1 ᑭᒋᐅᑭᒫᒃ 3 - ᐅᒋᐺ ᑭᒋᒪᓯᓇᐃᑲᓐᔂᓬᐊᒪᓐ ᑮᑲᑴᑗᒡ ᒋᒦᓂᑰᐎᓯᒡ ᑲᑮᑖᐌᑕᒧᐎᓐ ( 2 Chronicles 1.3-12 ) 1 ᔂᓬᐊᒪᓐ Solomon ᓴ ᑮᐃᓀᑕᒨᒃ ᑭᒋᐅᑭᒫᓐ ᐄᒋᐸᑮᕽ Egypt ᐌᒌᓂᒡ ᒋᒥᓄ ᐐᒌᑎᐙᒡ, ᐁᑮ ᐐᐎᒡ ᐅᑖᓂᓯᓂ᙮ ᐅᑮ ᐲᓈᓐ ᓴ ᐃᓂ ᐃᑴᐗᓐ ᐃᐃᒫ ᐆᑌᓈᕽ ᐁᒋᑳᑌᓂᒃ ᑌᐱᑦ David ᐅᑑᑌᓈᒻ ᐲᓂᔥ ᐁᑮ ᑮᔑᑑᒡ ᐅᑑᑭᒫᐎᑲᒥᒃ, ᑭᒋ ᐊᓇᒥᐁᐎᑲᒥᑯᓂ ᑲᔦ, ᑳᑮ ᐙᑳᔮᐱᑭᓂᑳᑌᓂᒃ ᑲᔦ ᒉᕒᐆᓴᓬᐊᒻ Jerusalem᙮ 2 ᑳᐐᓐ ᐄᑐᒃ ᒪᔑ ᑮᐅᔑᒋᑳᑌᓯᓂᓂ ᑭᒋ ᐊᓇᒥᐁᐎᑲᒥᒃ ᑫᑕᓀᑖᑯᓯᓂᒡ ᑳᑎᐯᒋᑫᓂᒡ᙮ ᒦᑕᔥ ᐯᒫᑎᓯᓂᒡ ᑫᔮᐱ ᑳᑮ ᐅᒋ ᐃᔑ ᐸᑭᑎᓈᓱᓂᒡ ᒥᓯᐌ ᑳᑮ ᐃᔑ ᓂᑖ ᐊᓇᒥᐋᐎᓐᒡ᙮ 3 ᔂᓬᐊᒪᓐ ᓴ ᐅᑮ ᓵᑭᐋᓐ ᑳᑎᐯᒋᑫᓂᒡ, ᐁᑮ ᐃᔑ ᐱᒧᓭᒡ ᑳᑮ ᐃᑭᑐᓂᒡ ᐅᑌᑌᐸᓃᓐ ᑌᐱᑑᓐ᙮ ᔖᑰᒡ ᐃᑕᔥ ᑮᐃᔑ ᐸᑭᑎᓈᓱ, ᑮᐃᔑ ᒥᓈᓯᑫ ᑲᔦ ᒥᓯᐌ ᐱᑯ ᐋᑎ ᑳᑕᔑ ᓂᑖ ᐊᓇᒥᐋᐎᓐᒡ᙮ 4 ᑭᒋᐅᑭᒫ ᑕᔥ ᑮᐃᔖ ᐆᑌᓈᕽ ᑭᐱᔭᓐ Gibeon ᐁᔑᓂᑳᑌᓂᒃ᙮ ᒦ ᓴ ᐌᑎ ᑳᑮ ᐃᔑᐊᔮᓂᒃ ᒫᐗᒡ ᑫᒋ ᐃᓀᑖᑾᓂᓂᒃ ᐃᔥᐸᑎᓈ᙮ ᔂᓬᐊᒪᓐ ᓴ ᒥᑖᔂᒃ 1,000 ᐸᑭᑎᓈᓱᐎᓇᓐ ᑳᑮ ᐊᒀᑭᑌᓂᑭᓐ ᑎᓄ ᐅᑮ ᐸᑭᑎᓈᓇᓐ ᐃᐃᒫ ᑳᑮ ᐃᔑ ᓂᑖ ᐸᑭᑎᓈᓱᓈᓂᐗᓂᓂᒃ᙮ 5 ᒦᑕᔥ ᐌᑎ ᑭᐱᔭᓄᕽ ᐁᐊᔮᒡ ᑳᑎᐯᒋᑫᓂᒡ ᑳᑮ ᓈᑯᓰᑖᑯᒡ ᐁᑮ ᐃᓈᐸᑕᕽ ᐁᑎᐱᑲᓂᓂᒃ᙮ ᒦᑕᔥ ᑳᐃᑯᒡ ᑭᔐᒪᓂᑑᓐ, ᐌᑯᓀᓐ ᐃᑯ ᑫᑲᑴᒋᒥᔭᓐ, ᑭᑲ ᒦᓂᓐ, ᐁᑮᐃᑯᒡ᙮ 6 ᒦᔥ ᐅᐅ ᔂᓬᐊᒪᓐ ᑳᐃᔑ ᓇᑴᑕᐙᒡ, ᑮᓐ ᓴ ᐌᐌᓂ ᑭᑮ ᑭᒋ ᒥᓄᑑᑕᐙ ᑳᑮ ᐊᓄᑮᐊᒡ ᑌᐱᑦ ᑳᑮ ᐅᑌᑌᔮᓐ, ᐋᐱᒋ ᓴ ᑌᐺ, ᑾᔭᒃ ᑲᔦ, ᑮᑾᔭᑯᓈᑾᓂᓂ ᐅᑌᐞ ᐁᓈᓴᒦᐗᒡ᙮ ᑳᐐᓐ ᑕᔥ ᒪᔑ ᑭᐴᓂ ᒥᓄᑑᑕᐙᓰ᙮ ᑭᒦᓂᒫᓐ ᐄᑐᒃ ᐅᑯᓯᓴᓐ ᒋᓇᒪᑕᐱᓂᒡ ᑭᒋᐅᑭᒫᐗᐱᐎᓂᕽ ᓅᑯᒻ ᑳᑮᔑᑲᓂᓂᒃ᙮ 7 ᐆ ᑌᐯᒋᑫᔭᓐ, ᑳᑭᔐᒪᓂᑑᐎᔭᓐ, ᑮᓐ ᐄᑐᒃ ᑭᑮᐃᔥ ᒋᓇᒪᑕᐱᔮᓐ ᐅᑭᒫᐗᐱᐎᓂᕽ ᒋᓈᐱᔥᑲᐗᒃ ᑌᐱᑦ ᑳᑮ ᐅᑌᑌᔮᓐ; ᐋᓇᐐᓐ ᐁᐊᐱᓅᒌᔑᐌᑖᑯᓯᔮᓐ᙮ ᑳᐐᓐ ᐅᔕ ᓂᑭᑫᑕᓰᓐ ᐋᓃᓐ ᐃᓇᑫ ᑫᐃᔑᑭᒫᐎᔮᐹᓐ᙮ 8 ᐃᓇᔥᑫ ᑕᔥ ᐅᐅᒫ ᓂᑕᔮ, ᓃᓐ ᑳᐸᒦᑕᐎᓈᓐ ᒣᑴᔭᐄ ᑳᔑ ᐊᔮᐙᒡ ᐯᒫᑎᓯᐙᒡ ᑮᓐ ᑳᑮ ᐅᓈᐸᒪᑣ᙮ ᐋᐱᒋ ᑲᔦ ᐹᑏᓄᐗᒃ, ᑳᐐᓐ ᑕᑲᔥᑭᒋᑲᓂᐎᓰᐗᒃ ᒋᐊᑭᒥᑣᐸᓐ᙮ 9 ᒦᔥ ᐁᔑ ᑲᑴᒋᒥᓈᓐ ᒋᒦᔑᔭᓐ ᑲᑮᑖᐌᑕᒧᐎᓐ ᐃᐃᒫ ᓂᑌᐃᕽ ᒋᐅᓈᑯᓇᒀ ᑭᐱᒫᑎᓰᒪᒃ ᒋᓂᓯᑕᐌᑕᒫᓐ ᑳᒥᓄᓈᑾᒃ, ᐃᐃ ᑲᔦ ᑳᒪᒋᓈᑾᒃ᙮ ᐊᐌᓀᓐ ᓴ ᑫᑲᔥᑭᑑᐸᓐ ᒋᐅᓈᑯᓈᐸᓐ ᐅᐅ ᑳᑭᒋ ᐹᑏᓄᓂᒡ ᐯᒫᑎᓯᓂᒡ ᑳᑎᐯᓂᒥᒪᒡ? ᐅᑮᐃᓈᓐ᙮ 10 ᑳᑎᐯᒋᑫᓂᒡ ᓴ ᐐᑫ ᐅᑮ ᒥᓍᐸᑕᒥᓂ ᔂᓬᐊᒪᓐ ᐃᓇᑫ ᑳᑮ ᐃᔑ ᑲᑴᒋᒫᒡ᙮ 11 ᑭᔐᒪᓂᑑᓐ ᑕᔥ ᐅᐅ ᐅᑮᐃᑰᓐ, ᐅᐅᐌ ᑕᔥ ᐃᓇᑫ ᐁᐃᔑ ᑲᑴᑗᔭᓐ, ᐁᑲᑴᑗᓯᐗᓐ ᑭᓉᔥ ᒋᐱᒫᑎᓯᔭᓐ, ᑮᓐ ᐃᑯ ᑲᔦ ᒋᐌᓅᑎᓯᔭᓐ; ᐁᐃᔑ ᑲᑴᑗᓯᐗᓐ ᑲᔦ ᒋᓂᓯᑣ ᑳᔒᑫᓂᒥᒀ᙮ ᑌᑾᒡ ᐃᓴ ᑭᑎᔑ ᑲᑴᑗ ᒋᓂᓯᑕᐌᑕᒪᓐ ᑫᐅᒋ ᓂᓯᑐᑕᒪᓐ ᐌᐌᓂ ᒋᐃᓈᑯᓂᑫᔭᓐ᙮ 12 ᓂᑲ ᐃᔑᒋᑫ ᓴ ᐃ ᐋᓃᓐ ᐁᔑ ᑲᑴᒋᒥᔭᓐ᙮ ᑭᑲ ᒦᓂᓐ ᓴ ᐋᒌᑫ ᑲᑮᑖᐌᑕᒧᐎᓐ, ᓂᓯᑐᑕᒧᐎᓐ ᑲᔦ, ᑳᐐᓐ ᓴ ᐊᐎᔭ ᐃᐃ ᐐᑳ ᐅᑖᓈᕽ ᒋᑆ ᐊᔮᔭᓐ ᑮᐱᒥ ᐃᔑᐊᔮᓰ, ᑳᐐᓐ ᑲᔦ ᐊᐎᔭ ᐐᑳ ᐃᐃ ᑕᐃᔑᐊᔮᓰ ᑮᐃᔥᒀ ᐊᔮᔭᓐ᙮ 13 ᑭᑲ ᑕᑯ ᒦᓂᓐ ᑕᔥ ᑲᔦ ᑫᑰᓐ ᑫᑴᑗᓯᐗᓐ᙮ ᐋᐱᒋ ᓴ ᑭᑲ ᑲᑮᑖᐌᑕᒻ, ᑭᑲ ᐌᓅᑎᔅ ᑲᔦ, ᑭᑲ ᑭᑌᑖᑯᔅ ᑲᔦ᙮ ᑳᐐᓐ ᓴ ᑳᑕᔑᐙᒡ ᑭᒋᐅᑭᒫᒃ ᐊᐎᔭ ᑕᐃᓀᑖᑯᓯᓰ ᑳᐃᓀᑖᑯᓯᔭᓐ ᒥᓂᒃ ᐃᑯ ᑫᐱᒫᑎᓯᔭᓐ᙮ 14 ᑮᔥᐱᓐ ᑯᑕ ᐃᔑ ᐱᒧᓭᔭᓐ ᓂᑎᔑᑣᐎᓂᕽ, ᑲᓇᐌᑕᒪᓐ ᑲᔦ ᓂᑎᑭᑐᐎᓐ, ᓂᑎᓈᑯᓂᑫᐎᓇᓐ ᑲᔦ ᑖᐱᔥᑰ ᑌᐱᑦ ᑳᑮ ᐅᑌᑌᔭᓐ ᑳᑮ ᐃᔑ ᐱᒧᓭᒡ, ᑭᑲ ᐃᓀᓂᒥᓐ ᑲᔦ ᑭᓉᔥ ᒋᐱᒫᑎᓯᔭᓐ, ᐅᑮᐃᑰᓐ᙮ 15 ᒦᑕᔥ ᔂᓬᐊᒪᓐ ᑳᑮ ᑯᔥᑯᓯᒡ, ᒦᔥ ᑳᑮ ᑭᑫᑕᕽ ᐃᓇᑾᓇ ᐁᑮ ᐃᓈᐸᑕᕽ᙮ ᑮᐊᓂ ᐃᔑ ᑮᐌ ᑕᔥ ᐌᑎ ᒉᕒᐆᓴᓬᐊᒥᕽ ᐁᑮ ᐃᓈᓴᒥᑳᐸᐎᒡ ᐁᔑᐊᔮᓂᒃ ᑳᑎᐯᒋᑫᓂᒡ ᐅᑕᔓᑕᒫᑫᒪᑲᑯᓂ᙮ ᒦ ᓴ ᐌᑎ ᑳᑕᔑ ᐸᑭᑎᓈᓱᒡ ᐁᑮ ᐸᑭᑎᓇᕽ ᑎᓄ ᐐᑫ ᑳᐊᒀᑭᓯᑳᑌᓂᒃ ᐸᑭᑎᓈᓱᐎᓇᓐ ᑲᔦ ᐌᒋ ᒥᓄ ᐐᒌᑎᕽ᙮ ᒦᑕᔥ ᑲᔦ ᑳᐃᔑ ᐐᑾᒫᒡ ᑲᑭᓇ ᐅᑕᓄᑮᐋᑲᓇᐞ᙮ ᔂᓬᐊᒪᓐ ᑮᓇᓇᐊᑑᒡ ᓭᓇᑫᑖᑾᓂᓂᒃ 16 ᓃᔑᓐ ᐃᑕᔥ ᐱᔑᒀᒋᑴᐗᐞ ᐅᑮ ᐱᐊᑕ ᐙᐸᒥᑰᐞ ᐁᑮ ᐅᒋᔥᑲᐎᑳᐸᐎᓂᒡ ᐁᔑᐊᔮᒡ ᑭᒋᐅᑭᒫ᙮ 17 ᒦᑕᔥ ᐅᐅ ᐯᔑᒃ ᑳᐃᑭᑐᓂᒡ, ᓂᑑᑭᒫᒻ, ᐗᐊ ᓴ ᐃᑴ ᐯᔑᑾᓐ ᐙᑳᐃᑲᓂᕽ ᓂᑎᔑᑖᒥᓐ᙮ ᒦᑕᔥ ᑳᑮ ᐅᓃᒑᓂᓯᔮᓐ ᒣᒀ ᐁᐐᒋᑖᒥᒡ᙮ 18 ᓂᓱᑮᔑᒃ 3 ᐃᑕᔥ ᑳᐃᔥᒀ ᓂᑖᐎᑭᒡ ᓂᓃᒑᓂᔅ, ᒦ ᐃ ᑫᐐᓐ ᑳᑮ ᐅᓃᒑᓂᓯᒡ᙮ ᓃᓀᑕᐎᓐᑦ ᓴ ᐁᑕ ᐃᐃᒫ ᓂᑮ ᐊᔮᒥᓐ᙮ ᑳᐐᓐ ᐸᑳᓐ ᐊᐎᔭ ᐃᐃᒫ ᒋᑮ ᐊᔮᒡ ᐙᑳᐃᑲᓂᕽ᙮ 19 ᐁᑎᐱᑲᓂᓂᒃ ᐃᑕᔥ ᑮᓂᐳᐗᓐ ᐅᑯᓯᓴᓐ ᐗᐊ ᐃᑴ, ᐋᓃᔥ ᐅᑮ ᐸᑕᑯᔥᑲᐙᓐ᙮ 20 ᒦᑕᔥ ᐄᓴᓐ ᐁᑎᐱᑲᓂᓂᒃ ᐁᓂᐹᐗᒃ ᑳᐃᔑ ᐗᓂᔥᑳᒡ ᐁᑮ ᐅᑖᐱᓈᒡ ᓂᑯᓯᓴᓐ ᐁᐐᐯᒥᒪᒃ ᐁᔑ ᐱᒥᔑᓄᐗᒃ᙮ ᒦᔥ ᐄᓴᓐ ᑳᐃᔑ ᐱᒥᔑᒫᒡ ᐁᔑ ᒎᒎᔑᒣᔑᕽ, ᐃᓂ ᑕᔥ ᑳᑮ ᓂᐳᓂᒡ ᐅᑯᓯᓴᓐ ᐅᑮ ᐃᔑ ᐸᑭᑎᓈᓐ ᐁᔑ ᒎᒎᔑᒣᔑᓄᐗᒃ᙮ 21 ᐁᑭᔐᐹᐗᑲᒃ ᐁᐗᓂᔥᑳᔮᓐ ᐁᐐ ᓅᓂᐊᒃ ᓂᑯᓯᔅ, ᑳᐐᓐ ᑮᐱᒫᑎᓯᓰ᙮ ᐌᐌᓂ ᑕᔥ ᐁᑮ ᓈᓈᑲᑕᐙᐸᒪᒃ, ᒦ ᐃ ᑳᑮ ᑭᑫᑕᒫᓐ ᐁᐋᐎᓯᒃ ᓂᑯᓯᔅ ᑳᑮ ᓂᑖᐎᑭᐊᒃ, ᐅᑮᐃᑰᓐ᙮ 22 ᐃᓂ ᑕᔥ ᑯᑕᒃ ᐃᑴᐗᓐ ᑮᐃᑭᑐᐗᓐ, ᐊᓂᔖᐃ ᐃᑭᑐ᙮ ᓃᓐ ᓴ ᐐᓐ ᐊᐊ ᑳᐱᒫᑎᓯᒡ ᓂᑯᓯᔅ; ᐊᐊ ᑕᔥ ᑮᓐ ᑳᓂᐳᒡ ᑭᑯᓯᔅ! ᑮᐃᑭᑐᐗᓐ᙮ ᐃᓂ ᑕᔥ ᓂᑕᒻ ᑳᑮ ᑲᓅᓂᑯᒡ ᐅᑮᐃᓈᓂ ᐃᓂ ᑯᑕᒃ, ᑳᐐᓐ ᐅᔕ! ᐊᐊ ᐅᔕ ᑳᓂᐳᒡ ᑮᓐ ᑭᑯᓯᔅ; ᐊᐊ ᑕᔥ ᑳᐱᒫᑎᓯᒡ, ᒦ ᓃᓐ ᐊᐊ ᓂᑯᓯᔅ! ᐅᑮᐃᓈᓂ᙮ ᒦᔥ ᑳᑮ ᑮᑳᑎᓂᒡ ᐁᓈᓴᒦᒡ ᑭᒋᐅᑭᒫ᙮ 23 ᒦᑕᔥ ᑭᒋᐅᑭᒫ ᑳᑮ ᐃᑭᑐᒡ, ᐗᐊ ᓴ ᐯᔑᒃ ᐅᐅ ᐃᑭᑐ, ᓃᓐ ᓴ ᐐᓐ ᐊᐊ ᑳᐱᒫᑎᓯᒡ ᓂᑯᓯᔅ; ᐊᐊ ᑕᔥ ᑮᓐ ᑳᓂᐳᒡ ᑭᑯᓯᔅ, ᐊᐊ ᑕᔥ ᑯᑕᒃ ᐅᐅ ᐁᐃᑭᑐᒡ, ᑳᐐᓐ ᐅᔕ! ᐊᐊ ᐅᔕ ᑳᓂᐳᒡ ᑮᓐ ᑭᑯᓯᔅ; ᐊᐊ ᑕᔥ ᑳᐱᒫᑎᓯᒡ, ᒦ ᓃᓐ ᐊᐊ ᓂᑯᓯᔅ᙮ 24 ᒦᔥ ᑳᐊᓂ ᐃᑭᑐᒡ, ᑕᑲ ᐲᑕᒪᐎᔑᒃ ᐸᔑᐸᐃᑫᐎᑯᒫᓐ! ᒦᔥ ᑳᐃᔑ ᐲᑕᒪᐎᓐᒡ᙮ 25 ᒦᑕᔥ ᐅᐅ ᑳᐃᓈᑯᓂᑫᒡ, ᑖᔥᑭᔓᒃ ᐊᐊ ᑳᐱᒫᑎᓯᒡ ᐊᐱᓅᒌᔥ, ᐋᐱᑕ ᒋᒦᓂᒡ ᐗᐊ ᐃᑴ, ᐋᐱᑕ ᑲᔦ ᐊᐊ ᑯᑕᒃ ᐃᑴ, ᑮᐃᑭᑐ᙮ 26 ᐊᐊ ᑕᔥ ᐃᑴ ᐌᓃᒑᓂᓯᒡ ᑳᑮ ᐱᒫᑎᓯᓂᒡ ᑸᐎᓭᓴᓐ, ᐅᑮ ᑰᐹᑌᓂᒫᓐ ᐅᑯᓯᓴᓐ ᐅᐅ ᐁᑮᐃᓈᒡ ᑭᒋᐅᑭᒫᓐ, ᓂᑑᑭᒫᒻ, ᑕᑲ ᒦᔥ ᐊᐊ ᑯᑕᒃ ᐃᑴ ᐃᓂ ᑳᐱᒫᑎᓯᓂᒡ ᐊᐱᓅᒌᔕᓐ! ᑫᑯ ᓂᓵᑫᓐ ᐊᐊ ᐊᐱᓅᒌᔥ! ᑮᐃᑭᑐ᙮ ᐊᐊ ᑕᔥ ᑯᑕᒃ ᐃᑴ ᑮᐃᑭᑐ, ᑳᐐᓐ ᐄᓴᓐ ᐊᐎᔭ ᐅᑲ ᐊᔮᐙᓰᓐ ᐅᐅ ᑳᔑ ᓃᔑᔭᕽ, ᐱᓵᓐ ᑖᔥᑭᔓ! ᑮᐃᑭᑐ᙮ 27 ᒦᔥ ᐅᐅ ᑭᒋᐅᑭᒫ ᑳᐃᑭᑐᒡ, ᒦᓂᒃ ᐊᐊ ᐃᑴ ᐃᓂ ᐊᐱᓅᒌᔕᓐ ᑳᐱᒫᑎᓯᓂᒡ ᑳᐃᑭᑐᒡ ᒋᓂᓯᒫᓯᐎᓐᒡ᙮ ᒦ ᓴ ᐊᐌ ᑌᐺ ᐅᒫᒫᒫ᙮ ᑫᑯ ᓂᓵᑫᒃ ᐊᐊ ᐊᐱᓅᒌᔥ, ᑮᐃᑭᑐ᙮ 28 ᐊᐲ ᑕᔥ ᑲᑭᓇ ᐃᔅᕒᐃᔭᓬᐊᒃ Israel ᐁᓅᑕᒧᐙᒡ ᐋᓃᓐ ᑭᒋᐅᑭᒫᓐ ᑳᐃᔑ ᓇᓇᐊᒋᑫᓂᒡ, ᒦ ᓴ ᑳᐃᔑ ᑭᑌᓂᒫᐙᒡ, ᐋᓃᔥ ᒦ ᐃ ᑳᑮ ᑭᑫᑕᒧᐙᒡ ᑭᔐᒪᓂᑑᓐ ᐁᑮ ᒦᓂᑯᓂᒡ ᑲᑮᑖᐌᑕᒧᐎᓐ ᐋᓃᓐ ᑫᔑ ᓇᓇᐊᑑᓂᒡ ᐅᐅ ᑳᑮ ᐃᔑᓭᓂᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society