ᔂᓬᐊᒪᓐ ᐅᓂᑲᒧᓇᓐ 1 - Ojibwe Kihcimasina'ikan

¹ Miiwan ono maawac menohtaakwaninikin Swaalaman (Solomon) onikamonan.

Nihtam Nikamowin Ihkwe Ehkitotc

² Kitoon ihsa kitaapacihtoon misiwe eshi ociimiyan; kiminwencikewin ihsa ciihkentaakwan ahpiihc wiin shoominaapo.

³ Wiinke hsa kiminomaakos, kiwiinsowin eshimaakwahk taapishkoo minaako'onink. Mii iitok oshkiniikihkwewak kaa⁠onci saaki'ihkwaa.

⁴ Taka maaciishihshin, weyiip maacaataa. Ishiwishihshin kipahkehcikanik ninkihciokimaam. Nawac ihsa kika kihci minwenitimin ahpiihc wiin cikii ciihkentamankipan shoominaapo. Kaawiin itahsh kika kihkentansiimin eshihcikeyank ke⁠ahpiihci minwenintiyank. Miitahsh iinsan kahkina ihkwewak kaa⁠onci saaki'ihkwaa!

⁵ Ihkwewak eyaayek kihci ootenaank Ceroosalamink (Jerusalem), nimahkatewaahs, shaakooc itahsh nintoonishihs, e⁠ishi mahkatewinaakosiyaan taapishkoo pakwaanekamikoon eshinaakwahkin eyaakin Kiitar (Kedar) ayaawinink. Shaakooc itahsh nintishiminonaakos eshi minonaakwaninikin Swaalaman (Solomon) okipiika'ikanan kihciokimaawikamikonk.

⁶ Keko tahsh onci kihci kanawaapamihshihken e⁠mahkatewaahsoyaan, kiisihs iitok a'a kaakii mahkatewaahsotc. Nintawemaak ohsha ninkii nishki'aak, miihsh kaah⁠tootawiwaatc ci⁠anohkiiwak kaashi kihtikaasowaatc shoominak, kaawiin itahsh niin ninkii ishihsehsii ci naakaci'itisoyaan.

⁷ Kaa⁠minweniminaan, wiintamawihshin aanti eshiwinatwaa kimaanahcaanihshimak ketashi wiihsiniwaatc, aanti kaye ketashi anwehshinowaatc aapihta kiishikaninik. Wekonen tahsh ke⁠onci papaa nanaantone'onaampaan eshi ayayaawaatc kotak kaa⁠naanaakaci'aawaatc maanahcaanihsha'.

Inini Ehkitotc

⁸ Kaa⁠minweniminaan, maawac wenishihshiyan, kiishpin kihkentansiwan aanti eshi ahshamakwaa, pima'ash aanti eshihkawewaatc ci⁠mihkamowatc entashi wiihsiniwaatc kimaanatihkomak ciikaya'i eshi patahkitenikin opakwaanekamikowaan iki kenawenimaawaatc maanatihkwa'.

⁹ Kaa⁠minweniminaan, kimisawinaakook ihsa ininiwak kii⁠waapamihkwaa, taapishkoo aape mihtatimoo' kaa⁠tootawaawaatc noonshe mihtatimoo' wetaapiinitc Peroon (Pharaoh) otootaapaanaahkoni.

¹⁰ Kiinisihsan ihsa minonaakwanoon e⁠inaapiikihsinkin kiwanowaank, e⁠ani inaapiikihsinkin kikwekanink eshinaakwahkin taapishkoo wenishihshiwaatc kaa⁠nipitehpisowaatc asiniinhsak naapihkaakaniminak.

¹¹ Naapihtepisonak hsa kika onci oshihtamaako osaawi shooniyaa waapihkonk, waapaapihko shooniyaa waapihk ci⁠aapatisitc ci⁠mansinihcikaakaniwitc.

Ihkwe Ehkitotc

¹² Ninkihciokimaam itahsh ehwiihsinitc tapasitoopowinaahkonk, niminaako'on ihsa wiinke mooshkinemaakwan e⁠minomaakwahk.

¹³ Kaa⁠minwenimak pikiiwiminaako'onink ishimaakosi eh⁠pimihshink nincoocoohshimink.

¹⁴ Kaa⁠minwenimak ihsa inentaakosi taapishkoo waapikwaniin eyaakin i'imaa eshi nihtaawikiwaatc shoominak Enkiitii (Engedi) ecikaatek.

Inini Ehkitotc

¹⁵ Kaa⁠minweniminaan etatawe hsa kiminonaakos, wiinke kitoonishihsh. Kishkiinshikoon ishinaakwanoon taapishkoo omiimiiwishkiishikoon.

Ihkwe Ehkitotc

¹⁶ Kaa⁠minweniminaan, etatawe kiminonaakos, wiinke kiminwentami'ihsh, mashkohsiink ihsa kika tashi wiihpentimin.

¹⁷ Kiishkaahtikook ihsa kika onaawinte'okanaahkomin kiwaahkaa'ikaninaanink, Saaipares (Cypress) tinowaahtikook itahsh aapatisiwak e⁠ahpahkwaanaahkoowiwaatc.