1 ᑭᒋᐅᑭᒫᒃ 22 - ᐅᒋᐺ ᑭᒋᒪᓯᓇᐃᑲᓐᒫᐃᑫᔭ ᓃᔮᒃ ᑮᐐᑕᒪᐙᒡ ᐁᐋᐴᓐ ᐋᓃᓐ ᑫᐃᔑᓭᓂᒡ (2 Chronicles 12.2-27) 1 ᓂᓱᐱᐴᓐ ᓴ ᑮᐃᔑᓭ ᐁᑮ ᐅᒋ ᒦᑳᑎᓯᒀ ᐃᔅᕒᐃᔭᓬᐊᒃ Israel, ᐃᑭ ᑲᔦ ᓰᕒᐃᔭ Syria ᐁᔮᐙᒡ᙮ 2 ᓂᓯᐱᐴᓐ ᐃᑕᔥ ᐁᔑᓭᓂᒃ ᒉᐆᔕᐹᑦ Jehoshaphat ᑳᑮ ᑭᒋᐅᑭᒫᐎᒡ ᒎᑕ Judah ᐊᑮᕽ ᑮᐃᔖ ᐃᔅᕒᐃᔭᓬᐊᑮᕽ ᐁᑮ ᐊᑕ ᐙᐸᒫᒡ ᐁᐋᐴᓐ Ahab ᑭᒋᐅᑭᒫᓐ᙮ 3 ᐁᐋᑉ ᐃᑕᔥ ᐅᑮ ᐃᔑ ᑲᑴᒋᒫᐞ ᐅᑖᓂᑫᐎᑭᒫᒪᐞ, ᑳᐐᓐ ᑭᑭᑫᑕᓰᒻ ᐆᑌᓇ ᐅᕒᐁᒪᑦ, ᑭᓬᐃᔭᑦ ᐊᑮᕽ Ramoth Gilead ᐁᑎᐯᑕᒪᕽ, ᑳᐐᓐ ᐃᑕᔥ ᑫᑰᓐ ᑭᑎᔑᒋᑫᓰᒥᓐ ᒋᑮᐌ ᒪᑲᒪᑭᐸᓐ ᑫᒋᐅᑭᒫᐎᒡ ᐌᑎ ᓰᕒᐃᔭ ᐊᑮᕽ? ᑮᐃᑭᑐ᙮ 4 ᒦᑕᔥ ᑳᑮ ᑲᑴᒋᒫᒡ ᒉᐆᔕᐹᑕᓐ, ᑭᑖ ᐐᒌᐎᔥ ᐃᓇ ᒋᐊᐎ ᒦᑳᑕᒪᕽ ᐃᐃ ᐆᑌᓇ ᐅᕒᐁᒪᑦ, ᑭᓬᐃᔭᑦ ᐊᑮᕽ ᐁᔮᒃ? ᐅᑮᐃᓈᓐ᙮ ᒦᑕᔥ ᐅᐅ ᑳᐃᔑ ᓇᑴᑖᑯᒡ, ᑳᑎᓄᐎᔭᓐ ᐄᑐᒃ ᓂᑎᓄᐤ, ᓂᐱᒫᑎᓰᒪᒃ ᑲᔦ ᑖᐱᔥᑰ ᐁᐅᐱᒫᑎᓰᒥᔭᓐ, ᓂᒥᑕᑎᒨᒪᒃ ᑲᔦ ᑖᐱᔥᑰ ᑮᓐ ᐁᐅᒥᑕᑎᒨᒥᔭᓐ, ᐅᑮᐃᑰᓐ᙮ 5 ᒉᐆᔕᐹᑕᓐ ᓴ ᐅᑮ ᐊᓂᐃᑰᓐ, ᑕᑲ ᓴ ᐱᓇᒫ ᐊᑕ ᑭᑫᑕᒧᐙᑖ ᑳᑎᐯᒋᑫᒡ ᑫᐃᑭᑐᑴᓐ, ᐅᑮᐃᑰᓐ᙮ 6 ᒦᑕᔥ ᐁᐋᑉ ᑫᒋᐅᑭᒫᐎᒡ ᐃᐃᒫ ᐃᔅᕒᐃᔭᓬᐊᑮᕽ ᑳᐃᔑ ᐊᑐᒫᒡ ᓃᐙᒃ 400 ᐅᑲᓅᑕᒫᑫᐞ ᐁᑮᐃᓈᒡ, ᓂᑲ ᐃᔖ ᓇ ᐌᑎ ᐆᑌᓈᕽ ᐅᕒᐁᒪᑦ, ᑭᓬᐃᔭᑦ ᐊᑮᕽ ᑳᐃᒋᑳᑌᒃ ᒋᐊᑕ ᒦᑳᓱᔮᓐ, ᑯᒫ ᑲᔦ ᑳᐐᓐ ᓂᑖ ᐃᔖᓰ? ᒦᑕᔥ ᑳᐃᑯᒡ, ᐱᓵᓐ ᐃᔖᓐ, ᑳᑎᐯᒋᑫᒡ ᐅᔕ ᑭᒦᓂᒃ ᒋᔖᑰᒋᐃᒪᒡ ᐃᓂ ᑭᒋᐅᑭᒫᓐ, ᐅᑮᐃᑰᐞ᙮ 7 ᐅᐅ ᑕᔥ ᐃᓂ ᑭᒋ ᐅᑭᒫᓐ ᒉᐆᔕᐹᑕᓐ Jehoshaphat ᐅᑮᐃᑰᓐ, ᑳᐐᓐ ᐃᓇ ᐯᔑᒃ ᐊᔮᓰ ᐅᐅᒫ ᑳᑲᓅᑕᒪᐙᒡ ᑳᑎᐯᒋᑫᓂᒡ ᑫᑲᑴᒋᒪᑭᐸᓐ? ᐅᑮᐃᑰᓐ᙮ 8 ᒦᑕᔥ ᐅᐅ ᐁᐋᑉ ᑳᐃᑭᑐᒡ, ᑫᔮᐱ ᓴ ᐯᔑᒃ ᐋᓇ ᐊᔮ ᐃᓂᓂ ᑫᑲᑴᒋᒪᑭᐸᓐ ᒋᑲᑴᒋᒫᒡ ᑳᑎᐯᒋᑫᓂᒡ᙮ ᐐᑫ ᑕᔥ ᓂᔒᑫᓂᒫ ᐊᐊ ᐃᓂᓂ ᐋᓃᔥ ᑳᐐᓐ ᐐᑳ ᓂᒥᓍᒋᒧᑖᑯᓰ ᓃᓐ ᐅᒋ ᓃᔮᒃ ᑫᑰᓂᓂ ᐋᓇᑮ ᐐᑕᒪᐎᒡ, ᒦ ᐁᑕ ᑯ ᓅᒋᑯ ᐁᓂᑖᐃᔑᒡ᙮ ᒫᐃᑫᔭ Micaiah ᓴ ᐃᔑᓂᑳᓱ, ᑳᐅᑯᓯᓯᒥᑯᒡ ᐃᒪᓬᐊᐗᓐ Imlah, ᑮᐃᑭᑐ᙮ ᐅᐅ ᑕᔥ ᒉᐆᔕᐹᑦ ᑮᐃᑭᑐᐗᓐ, ᑕᑲ ᓴᓈ ᑫᑯ ᐃᐃᓇᑫ ᑕᔑ ᑳᑮᑭᑐᓰ ᑭᒋᐅᑭᒫ᙮ 9 ᐁᐋᑉ ᑕᔥ ᐅᑮᐃᓈᓐ ᐯᔑᒃ ᑳᑮ ᓈᓈᑲᒋᒋᑫᓂᒡ, ᒫᒑᓐ ᔐᒫᒃ ᐃᑯ ᓈᓯᑲᐤ ᒫᐃᑫᔭ Micaiah ᑳᐅᑯᓯᓯᒥᑯᒡ ᐃᒪᓬᐊᐗᓐ, ᐅᑮᐃᓈᓐ᙮ 10 ᐃᑭ ᓴ ᒥᒋᓃᔥ ᑭᒋᐅᑭᒫᒃ, ᐁᐋᑉ ᑫᒋᐅᑭᒫᐎᒡ ᐃᔅᕒᐃᔭᓬᐊᑮᕽ, ᐊᐊ ᑲᔦ ᒉᐆᔕᐹᑦ ᑫᒋᐅᑭᒫᐎᒡ ᒎᑕ ᐊᑮᕽ, ᐅᑮ ᑭᑭᔥᑳᓈᐙᓐ ᐅᑑᑭᒫ ᑭᑭᔥᑭᑲᓂᐙᓐ᙮ ᑮᓇᒪᑕᐱᐗᒃ ᑲᔦ ᐅᑑᑭᒫᐗᐱᐎᓂᐙᕽ ᐃᐃᒫ ᐁᔑ ᓂᑖ ᐸᐎᑲᓈᑌᓂᒃ ᒪᓅᒥᓐ ᐌᒋ ᐲᑎᑫᕽ ᐃᐃ ᐃᔥᒀᑌᒻ ᑭᒋ ᐆᑌᓇ ᓴᒣᕒᐃᔭ Samaria᙮ ᑲᑭᓇ ᑕᔥ ᐅᑲᓅᑕᒫᑫᐞ ᐃᓂᓂᐗᐞ ᐅᑮ ᐐᑕᒫᑯᐙᐞ ᐋᓃᓐ ᓃᔮᒃ ᑫᓂ ᐃᔑᐌᐸᓂᓂᒃ᙮ 11 ᐯᔑᒃ ᑕᔥ ᐃᓂ ᓭᑎᑳᔭᐗᓐ Zedekiah ᐌᑌᑌᓂᒡ ᑮᓀᐊᓇ Chenaanah ᐁᔑᓂᑳᓱᓂᒡ, ᑮᐅᔑᐋᓂᑯᐸᓐ ᐲᐙᐱᑴᔥᑲᓇᐞ ᒦᑕᔥ ᑳᐃᑭᑐᓂᒡ, ᒦ ᐅᔕ ᐅ ᐁᑭᑐᒡ ᑳᑎᐯᒋᑫᒡ, ᒦᐗᒃ ᓴ ᐅᑯ ᑫᐋᐸᒋᐊᑣ ᒦᑳᓇᑣ ᐃᓂᓂᐗᒃ ᓰᕒᐃᔭ ᐌᒌᐙᒡ ᐲᓂᔥ ᐗᐐᑫ ᒋᒑᑭᐊᑣ, ᑮᐃᑭᑐᐗᓐ᙮ 12 ᐃᐃ ᑕᔥ ᑯᑕᒃ ᐅᑲᓅᑕᒫᑫᐞ ᒦ ᐃ ᐯᔑᑾᓐ ᑳᐃᑭᑐᓂᒡ᙮ ᐊᐎ ᒦᑳᑕᒧᒃ ᐃᐃ ᐆᑌᓇ ᐅᕒᐁᒪᑦ ᐌᑎ ᑭᓬᐃᔭᑦ ᐊᑮᕽ ᐁᔮᒃ᙮ ᑭᑲ ᔖᑰᒋᑣᒻ ᐅᔕ, ᐋᓃᔥ ᑳᑎᐯᒋᑫᒡ ᑭᒦᓂᑯᐙ ᒋᔖᑰᒋᑣᐌᒃ, ᑮᐃᑭᑐᐗᐞ᙮ 13 ᐃᑭ ᑕᔥ ᐐᓐ ᐃᓂᓂᐗᒃ ᑳᑮ ᐃᔑᓂᔕᐅᑣ ᒋᐊᐎ ᑲᓅᓈᐙᒡ ᒫᐃᑫᔭᐗᓐ, ᐅᐅ ᐅᑮᐃᓈᐙᓐ, ᐃᓇᔥᑫ ᓴ ᐃᑭ ᑳᑲᓅᑕᒫᑫᐙᒡ ᑲᑭᓇ ᐯᔑᑾᓐ ᐃᑭᑐᐗᒃ, ᐁᐃᓈᐙᒡ ᑭᒋᐅᑭᒫᓐ ᒋᒥᓄᓭᓂᒡ᙮ ᑕᑲ ᓴ ᑫᑮᓐ ᐯᔑᑾᓐ ᐃᑭᑑᑲᓐ ᑳᐃᑭᑐᐙᒡ, ᒋᒥᓄᐃᓇᒡ ᑭᒋᐅᑭᒫ, ᐅᑮᐃᓈᐙᓐ᙮ 14 ᒦᑕᔥ ᐅᐅ ᒫᐃᑫᔭ ᑳᐃᑭᑐᒡ, ᑫᒋᓈᒡ ᐃᑯ ᑳᑎᐯᒋᑫᒡ ᐐᓐ ᒥᓯᐌ ᐁᑎᐯᒋᑫᒡ, ᒦ ᐃ ᐁᐲᒋ ᑫᒋᓈᐁᑕᒫᓐ ᑳᐃᔑᒡ ᐃᓴ ᐁᑕ ᑳᑎᐯᒋᑫᒡ, ᒦ ᓴ ᐁᑕ ᑯ ᒥᓂᒃ ᑫᐃᓇᒃ ᑭᒋᐅᑭᒫ, ᑮᐃᑭᑐ᙮ 15 ᐊᐲ ᑕᔥ ᐌᑎ ᑌᑯᔑᕽ ᐁᔑᐊᔮᓂᒡ ᑭᒋᐅᑭᒫᓐ, ᒦ ᓴ ᑳᐃᔑ ᑲᑴᒋᒥᑯᒡ, ᒫᐃᑫᔭ, ᓂᑲ ᐊᑕ ᒦᑳᓱᒥᓐ ᐃᓇ ᐌᑎ ᐆᑌᓈᕽ ᐅᕒᐁᒪᑦ, ᑭᓬᐃᔭᑦ ᐊᑮᕽ ᐁᔑᐊᔮᒃ, ᑯᒫ ᑲᔦ ᑳᐐᓐ? ᒦᔥ ᐅᐅ ᒫᐃᑫᔭ ᑳᐃᔑ ᓇᑴᑕᕽ, ᒫᒑᒃ ᐊᑕ ᒦᑳᓱᒃ ᒋᔖᑰᒋᑣᔦᒃ, ᑳᑎᐯᒋᑫᒡ ᐄᑐᒃ ᑭᒦᓂᒃ ᒋᔖᑰᒋᑣᐗᒡ! ᐅᒋᑕ ᐅᑮ ᐃᓇᓐ᙮ 16 ᒦᔥ ᐁᐋᐴᓐ ᑳᐃᑯᒡ, ᐊᐲ ᓴ ᑮᑲᓅᔑᔭᓐ ᐅᑎᔑᓂᑳᓱᐎᓂᕽ ᑳᑎᐯᒋᑫᒡ, ᑌᐺᓐ ᓴ ᑫᑰᓐ ᑮᐐᑕᒪᐎᔭᓐ᙮ ᐋᔕ ᐅᔕ ᐹᑏᓍ ᐃᐃ ᑭᑖᓇᐃᓂᓐ, ᐅᑮᐃᑰᓐ᙮ 17 ᒫᐃᑫᔭ ᓴ ᑕᔥ ᑮᐊᓂ ᐃᑭᑐ, ᓂᑮ ᐙᐸᒫᒃ ᓴ ᑲᑭᓇ ᐃᔅᕒᐃᔭᓬᐊᒃ ᐁᐹᐲᐌ ᐊᔮᐙᒡ ᑭᒋ ᐗᒌᑳᕽ ᑖᐱᔥᑰ ᒫᓇᒑᓂᔕᒃ ᑳᐊᔮᐙᓯᒀ ᑫᓇᐌᓂᒥᑯᐙᒡ, ᑳᑎᐯᒋᑫᒡ ᑕᔥ ᓂᑮᐃᒃ, ᐅᑯᐌᓂᐗᒃ ᓴ ᑳᐐᓐ ᐅᑑᑭᒫᒥᓰᐗᒃ᙮ ᑕᑲ ᓴ ᐸᑭᑎᓐ ᐁᑕᓱ ᐯᔑᑯᐙᒡ ᐅᑖᐎᓂᐙᕽ ᐱᓵᓐ ᐌᐌᓂ ᒋᔑ ᑮᐌᐙᒡ, ᑮᐃᑭᑐ᙮ 18 ᒦᔥ ᐁᐋᐴᓐ ᑳᑮᐃᓈᓂᒡ ᒉᐆᔕᐹᑕᓐ, ᑭᑖᓇᑮ ᐐᑕᒪᐎᓐ ᐄᑐᒃ, ᐐᑳ ᑾᔭᒃ ᐁᐃᔑᓯᒃ ᓃᔮᒃ ᑫᑰᓂᓂ ᐋᓇᑮ ᐐᑕᒪᐎᒡ, ᒦ ᐁᑕ ᑯ ᓅᒋᑯ ᐁᐃᔑᒡ᙮ 19 ᒦᑕᔥ ᒫᐃᑫᔭ ᑳᐊᓂ ᐃᑭᑐᒡ, ᐃᓇᔥᑫ ᓴ ᓅᑕᒧᐙᒃ ᑳᑎᐯᒋᑫᒡ ᐁᑭᑐᒡ, ᓂᑮ ᐙᐸᒫ ᓴ ᑳᑎᐯᒋᑫᒡ ᐁᓇᒪᑕᐱᒡ ᐅᑑᑭᒫᐗᐱᐎᓂᕽ ᑲᑭᓇ ᑭᒋᑮᔑᑯᕽ ᐁᔮᓂᒡ ᐁᐙᑳᔥᑳᑯᒡ ᐅᑭᒋᓂᑭᕽ ᐃᓇᑫ, ᐅᓇᒪᑎᓂᑭᕽ ᑲᔦ᙮ 20 ᒦᔥ ᐅᐅ ᑳᑎᐯᒋᑫᒡ ᐁᑭᑐᒡ, ᐊᐌᓀᓐ ᑕᔥ ᑫᐃᔖᒡ ᒋᐊᐎᑲᑴ ᑲᔥᑭᒫᒡ ᐁᐋᐴᓐ ᒋᐊᑕ ᒦᑳᓱᓂᒡ ᐌᑎ ᐆᑌᓈᕽ ᐅᕒᐁᒪᑦ, ᑭᓬᐃᔭᑦ ᐊᑮᓂ ᐁᔮᓂᒃ, ᒦᑕᔥ ᐌᑎ ᑫᔑ ᓂᓯᓐᒡ? ᐋᓂᑕ ᑕᔥ ᐁᒐᓬᐊᒃ ᐯᔑᑾᓐ ᑮᐃᑭᑐᐗᒃ, ᐋᓂᑕ ᑕᔥ ᐸᑳᓐ ᑮᐃᑭᑐᐗᒃ᙮ 21 ᑫᑲᐲ ᑕᔥ ᐯᔑᒃ ᐊᒑᑾᓐ ᑮᒪᑌᑳᐸᐎᐗᓐ ᐁᑮ ᐃᓈᓴᒥᑳᐸᐎᑖᑯᒡ ᑳᑎᐯᒋᑫᒡ ᐁᑮ ᐃᑭᑐᓂᒡ, ᓃᓐ ᓴ ᓂᑲ ᑲᑴ ᔖᑰᓱᒫ, ᑮᐃᑭᑐᐗᓐ᙮ 22 ᒦᑕᔥ ᐅᐅ ᑳᑎᐯᒋᑫᒡ ᑳᐃᓈᒡ, ᐋᓃᓐ ᑕᔥ ᐙᑑᑕᐗᒡ? ᒦᔥ ᐃᓂ ᐊᒑᑾᓐ ᑳᐃᑭᑐᓂᒡ, ᓃᓐ ᓴ ᓂᑲ ᐃᔖ, ᓂᑲ ᐃᔑᐃᑎᔅ ᓴ ᑎᓄ ᐊᒑᒃ ᑳᓂᑖ ᐗᓂᒥᐌᒡ, ᓂᑲ ᐃᔑᐃᒫᐞ ᓴ ᐁᐋᑉ ᑳᑲᓅᑕᒫᑯᒡ ᒋᑮᐗᓂᒧᓂᒡ᙮ ᑳᑎᐯᒋᑫᒡ ᓴ ᑕᔥ ᑮᐃᑭᑐ, ᐊᐤ ᒫᒑᓐ ᒦ ᓴ ᐃ ᒋᑲᔥᑭᒪᒡ, ᑭᑲ ᑲᔥᑭᑑᓐ ᓴ ᐃ ᑳᐎ ᐃᔑᒋᑫᔭᓐ, ᐊᐤ ᒫᒑᓐ, ᑮᐃᑭᑐ 23 ᐃᓇᔥᑫ ᑕᔥ ᑳᑎᐯᒋᑫᒡ ᓴ ᐅᑮ ᐃᔑ ᐸᑭᑎᓈᐞ ᑳᐗᓂᒥᐌᓂᒡ ᐊᒑᑾᐞ ᐅᑑᓂᓃᕽ ᐃᐃ ᑲᑭᓇ ᑳᑲᓅᑕᒪᐎᒥᒃ᙮ ᑳᑎᐯᒋᑫᒡ ᓴ ᑫᒋᓈᒡ ᑭᑎᒃ ᒋᐅᑎᓵᐸᑕᒧᐗᒡ ᒋᓂᓯᑰᐗᒡ! ᑮᐃᑭᑐ ᒫᐃᑫᔭ᙮ 24 ᓭᑎᑳᔭᐗᓐ ᑕᔥ ᐌᑌᑌᓂᒡ ᑮᓀᐊᓇᐗᓐ ᐅᑮ ᓈᓯᑳᑰᓐ ᒫᐃᑫᔭ ᒦᔥ ᑳᐃᔑ ᐸᓰᑴᑲᓈᒥᑯᒡ, ᐯᑭᔥ ᐁᑮᐃᑯᒡ, ᐋᑎ ᑕᔥ ᐃᓇᑫ ᑳᐊᓂ ᐃᔖᓂᒡ ᑳᑎᐯᒋᑫᒡ ᐅᑕᒑᑾᓐ ᑮᓇᑲᔑᒥᒡ ᑮᓐ ᐃᑕᔥ ᐁᑮ ᐊᐎ ᑲᓅᓂᒥᒃ? ᐋᑎ ᑳᐅᒋ ᐋᔕᐎᔥᑳᓂᒡ, ᐅᑮᐃᑰᓐ᙮ 25 ᒦᔥ ᐅᐅ ᒫᐃᑫᔭ ᑳᐃᓈᒡ ᓭᑎᑳᔭᐗᓐ, ᐹᓂᒫ ᓴ ᐅᐅ ᑭᑲ ᑭᑫᑖᓐ ᐊᐲ ᑮᔑᑲᒃ ᐸᑫᒋᑲᓂᕽ ᐃᔑ ᑳᓱᔭᓐ, ᐅᑮᐃᓈᓐ᙮ 26 ᒦᑕᔥ ᐅᐅ ᐁᐋᐴᓐ ᑫᒋᐅᑭᒫᐎᓂᒡ ᐃᔅᕒᐃᔭᓬᐊᑮᕽ ᑳᑮ ᐊᓅᑮᓂᒡ ᐁᐃᑭᑐᓂᒡ, ᑕᑲ ᐃᔑᐎᓂᒃ ᒫᐃᑫᔭ ᐌᑎ ᐁᔑᐊᔮᓂᒡ ᐆᑌᓈᐎᑭᒫᓐ ᐁᒪᓇᓐ Amon, ᑲᔦ ᐁᔑᐊᔮᒡ ᒍᐋᔥ Joash ᓂᑯᓯᔅ᙮ 27 ᒦᑕᔥ ᑫᐃᑭᑐᔦᒃ, ᑭᒋᐅᑭᒫ ᓴ ᐅᐅ ᐃᑭᑐ, ᑭᐸᐅᒃ ᐗᐊ ᐃᓂᓂ, ᐸᑮ ᑲᔦ ᐁᑕ ᑭᑲ ᐊᔕᒫᐙ ᐸᑴᔑᑲᓇᓐ, ᓂᐲᓂ ᑲᔦ᙮ ᐹᓂᒫ ᓴ ᐌᐌᓂ ᑮᐱᑕᑯᔑᓈᓐ, ᒦ ᓴ ᐃ ᐸᔦᔥ ᒋᐸᑭᑎᓀᒃ, ᑮᐃᑭᑐᐗᓐ᙮ 28 ᒦᑕᔥ ᐅᐅ ᒫᐃᑫᔭ ᑳᐃᑭᑐᒡ, ᑮᔥᐱᓐ ᓴ ᐌᐌᓂ ᐱᑕᑯᔑᓇᓐ, ᑳᐐᓐ ᐄᓴᓐ ᑳᑎᐯᒋᑫᒡ ᓂᑮ ᐋᐸᒋᐃᑯᓰ ᐅᐅ ᑳᑮ ᐃᑭᑐᐗᒃ᙮ ᒦᔥ ᑲᔦ ᑳᐊᓂ ᐃᑭᑐᒡ, ᑮᓇᐙ ᑲᑭᓇ ᐯᒫᑎᓯᔦᒃ ᐅᐅᒫ ᑳᐊᔮᔦᒃ ᐱᓯᑕᐎᔑᒃ ᐋᓃᓐ ᐁᑭᑐᔮᓐ᙮ ᐁᐋᑉ ᐁᑕᔑᑌᓂᒃ ᐋᓃᓐ ᑳᐃᔑᓂᐳᒡ 29 ᒦᑕᔥ ᐁᐋᑉ Ahab ᑫᒋᐅᑭᒫᐎᒡ ᐃᔅᕒᐃᔭᓬᐊᑮᕽ Israel, ᐊᐊ ᑲᔦ ᒉᐆᔕᐹᑦ Jehoshaphat ᑫᒋᐅᑭᒫᐎᒡ ᒎᑕ Judah ᐊᑮᕽ ᑳᑮ ᐃᔖᐙᒡ ᐁᑮ ᐊᑕ ᒦᑳᓱᐙᒡ ᐌᑎ ᐆᑌᓈᕽ ᐅᕒᐁᒪᑦ Ramoth, ᑭᓬᐃᔭᑦ Gilead ᐊᑮᕽ᙮ 30 ᒦᔥ ᐁᐋᑉ ᑳᐃᓈᒡ ᒉᐆᔕᐹᑕᓐ, ᔑᒫᑲᓂᔕᒃ ᓴ ᑳᐃᔑᐅᐙᒡ ᓃᓐ ᓂᑲ ᐃᔑᐞ ᒋᑭᑫᓂᒥᑰᓯᐙᓐ; ᑮᓐ ᑕᔥ ᐐᓐ ᑭᑭᔥᑲᓐ ᐅᑭᒫᐎᐅᓇᓐ᙮ ᒦᑕᔥ ᐁᐋᑉ ᑳᐃᔑᒋᑫᒡ ᐁᑮ ᐃᔑᐅᒡ ᔑᒫᑲᓂᔕᐞ ᐁᔑᐅᓂᒡ ᒋᑭᑫᓂᒫᓯᐎᓐᒡ, ᒦᔥ ᑳᐃᔑ ᐊᑕ ᒦᑳᓱᒡ᙮ 31 ᐊᐊ ᑕᔥ ᑭᒋᐅᑭᒫ ᓰᕒᐃᔭ ᐊᑮᕽ ᐌᒌᒡ ᑮᐃᓈᑯᐸᓐ ᓂᓯᒥᑕᓇᔑᓃᔑᓐ 32 ᐅᔑᒫᑲᓂᔒᐎᑭᒫᐞ ᑳᑮ ᓈᑲᒋᐋᓂᒡ ᒦᑳᓱᐎ ᐅᑖᐹᓈᑾᐞ, ᑫᑯ ᐐᓐ ᒦᑳᓈᑫᒀᓂᒃ ᐃᑭ ᑳᐊᑳᓭᑖᑯᓯᐙᒡ, ᐃᑭ ᑲᔦ ᑳᑭᒋ ᐃᓀᑖᑯᓯᐙᒡ, ᐊᐊ ᓴ ᐁᑕ ᑳᑭᒋᐅᑭᒫᐎᒡ ᐃᔅᕒᐃᔭᓬᐊᑮᕽ ᑭᑲ ᒦᑳᓈᐙ᙮ 32 ᒦᑕᔥ ᐃᑭ ᔑᒫᑲᓂᔒᐎᑭᒫᒃ ᑳᑮ ᓈᓈᑲᒋᐋᐙᒡ ᒦᑳᓱᐎ ᐅᑖᐹᓈᑾᐞ ᐁᐙᐸᒫᐙᒡ ᒉᐆᔕᐹᑕᓐ, ᒦ ᓴ ᑳᐃᑭᑐᐙᒡ, ᒦ ᒫᐐᓐ ᐊᐊ ᑫᒋᓈᒡ ᐃᔅᕒᐃᔭᓬᐃ ᑭᒋᐅᑭᒫ᙮ ᒦᑕᔥ ᑳᐃᔑ ᐸᑫᐙᒡ ᐁᐐ ᒦᑳᓈᐙᒡ᙮ ᒦᑕᔥ ᒉᐆᔕᐹᑕᓐ ᑳᑮ ᔖᑯᐌᓂᒡ᙮ 33 ᒦᔥ ᐃᑭ ᔑᒫᑲᓂᔒᐎᑭᒫᒃ ᐁᐙᐸᒫᐙᒡ ᐁᐋᐎᓯᓂᒃ ᐃᔅᕒᐃᔭᓬᐃ ᑭᒋᐅᑭᒫᓐ, ᒦ ᓴ ᑳᐃᔑ ᐴᓂᐋᐙᒡ᙮ 34 ᐯᔑᒃ ᑕᔥ ᐃᑯ ᔑᒫᑲᓂᔥ ᓅᒋᑯ ᑮᐃᔑ ᐱᒧᒋᑫ᙮ ᒦᑕᔥ ᒪᔮ ᑳᑮ ᒦᑾᐅᓐᒡ ᐃᔅᕒᐃᔭᓬᐃ ᑭᒋᐅᑭᒫ ᐁᔑ ᑕᐙᓂᒃ ᐁᔑ ᐋᓂᑲᐎᓯᓂᓂᒃ ᐅᒦᑳᓱᐎ ᑭᑭᔥᑭᑲᓐ᙮ ᐁᐋᑉ ᑕᔥ ᐅᑮᐃᓈᓐ ᑳᑮ ᐅᑖᐸᐃᐌᑕᒫᑯᒡ, ᑕᑲ ᒦ ᐃ ᐃᑕᐙ ᐃᔑᑴᑮᓐ, ᓂᑯᒋ ᐅᒫ ᐅᒋᐃᔑᐎᔑᔑᓐ ᑳᑕᔑ ᒦᑳᑎᕽ, ᐗᐐᑫ ᐅᔕ ᓂᒫᑭᐃᑰ, ᑮᐃᑭᑐ᙮ 35 ᑲᐯᑮᔑᒃ ᑕᔥ ᑮᑭᒋ ᒦᑳᑎᓈᓂᐗᓐ᙮ ᐁᐋᑉ ᑕᔥ ᐅᒦᑳᓱᐎ ᐅᑖᐹᓈᑯᕽ ᑮᐃᔑ ᐋᓱᔑᓐ, ᐁᑮ ᐃᓈᓴᒥᔑᕽ ᐁᔑᐊᔮᓂᒡ ᐃᓇᑫ ᔑᒫᑲᓂᔕᐞ ᐌᒌᓂᒡ ᓰᕒᐃᔭ ᐊᑮᕽ᙮ ᐃᐃᒫ ᑕᔥ ᑳᑮ ᐃᔑ ᒫᑭᒋᑲᓂᐎᒡ ᑮᐅᒋᒋᐗᓂᓂ ᐅᒥᔅᑸᒻ ᐁᑮ ᐃᔑᒋᐗᓂᓂᒃ ᐃᐃᒫ ᑳᑮ ᐃᔑ ᒥᒋᓴᑳᓂᒃ ᐅᑖᐹᓈᑯᕽ᙮ ᐁᐊᓂ ᐅᓈᑯᔑᓂᓂᒃ ᑕᔥ ᒦ ᐃ ᑳᐃᔑ ᓂᐳᒡ᙮ 36 ᑮᓯᓲᓐ ᐃᑕᔥ ᐁᐊᓂ ᐸᑭᔑᒧᓂᒡ, ᐊᐎᔭᓐ ᓴ ᑮᐃᔑ ᔖᑯᐌᐗᓐ ᔑᒫᑲᓂᔕᐞ ᐁᔑᐊᔮᓂᒡ, ᑕᑲ ᐁᑕᓱ ᐯᔑᑯᒡ ᐃᓂᓂ ᐅᑑᑌᓈᒥᕽ ᑕᔑ ᑮᐌ, ᐅᑕᑮᒥᐙᕽ ᒋᔑ ᑮᐌᐙᒡ᙮ 37 ᒦ ᓴ ᐃ ᑳᑮ ᐅᒋ ᐃᔥᒀ ᐱᒫᑎᓯᒡ ᑭᒋᐅᑭᒫ ᐁᐋᑉ᙮ ᐅᐐᔭᐤ ᑕᔥ ᓴᒣᕒᐃᔭ Samaria ᐊᑮᕽ ᑮᐃᔑᐎᒋᑳᑌᓂ, ᒦᑕᔥ ᐌᑎ ᑳᐃᔑ ᓇᐃᓂᑳᑌᓂᒃ᙮ 38 ᒦᑕᔥ ᐌᑎ ᑳᑮ ᐃᔑ ᐯᑭᒋᑲᓂᐎᓂᒡ ᐅᑑᑖᐹᓈᑾᓐ ᐁᔑᐊᔮᓂᒃ ᓵᑲᐃᑲᓃᓯᑳᓐ ᓴᒣᕒᐃᔭ ᐆᑌᓈᕽ᙮ ᒦᑕᔥ ᐃᐃᒫ ᐊᓂᒨᐞ ᑳᑮ ᐃᔑ ᓅᔅᒀᑕᐊᒥᓂᒡ ᐅᒥᔅᑸᒻ, ᐁᑮ ᐃᔑᓭᓂᒃ ᑳᑮ ᐃᑭᑐᓂᐸᓐ ᑳᑎᐯᒋᑫᓂᒡ᙮ ᒦ ᓴ ᑲᔦ ᐃᐃᒫ ᓵᑲᐃᑲᓃᓯᑳᓂᕽ ᑳᑮ ᐃᔑ ᓂᑖ ᑭᓰᓯᐸᓱᓂᒡ ᐱᔑᒀᒋᑴᐗᐞ᙮ 39 ᑲᑭᓇ ᓴ ᐁᐋᑉ ᑭᒋᐅᑭᒫ ᑳᑮ ᐃᔑᒋᑫᒡ, ᐁᔑ ᑕᔑᑌᓂᒃ ᑲᔦ ᐅᑑᑭᒫᐎᑲᒥᒃ ᐁᑮ ᒪᒪᓯᓇᒋᑳᑌᓂᒃ ᑲᑭᓅᔥᑭᔒᐙᐱᑕᓐ ᐁᑮ ᐋᐸᑕᓂᓂᑭᓐ, ᑲᑭᓇ ᐆᑌᓇᐗᓐ ᑳᑮ ᐅᔑᑑᒡ ᐃᐃᒫ ᐃᔑ ᑕᔑᑌᓂᐗᓐ ᒪᓯᓇᐃᑲᓂᕽ ᐁᔑᓂᑳᑌᓂᒃ, ᐁᔑ ᑕᔑᓱᐙᒡ ᐃᔅᕒᐃᔭᓬᐃ ᑭᒋᐅᑭᒫᒃ᙮ 40 ᑮᐃᔑ ᓇᐃᓈ ᓴ ᐁᔑ ᓇᐃᓂᒥᓐᒡ ᐅᑫᑌᐊᔭᐋᒪᐞ᙮ ᐅᑯᓯᓴᓐ ᓴ ᐁᐊᓵᔭ Ahaziah ᐁᔑᓂᑳᓱᓂᒡ ᐅᑮ ᓈᐱᔥᑳᑰᓐ ᐁᑮ ᑭᒋᐅᑭᒫᐎᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society