔑᓂᓂᒡ ᑫᔑ ᐸᑕᑭᑌᓂᒃ ᑭᒋ ᐊᓇᒥᐁᐎᑲᒥᒃ᙮ 18 ᔂᓬᐊᒪᓐ ᐃᑕᔥ ᐅᑎᓂᓃᒪᐞ, ᐊᐊ ᑲᔦ ᐋᐃᕒᐃᒻ ᐅᑎᓂᓃᒪᐞ, ᐃᐃ ᑲᔦ ᐃᓂᓂᐗᐞ ᐌᒌᓂᒡ ᐆᑌᓈᕽ ᑮᐯᓬ Gebal, ᐅᑮ ᑾᔮᒋᐋᓂ ᐊᓯᓃᐞ ᑫᓂᑕᒫᐱᑭᔑᓂᓂᒡ᙮ ᒥᑎᑰᐞ ᑲᔦ ᐅᑮ ᑾᔮᒋᐋᓂ ᒋᐅᔑᒋᑳᑌᒃ ᑭᒋ ᐊᓇᒥᐁᐎᑲᒥᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society