ᑲᑮᑖᐎᑮᔗᐎᓇᓐ 7 - Ojibwe Kihcimasina'ikan

¹ Ninkosihs, kanawentan hsa nintihkitowinan, maawacihtoon kaye nintinaahkonikewinan kipimaatisiwinink.

² Kanawentan ehkitoyaan ci⁠pimaatisiyan. Weweni kanawentan ninkihkino'amaakewinan taapishkoo weweni kaashi kanawentaman kishkiinshikoon.

³ Kininciink ishi akwahpitoon kaashi kihkino'amawinaan, kite'ink kaye ishi oshipii'an.

⁴ O'o hsa iitan kakiihtaawentamowin, “Kiin nintawemaa.” I'ihsh kaye nihsitohtamowin ke⁠tootawatipan maawac pehsho kaa⁠saaki'ihk, mii 'iwe ke⁠inentaman.

⁵ Miiwan hsa ini ke⁠miitaakwenikoyan ci⁠naasihkawaahsiwatc pihshikwaacihkwe, a'a kaye wiiwimaa noociko eshi'ayaatc kaa⁠nihtaa wiinikiishwetc.

Kaakakiipaatisitc Ihkwe Ehtashinsotc

⁶ Niwaahkaa'ikanink kaashi waahsehcikaniwank tahsh e⁠onsaapiyaan,

⁷ ninkii waapamaak niipiwa' oshkiniikiwak kaa⁠eshaawaatisihsikwaa tino. Peshik tahsh memintake oshkiniiki kii⁠nihsitawinaakosi e⁠shaawaatisihsik.

⁸ Ninkii waapamaa ekiih pima'atootc ekii ani ishaatc kaakii ishi kiihkemoninik miihkana ciikaya'ii eshitaanitc peshik ihkwewan.

⁹ Aasha tahsh i'i ahpii kii⁠ani tipihkanini e⁠ani onaakohshininik, aasha piko e⁠ani kashkiitipihkaninik.

¹⁰ Miitahsh ihkwewan kaakiih pi saaka'aminitc ekii nakishkaakotc, pihshikwaacihkwenk ekii ishi'onitc, sesik ekii inentansinik.

¹¹ Wiinke hsa kiih⁠soonkite'ewan, kaawiin kaye kii⁠akacihsiiwan, wiihkaa e⁠apihsinik otaawininiink.

¹² Mooshak iko miihkanaank, kaashi ayataawewikamikohkenk kaye, kaacaya'ii kaye eh⁠tashi pi'oniitc.

¹³ Miitahsh kaa⁠ishi kihkincikwepinikotc ekii ayociimikotc, ekiih kanawaapamikotc pehsho o'o e'ikotc,

¹⁴ “Nintayaanan ohsha mino wiiciintiwi pakitinikewinan kaashitaayaan, ekii ishihcikeyaan kaye kekii ishihcikeyaampaan.

¹⁵ Miitahsh i'i kaa⁠onci saaka'amaan e⁠nanaantawaapaminaan, ekiih kakwe mihkawinaan, tepwe hsa tahsh kimihkawin.

¹⁶ Aasha kaye ninkii tashwekihsitoonan pepaahkaan kaa⁠ishinaakwahkin senipaawekinoon ninipewinaahkonk Iicipahkiink (Egypt) kaa⁠onciikin.

¹⁷ Aasha kaye ono tino minaako'onan ninkii ahtoonan ninipewinink, pikiwi minaako'on mar (myrrh) kaa⁠ishinihkaatek, aniipiihshiwi minaako'on aaloos (aloes) kaa⁠ishinihkaatek, kaye wiihkenhsh sinaman (cinnamon) kaa'icikaatek.

¹⁸ Ampe, taka minwenintitaa kapetipihk piinihsh cini waapank. Wiinke hsa ko ci⁠minwentamank ci⁠kakiihkincicinintiyank.

¹⁹ Kaawiin ohsha apihsii ninaapem; ahpane ohsha waahsa kii‑ishaa.

²⁰ Niipiwa' kaye shooniyaan okii maaciinaan oshooniyaawashink, kaawiin tahsh ta⁠takohshinsii piinihsh paanimaa waawiyaasinitc tipihkikiisihsoon,” kii‑ihkitowan pihshikwaacihkwen.

²¹ Miitahsh kaa⁠ishi shaakoosomikotc ekii wanimikotc ini ihkwewan, ekiih kashkimikotc wiinke e⁠mamino kiishwenitc.

²² Miitahsh kaa⁠ishi maacii wiiciiwaatc e⁠ishinaakositc taapishkoo pishihki kaa‑awi nihsintc, waawaashkeshi kaye kaa⁠ishi kwaashkwaanitc nakwaakanink.

²³ Miitahsh taapishkoo pihkwahkoni keshi shaapohsenik ote'ink, e⁠ishinaakositc kaye taapishkoo pinehshiinsh kaa⁠ishaatc ahsapiink e⁠kihkentansik ekii naniisaanatininik opimaatisiwin!

²⁴ Ninkosihsak, taka tahsh noonkom pisintawihshik aaniin eninakook.

²⁵ Keko tahsh pakitinaahkek a'a tino ihkwe ci⁠kashkiminek kite'iwaank; keko otishi'ayaawinink kika ishi wanihshimikohsii.

²⁶ Niipiwa' ohsha aasha opi nihshiwanaaci'aa' ininiwa', kaapi nihsaatc kaye onsaam paahtiinowa' ci⁠akimimintipan.

²⁷ Owaahkaa'ikan hsa mii 'i enentaakwaninik taapishkoo miihkana enamoninik kaashi ayaanitc neponitc. Mii 'imaa nahke eshi pehshwentaakwahk nipowin.