1 ᑭᒋᐅᑭᒫᒃ 2 - ᐅᒋᐺ ᑭᒋᒪᓯᓇᐃᑲᓐᑌᐱᑦ ᐃᔥᒀᒡ ᐌᐌᓂ ᑮᑲᑲᓅᓈᒡ ᔂᓬᐊᒪᓇᓐ 1 ᐋᔕ ᑕᔥ ᑫᑳ ᑮᐅᒋᒋᓭᓂᒃ ᑌᐱᑦ David ᒋᐃᔥᒀ ᐱᒫᑎᓯᒡ, ᒦᔥ ᑳᑮ ᐊᑐᒫᒡ ᐅᑯᓯᓴᓐ ᔂᓬᐊᒪᓇᓐ Solomon᙮ ᒦᔥ ᐅᐅᐌᓂ ᐃᔥᒀᒡ ᑳᐃᔑ ᑲᑲᓅᓈᒡ, 2 ᒦ ᐅᔕ ᐃ ᐋᔕ ᐁᐅᒋᒋᓭᒃ ᒋᐃᔥᒀ ᐱᒫᑎᓯᔮᓐ, ᒪᔥᑲᐌᓂᑎᓱᓐ ᐃᓴ, ᐃᓂᓃᕽ ᑲᔦ ᐃᓀᓂᑎᓱᓐ᙮ 3 ᐃᔑᒋᑫᓐ ᓴ ᒋᑲᓇᐌᑕᒧᐗᒡ ᑳᑎᐯᒋᑫᒡ ᑭᑭᔐᒪᓂᑑᒻ ᐅᑎᔑᑣᐎᓐ; ᐅᑎᑭᑐᐎᓐ, ᐅᑎᓈᑯᓂᑫᐎᓇᓐ, ᐋᓃᓐ ᑲᔦ ᐁᔑ ᐊᑕᐌᑕᕽ, ᑲᑭᓇ ᑲᔦ ᐁᔑᓯᓂᓂᒃ ᐅᑑᓇᔓᐌᐎᓐ᙮ ᒋᑲᓇᐌᑕᒧᐗᒡ ᑲᑭᓇ ᑳᐃᔑᐲᐃᑳᑌᓂᒃ ᒨᓯᔅ Moses ᐅᑑᓇᔓᐌᐎᓐ, ᑮᓐ ᓴ ᒋᒥᓄᓭᔭᓐ ᐋᓃᓐ ᐃᑯ ᑫᐃᔑᒋᑫᔭᓐ, ᑲᔦ ᐋᑎ ᐱᑯ ᑫᐃᔖᔭᓐ᙮ 4 ᒦ ᒫᐐᓐ ᐃᑕᔥ ᐃᐃ ᒋᑑᑕᕽ ᑳᑎᐯᒋᑫᒡ ᑳᑮ ᐃᔑ ᐊᔓᑕᒪᐎᐸᓐ ᐊᐲ ᑮᐃᔑᐸᓐ, ᑮᔥᐱᓐ ᓴ ᑭᑕᐱᓅᒌᔑᒪᒃ ᐊᔮᒀᒥᓯᐙᒡ, ᑫᐃᔑ ᐱᒫᑎᓯᐙᒡ, ᑌᐺᐎᓂᕽ ᑲᔦ ᐃᔑ ᐱᒧᓭᐙᒡ ᐅᑌᐃᐙᕽ, ᐃᐃᒫ ᑲᔦ ᐅᑕᒑᑯᐙᕽ ᐁᓈᓴᒦᐗᒃ; ᑳᐐᓐ ᓴ ᐐᑳ ᑕᑴᓇᐎ ᐅᒌᓰ ᐃᓂᓂ ᑫᓇᒪᑕᐱᒡ ᐃᐃᒫ ᑭᒋᐅᑭᒫᐗᐱᐎᓂᕽ ᐃᔅᕒᐃᔭᓬᐃᑳᕽ ᑳᐊᔮᓂᒃ᙮ 5 ᑭᑭᑫᑕᒧᐙᓐ ᐄᑐᒃ ᑲᔦ ᐋᓃᓐ ᒎᐊᑉ Joab ᐌᒫᒫᒡ ᓭᕒᐅᐋᔭᐗᓐ Zeruiah ᑳᑑᑕᐎᒡ, ᐁᑮ ᓂᓵᒡ ᓃᔑᓐ ᔑᒫᑲᓂᔒᐎᑭᒫᐞ ᑳᓈᓈᑲᒋᐋᓂᒡ ᐃᔅᕒᐃᔭᓬᐃ ᔑᒫᑲᓂᔕᐞ᙮ ᒦᔥ ᐅᐅ ᑳᑮ ᓂᓵᒡ ᐋᐱᓇᕒ Abner ᐁᔑᓂᑳᓱᓂᒡ ᐌᑌᑌᓂᒡ ᓀᕒ Ner ᑳᑮᐃᓂᒥᓐᒡ, ᐊᒣᓴ Amasa ᑲᔦ ᑳᑮ ᐅᑌᑌᓂᒡ ᒌᑕᕒᐊᓐ Jether ᐁᑮ ᑑᑕᐙᒡ ᒣᒀ ᐊᐲ ᑳᒦᑳᑎᓈᓂᐗᓯᓄᒃ ᑖᐱᔥᑰ ᑳᑑᑖᑎᕽ ᑳᑕᔑ ᒦᑳᑎᕽ᙮ ᒦᔥ ᑳᑮ ᐅᒋ ᒥᔅᑸᐗᓂᓂᒃ ᑫᒋᐱᔂᑫᒡ, ᐅᒪᑭᓯᓇᓐ ᑲᔦ ᑳᑮ ᐅᒋ ᒥᔅᑸᐗᓂᓂᑭᓐ᙮ 6 ᐁᔑ ᑲᑮᑖᐌᑕᒪᓐ ᐃᑕᔥ ᑑᑕᐤ, ᑫᑯ ᐐᓐ ᐸᑭᑎᓈᑫᓐ ᒋᑲᐎᑮᑳᒡ᙮ 7 ᑭᑲ ᒥᓄᑑᑕᐎᒫᐞ ᐃᑕᔥ ᐐᓐ ᐊᐊ ᐹᕒᓯᓬᐋᐃ Barzillai ᐅᑯᓯᓴᐞ ᑭᓬᐃᔭᑦ Gilead ᐊᑮᕽ ᐌᒌᒡ᙮ ᑕᑲ ᒦᐗᐞ ᐃᐃ ᑫᑎᓄᐎᓂᒡ ᑫᐅᒋ ᐐᓯᓂᓂᒡ ᑭᑕᑑᐳᐎᓈᑯᕽ᙮ ᐐᓇᐙ ᐄᑐᒃ ᑳᑮ ᒥᓄᑑᑕᐎᐙᒡ ᐊᐲ ᑮᒫᒌᐸᐃᐙᓂᒪᑭᐸᓐ ᑮᒋᑭᐌᔭᓐ ᐋᐸᓴᓬᐊᒨᓐ Absalom᙮ 8 ᐃᓇᔥᑫ ᑕᔥ ᑲᔦ ᐊᔮ ᔑᒥᐋᐃ Shimei ᐌᑌᑌᒡ ᑮᕒᐊᐗᓐ Gera ᐌᒌᒡ ᐸᔫᕒᐃᒻ Bahurim ᐯᒋᒪᓂᕽ Benjamin ᐌᑕᑳᓀᓯᒡ᙮ ᐐᓐ ᐄᑐᒃ ᑳᑮ ᒪᒋᐃᓈᐱᓀᒥᐸᓐ ᐁᑮᔑᑲᓂᓂᒃ ᑮᐃᔖᐗᑭᐸᓐ ᐌᑎ ᐆᑌᓈᕽ ᒣᐊᓀᐃᒻ Mahanaim᙮ ᐊᐲ ᑕᔥ ᑮᐱ ᐊᑕ ᓇᑭᔥᑲᐎᐸᓐ ᐌᑎ ᒞᕒᑕᓐ Jordan ᓰᐱᕽ, ᒦᔥ ᑳᐃᔑ ᐊᐱᒧᐗᑭᐸᓐ ᑳᑎᐯᒋᑫᓂᒡ ᒋᓂᓵᓯᐗᒃ᙮ 9 ᑫᑯ ᑕᔥ ᐸᑭᑎᓈᑫᓐ ᑫᑰᓐ ᒋᐃᔑ ᓇᓇᐊᓵᓯᐎᓐᒡ᙮ ᑮᓐ ᓴ ᑭᑲᑮᑖᐌᑕᒻ, ᑭᑲ ᑭᑫᑖᓐ ᓴ ᑫᑑᑕᐗᒡ, ᒥᓴᐙ ᑯ ᐋᓇ ᐙᐱᑴᒡ ᑭᑲ ᓂᓵ, ᐅᑮᐃᓈᓐ᙮ ᑌᐱᑦ ᐊᐲ ᑮᐃᔥᒀᐱᒫᑎᓯᒡ 10 ᑌᐱᑦ David ᓴ ᑕᔥ ᑮᐃᔥᒀ ᐱᒫᑎᓯ᙮ ᐌᑎ ᓴ ᑮᐃᔑ ᓇᐃᓂᑲᓂᐎ ᐅᑑᑌᓈᒥᕽ ᐁᒋᑳᑌᓂᒃ, ᑌᐱᑦ ᐅᑑᑌᓈᒻ᙮ 11 ᓃᒥᑕᓇ 40 ᑕᓱᐱᐴᓐ ᓴ ᑌᐱᑦ ᑮᑭᒋᐅᑭᒫᐎ ᐃᐃᒫ ᐃᔅᕒᐃᔭᓬᐊᑮᕽ᙮ ᓃᔣᓱ ᐱᐴᓐ ᓴ ᐆᑌᓇ ᐄᐸᕒᐊᓐ Hebron ᐁᒋᑳᑌᓂᒃ ᑮᑕᔑ ᑭᒋᐅᑭᒫᐎ᙮ ᓂᓯᒥᑕᓇᔑᓂᓱᐱᐴᓐ 33 ᐃᑕᔥ ᑮᑕᔑ ᑭᒋᐅᑭᒫᐎ ᐌᑎ ᒉᕒᐆᓴᓬᐊᒥᕽ Jerusalem᙮ 12 ᔂᓬᐊᒪᓐ Solomon ᑕᔥ ᑮᓇᒪᑕᐱ ᐅᑑᑭᒫᐗᐱᐎᓂᓃᕽ ᑌᐱᑑᓐ ᑳᑮ ᐅᑌᑌᒡ ᐁᑮ ᓈᐱᔥᑲᐙᒡ᙮ ᐅᑑᑭᒫᐎᐎᓐ ᓴ ᑕᔥ ᐐᑫ ᑮᐊᔩᒋ ᐊᔮᓂ᙮ ᐊᑐᓈᐃᒐ ᑮᓂᐳᒡ 13 ᐊᑐᓈᐃᒐ Adonijah ᓴ ᐌᒫᒫᒡ ᐊᑭᑦ Haggith ᐁᔑᓂᑳᓱᓂᒡ ᐅᑮ ᐱ ᓈᓯᑲᐙᓐ ᐹᔒᐸᐗᓐ Bathsheba ᐌᑯᓯᓯᓂᒡ ᔂᓬᐊᒪᓇᓐ᙮ ᒦᔥ ᐅᐅ ᑳᐃᑯᒡ, ᐱᓵᓐ ᐃᓇ ᑭᐲᔖ? ᒦᑕᔥ ᑳᐃᓈᒡ, ᐁᔭᐞ, ᐱᓵᓐ ᓂᐲᔖ, ᐅᑮᐃᓈᓐ᙮ 14 ᒦᔥ ᑳᐊᓂ ᐃᑭᑐᒡ, ᓂᑕᔮᓐ ᑫᑰᓐ ᒋᐃᓂᓈᓐ, ᐅᑮᐃᓈᓐ᙮ ᐅᐅ ᑕᔥ ᐅᑮᐃᑰᓐ, ᐋᓃᓐ ᐃᑕᔥ ᐙᐃᔑᔭᓐ, ᐅᑮᐃᑰᓐ᙮ 15 ᐊᑐᓈᐃᒐ ᑕᔥ ᑮᐃᑭᑐ, ᑭᑭᑫᑖᓐ ᐄᑐᒃ ᓃᓐ ᒋᑮ ᑭᒋᐅᑭᒫᐎᔮᐹᓐ᙮ ᒦ ᓴ ᐃ ᑲᑭᓇ ᐃᔅᕒᐃᔭᓬᐊᒃ Israel ᑳᐃᓀᑕᒧᐙᒡ᙮ ᑳᐐᓐ ᐃᑕᔥ ᐃᐃ ᑮᐃᔑᓭᓯᓅᓐ, ᔂᓬᐊᒪᓐ ᓴ ᑮᑭᒋᐅᑭᒫᐎᐋ, ᐋᓃᔥ ᒦᐃᓇᑫ ᑳᐃᓀᑕᒥᓂᒡ ᑳᑎᐯᒋᑫᓂᒡ᙮ 16 ᐯᔑᒃ ᐃᑕᔥ ᑫᑰᓐ ᑭᐐ ᑲᑴᒋᒥᓐ, ᑫᑯ ᑕᔥ ᐋᓉᑕᐎᔑᑫᓐ, ᐅᑮᐃᓈᓐ᙮ ᒦᔥ ᐅᐅ ᑳᐃᑯᒡ, ᐌᑯᓀᓐ ᐃᑕᔥ ᐁᑕᐌᑕᒪᓐ? ᐅᑮᐃᑰᓐ᙮ 17 ᒦᔥ ᑳᐃᓈᒡ, ᑕᑲ ᐊᐎ ᑲᑴᒋᒻ ᔂᓬᐊᒪᓐ ᑭᒋᐅᑭᒫ ᒋᒦᔑᒡ ᒋᐐᐎᐗᒃ ᐋᐱᔕᑰᓐ Abishag ᔔᓀᒻ Shunem ᐌᒌᓂᒡ, ᑳᐐᓐ ᐄᑐᒃ ᑮᓐ ᑭᑲ ᐋᓉᑖᑯᓰ, ᑮᐃᑭᑐ᙮ 18 ᒦᑕᔥ ᑳᐃᑯᒡ ᐹᔒᐸᐗᓐ, ᐌᐌᓂ ᓴ ᓂᑲ ᐃᔑᒋᑫ; ᑭᑲ ᑲᓅᒋᑫᑕᒪᐎᓐ ᓴ ᒋᑲᓅᓇᒃ ᑭᒋᐅᑭᒫ, ᐅᑮᐃᑰᓐ᙮ 19 ᐹᔒᐸ ᓴ ᑮᐃᔖ ᐁᑮ ᐊᑕ ᐙᐸᒫᒡ ᔂᓬᐊᒪᓇᓐ ᑭᒋᐅᑭᒫᓐ ᐁᐐ ᑲᓅᒋᑫᑕᒪᐙᒡ ᐊᑐᓈᐃᒐᐗᓐ᙮ ᑭᒋᐅᑭᒫᓐ ᓴ ᑮᐸᓯᑸᐗᓐ ᐁᐴᔔᐃᑯᒡ ᐁᑮ ᐊᓂᒥᑯᑖᓂᒡ, ᒦᔥ ᑳᐃᔑ ᐅᓇᐱᓂᒡ ᐅᑭᒋᐅᑭᒫᐗᐱᐎᓂᓃᕽ᙮ ᒦᔥ ᑳᐃᔑ ᑲᑴᑗᓂᒡ ᒋᐲᒋᑳᑌᓂᒃ ᑯᑕᒃ ᐅᑭᒫᐗᐱᐎᓐ ᐃᐃᒫ ᐁᑮ ᐃᔑ ᓇᒪᑕᐱᒡ ᐅᑭᒋᓂᑭᓃᕽ ᐃᓇᑫ ᔂᓬᐊᒪᓇᓐ᙮ 20 ᒦᑕᔥ ᑳᐃᔑ ᑲᑴᒋᒫᒡ, ᑫᑰᓀᔅ ᓴ ᑭᐱ ᑲᑴᒋᒥᓐ ᒋᑑᑕᐎᔭᓐ᙮ ᑫᑯ ᑕᔥ ᐋᓉᑕᐎᔑᑫᓐ! ᐅᑮᐃᓈᓐ᙮ ᓂᒫᒫ, ᐱᓵᓐ ᑲᑴᒋᒥᔑᓐ; ᑳᐐᓐ ᑭᑲ ᐋᓉᑕᐎᓯᓅᓐ, ᐅᑮᐃᑰᓐ᙮ 21 ᒦᑕᔥ ᑳᐃᓈᒡ, ᑕᑲ ᐊᑐᓈᐃᒐ ᑮᒋᑭᐌᓯ ᑕᒦᓈ ᒋᐐᐎᒡ ᐋᐱᔕᑰᓐ ᔔᓀᒻ ᐌᒌᓂᒡ, ᐅᑮᐃᓈᓐ᙮ 22 ᔂᓬᐊᒪᓐ ᑕᔥ ᐅᐅ ᐅᑮ ᐃᔑ ᓇᑴᑕᐙᓐ ᐅᒫᒫᓐ, ᐌᑯᓀᓐ ᑕᔥ ᐌᒋ ᑲᑴᑗᔭᓐ ᐋᐱᔕᒃ ᐌᒌᒡ ᔔᓀᒻ ᒋᒦᓂᑎᐸᓐ ᐊᑐᓈᐃᒐ? ᒦ ᓴ ᐯᔑᑾᓐ ᑫᐃᓀᑖᑾᑭᐸᓐ ᑲᑴᒋᒥᔭᐸᓐ ᒋᒦᓂᑎᐸᓐ ᑲᔦ ᓂᑑᑭᒫᐎᐎᓐ᙮ ᐐᓐ ᐄᑐᒃ ᑎᐱᓇᐌ ᓂᓴᔦᔅ᙮ ᐅᐐᒌᐎᑰᓐ ᐄᑐᒃ ᑲᔦ ᐊᐹᐃᑕᕒᐊᓐ Abiathar ᐊᓇᒥᐁᐎᑭᒫᓐ, ᒎᐊᐴᓐ Joab ᑲᔦ ᐌᒫᒫᓂᒡ ᓭᕒᐅᐋᔭᐗᓐ! ᑮᐃᑭᑐ᙮ 23 ᒦᑕᔥ ᔂᓬᐊᒪᓐ ᑳᑮ ᐊᐱᒧᒡ ᑳᑎᐯᒋᑫᓂᒡ ᐁᑮ ᐃᑭᑐᒡ, ᑕᑲ ᑭᔐᒪᓂᑑ ᐙᑑᑕᐎᒡ ᐃᑯ ᓂᑲ ᑑᑖᒃ, ᑮᔥᐱᓐ ᐊᑐᓈᐃᒐ ᐅᐱᒫᑎᓯᐎᓐ ᑎᐸᐃᑳᑫᓯᒃ ᐃᐃ ᑳᔑ ᑲᑴᒋᒥᒡ! 24 ᑳᑎᐯᒋᑫᒡ ᐄᑐᒃ ᓂᑮ ᐊᔩᑕᓯᒃ ᒋᓇᒪᑕᐱᐗᒃ ᓂᑌᑌᐸᓃᓐ ᑌᐱᑑᓐ ᐅᑑᑭᒫᐗᐱᐎᓂᓃᕽ᙮ ᑮᐃᔑᒋᑫ ᑳᑮ ᐃᔑ ᐊᔓᑕᒫᑫᑯᐸᓀᓐ, ᓃᓐ ᐁᑮ ᒦᔑᒡ ᐃᐃ ᐅᑭᒫᐎᐎᓐ, ᓂᐲᐌᓰᒪᐞ ᑲᔦ᙮ ᐁᔑ ᐱᒫᑎᓯᒡ ᓴ ᑳᑎᐯᒋᑫᒡ ᓂᑎᔑ ᐊᐱᒻ ᐊᑐᓈᐃᒐ ᒋᓂᐳᒡ ᓅᑯᒻ ᑳᑮᔑᑲᓂᓂᒃ! ᑮᐃᑭᑐ᙮ 25 ᒦᑕᔥ ᔂᓬᐊᒪᓐ ᑭᒋᐅᑭᒫ ᑳᑮ ᐊᓅᓈᒡ ᐲᓈᐃᐊᐗᓐ Benaiah ᐌᑌᑌᓂᒡ ᒉᐅᐃᐊᑖᐗᓐ Jehoiada ᒋᐊᐎ ᓂᓵᓂᒡ ᐊᑐᓈᐃᒐᐗᓐ᙮ ᐊᐹᐃᑕᕒ ᑮᐸᑭᑎᓂᓐᒡ ᐁᐊᓇᒥᐁᐗᓄᑮᐸᓐ, ᒎᐊᑉ ᐃᑕᔥ ᑲᔦ ᑮᓂᓯᓐᒡ 26 ᑭᒋᐅᑭᒫ ᔂᓬᐊᒪᓐ ᑕᔥ ᐅᑮᐃᓈᓐ ᐊᐹᐃᑕᕒᐊᓐ Abiathar ᐊᓇᒥᐁᐎᑭᒫᓐ, ᐌᑎ ᓴ ᑮᓐ ᐃᔖᓐ ᐊᓇᑕᑦ Anathoth ᑭᑕᑮᒥᕽ᙮ ᐃᔑᓈᑾᓐ ᑫᑮᓐ ᒋᓂᓯᑰᔭᐸᓐ, ᑳᐐᓐ ᐃᑕᔥ ᐃᐃ ᓅᑯᒻ ᑭᐐ ᑑᑕᐎᓯᓅᓐ, ᐋᓃᔥ ᑭᑮ ᐱᒥᐎᑖᐙᓐ ᑳᒫᐗᒋ ᑎᐯᒋᑫᒡ ᐅᑕᔓᑕᒫᑫᒪᑲᒃ ᒣᒀ ᑮᐐᒌᐗᑎᐸᓐ ᓂᑌᑌᐸᓐ ᑌᐱᑦ, ᑳᑮ ᐃᔑ ᑲᒀᑕᑭᓭᒡ ᑲᔦ ᑮᓐ ᑭᑮ ᑕᑯ ᑲᒀᑕᑭᑑ, ᐅᑮᐃᓈᓐ᙮ 27 ᒦᑕᔥ ᑳᐃᔑ ᐸᑭᑎᓈᒡ ᐃᐃ ᑳᑮ ᐃᔑ ᐊᓇᒥᐁᐎᑭᒫᐎᓂᐸᓐ ᐁᐸᒦᑕᐙᓂᐸᓐ ᑳᑎᐯᒋᑫᓂᒡ᙮ ᒦᔥ ᒪᔮ ᐁᑮ ᐃᔑᓭᓂᒃ ᑳᑎᐯᒋᑫᒡ ᑳᑮ ᐃᑭᑐᑯᐸᓀᓐ ᐌᑎ ᔖᐃᓬᐆ Shiloh ᐆᑌᓈᕽ ᑮᑕᔑᑕᒧᑯᐸᓀᓐ ᐄᓬᐋᐃᐗᓐ Eli ᐅᑖᐎᓂᓂ᙮ 28 ᐊᐲ ᑕᔥ ᒎᐊᑉ Joab ᐁᓅᑕᕽ ᐋᓃᓐ ᑳᐃᓇᑲᒥᑲᓂᓂᒃ, ᑫᐐᓐ ᐄᑐᒃ ᑳᑮ ᐐᒋᐋᒡ ᐊᑐᓈᐃᒐᐗᓐ, ᑳᐐᓐ ᐐᓐ ᐋᐸᓴᓬᐊᒨᓐ, ᒦ ᓴ ᑳᑮ ᐊᐸᐃᐌᒡ ᐅᑭᒋ ᐊᓇᒥᐁ ᐸᒀᓀᑲᒥᑯᓃᕽ ᑳᑎᐯᒋᑫᓂᒡ ᐁᑮ ᑭᒋᐎᓇᕽ ᑮᑫᔮᕽ ᐁᔑ ᑲᑳᔑᒋᑳᑌᓂᒃ ᐁᔑ ᐸᑭᑎᓈᓱᐎᓐᒡ᙮ 29 ᔂᓬᐊᒪᓐ ᑕᔥ ᑮᐐᑕᒪᐙ ᒎᐊᐴᓐ ᐁᑮ ᐊᐸᐃᐌᓂᒡ ᐅᑭᒋ ᐊᓇᒥᐁ ᐸᒀᓀᑲᒥᑯᓃᕽ ᑳᑎᐯᒋᑫᓂᒡ, ᐁᑮ ᐊᔮᓂᒡ ᐄᓴᓐ ᑳᔑ ᐸᑭᑎᓈᓱᐎᓐᒡ᙮ ᒦᑕᔥ ᑳᑮ ᐊᓅᓈᒡ ᐲᓈᐃᐊᐗᓐ ᐌᑯᓯᓯᒥᑯᓂᒡ ᒉᐅᐃᐊᑖᐗᓐ ᐅᐅ ᐁᑮᐃᓈᒡ, ᒫᒑᓐ ᐊᐎ ᓂᔑ! ᐅᑮᐃᓈᓐ᙮ 30 ᒦᑕᔥ ᑳᐃᔑ ᐃᔖᓂᒡ ᐅᑭᒋ ᐊᓇᒥᐁ ᐸᒀᓀᑲᒥᑯᓃᕽ ᑳᑎᐯᒋᑫᓂᒡ ᐅᐅ ᐁᑮᐃᓈᓂᒡ ᒍᐊᐴᓐ, ᐅᐅ ᓴ ᑭᒋᐅᑭᒫ ᑭᑎᒃ, ᐱᓵᑲᐊᓐ, ᐅᑮᐃᓈᓂ᙮ ᐅᐅ ᑕᔥ ᑮᒪᑗ ᐃᑭᑐᐗᓐ, ᑕᑲ ᒦ ᐃ, ᒦ ᓴ ᐅᐅᒫ ᐱᓵᓐ ᑫᑕᔑ ᓂᐳᔮᓐ! ᒦᔥ ᐲᓈᐃᐊᐗᓐ ᑳᐃᔑ ᐊᑕ ᐙᐸᒥᑯᒡ ᑭᒋᐅᑭᒫ ᐅᐅ ᐁᑮᐃᑯᒡ, ᒦ ᓴ ᐅᐌᓂ ᒎᐊᑉ ᐁᔑ ᓇᑴᑕᐎᒡ᙮ 31 ᒦᑕᔥ ᑭᒋᐅᑭᒫ ᑳᐃᓈᒡ ᐲᓈᐃᐊᐗᓐ, ᐃᔑᒋᑫᐤ ᓴ ᐃᐃ ᑳᐃᑭᑐᒡ᙮ ᓂᔑ, ᒦᔥ ᐃᔑ ᓂᑾᐙᑲᓐ᙮ ᑳᐐᓐ ᐃᑕᔥ ᑫᑰᓐ ᓂᑲ ᐃᔑ ᐊᓈᒣᑖᑯᓯᓰ, ᓂᑌᑌᕽ ᑲᔦ ᐌᑕᑳᓀᓯᐙᒡ ᐃᐃ ᒎᐊᑉ ᑳᐃᔑ ᓂᓵᑯᐸᓀᓐ ᐊᐎᔭᐞ ᑫᑰᓐ ᑳᑮ ᐃᔑ ᒪᒫᔒᓯᓂᑯᐸᓀᓐ᙮ 32 ᐐᓐ ᓴ ᐱᑯ ᒎᐊᑉ ᐅᑲ ᑎᐸᐊᒫᑰᓐ ᑳᑎᐯᒋᑫᓂᒡ ᑳᑮ ᐃᔑ ᓂᔑᐌᒡ᙮ ᑳᐐᓐ ᐄᑐᒃ ᐅᑮ ᑭᑫᑕᓰᓂ ᓂᑌᑌᐸᓃᓐ ᐅᐅ ᐁᑮ ᐃᔑᒋᑫᑯᐸᓀᓐ᙮ ᓃᔑᓐ ᑮᓂᓵᑯᐸᓐ ᐃᓂᓂᐗᐞ ᓇᐗᒡ ᑫᒋ ᐃᓀᑖᑯᓯᓂᒡ ᐊᐲᒡ ᐐᓐ᙮ ᒦᐗᒃ ᓴ ᐅ; ᐊᐱᓇᕒᐊᓐ Abner ᐌᑌᑌᓂᒡ ᓇᕒᐊᓐ Ner ᔑᒫᑲᓂᔒᐎᑭᒫᓐ ᑳᑮ ᓈᓈᑲᒋᐋᓂᒡ ᐃᔅᕒᐃᔭᓬᐃ ᔑᒫᑲᓂᔕᐞ, ᐃᓂ ᑲᔦ ᐊᒣᓴᐗᓐ Amasa ᐌᑌᑌᓂᒡ ᒌᑕᕒᐊᓐ Jether ᔑᒫᑲᓂᔒᐎᑭᒫᓐ ᑳᑮ ᓈᓈᑲᒋᐋᓂᒡ ᒎᑕᐗᑭ ᔑᒫᑲᓂᔕᐞ Judah᙮ 33 ᐃᐃ ᑳᑮ ᐃᔑ ᒪᒫᔒᒡ ᑕᑲ ᐐᓐ ᒍᐊᑉ ᐅᑲ ᐸᑲᒥᔥᑳᑰᓐ ᓀᐱᒡ ᐃᑯ, ᐃᐃ ᑲᔦ ᑲᑭᓇ ᐅᐲᐌᓰᒪᐞ᙮ ᐊᐊ ᑕᔥ ᐐᓐ ᑌᐱᑦ, ᐅᐲᐌᓰᒪᐞ ᑲᔦ, ᐅᑖᐎᓂᕽ ᑲᔦ ᐌᒌᓂᒡ, ᐃᐃ ᑲᔦ ᐁᔑ ᑭᒋᐅᑭᒫᐎᒡ ᐅᑲ ᐃᔑ ᔕᐌᓂᒥᑰᓐ ᑳᑎᐯᒋᑫᓂᒡ ᒋᓀᐱᒋ ᐊᔮᓂᒃ ᐱᓵᓂᓯᐎᓐ, ᐅᑮᐃᓈᓐ᙮ 34 ᒦᑕᔥ ᐲᓈᐃᐊᐗᓐ ᑳᐃᔑ ᐃᔖᓂᒡ ᐅᑭᒋ ᐊᓇᒥᐁ ᐸᒀᓀᑲᒥᑯᓃᕽ ᑳᑎᐯᒋᑫᓂᒡ ᐁᑮ ᓂᓵᓂᒡ ᒎᐊᐴᓐ᙮ ᐌᑎ ᑕᔥ ᐌᒌᓂᒡ ᐅᑕᑮᒥᓃᕽ ᑮᐃᔑ ᓇᐃᓈᐗᓐ ᐱᑾᑕᑲᒥᒃ᙮ 35 ᒦᑕᔥ ᔂᓬᐊᒪᓐ ᑳᑮ ᐃᓇᑭᒫᒡ ᐲᓈᐃᐊᐗᓐ ᒋᔑᒫᑲᓂᔒᐎᑭᒫᐎᓂᒡ ᒋᓈᐱᔥᑲᐙᓂᒡ ᒎᐊᐴᓐ᙮ ᓭᑕᑰᓐ Zadok ᐊᓇᒥᐁᐎᑭᒫᓐ ᑕᔥ ᐐᓐ ᐅᑮ ᐃᓇᑭᒫᓐ ᒋᓈᐱᔥᑲᐙᓂᒡ ᐊᐹᐃᑕᕒᐊᓐ᙮ ᔑᒥᐋᐃ ᑮᓂᓯᓐᒡ 36 ᑭᒋᐅᑭᒫ ᑕᔥ ᐅᑮ ᐊᑐᒫᓐ ᔑᒥᐋᐃᐗᓐ Shimei, ᒦᔥ ᐅᐅ ᑳᐃᓈᒡ, ᐅᔑᑕᒫᓱᓐ ᐙᑳᐃᑲᓐ ᑫᐃᔑᑖᔭᓐ ᐃᐃᒫ ᒉᕒᐆᓴᓬᐊᒥᕽ Jerusalem᙮ ᑫᑯ ᑕᔥ ᐃᑯᒋ ᐃᐃᒫ ᐅᒋ ᐃᔖᑫᓐ᙮ 37 ᐊᐲ ᓴ ᑮᔑᑲᒃ ᒫᒑᔭᓐ, ᐋᔕᐎᔥᑳᔭᓐ ᐃᑕᔥ ᐃᐃ ᑮᑕᕒᐊᓐ Kidron ᓰᐲᔅ, ᒦ ᓴ ᐃ ᑫᒋᓈᒡ ᒋᓂᐳᔭᓐ; ᑮᓐ ᐃᑕᔥ ᐃᑯ ᐃᐃ ᑫᑑᑖᓱᔭᓐ, ᐅᑮᐃᓈᓐ᙮ 38 ᒦᑕᔥ ᐅᐅ ᔑᒥᐋᐃᐗᓐ ᑳᐃᑯᒡ, ᐅᓂᔑᔑᓐ ᓴ ᐃ ᑳᐃᑭᑐᔭᓐ᙮ ᑭᑕᓄᑮᐋᑲᓐ ᓴ ᑯ ᑕᐃᔑᒋᑫ ᐅᑑᑭᒫᒪᓐ ᑭᒋᐅᑭᒫᓐ ᐁᐃᑯᒡ, ᑮᐃᑭᑐᐗᓐ᙮ ᒦᔥ ᔑᒥᐋᐃᐗᓐ ᑭᓉᔥ ᑳᐃᔑᐊᔮᓂᒡ ᐃᐃᒫ ᒉᕒᐆᓴᓬᐊᒥᕽ᙮ 39 ᓂᓱᐱᐴᓐ ᐃᑕᔥ ᐁᐊᓂ ᐃᔑᓭᓂᒃ, ᓃᔑᓐ ᔑᒥᐋᐃ ᐯᒦᑖᑯᒡ ᑮᒫᒌᐸᐃᐌᐗᐞ ᐁᑮ ᐊᐸᐃᐌᓂᒡ ᐁᔑᐊᔮᓂᒡ ᑭᒋᐅᑭᒫᓐ ᐁᑭᔥ Achish ᐁᔑᓂᑳᓱᓂᒡ ᐌᑌᑌᓂᒡ ᒫᐊᑲ Maacah ᐌᒌᓂᒡ ᑲᑦ Gath ᐆᑌᓈᕽ᙮ ᒦᔥ ᑳᑮᐃᓂᓐᒡ, ᑳᐸᒦᑕᐎᒀ ᓴ ᐌᑎ ᐊᔮᐗᒃ ᑲᑦ ᐆᑌᓈᕽ, ᑮᐃᓈ᙮ 40 ᒦᑕᔥ ᑳᑮ ᐅᓇᐱᓈᒡ ᐅᒫᔑᒥᑕᑎᒨᒪᓐ ᐁᑮ ᐃᔖᒡ ᐁᔑᐊᔮᓂᒡ ᐁᑭᔕᓐ ᑭᒋᐅᑭᒫᓐ ᑲᑦ ᐆᑌᓈᕽ ᐁᑮ ᐊᑐᓀᐙᒡ ᐯᒦᑖᑯᒡ᙮ ᒦᔥ ᑳᑮ ᒥᑲᐙᒡ, ᑲᑦ ᐆᑌᓈᕽ ᐁᑮ ᐱᐅᒋ ᑮᐌᐎᓈᒡ᙮ 41 ᔂᓬᐊᒪᓐ ᑕᔥ ᑮᓅᑕᒻ ᔑᒥᐋᐃᐗᓐ ᒉᕒᐆᓴᓬᐊᒥᕽ ᐁᑮ ᐅᒋ ᒫᒑᓂᒡ ᐁᑮ ᐃᔖᓂᒡ ᑲᑦ ᐆᑌᓈᕽ, ᒦᓇᐙ ᓴ ᐁᑮ ᐱᑮᐌᓂᒡ᙮ 42 ᒦᑕᔥ ᑳᑮ ᐊᑐᒫᒡ ᔑᒥᐋᐃᐗᓐ ᐁᑮᐃᓈᒡ, ᑭᑮ ᐃᔑ ᐊᐱᒧᓈᐸᓐ ᐄᑐᒃ ᑳᑎᐯᒋᑫᒡ ᐅᐐᓱᐎᓂᕽ ᐐᑳ ᒋᓇᑲᑕᓯᐗᓐ ᒉᕒᐆᓴᓬᐊᒻ᙮ ᒦᑕᔥ ᑲᔦ ᐅᐅᐌ ᑳᐃᔑ ᐊᔮᒀᒥᒥᓈᐹᓐ, ᐊᐲ ᑮᔑᑲᒃ ᒫᒑᔭᓐ ᐃᑯᒋ ᐃᔖᔭᓐ, ᒦ ᓴ ᐃ ᑫᒋᓈᒡ ᒋᓂᐳᔭᓐ! ᐅᐅ ᑕᔥ ᑭᑮ ᐃᔑᓈᐸᓐ, ᐅᓂᔑᔑᓐ ᐃᐃ ᑳᐃᑭᑐᔭᓐ᙮ ᓂᑲ ᓇᐃᑕᒻ, ᐁᑮᐃᔑᔭᐸᓐ᙮ 43 ᐌᑯᓀᓐ ᐃᑕᔥ ᑳᐅᒋ ᑲᓇᐌᑕᓯᐗᓐ ᑳᑮ ᐃᔑ ᐊᐱᒧᓄᑕᐗᑎᐸᓐ ᑳᑎᐯᒋᑫᒡ, ᐁᑮ ᐃᔑᒋᑫᓯᐗᓐ ᑳᑮᐃᓂᓈᐹᓐ? ᐅᑮᐃᓈᓐ᙮ 44 ᒦᑕᔥ ᐅᐅ ᑭᒋᐅᑭᒫ ᑳᐃᓈᒡ, ᑭᑭᑫᑖᓐ ᐄᑐᒃ ᑭᑌᐃᕽ ᑲᑭᓇ ᑳᑮ ᐃᔑ ᒫᔑ ᑑᑕᐗᒡ ᓂᑌᑌᐸᓐ ᑌᐱᑦ David᙮ ᓅᑯᒻ ᐃᑕᔥ ᑳᑎᐯᒋᑫᒡ ᑭᑲ ᑎᐸᐊᒫᒃ ᑳᑮ ᐃᔑ ᒫᔑ ᑑᑕᐎᒪᒡ᙮ 45 ᓃᓐ ᐃᑕᔥ ᐐᓐ ᓂᑲ ᒥᓄᓭᐃᒃ, ᐅᑲ ᐃᔑᑑᓐ ᑲᔦ ᑌᐱᑦ ᑳᑮ ᐃᔑ ᐅᑭᒫᐎᓂᒡ ᐐᑳ ᒋᐴᓂᓭᓯᓂᓂᒃ, ᐅᑮᐃᓈᓐ᙮ 46 ᒦᑕᔥ ᑭᒋᐅᑭᒫ ᑳᑮ ᐊᓅᓈᒡ ᐲᓈᐃᐊᐗᓐ ᒋᐊᐎ ᓂᓵᓂᒡ ᔑᒥᐋᐃᐗᓐ᙮ ᒦᔥ ᑳᐃᔑ ᓂᓵᓂᒡ᙮ ᒦᑕᔥ ᔂᓬᐊᒪᓐ ᐅᑑᑭᒫᐎᐎᓐ ᑳᑮ ᐊᔩᑕᑌᓂᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society