ᐅᕒᐆᒪᓇᒃ 6 - Ojibwe Kihcimasina'ikan

Inenintisok ekii'nipoyek macitootamowin citipenimikohsiwek

¹ Aaniin itahsh keihkitoyankipan? Keyaapi na kikani‑ishipimaatisimin macitootamowinink awahshime piko cianiayaamakaninik Kishemanitoo oshaawencikewin?

² Kaawiin kanake taishinaakwahsinoon! Kitinentaakosimin iitok ekii'ishinipoyank macitootamowin citipenimikohsiwank: kaawiin tahsh ishinaakwahsinoon keyaapi ci‑ishipimaatisiyankipan ehtipenimikoyank macitootamowin.

³ Kehcinaac aasha kikihkentaanaawaatok o'o: kahkina kaatahshiyank kaakii'ishisiika'antaakooyank ciwiiciiwank a'a Christ Ciisahs, tako kaye 'iwe kikii'ishisiika'antaasomin ciwiiciiwikowank onipowin.

⁴ Ahpii tahsh kaakiihsiika'antaasoyank, kikii'wiici⁠na'inikoomaanaan a'a Christ ekii'wiici'iweyank i'imaa onipowinink. Shikwa tahsh peshikwan a'awe Weyoohsimintc ekii'aapacihtootc i'iwe maawac kaakihci‑inentaakwaninik omashkawisiiwin ekiihkiiwepimaatisi'aatc Christan kaakii'niponitc, miitahsh i'i kekiinawint peshikwan oshkaya'iink ci‑ishipimaatisiyank.

⁵ Inashke hsa peshikwan kikashitakowiiciiwaanaan, peshikwan ekii'ishionipowiniyank wiin kaakii'ishinaakwaninik onipowin Christ. Miihsh i'i taapishkoo peshikwan kikashitakowiiciiwaanaan ci‑ishikiiwepimaatisi'ikooyank wiin iko kaakii'ishi kiiwepimaatisi'intc.

⁶ Aaniihsh kikihkentaamin o'o: i'iwe otaanaank kaakii'ishipimaatisiyankipan kii'wiitaahpinacikaate i'imaa Ciisahs kaakii'ishiakosaka'ikaniwitc aashiteyaahtikonk. Mii 'iwe cionciaanihsahk i'i kaawii'nihtaa macihcikemakahk pimaatisiwinimaank, miihsh i'iwe ekaa miinawaa keyaapi ciawahkaanikohsiwank i'i macitootamowin.

⁷ Aaniihsh awiya kaanipotc kaawiin awiyan otipenimikohsiin, macitootamowin kaawiin oka‑awahkaanikohsiin.

⁸ Kiishpin i'iwe ishinaakosiyank ekii'wiicinipoomank a'a Christ, miitahsh i'i kitepwehtaamin kaye ciwiicipimaatisiimank.

⁹ Kikihkentaamin a'a Christ ekiihkiiwepimaatisi'intc nipowinink onci, miinawaa wiihkaa cinipohsik. Kaawiin miinawaa wiihkaa okakashki'ikohsiin i'i nipowin citipenimikotc.

¹⁰ I'iwehsh ekii'nipotc a'a Christ, kii'ishinipo ekaa miinawaa wiihkaa cikakwetipenimikohsik macitootamowin. I'iwehsh noonkom eshipimaatisitc opimaatisiihtawaan Kishemanitoon.

¹¹ Miihsh peshikwan kekiinawaa kitaainenintisom, ekii'ishinipoyek wiihkaa miinawaa cikashki'ikohsiwek macitootamowin, shikwa meshkwac cipimaatisiihtawek Kishemanitoo, mii 'iwe e'wiiciiwinek Christ Ciisahs.

¹² Keko miinawaa keyaapi macitootamowin tatashi okimaahkantaakemakahsinoon i'imaa kiwiiyawiwaank kenipoomakahkin, miinawaa cina'ihtansiwek i'iwe kikehteinaatisiwiniwaa waahkakweishihcikemakahk.

¹³ Kaawiin kekoon eshipahkesiwineyek kikamiikiwaatamawaatansiim i'i macitootamowin citashiaapatahk macihcikewinink inahke. Meshkwac itahsh kikamiinaawaa Kishemanitoo kiwiiyawiwaan wiiniko citipentank. Kiinawaa kikii'inentaakosim ekii'nipoyek, noonkom itahsh kipimaatisim. Mii 'iwe misiwe ishipakitinitisohkantawihk Kihshemanitoo i'imaa ci‑inaapatisiyek kwayahkohcikewinink.

¹⁴ Keko wiin macitootamowin kikaniokimaahkantaakohsiinaawaa. Aaniihsh kaawiin inaahkonikewinink kitashi tipentaakosihsiim, i'imaa tahsh Kishemanitoo oshawencikewinink.

Kwayahk ishihcikewin citipenimikoyek

¹⁵ Aaniin tahsh keinentaakwahk? Mii na pisaan iko cianimacitootamank, i'iwe ehkihkentamank ekaa inaahkonikewinink e'oncitipentaakosihsiwank, i'imaahsh ehta Kishemanitoo oshawencikewinink e'ishitipentaakosiyank? Kaawiin kanake taainentaakwahsinoon.

¹⁶ Kaawiin ina kikihkentansiim? Kiishpin pakitinitisoyek pahkaan awiya ciotawahkaaniminek kaye cina'ihtawek awiya, miitahsh i'i tepwe ciotanohkii'aakaniminek a'a kaatipeniminek e'na'ihtawek. Komaa macitootamowin kikana'ihtaam, mii iitok i'imaa wenciik nipowin. Komaa kaye Kishemanitoo kikana'ihtawaawaa, miitahsh i'imaa cionci inahsikooyek kwayahk ciminowiiciiwek.

¹⁷ Noonkom itahsh Kishemanitoo tananaahkomaa! Weti otaanaank kikiihpiayintim macitootamowin ekii'otawahkaanimikoyek, ekiihtashitipenimikoyekipan. Miinawaa tahsh inkotink pahkaan kikii'ishinana'ihtaam, enikohkote'eyek ekiihtootamek kaaishiwaapantamek i'i kihkino'amaakewin kaakii'miinikooyek.

¹⁸ Kaye 'iwe ahpii kikii'aapiskonikowaa Kishemanitoo macitootamowin citipenimikohsiwek. Miitahsh ekwa' Kishemanitoo ciotanohkii'aakaniminek kaakwayahkwahk itahsh citootamek.

¹⁹ Taka tahsh kaanihtaa⁠ishikiishwenaaniwank niwii'aapacihtoonan e'wahkenihsitohtansiwek e'mihci ininiiwi pimaatisiyek. Inkotink iko misiwe kikiihpakitinitisom kaawiinentaakwahk ci‑inaapaci'ikoyek ekii'otawahkaanimikoyek, kaye kahkina kekoon macihcikewin ekii'ani wenooci tootamek. Miitahsh peshikwan noonkom ishimisiwe⁠pakitinitisok kwayahkohcikewinink, mii 'imaa ci‑ishiaapatisiyek, cipahkaani⁠awahkaanikooyek, misiwe piko Kishemanitoo citipeniminek.

²⁰ Inashke mekwaa otaanaank ekii'otawahkaanimikoyek macitootamowin, kaawiin 'iwe ahpii kikiihtipenimikohsiiwaam kaaishiantawentank Kishemanitoo citootamowek.

²¹ Wekonen tahsh kaakii'ontinamek ekii'nihtaatootamek ini kekoonan noonkom kaa‑akatentamek? Inashke iniweniwan ehtootank awiya, mii ehta nipowin ciontinank.

²² Aasha tahsh Kishemanitoo kikii'aapa'okowaa i'imaa kaakii'ishitipenimikoyekipan macitootamowin, wiin itahsh meshkwac ehtipeniminek taapishkoo e'otanohkii'aakanitc. Noonkom itahsh mii 'owe eshiontisiyek, misiwe Kishemanitoo ehtipentank kipimaatisiwiniwaan, piinihsh kaye ewii'miininek i'i pimaatisiwin ekaa kewehkwaa‑ayaahsinok.

²³ Nashke macitootamowin awiya ehtootank nipowinini taontisi. I'iweni tahsh wiin Kishemanitoo kaamihcimiikiwetc pimaatisiwin, kaawiin wiihkaa tawehkwaahsehsinini. Mii 'iwe kitooncimiinikoomin Christ Ciisahs kaaTipeniminank e'wiiciiwinank.