ᐅᕒᐆᒪᓇᒃ 4 - Ojibwe Kihcimasina'ikan

Eparahaam otepwehtamowinink mii 'imaa kwayahk kaakii'onciminowiiciiwaatc Kishemanitoon

¹ Aaniin tahsh keinak a'a kaakii'okehteaya'aamiyaank Eparahaam (Abraham), niinawint kaaCoowiwiyaank kaaontahkaanesiyaank? Wekonehsh wiin kaa'aniotihtaapantank?

² Kiishpin wiin otishihcikewinink kaakii'onci‑inahsikotc cionciminowiiciiwaatc Kishemanitoon, otaakii'ontinaan kekoon ciminomaamiihkwaatankipan. I'imaa tahsh kaashiwaapancikenitc Kishemanitoon kaawiin kekoon okii'ayaahsiin cimaamiihkwaatank.

³ O'owe aaniihsh ihkitoomakan kihcioshipii'ikewin: “Eparahaam okiihtepwehtawaan Kishemanitoon, miitahsh i'imaa kaakii'onci‑inakimikotc ehkwayahkwaatisitc.”

⁴ Inashke, kaa‑ayanohkiitc awiya, otipa'amaakoowin kaawiin miinikoowin inakintehsinini, mii hsa enakintenik ekiihkashkihtamaasotc.

⁵ Inashke tahsh wiin awiya kaakashkihtamaasohsik ciminwaapamikotc Kishemanitoon, e'ahpenimonotawaatc itahsh, owaapamikoon ehtepwehtawaatc. Miitahsh aanawiin ekiihpi⁠maci‑ishiwepisitc, mii 'owe otikoon: “Kaawiin kekoon kitinenimihsinoon, kikainakimin ehkwayahkwaatisiyan,” e'ikotc. Mii 'iwe otepwehtamowinink a'a inini kaaonci‑inahsikotc kwayahk ciminowiiciiwaatc Kishemanitoon.

⁶ Mii 'iweni kaa'itank a'a Tepit (David) ekiihtashintank kaaishishawenimimintc ini ininiwan kwayahkwaatisiwinink kaainenimikonitc Kishemanitoon aanawiin kekoon ekii'anohkaatansinik ini ininiwan cionciotaahpinikonitc Kishemanitoon. Mii 'owe ehkitotc:

⁷ “Shawentaakosiwak ikiweniwak omacihcikewiniwaan kaapoonentamawintwaa, omacitootamowiniwaan wiinke kaakiihkaahsiinamawintwaa!

⁸ Shawentaakosi a'a inini omacitootamowin ekaa wiihkaa ewii'akintamaakohsik kaaTipencikenitc!” kii'ihkito Tepit.

⁹ O'owe tahsh shawentaakosiwin, ikiweniwak ina ehta kaakihkinawaatashakeshikaniwiwaatc oka‑ayaanaawaa? Kaawiin. Kaye hsa ko kewiinawaa kaakiih⁠kihkinawaaci'aahsiwintwaa oka‑ayaanaawaa. Aaniihsh ninkiihtashimaanaan a'awe Eparahaam ekiihtepwehtawaatc Kishemanitoon, miitahsh kaakii'onci inakimikotc ehkwayahkwaatisitc.

¹⁰ Aaniin mayaa ahpii kaa'maaci inakimikotc ehkwayahkwaatisitc? Cipwaa kihkinawaatashakeshikaniwitc ina? Kaa'ishkwaa kihkinawaatashakeshikaniwitc ina? Kaawiin kaa'ishkwaatootawintc, cipwaa tootawintc ihsa kii'inakimaa cikwayahkwaatisitc.

¹¹ Naanaake tahsh kiih⁠kihkinawaatashakeshikaniwi. Mii 'iwe kaa'ishihcike'intc, mooshak iko cikihkencikaatek mii 'imaa otepwehtamowinink ekii'onci‑inakimintc ehkwayahkwaatisitc. Aaniihsh cipwaa kihkinawaacishontc okii'ishiotaahpinikoon Kishemanitoon. Miitahsh i'iwe e'inentaakositc Eparahaam e'oyoohsimikotc kahkina awiya' kaatepwehtawaanitc Kishemanitoon. Kewiinawaa hsa otishiotaahpinikowaan Kishemanitoon cikwayahkwaatisiwaatc aanawiin wiihkaa ekiih⁠kihkinawaatashakeshwaahsiwintwaa.

¹² Shikwa ikiweniwak kaakiih kihkinawaatashakeshikaniwiwaatc kaye wiinawaa peshikwan otooyoohsimaawaan Eparahaaman. Kaawiin ehta okihkinawaaci'ikoowiniwaank onci oyoohsihsiiwak, i'iwe hsa wiin e'naapa'amaanaawaatc ini Eparahaaman kaakii'ishi otepwehtamowininitc, kaakii'ishipimaatisinitc cipwaa kihkinawaaci'imintc.

Otepwehtamowinink awiya taishimiinaa i'iwe kaainahshotamaakenitc Kishemanitoon

¹³ Inashke Kishemanitoo okiih⁠pii tahshotamawaan Eparahaaman (Abraham) miinawaa opiiwesiimini piciinak citipentaminitc o'o ahkiini. O'owe tahsh kaakii'inahshotamawintc Eparahaam, kaawiin i'imaa ekiihkanawentank Inaahkonikewin kii'oncimiinikowisihsii. I'imaa hsa wiin ekiihtepwehtawaatc Kishemanitoon kayehsh ekii'onci‑inakimikotc ehkwayahkwaatisitc, mii hsa wiin i'imaa kaa'onci⁠ahshotamaakotc.

¹⁴ Taka tahsh o'owe ishi‑ihkitoyankipan Kishemanitoo e'ahshotamawaatc kekoon cimiinaatc awiyan i'imaa ehta kaashikanawentaminitc Inaahkonikewin. Kiishpin i'iwe ishihsekipan, anihshaa 'iwe taaishinaakwan awiya ciotepwehtamowinitc. Shikwa aanawiin Kishemanitoo e'ahshotamawaatc kekoon ini kaatepwehtaakotc, kaawiin kekoon taainaapatahsinini otahshotamaakewin.

¹⁵ I'imaa hsa e'ayaanik i'i Moosihs (Moses) otInaahkonikewin, awiya ehpiikonank e'maashihciketc, okaoncitipa'amaakoon Kishemanitoon onishkaatisiwininiink. I'imaa tahsh ayaahsinok inaahkonikewin, kaawiin taatanencikaatehsinoon maashihcikewin.

¹⁶ Miitahsh wiin i'imaa otepwehtamowinink a'a Eparahaam kaakii'onci⁠ahshotamawintc. Mii 'iwe cionci⁠kehcinaa'owentaakwaninik i'iwe Kishemanitoo otahshotamaakewin, oshawencikewinink ewii'oncimihcimiinaatc kahkina awiyan opiiwesiimini ini Eparahaaman. Kaawiin ehta tamiinaahsiiwak iki kaakanawentamowaatc Moosihsoon otInaahkonikewinini, ikiweniwak itahsh kaye kaanaapi⁠tepwehtamowaatc ini Eparahaaman kaakii'ishitepwehtaminitc. Aaniihsh otepwehtamowinink Eparahaam kiinawint kahkina kaaonci⁠oyoohsimank.

¹⁷ Mii aaniihsh o'o eshipii'ikaatenik Kishemanitoo otihkitowin: “O'owe hsa kaa'ishihcike'inaan, niipiwa' ketahswewaanakisiwaatc pemaatisiwaatc kikaoyoohsimikook,” ekii'inintc Eparahaam. Tepwe hsa ko kiinawint kitooyoohsimaanaan Eparahaam, eshiwaapancikenitc Kishemanitoon kaakiihtepwehtawaatc. Mii 'awe Kishemanitoo kaapimaatisiishkawaatc i'i kaakii'niponitc, kaye kaaihkitotc: “Taka 'iwe tanaakwan mahshi kaa‑ayaahsinok,” miitahsh i'i kaa'ishihsenik.

¹⁸ A'a tahsh Eparahaam kiihtepwehtam, okii'ahshawaapantaan mahshi kekoon aapiinc ekii'naakwahsininik cikii'ocihcihsenikipan i'i kaakiihpiihtootc. Miihsh i'i piinihsh tepwe okii'oyoohsimikoo' niipiwa' kaatahswewaanakisinitc. Mii hsa mayaa kaa'ani‑ishihsenik kaakii'inintc: “Mii 'i ketahshiwaatc kipiiwesiimak,” ekii'inintc.

¹⁹ Ahpii kaa'ahshotamawintc, aasha kekaa ninkotwaahk kiihtahsopipoonwe. Kaawiin itahsh wiin kii'onci⁠mehcihsehsinini otepwehtamowin ekii'naakatawentank tipinawe owiyaw aasha taapishkoo nipoomakan ekii'ishinank, kaye ini Serawan (Sarah) aasha mewisha ekii'ishkwaahsenik opimoonshewinini.

²⁰ Kaawiin awaac pankii kii'oncipoonitepwehtansii, kaawiin okii'aanwehtansiin i'i Kishemanitoon kaakii'ahshotamaakotc. Awahshime hsa wiin kii'anisoonkitepwehtam, okii'anikihtakimaan Kishemanitoon.

²¹ Wawiinke kiihkehcinaa'o, “Tepwe Kishemanitoo ninkakashkihtamaak i'i kaakii'ishiahshotamawitc,” kii'inentam a'a Eparahaam.

²² Mii 'owe otepwehtamowinink kaakii'onciotaahpinikotc Kishemanitoon ekii'inakimikotc ehkwayahkwaatisitc.

²³ O'o tahsh kaa'ihkitoomakahk: “Kii'ishi‑inakimaa ehkwayahkwaatisitc,” kaawiin wiin Eparahaam ehta kaaoncioshipii'ikaatenik.

²⁴ Kiinawint ohsha kaye kaaonci‑ishipii'ikaatek, keishi‑inakiminank Kishemanitoo cikwayahkwaatisiwank, aaniihsh kitepwehtawaanaan Kishemanitoo kaakiihkiiwepimaatisi'aatc Ciisahsoon kaaTipenimiminank.

²⁵ Kishemanitoo aaniihsh okiihpakitinaan Christan ci⁠oncinihsimintc kimacihcikewininaanink onci. Okiihkiiwepimaatisi'aan tahsh kiinawint ewii'onci‑inahsinank ciminowiiciiwank Kishemanitoo.