ᔂᓬᐊᒪᓐ ᐅᓂᑲᒧᓇᓐ 7 - Ojibwe Kihcimasina'ikan

Inini Ehkitotc

¹ Etatawe hsa kiminonaakos e⁠ihkwewiyan, etatawe minonaakwanoon kisitan eh⁠kikahkisineyan. I'i hsa kaashi minwaahkopwaameyan mii hsa 'i eshinaakwahk taapishkoo tino ahsin kaa‑akinsotc, eshi maaciitc a'a kaa⁠nakacihtootc kekoon e⁠oshihtootc.

² Mii hsa 'i kitihs enentaakwahk taapishkoo kaa⁠waawiyeyaak minihkwaakan, wiihkaa kaashi caakihsehsinok shoominaapo. Kimihsat hsa mii 'i enentaakwahk taapishkoo pahkweshikaniminan kaa⁠ohkohsinkin, waapikwaniin kaa⁠waahkaa ayaakin i'imaa.

³ Kicoocoohshimak hsa inentaakosiwak taapishkoo kaa⁠niishootewiwaatc waawaashkeshiinhsak, kaa⁠niishiwaatc mayaki waawaashkeshiwak.

⁴ Kihkwekan hsa ehpiihci minonaakwahk taapishkoo onsaapiwin kaa⁠onci oshihcikaatek misiwekan wiipitaank. Miihsh kishkiinshikoon eshinaakwahkin taapishkoo saaka'ikaniinhsihkaanan eyaakin i'imaa ootenaank Heshpan (Heshbon), ciikaya'ii kihci ishkwaantemink Pahtraapim (Bath Rabbim) ecikaatek. Kihshankwan enentaakwahk taapishkoo Lepanan kaa⁠ishpahkitek onsaapiwin ci⁠onci kanawaapancikaatek Timaaskahs ootena.

⁵ Kihtikwaan hsa etatawe kiminonaakoshkaakon taapishkoo waciw Kaarmal ecikaatek kaashi minonaakohcikemakahk. Kiinisihsan e⁠waawaahsaapiikitekin mii hsa 'i eshinaakwahkin taapishkoo wenishihshink senipaawekin, kihciokimaa hsa kaawiin anihsaa'ohsii ci⁠kanawaapantankipan.

⁶ Etatawe hsa kitoonishihsh, wiinke e⁠minonaakosiyan, etatawe tepi minwentaakwan kaashi minwenimiweyan.

⁷ I'i hsa eshi minokiyan taapishkoo paam tinowaahtik kitinentaakos, kicoocoohshimak e⁠inentaakosiwaatc taapishkoo kaa⁠ohkwakootek shiiwimiicim.

⁸ Ninka ahkwaantawe hsa a'a mihtik ci⁠mawinswaatamaan ini nehtaawikinkin i'imaa. Mii hsa 'i enenimakwaa kicoocoohshimak taapishkoo shoominak kaa⁠ohkwa'oosowaatc, taapishkoo hsa eshi maakosiwaatc pihshiiminak, mii 'i mayaa eshi maakwanaamoyan,

⁹ kitoon kaye shoominaapoonk e⁠ishi maakwahk. Taka ta⁠ishiciwanini i'i shoominaapooni eshi'ayaatc kaa⁠minwenimak, ci⁠ani ishiciwaninik otoonink, wiipitaank kaye.

Ihkwe Ehkitotc

¹⁰ Nintipenimik kaa⁠minwenimitc eh⁠pakohsentank ci⁠ayaawitc.

¹¹ Taka ampe kaa⁠minweniminaan, taka ishaataa weti mihshawahkamik, ci⁠awi katikoniyank weti eshitaaniwank.

¹² Taka hsa wiipa ishaataa weti kaashi kihtikaasowaatc shoominak, taka aasha ci⁠saakipakiiwaakwen, taka aasha ci⁠maaciikiwaakwen, taka kaye iki mihtikook kaashi nihtaawikink shiiwimiicim aasha ci⁠kiishikiwaakwen, miitahsh weti ketashi minweniminaan.

¹³ Miitahsh ci⁠minaantaman tino kaa⁠nihtaawikinkin wenci otapinoonciishimink, kahkina kaye wenishihshink shiiwimiicim nehtaawikink pehsho akwaciink ishkwaantenk e⁠ayaak. Kaa⁠minweniminaan, ninkii mawaacihtoon ohsha otaanaank kaakii nihtaa minwentamo'ikoyan, oshki kekoon kaye ke⁠minwentamo'ikoyan.