ᔂᓬᐊᒪᓐ ᐅᓂᑲᒧᓇᓐ 8 - Ojibwe Kihcimasina'ikan

¹ Ampehsh inaa nintawemaa inawemiyampan, nimaamaa kii⁠nooni'ihkipan. Pisaan itahsh kitaa ociimin mohsheya'ii, kaawiin itahsh awiya kekoon ta⁠inentansii.

² Kitaa ishi kihkinowinin hsa ci‑ishiwininaampaan nimaamaa owaahkaa'ikanink kaakiih kihkino'amawitc. Miitahsh keshi mina'inaan shoominaapo tekwaakaminikaatek, shiiwimiicimink wenci oshihcikaatek shoominaapo.

³ Kinamantinihk hsa kitaapacihtoon ci⁠apihkwehshimoyaan. Kikihcinihk itahsh kitaapacihtoon e⁠minciminiyan.

⁴ Ihkwewak Ceroosalamink eyaayek, kiwiintamawininim ci⁠ahpimoyek keko wanashkwe'ihshinaahkaank o'o kaa⁠minwenintiyaank, paanimaa kiihte minwenintiyaank.

Ninkotwaahso Nikamowin Pahkaan ihkwewak eh⁠kakitowaatc

⁵ Awenen itahsh a'a pikwatahkamik kaa⁠pionci pinaakositc, kaapi naapinihke'waatc kaa⁠minwenimaatc? Weti hsa shiipaayaahtik pihshiiminaahtikonk kikii ishi amaci'in, mii iitok weti kimaamaa kaah⁠tashi nihtaawiki'ihkipan.

Ihkwe Ehkitotc

⁶ Keko tahsh wiin pahkaan awiya minwenimaahken kite'ink, niin ehta ko; keko pahkaan awiya minciminaahken. Minwenimiwewin hsa ishi mashkawentaakwan taapishkoo nipowin kaashi mashkawentaakwahk, mihsawenintiwin e⁠ishi mashkawentaakwahk nipowinink, e⁠inentaakwahk ishkotenk kaa⁠piskanek, maawac iko kaa‑aahkwentaakwahk tino ishkote.

⁷ Kaawiin niipiwa' nipiink ta⁠onci aahtawe'ikaatehsinoon minwenimiwewin, kaawiin siipink ta⁠onci nihsaapaawehsinoon. Kiishpin awiya pakitinank kahkina otaya'iiman kaashi wenootisitc ewii ataawetc minwenimiwewin, ta⁠mihci paahpi'aa iitok.

Ehkitonitc ihkwe otawemaa'

⁸ Nintayaawaanaan ohsha nintawemaanaan e⁠ihkwewitc, kaawiin mahshi ci⁠ocoocoohshimitc. Aaniin itahsh inaa ke⁠ishihcikeyank ahpii kiishikaninik pi⁠kakwecimikoyank e⁠mihsawenimaakaniwitc?

⁹ Kiishpin ihsa aahsamaapihkihsicikan tenowikwen, mii hsa imaa kaa⁠waapishooniyaa waapihkowankin onsaapiwinan keshi onahkitooyank. Kiishpin ihsa wiin eshkwaantemiwikwen, ninka waahkaa kipa'waanaan ihsa ci⁠aapaci'imankitc kiishkaahtikowi napakihsakoo'.

Ihkwe Ehkitotc

¹⁰ Niin ohsha aahsamaapihkihsicikan, nincoocoohshimak hsa mii 'i enentaakosiwaatc taapishkoo onsaapiwinink, miitahsh eshinawitc kaa⁠minwenimak eh⁠tinowiwak kaa⁠minwentamo'ikotc.

Inini Ehkitotc

¹¹ Swaalaman hsa otayaan eshi kihtikaanaatc shoomina' weti Peyal Heman (Baal Hamon) eshinihkaatank. Ayaawa' hsa kehtikaataminitc kaa‑awi'aasomikotc tepa'amaakotc itahsh, entahshinitc mitaahswaahk waapaapihko shooniyaanhsa' eh⁠tipa'amaakotc.

¹² Swaalaman hsa pisaan otootaahpinaa' mitaahswaahk shooniyaanhsa', neniishwaahk itahsh e⁠maamiinaatc entahshinitc i'i kehtikenitc kaa‑awi'aasomikotc. Niin hsa wiin nintipinawewis kaashi kihtikaasowaatc shoominak.

¹³ Kaa⁠minweniminaan, taka weti kaashi kihtikenk tanwewitan ci⁠noontaakooyan; oko ohsha kaa⁠wiiciiwiwaatc antoohtamook ewii noontawihkwaa kiikitowatc.

Ihkwe Ehkitotc

¹⁴ Taka ampe, pi'anta waapamihshin kaa⁠minweniminaan, mayaki waawaashkeshiink enentaakosiyan, taapishkoo oshki ayaape waawaashkeshi eyaatc waciink eshi nihtaawikininikin takosehkwaanan.