ᐅᕒᐆᒪᓇᒃ 14 - Ojibwe Kihcimasina'ikan

Keko naanaakasaapamaahken kiitanami'aa aaniin eshipimaatisitc

¹ Otaahpinihk hsa a'a mahshi kaamashkawitepwehtansik, keko tahsh wiin kakweshaakoosomaahken aaniin enentank kekoonini.

² Peshik itahsh ishitepwehtam pisaan iko kahkina kekoonini cimiicitc. A'a tahsh mahshi kaamashkawi tepwehtansik kaakihtikaatenik miicim ehta omiicin.

³ Kaawiin tahsh ishinaakwahsinini a'a kahkina kekoonini kaamiicitc ciaanawenimaatc ini kahkina kekoonini kaamiicihsinik. A'a tahsh kaye kaakihtikaatenik miicim ehta kaamiicitc kaawiin kaye wiin ishinaakwahsinini ci‑inaahpan e'macitootaminitc ini kahkina kekoonini kaamiicinitc. Kishemanitoon iitok okii'otaahpinikoni.

⁴ Awenen itahsh kiin entinowiyan cinaanaakasaapamatipan pahkaan awiyan kaapamiihtawaatc? Otookimaaman ohsha onaanaakaci'ikoon tepwe kwayahk eshihcikekwen komaa kaye kwayahk eshihcikehsikwen. Weweni hsa taishihcike, aaniihsh kaaTipencikenitc okawiici'ikoon ciminohsetc.

⁵ Peshik itahsh inini awahshime otinentaan peshik ehkiishikaninik, kaawiin tahsh aahpici opapaapisiskentansiinan kotak kaakiishikaninikin. A'a tahsh kotak peshik miinawaa kahkina peshikwan otinentaanan ini kaakiishikaninikin. Mii hsa tahsh eshinaakwaninik entahsopeshikotc piko ciaayiitentankipan aaniin waa'ishikiishikanohketc.

⁶ Awenen hsa piko kaakihci inentank ehkiishikaninik, mii hsa eshihciketc ewiihkihtenimaatc kaaTipencikenitc. A'a kaye kahkina kekoonini kaamiicitc, mii hsa eshihciketc ehkihtenimaatc kaaTipencikenitc, aaniihsh omiikwehciwenimaan Kishemanitoon e'miinikotc miicim. A'a tahsh kaye kotak aaninta kekoonini kaamanaamiicitc, mii hsa kewiin eshihciketc, ehkihtenimaatc kaaTipencikenitc, kewiin e'miikwehciwenimaatc Kishemanitoon.

⁷ Kaawiin tahsh kaatahshiyank awiya wiin ehta piko pimaatisiihtamaasohsii. Kaawiin kaye awiya wiin iko nipoohtamaasohsii.

⁸ Aaniihsh kiishpin kiipimaatisiyank, kaaTipenciketc ohsha kaaoncipimaatisiyank cikihtenimintc. Kiishpin tahsh nipoyank, cikihtenimintc ohsha kaye kaaoncinipoyank. Komaa hsa pemaatisiwankwen, komaa kaye nepowankwen, kaaTipenciketc ohsha kitipenimikonaan.

⁹ Mii hsa Christ kaakii'oncinipotc, kaakii'onci⁠kiiwepimaatisitc kaye, citipenimaatc i'i kaapimaatisinitc, i'i kaye kaaniponitc.

¹⁰ Wekonen itahsh kiin wencinaanaakasaapamatc aaniin kiitanami'aa eshipimaatisitc? Wekonen tahsh kaye kiin wenciaanawenimatc kiiciotepwehtamo? Kahkina iitok kikaniipawiwaamin enaahsamiitc Kishemanitoo ahpii tipaahkoninank.

¹¹ Kihcimasina'ikan hsa ishipii'ikaate: “Niin kaaTipencikeyaan nintahpiwiintaan nimpimaatisiwin, maawac iko ninkihcitepwe kaaihkitoyaan, kahkina hsa awiya taociciinkwanapihtaa enaahsamiiwak, kahkina kaye awiya taihkito niin ehKishemanitoowiwak.”

¹² Inashke tahsh, kahkina kaatahsopeshikoyank ishinaakwan ciwiintamawank Kishemanitoo aaniin kaakiihpi ishihcikewank.

Keko pisokeshkawaahken kiitanami'aa

¹³ Taka tahsh i'i ishipoonihciketaa o'o kaanihtaa⁠naanaakasaapantiyank. Taka hsa onentantaa ci ishihcikehsiwank aaniin awiya keoncipisokehshink, aaniin kaye keoncipankihshink a'a kiitanami'aanaan.

¹⁴ KaaTipenciketc Ciisahs tahsh e'wiiciiwak kaaoncikihkentamaan, kaaoncikehcina'oyaan kaye, kahkina miicim kaakii'oshihcikaatek ehpehkahk, pisaan iko cimiicinaakaatek. Kiishpin tahsh wiin awiya ishitepwehtank aaninta kekoon cimanaaishihcikehpan, mii hsa ko 'i cimaashipinitisohpan kiishpin ishihciketc kaamanaaishihciketc.

¹⁵ Kiishpin tahsh oncimaashihsetc kiitanami'aa kiwiihsiniwinink, kaawiin itahsh iinsan saaki'iwewinink kitoonci ishihcikehsii i'i kaaishihcikeyan. Keko i'imaa kitinancikewinink oncinihshiwanaaci'aahken kiitanami'aa. Christan iitok kewiin okii'nipohtamaakoon.

¹⁶ Keko tahsh kekoon ishihcikehken cionci⁠macitashincikaatek i'i kaaonishihshentaman.

¹⁷ I'iwe hsa kiitashintenik aaniin Kishemanitoo eshiokimaahkantawinank, kaawiin wiin aaniin keinancikeyank, aaniin kaye keshiminihkweyank kaatashintek, i'iwe ohsha kaaicikaatek, kii‑ishihcikenaaniwank Kishemanitoo kaaminwaapantank, pisaan kaye ciwiiciiwank Kishemanitoo, minwentamowinini kaye kaamiiniminank Kishemanitoo otAhcaahkwan.

¹⁸ Awiya tahsh o'o nahke kii‑ishianohkiihtawaatc Christan, Kishemanitoon ominwaapamikoon, pemaatisinitc kaye ominwaapamikoo'.

¹⁹ Taka tahsh mooshak i'i kakweishihciketaa, aaniin pisaan iko keshiwiiciintiyank, ciwaawiici'itiyank kaye cinimashkawikiyank.

²⁰ Keko tahsh wiin i'imaa kimiicimimink oncinihshiwanaacihtaawaahken Kishemanitoo kaakii'oshihtootc. Kahkina miicim kiihpakitinikaate cimiicinaakaatek, kaawiin itahsh taaonishihshinsinoon cimiicinaakaatekipan i'i miicim kiishpin awiya i'imaa oncimacitootank.

²¹ Kiishpin kiitanami'aa oncipisokehshink i'imaa, kaawiin taonishihshinsinoon cimiiciyampan wiiyaahs, ciminihkweyampan kaye shoominaapo, ci‑ishihcikeyampan kaye kekoon iko keoncipisokehshinkipan.

²² I'i tahsh inahke kaye kaashitepwehtaman ono, taka kiinehtawaa piko Kishemanitoo kikakihkentaam. Aahpici hsa taminwentam a'a inini kaamaanentamoshkaakohsik e'ishihciketc wiin iko kaashiminwaapantank.

²³ Kiishpin tahsh oncikehcinaa'owenintisohsik wekonenini kaamiicitc, Kishemanitoon ihsa okawiintamaakoon sesik e'ishihcikehsik. Aaniihsh i'i kaaishihciketc kaawiin tepwehtamowinink onciimakahsinini. Kekoon tahsh tepwehtamowinink e'onciihsinok mii hsa i'i macitootamowin.