ᐅᕒᐆᒪᓇᒃ 12 - Ojibwe Kihcimasina'ikan

Pimaatisiwin eshinaakwahk awiya kaa‑anohkiihtawaatc Kishemanitoon

¹ Miitahsh niiciotepwehtamook, Kishemanitoo e'wenootaninik okoohpaasinaakewin, kikakaansomininim cipakitinitisoyek enaahsamiitc Kishemanitoo. I'i hsa kaapimaatahk pakitinikewin ci‑ishinaakosiyek, wiin ehta ko eshionahtamaasoyek ciaapaci'inek anohkiihtawek, miitahsh i'iweni kaaminwaapantank Kishemanitoo. Mii hsa tahsh i'i tepwe kwayahk anami'aawin kemiinekipan Kishemanitoo.

² Keko tahsh naapinaakosihkek o'o kaaishihcikewaatc o'omaa ahkiink kaapimaatisiwaatc. Maano pakitinihk Kishemanitoo ciaanci'inek i'imaa piincaya'ii kipimaatisiwiniwaank, cioshkihtootc kaye kitinentamowiniwaan. Mii hsa tahsh cioncikihkentamowek Kishemanitoo otinentamowin, mii hsa 'iweni kaaonishihshininik, i'i kaye kaaminwaapantank, i'i kaye kaakiishinaakwaninik.

³ Kishemanitoo ninkii'miinik okishewaatisiwin, miitahsh o'o eninakook kahkina kaatahshiyek, keko awahshime inenintisohkek i'i kaa‑ahpiihtentaakosiyek. Weweni naanaakatawentamohk mooshak. I'i tahsh tepweyentamowin Kishemanitoo kaamiininek, mii hsa 'imaa ishitipaacintisok.

⁴ I'imaa tahsh kiwiiyawinaanink aahpici paahtiinatinoon ini pepahkaan kaainwaatekin. Onoweniwan tahsh kahkina pepahkaan inanohkiimakanoon.

⁵ Aana tahsh wiin ehpaahtiinoyank, mii hsa eshinaakosiyank taapishkoo owiiyawimaa kaapeshikwahk e'ishipeshikoyank, aaniihsh Christ kahkina kiwiiciiwaanaan. Miitahsh eshinaakosiyank e'wiiciintiyank kahkina kaatahshiyank taapishkoo kaashiwiiciintiimakahkin ini pahkesiwinan i'imaa wiiyawimaank.

⁶ Kishemanitoo tahsh ekiihshaweniminank kikii'miinikonaan omiikiwewinan pepahkaan kaaishianohkiimakaninikin ci‑ishihcikewank. Kiishpin awiya kii'ishimiinikoowisitc citashintank Kishemanitoon otipaacimowinini, taka mii keahpiihtaacimotc aaniin ehpiihcitepweyentank.

⁷ Kiishpin tahsh awiya kii‑ishimiinikoowisitc cipami'iwetc, taka hsa tapami'iwe. Kiishpin tahsh ishimiinikoowisitc cikihkino'amaaketc, taka hsa takihkino'amaake.

⁸ Kiishpin tahsh ishimiinikoowisitc cimashkawite'e'aatc awiyan, mii hsa 'i keishihcikehpan. A'a kaye kaapakitiniketc, pisaan iko ciciihkentankipan ehpakitiniketc. A'a kaye kaaniikaaniitc, pisaan iko takihcianohkii. A'a kaye kaaminotootaaketc, ciminwentankipan i'i e'ishihciketc.

⁹ Tepwe piko kaye wiinke saaki'itik. Shiinkentamok i'i kaamacinaakwahk, kihciwinamok itahsh i'i kaaonishihshik.

¹⁰ Wiinke kaye saaki'itik taapishkoo kaaowiicihkiwentiwaatc kaashisaaki'itiwaatc. Niikaani⁠kihtenimihkwak kiiciotepwehtamoomiwaak ahpiihc kiinawaa kaainenintisoyek.

¹¹ Mooshak kaye anohkiik, keko wiihkaa kihtimihkek. Wiinke piko misiwe kite'iwaank oncianohkiihtawihk kaaTipenciketc.

¹² E'ayaayek tahsh i'i ahpenimowin, mooshak iko ciihkentamok. Aayiitentamok kaye aanimisiwin otihsikoyek. Mooshak iko kaye anami'aak.

¹³ Miinihkwak kaye iki otanami'aak kekoonini kaaishinoontehsewaatc, weweni naakaci'ihkwak kiiotihsinekwaa iki piiwitek kitaawiniwaank.

¹⁴ Kakwecimihk kaye Kishemanitoo cishawenimaatc i'i kaakakwaataki'iminek, tepwe kakwecimihk cishawenimaatc, kaawiin wiin cimacakimaatc.

¹⁵ Wiiciminwentamoomihkwak hsa iki kaye kaaminwentamowaatc, wiicimawimihkwak kaye iki kaamawiwaatc.

¹⁶ Peshikwan kaye inenintik kahkina kaatahshiyek, keko wiin kihci‑inenintisohkek. Pisaan iko ishihcikek ini kaatapahsentaakwahkin anohkiiwinan. Keko kaye ninkakiihtaawentaamin inenintisohkek.

¹⁷ Kiishpin awiya macitootawinek, keko kakwe⁠naapinamawaahkek i'i kaatootawinek. Kakweishihcikek itahsh i'i wenishihshink kahkina awiya kaaminwaapantank.

¹⁸ Maawac iko kihcianohkiik ehkokashkihtooyek, pisaan ciwiicipimaatisiimekwaa kahkina awiyak.

¹⁹ Kaasaaki'inakook, keko kakwetipa'ikehkek awiya kekoonini tootawinek. Tawinamawihk Kishemanitoo onishkaatisiwin cinana'ahcikemakaninik. Kihcimasina'ikan aaniihsh ishipii'ikaate: “Niin ninkanana'ahcike, niin ninkakiiwetipa'ike, ihkito kaaTipenciketc.”

²⁰ O'o tahsh ihkitoomakan Kihcimasina'ikan: “Kiishpin hsa a'a kaashiinkenimihk noonteskatetc, ahsham kekoonini. Kiishpin kaye noontewiiminihkwetc, pisaan iko cimina'atc. Kiishpin tahsh i'i ishihcikeyan, taapishkoo hsa ehcaakisotc taishiayaa keahpiihtakacitc.”

²¹ Keko kaye pakitinankek i'i kaamacinaakwahk cishaakooci'ikoyek. O'o tahsh ishihcikek, kaaonishihshik aapacihtook cishaakoocihtooyek i'i kaamacinaakwahk.