ᑭᑫᑕᒨᔑᐌᐎᓐ 8 - Ojibwe Kihcimasina'ikan

Miinawaa kipishkiwahsikan ehpahkwacipicikaatek, niishwaahso e'inakincikaatek

¹ Miinawaa kaapahkwacipitootc kotak kipishkiwahsikan a'a Maanahcaanihshenhs, mii 'iwe niishwaahso (7) kaakiihpaahkwacipitootc, mii 'i ahpii kaawiin kekoon kii'nawiintaatiimakahsinoon kiishikonk aapihta tipa'ikan minihk.

² Miihsh ninkii'waapamaak ikiweniwak kaaniishwaahciwaatc encalak miiwak iki kaanihtaa inaahsamikaapawiihtawaawaatc Kishemanitoon. Kii'miinaawak niishwaahso pootaacikanan.

³ Miinawaa tahsh kotak encal okiihpitahkonaan minaahsikanaapihk e'osaawi shooniyaawaninik, ehpiantaniipawitc i'imaa pakitinaahsowinaapihkonk. Niipiwa' kii'miinaa minominaahsikan cikikitahkonank cianikikiayaanik i'imaa otanami'aawininiink kahkina Kishemanitoo okwayahkwaatisiima', mii 'imaa cikikipakitinank cicaakisank iwe minomaahsikan, i'iwe osaawi shooniyaawi pakitinaahsowinaapihkonk kaa‑ayaanik i'imaa inaahsamaya'ii 'i kihciapiwinink.

⁴ Miitahsh e'ishpaapahtenik i'iwe minomaahsikan, kii'anitakokikiompishkaani otanami'aawinini Kishemanitoo okwayahkwaatisiima'. Mii 'imaa oninciink a'a encal kii'anionci‑ishpishkaaniwan i'imaa enaahsamiayaatc a'a Kishemanitoo.

⁵ Miitahsh a'a encal kaaishiotaahpinank minomaahsikanaapihk, okii'mooshkinatoon itahsh i'iwe kaaishkotewaninik pakitinaahsowinaapihkonk kaa'ontinank. Miish i'imaa ahkiink kaakii'ishiwepinank. Miitahsh ahpii kii'noontaakwan ehpitihkowek kaye e'noontaakosiwaatc pinehsiwak kaye kii'waawaahtehse kaye kii'waawaahkawihse 'i ahki.

Niishwaahso e'maaciinoontaakohcikaatekin kihcipootaacikanan

⁶ Iki tahsh kaaniishwaahciwaatc encalak kaa‑ayaawaatc ini niishwaahso (7) pootaacikanan kii'oshikaapawi'itisowak ewii'ahshonoontaakohtoowaatc.

⁷ Miihsh iwe nihtam a'a encal okii'noontaakohtoon opootaacikan. Imaa tahsh ahkiink kii'ahpakicikaate 'i sehsekan kaye ishkote kaye miskwi ekii'maamawikinikawihsekin. Kekaa aapihta kiihcaakisikaate ahki, kaye kekaa aapihta piko mihtikook kiihcaakaahkisowak, kaye kahkina kiihcaakaahkite kaaoshaawashkwashkohsiwakaak.

⁸ Miitahsh awe kotak encal okii'noontaakohtoon opootaacikan, amii niishin (2) e'noontaakohtoowaatc. Taapishkoo kekoon kaaishinaakwahk kihciwaciw ehkihci‑ishkotewank i'imaa kii'ahpakicikaate kihcikamiink. Miitahsh 'i kihcikam miskwiink kaa'ishi inaakamihsek.

⁹ Miihsh kekaa aapihta iki kihcikamiink kaapimaatisiwaatc Kishemanitoon kaakii'oshi'ikowaatc kii'nipowak. Kaye kekaa aapihta naapihkwaanan kii'nihshiwanaatanoon.

¹⁰ Miitahsh kotak miinawaa kaa'ishinoontaakohtootc opootaacikan a'awe encal, mii nihsin (3) encalak. Miitahsh kii'oncipankihshin kihciwanankohsh kiishikonk ehpimaahkwanek. Kii'ishiwaahsahkonehkone taapishkoo wiikwaahs e'waahsahkonencikaaketc awiya. Mii 'imaa kaaishipankihshink kekaa aapihta ini siipiin, ini kaye kaamoohkiciwankin.

¹¹ ‘Wiihsakaapo’ ishinihkaaso 'a kihciwanankohsh. Amii kii'wiihsakaakamihse 'iwe nipi, kekaa aapihta 'i nipi kii'wiihsakaakamin. Niipiwa' itahsh iki pemaatisiwaatc okii'nihsikonaawaa i'i nipiini ekii'minihkwewaatc kaakii'wiihsakaakamihsenik.

¹² Shikwa miinawaa kotak encal okii'noontaakohtoon opootaacikan, amii niiwin (4) encalak. A'ahsh kiisihs kiihpahkihte'waa, kekaa aapihta minihk kiihpahkihte'waa. Miinawaa kaye kekaa aapihta minihk a'a tipihkikiisihs kiihpahkihte'waa, iki kaye wanankohshak kekaa aapihta minihk kiihpahkihte'waawak. Miitahsh kekaa aapihta minihk ekiihtipihkinaakosiwaatc. Shikwa kii'naanoonte tipihkan kekaa aapihta ehkiishikahk. Kaawiin kaye kii'waahseyaahsinoon kekaa aapihta eniahkotipihkahk. Wiinke hsa kiihkashkiitipihkan.

¹³ Ninkii'inaap, ninkii'noontawaa tahsh ehtepwewitank mikisi e'naawinaakositc ehpimiayaatc newacikiishikonk, ehkishiiwetc: “Kakwaanihsakentaakwan! Kakwaanihsakentaakwan! Takakwanihsaki ishiwepisiwak iki ahkiink kaapimaatisiwaatc. Ahpii noontaakwaninikin opootaacikaniwaan iki nihsin (3) encalak keyaapi kenoontaakohcikewaatc,” kii'ihkito.