ᑭᑫᑕᒨᔑᐌᐎᓐ 16 - Ojibwe Kihcimasina'ikan

Ehsiikihsenik Kishemanitoo onishkaatisiwin kaaniishwaahcinkin kihcionaakanink kaa‑ahtenik

¹ Ninkii'noontawaa tahsh awiya ehkihcinoontaakositc i'imaa kihcianami'ewikamikonk e'oncikiikitotc, ehkanoonaatc ono niishwaahso (7) encala': “Animaacaak, awisiikinamohk ahkiink iwe Kishemanitoo onishkaatisiwin imaa kaaishiahtenik kaaniishwahcinkin kihcionaakanink,” inaawa'.

² Amiitahsh kaa'ishimaacaatc a'a nihtam encal ekii'awisiikinank okihcionaakanink kaa‑ahtenik, ekii'ishipakamihsenik ahkiink. Miitahsh i'imaa kaa'oncikihciomikiiwinaaniwank ahkiink e'maanaataninik, e'wiihsakentaakwaninik kaye. Tahsin iko awiyak kii'ishimaataahpinewak kaakii'oncikihkinawaacipii'ikaasowaatc pikwaciaya'aawihshan citipenimikowaatc, kaye kaakii'ociciinkwaniihtamawaawaatc omanitoohkaanihkoocikanini.

³ Miinawaa 'a kotak encal okii'anisiikinaan i'imaa kaakii'ahtenik okihcionaakanink ekii'ishisiikihsenik kihcikamiink. Miskwiink itahsh kii'inaakamihse 'i nipi. Taapishkoo awiya kaanipotc kaaishinaakwaninik omiskwi kii'inaakamihse. Kahkina kekoon i'imaa kihcikamiink kaa‑ayaak kii'nipoomakan.

⁴ Miinawaa 'a kotak encal kii'maacaa, mii 'awe nihsin (3) kaainakincikaasotc. Okiihsiikinaan itahsh miinawaa okihcionaakanink kaa‑ahtenik, i'imaa tahsh ekiihsiikihsenik kahkina siipiink kaye kaaishimoohkiciwaninikin. Kii'miskwiiwaakamihsewan itahsh.

⁵ Ninkii'noontawaa 'awe encal kaatipentank i'iwe kahkina nipi ehkakitotc: “Kiin misiwe kaakwayahkwaatisiiwentaakosiyan!” kii'ihkito. “Kiin o'omaa noonkom kaa'ayaayan kaye mewisha iko kaapionciayaayan! Kwayahkwanoon ono kaapiayinaahkonikeyan!

⁶ Oko pemaatisiwaatc okiihsiikinamawaawaa' omiskwiimini kipimaatisiima' kaye otipaacimoo' kaakiihkanootamawihkwaa. Kiin itahsh kikii'mina'aak miskwi. Miihsh i'iweni keshkihtamaasowaatc,” kii'ihkito.

⁷ Ninkii'noontaan itahsh pakitinaahsowinaapihkonk inwewin e'ihkitoomakahk: “Eha' mii nanke, Tepencikeyan Kishemanitoo kaaMaamawentaakosiyan! Tepwewiniwanoon kaye kwayahkwanoon kitinaahkonikewinan.”

⁸ Miihsh awe miinawaa kotak encal kii'animaacaa, mii 'awe niiwin e'inakincikaasotc. I'imaahsh kiisihsonk okiihsiikinaan 'iwe okihcionaakanink kaa‑ahtenik. Kii'ishimiinikoowisi tahsh 'awe kiisihs otishkotemink cioncicaakiswaatc i'i pemaatisinitc.

⁹ Amiitahsh kii'oncicaakisowak maawac ekiihkihcikishitek. Okii'mamacikiishwaanotamawaawaan owiinsowinini Kishemanitoon kaatipentaminitc ono kakwaataki'iwewinan, kaye aanciko kaawiin okiiwiihpoonihtoohsiinaawaa omacitootamowiniwaan. Kaawiin kaye okiiwiihkihci‑inenimaahsiwaawaan Kishemanitoon.

¹⁰ Miitahsh miinawaa kotak encal kii'animaacaa, mii 'awe naanan kaa'inakincikaasotc. Okiihsiikinaan i'iweni okihcionaakanink kaa‑ahtenik, ekii'ishipakamihsenik okihciapiwininiink ini pikwaciaya'aawihshan. I'imaa tahsh kii'wanitipihkihseni otipencikewininiink. Ikiweniwak itahsh i'imaa kaa‑ayaawaatc okii'maamaakwantaanaawaan otenaniwiwaan e'ahpiihciwiihsakentamowaatc.

¹¹ Okii'macikiishwaanaawaan itahsh Kishemanitoon kihcikiishikonk kaa‑ayaanitc owiihsakentamowiniwaan onci, 'iwe kaye otoomikiiwaahpinewiniwaan kaakii'ayaawaatc. Shaakooc keyaapi kaawiin okiiwiihpoonihtoohsiinaawaan omacitootamowiniwaan.

¹² Miitahsh kii'animaacaa encal inkotwaahso kaainakincikaasotc. I'i tahsh otonaakanink kaa‑ahtenik okiihsiikinaan i'imaa kihcisiipiink Iyoohparetiis (Euphrates) kaaicikaatek. Miitahsh kaaishipaankohsek i'i siipi, ekii'ishikwayaancihcikaatek keishiaashawishkaawaatc iki kihciokimaak waapanonk kepionciiwaatc.

¹³ Ninkii'waapamaak itahsh nihsin (3) kaawiinaatisiwaatc ahcaahkwak taapishkoo omahkahkiink kaaishinaakosiwaatc. I'imaa otooniniink oncisaaka'amook kihciohkaatiikinepikoon, ini kaye pikwaciaya'aawihshan, ini tahsh kaye kaakanootamaakonitc kaawayeshinkenitc.

¹⁴ Miiwak oko maciahcaahkwak tino kaanihtaamaamahkaacihcikewaatc. Okoweniwak itahsh animaacaawak e'naasihkawaawaatc kahkina kihciokimaa' ahkiink misiwehkamik kaa‑ayaanitc, e'antamaawantoonaawaatc ci‑ishaanitc keishimiikaatinaaniwaninik ahpii keokihcikiishikaamitc a'awe maawac Meshkawentaakositc Kishemanitoo.

¹⁵ “Inashke pisintan! Ninkapikoshkotakohshin taapishkoo kimootishk ehkihkentaakosihsik ewiihpimitakwihshink. Taminwentam a'awe kaa‑ahshawaapitc, weweni kaye kaakanawentank okikishkikanan ekaa ciwaahsaahkonawe papaamohsehsik, kaawiin ta‑akacihsii e'waapancikaniwitc,” ihkito kaaTipenciketc.

¹⁶ Iki tahsh nihsin (3) maciahcaahkwak ookii'maawaci'aawaa' ini kihciokimaa' i'imaa ayaawinink Aarmaketan (Armageddon) kaaishinihkaatek Hiiparoo (Hebrew) e'ishikiishwenk.

¹⁷ Miitahsh kii'animaacaa 'awe encal niishwaahso (7) ekii'inakincikaasotc. Okiihsiikinaan i'iwe otoonaakanink kaa‑ahtenik, newacikiishikonk okii'ishisiikinaan. Kihci‑inwewin itahsh i'imaa kii'oncinoontaakwan kihciapiwinink kihcianami'ewikamikonk kaa‑ayaak. Mii 'owe kaa'ihkitoomakahk: “Aasha kiihkiishihcikaate!”

¹⁸ Kii'waawaahtehse, kiihpitihkonoontaakwan, pinehsiwak kaye kii'noontaakosiwak. Kaye kii'wawaahkawihse 'i ahki, mii 'iwe kaa‑ahpiihciwawaahkawihsek ekaa wiihkaa ehpimi‑ishiwepahsinok ahpan iko kaa'oshi'intwaa pemaatisiwaatc. Mii 'owe maawac ekiihkihcimashkawentaakwahk.

¹⁹ Nihswaa (3) 'iwe kii'ishitaahtaashkihse 'i kihciootena, kii'nihshiwanaatanoon itahsh kahkina ootenawan kahkina kaa‑ayayaakin tipencikewinink ahkiink. Shikwa Kishemanitoo okii'maamihkawinotaan Paapilan (Babylon), i'iwe kaakihci‑inentaakwaninik ootena. Maano okii'mina'aan i'iweni shoominaapo ominihkwaakanink cionci⁠minihkwenitc, mii 'iwe eshitipa'amawaatc okihcinishkaatisiwin e'aapacihtootc.

²⁰ Kahkina minihsan inkoci weti kii'ishaamakanoon, kaawiin inkoci waciin kii'naakwahsinoonan.

²¹ Kaye ehsehsekahk kii'ishipapaa pankihshinook kihcimihkwamiik e'mamaantitowaatc, aaninta piinihsh ninkotwaahk kii'ahpiihtinikwaniwak pehpeshik kiishikonk ehpionci pankihshinowaatc ekii'miihkoshkawaawaatc i'i pemaatisinitc. Aanciko okii'mamacikiishwaanaawaan Kishemanitoon ini onci ehsehsekaninik, aaniihsh wiinke kiihkihciocaanimentaakwan o'o kakwaatakihtoowin.