ᑲᑮᑖᐎᑮᔗᐎᓇᓐ 5 - Ojibwe Kihcimasina'ikan

Pihshikwaatisiwin Ehtashintek

¹ Ninkosihs, taka noontan eshi kakiihtaawentamaan, pisintan kaye ninihsitohtamowin.

² Miitahsh ci⁠kihkentaman aaniin kwayahk ke⁠ishihcikeyan, kitihkitowinink ci⁠onci kihkentaakwahk e⁠okihkentamaawiniyan.

³ Otoonink ihsa a'a ihkwe peshikwaatisitc taapishkoo aamoowi siinsipaahkwat kaa‑ahpiihci shiiwank, wiinke kaye nihtaa mino kiishwe.

⁴ Ahpii tahsh e⁠ishkwaahkamikisitc, kaawiin kekoon kitishkonamaakohsii, mii ehta ko e⁠nishkentaman, kaye tahsh e⁠wiihsakentaman taapishkoo wiinsop kaa‑ahpiihci wiihsakihpokwahk.

⁵ Kaa⁠niponitc eshi'ayaanitc ohsha kika ishiwinik, opimohsaataan miihkana enamoninik kaa⁠niponitc kaa⁠ishi'ayaanitc.

⁶ Kaawiin onaanaakatawentansiin inahke keshi pimaatisitc, omiihkanaam e⁠kihci waawaakashkamoninik, e⁠kihkentansik aaniin eshiwepisitc.

⁷ Inashke tahsh ninkosihsak, pisintawihshik, keko wiihkaa waniihkehkek kaashi kakanooninakook.

⁸ Keko naasihkawaahken a'a tino ihkwe. Keko ishaawaahken ciikaya'ii otishkwaantemink.

⁹ Kiishpin itahsh wiin ishihcikehsiiwan kaa'ininaan, mii 'i iinsan e⁠mahkamihkwaa kotak awiyak eshi kihtenimikooyampan. Wiipa tahsh kika nihsikook iki menaaci'aahsikwaa awiyan.

¹⁰ Tepwe hsa piiwitek kika mahkamikook kahkina eshi wenootisiyan, kotak meyakisiwaatc oka ayaanaawaa kitaya'iiman kaakiih kihci anohkiiyan ci⁠tepinaman.

¹¹ Kika moohkone tahsh ani ishkwaa pimaatisiyan, ahpii kiwiiyaahsipimaatisiwin, kiwiiyaw kaye cini ankook.

¹² Miihsh ke⁠ihkitoyan, “Wekonen itahsh kaa⁠onci shiikentamaan ekihkino'amaakooyaan. Wekonen kaye kaa⁠onci pisintawaahsiwakwaa kaakiih kakwe nana'imiwaatc.

¹³ Kaawiin ninkiih pisintawaahsiik kaakiih kihkino'amawiwaatc, kaawiin ninkiih papaamihtawaahsiik kaakii maamiinomiwaatc.

¹⁴ Inashke tahsh noonkom mii 'i kii⁠otihsaapantamaan kekaa e⁠ani ishkwaahseyaan, eshi'ayaawaatc kahkina awiyak.”

¹⁵ Tepweyentaakosiihtaw kiwiiw, wiin ehta kikasaaki'aa, ci⁠tinowenimatc kitoonta'ipaanink kaa⁠onci minihkweyan.

¹⁶ Keko tahsh tinowiihken kaa⁠moohkiciwank nipi kaa⁠onci minihkwewaatc awenenak piko ihkwewak.

¹⁷ Kiin iitok kitipinawewis a'a kiwiiw. Keko tahsh papaamenimaahken pahkaan ihkwewak.

¹⁸ Taka hsa ta⁠minwentaakwan kaa⁠moohkiciwank kinipiim. Ishi ciihkenim kaakii wiitikematc kiwiiw kii⁠oshkaatisiyan.

¹⁹ Taapishkoo noonshe waawaashkeshi menonaakositc, taka ocoocoohshima' kika minwentami'ikoo'. Taka maano eshi minwenimiwetc ishi pakitinintison.

²⁰ Ninkosihs, wekonen itahsh ke⁠onci minwenimatipan pahkaan ihkwe. Wekonen itahsh ke⁠onci minwenimimatipan pahkaan awiya wiiwan?

²¹ KaaTipenciketc iitok kahkina ininiwan owaapamaan entahso ishihcikenitc, owaapamaan kaye inahke eshaanitc.

²² Maci'inini hsa omacihcikewinink onci tahsoonintiso. Wiin iko omacitootamowinink onci tahkopinintiso.

²³ Miihsh kaa⁠onci nipotc e⁠kashkihtoohsik ci⁠kanawenintisotc, okakiipaatisiwinink e⁠onci wanihshink.