ᑲᑮᑖᐎᑮᔗᐎᓇᓐ 9 - Ojibwe Kihcimasina'ikan

Kakiihtaawentamowin Ehkitoomakahk.

¹ Kakiihtaawentamowin iitok otooshihtoon owaahkaa'ikan, niishwaahso (7) petahkisonitc ahswaahkwa'ikana' e⁠aapaci'aatc.

² Okii nihsaan aya'aawihshan ekiih kwayaancihtootc ewiih kihci wiihkwanketc, aasha shoominaapo ekiih takwaakaminank. Toohpowinaahk kaye aasha okii oshihsitoon.

³ Aasha kaye okii ishinisha'waa' kaa⁠ihkwewinitc otanohkii'aakana' maawac eshi ishpaanik ootena, o'o ci‑ihkitonitc,

⁴ “Kahkina, ampeyohk piintikek, kehkentansiwek kekoon,” otinaa' nesihtawencikehsinik.

⁵ “Ampeyohk, piwiihsinik ci⁠miiciyek nimiicimim, ci⁠minihkweyek kaye shoominaapo kaakiih takwaakaminamaan.

⁶ Nakatamok kikakiipaatisiwiniwaa ci⁠pimaatisiyek, nihsitohtamowinink ishi pimohsek.”

⁷ Kiishpin maamiinomatc nehtaamaanenciketc, tekwac wiin kika mikoshkaaci'ik. Kiishpin kaye maamiinomatc omacaatis, kehcinaac kika wiihsakentami'ikon.

⁸ Keko wiihkaa maamiinomaahken nehtaamaanenciketc, kika onci nishkenimik ohsha. Kiishpin itahsh wiin maamiinomatc kekiihtaawentank, aanciko kika saaki'ik.

⁹ Kihkino'amawatc kekiihtaawentank, aanciko tani onci kakiihtaawentam, kihkino'amawatc kweyahkwaatisitc aanciko tani onci kihkentaahso.

¹⁰ Kii⁠kohtaanenimintc kaaTipenciketc onci maacihse kakiihtaawentamowin, kii⁠kihkenimintc Kehtentaakositc, mii 'iwe e⁠ayaakaatek nihsitohtamowin.

¹¹ Kakiihtaawentamowinink ohsha ta⁠onci paahtiinatinoon minihk keni kakiishikanishiyan, minihk kaye keni pipoonishiyan.

¹² Kiishpin kakiihtaawentaman, mii hsa iwe ke⁠mino tipa'amaakoyan. Kiishpin itahsh maanencikeyan kiin ehta kika kakwaatakihtoo.

¹³ Kakiipaatisiwin iitok inentaakwan taapishkoo ihkwe kaa⁠nipaatwewitank, kehkino'amaahsiwintc, eyaahsik kihkentamaawin.

¹⁴ Kaa⁠namatapitc otishkwaantemink, maawac iko eshi ishpaanik ootena,

¹⁵ eh⁠kanoonaatc awiya' kaa⁠mayaashkaakotc, eshaanitc iko wa⁠ishaanihpan, miihsh o'o e'inaatc,

¹⁶ “Piintikek kekoon kehkentansiwek,” enaatc kekiipaatisinitc,

¹⁷ “Kaa⁠kiimootinaaniwank nipi ohsha nawac minohpokwan. Pahkweshikan kaa⁠kiimootinaaniwitc nawac minohpokosi.”

¹⁸ Kaawiin iitok okihkentansiini kaa⁠piintikaakotc ci⁠niponitc. Ini tahsh aasha kaakiih piintikaakotc aasha eh⁠tanentaakosinitc eshi'ayaanitc neponitc.