ᑭᑫᑕᒨᔑᐌᐎᓐ 9 - Ojibwe Kihcimasina'ikan

¹ Miinawaa kotak encal okii'noontaakohtoon pootaacikan, amii 'iwe naanan ekii'noontaakohtoowaatc. Ninkii'waapamaa tahsh wanankohsh aasha ekii'oncipankihshink kihcikiishikonk 'imaa ahkiink e'apitc. Mii 'awe kii'miinaa aapaapihka'ikan, mii 'iwe tino kaakipaapihka'ikaakaaniwank i'imaa kaaishiwiimpahkamikaak i'iwe ekaa kaamishahkiiyaahsinok.

² Okiihpaahkinaan itahsh piintaapihkaanink kaaishiwiimpahkamikaanik. I'imaa tahsh kii'ontaapahte taapishkoo kaaishipaashkinek i'i ninkisikan kaaishi‑ishpaapahtek. Kii'anitipihkinaakosi tahsh a'a kiisihs e'ankwaapahsotc, newacikiishik kaye kii'mahkatewaapahte.

³ Amiihsh imaa akwaapahtenk kii'onciiwak kihcipahpahkinek, ekiihpooniiwaatc ahkiink. Kii'ishimiinaawak itahsh taapishkoo kihcimanicoohshak kaaociihsowewiniwaatc mii 'i ci‑ishihcikewaatc.

⁴ “Keko nihshiwanaacihtoohkek mashkohsiwan,” kii'inaawak, kaye mihtikook kaye kahkina hsa kekoon kaanihtaawikinkin, mii piko tahsiin awiya ekaa oskahtikowaank ekihkinawaacipii'waahsiwintwaa ehtipenimikohsikwaa Kishemanitoon, miiwak iki keciihswaakaniwiwaatc.

⁵ Kaawiin itahsh kii'ishimiinaahsiiwak oko pahpahkinek cinihsaawaatc i'i ininiwa', cimihcikakwaataki'aawaatc itahsh naanokiisihs minihk. Taishikakwaatakentamook iki ininiwak taapishkoo eshikakwaataki'ikotc awiya kihcimanicoohshan kaaociihsowewininitc ehciihsokotc.

⁶ Mii 'iwe ehkakiishikaninik okananaantonaanaawaa keshinipowaatc, kaawiin itahsh okamihkansiinaawaa. “Ampehsh nipoyaan,” tainentamook, okatapasii'ikonaawaa tahsh 'iwe nipowin.

⁷ Kii'ishinaakosiwak itahsh iki pahpahkinek taapishkoo mihtatimook e'oshiihtaa'intwaa ewii'antayaapatisiwaatc miikaatiwinink. Ohtikwaaniwaank kii'ishinaakosiwak taapishkoo osaawi shooniyaawi pahsihkwepisonan e'ayaanikin. Ininiink itahsh kaye kii'inatenkwewak.

⁸ Kii'ishiowiinisihsiwak taapishkoo ihkwewa' kaaishikakaanwaanihkwenitc, shikwa mihshipishiwaapitink kii'inaapitewak.

⁹ Ohkaahkikaniwaank kii'ina'akayewak taapishkoo i'i piiwaapihk shimaakanihshak kaapihsihkamowaatc ohkaahkikaniwaank. Shikwa pisaaniko kii'inihtaakosiwak mihtatimook ehpimwewetaapiipa'aawaatc otootaapaanaahkowaa' ewii'moohkiihtaatiwaatc miikaatiwinink, mii 'i kaaishipimweweyaankewaatc oko pahpahkinek.

¹⁰ Kihcimanicoohshink kaaociihsowewininitc, mii 'i kaainaanowewaatc iki kihcipahpahkinek. Okiihciihswaakenaawaan osoowiniwaan. Miihsh i'imaa wencikashkihtoowaatc cikakwaataki'aawaatc i'i pemaatisinitc naanokiisihs minihk.

¹¹ Otayaawaawaan kaaokihciokimaamiwaatc, miiwan ini encalan kaatashiokimaahkantaminitc kaaishiwiimpahkamikaanik, 'iwe ekaa kaamishahkiiyaahsininik. Mii eshinihkaasotc a'awe encal, Apaatan (Abaddon) e'ishikiishwenk Hiiparoo (Hebrew). Ahpwaaliyan (Apollyon) itahsh kaye ishinihkaaso Kariihk (Greek) e'ishikiishwenk. Mii 'iwe ecikaniwitc Onihshiwanaaci'iwe.

¹² Nihtam i'iwe kaakakwaanihsakentaakwahk aasha ahpan kii'ishkwaahse. Inashke keyaapi niishin ta‑ayaawan kekakwaanihsakentaakwahkin.

¹³ Miinawaa tahsh encal okii'noontaakohtoon opootaacikan, mii aasha ninkotwaahso encalak ekiihpootaacikewaatc. Ninkii'noontaan inwewin i'imaa e'oncihsek kaaishioteshkaniwank kaaishiniiyokiihkeyaak i'i kaaosaawi shooniyaawank pakitinaahsowinaapihk, mii 'iweni kaaoncishkawishkaakotc Kishemanitoo.

¹⁴ Kiihkanoonaa tahsh a'awe ishkwaac encal kaaopootaacikanitc, amii 'awe ninkotwaahso kaainakincikaasotc: “Haw, aapiskon iki niiwin encalak kaamamaancikwahpisowaatc i'imaa kihcisiipiink Iyoohparetiis (Euphrates) kaaishinihkaatek,” okii'ikon i'i inwewin.

¹⁵ Miish kaa'ishiaapiskonintwaa iki niiwin encalak ciawinihsaawaatc kekaa aahpihta kaatahshinitc i'i pemaatisinitc ahkiink. Aaniihsh niiyaak iko kii'oshiihtaa'aawintwaapan i'i ci ishihcikewaatc, mayaa ocihcihsenik kihkinoonowin, mayaa kaye kiisihsoon pimakinsonitc, mayaa kaye ehkiishikaninik, mayaa kaye ahpii kiishikaninik, piinihsh kaye mayaa tipa'ikan ciniocihcihsenik.

¹⁶ Ninkii'wiintamaakoo entahshiwaatc iki omiikaasook kaatehsapiwaatc mihtatimoo'. Niishwaahk minihk kihcimitaahswaahk tahsink kihcimitaahswaahk (200,000,000) kiihtahshiwak.

¹⁷ Ninkii'ishiwaapamaak nintinaapantamowinink kaaishinaakosiwaatc iki mihtatimook kaye iki kaapimiwanepa'ikowaatc. Taapishkoo ishkote kaaishimiskwahkonek kii'ishinaakwaniniwan otoohkaahkikani⁠aakawahpisoniwaan, e'mahkateoshaawashkwaanikin kaye e'aahko osaawaanikin kaye. Mishipishiwihtikwaanink kii'ishinaakwaniniwan ohtikwaaniwaan iki mihtatimook. Kii'onciimakanini otooniwaank ishkote, kipwaapahte kaye, i'iweni kaye kaawiihsakaapahsowetc kaacaakisotc tino osaawiahsin.

¹⁸ Kekaa tahsh aapihta iki pemaatisiwaatc okii'nihsikonaawaa ono nihsin (3) macihsewinan kaapimiayaamakaninikin, miiwan ono ishkote, kipwaapahte, kaawiihsakaapahsowemakaninik kaye.

¹⁹ Omashkawisiiwiniwaa iki mihtatimook i'imaa tako/⁠ayaani otooniwaank kaye 'imaa osoowiwaank. Kinepikonk kii'ishinaakwaniniwan osoowiwaan, kaye kii'ohtikwaaniwaniniwan. Miitahsh ini iyaapacihtoowaatc ciwiihsakaahpine'aawaatc i'i pemaatisinitc.

²⁰ Iki tahsh pemaatisiwaatc kaakii'ishko'intwaa kaakii'nihsikohsikwaa ono macihsewinan, kaawiin kii'oncikipihciihsiiwak eshianami'ehtamowaatc wiinawaa oninciiwaank kaakii'oncioshihtoowaatc. Aanciko kaawiin okii'onci poonikanoonaahsiwaawaa' maciahcaahkwa', i'i kaye omasinihkoocikaniwaa' osaawi shooniyaa waapihkonk kaaoncioshi'aawaatc, waapaapihkonk kaye, osaawaapihkonk kaye, ahsiniink kaye, mihtikonk kaye kaakii'oncioshi'aawaatc. Kaawiin tahsh waapihsiiwa', kaawiin kaye noontamaahsiiwa', kaawiin kaye pimohsehsiiwa'.

²¹ Kaawiin kaye kii'oncikipihciihsiiwak i'iwe onci kaakii'ishi nihtaa nihshiwewaatc, kaakii'ishi macimashkihkiihkewaatc kaye. Kaawiin kaye okiiwiihpoonihtoohsiinaawaa i'iweni opihshikwaatisiwiniwaa, 'iwe kaye okimootiwiniwaa.