ᑲᑮᑖᐎᑮᔗᐎᓇᓐ 31 - Ojibwe Kihcimasina'ikan

Sasekaa Ihkwe Ehtashinsotc

¹⁰ Aahpici hsa sanakan ci⁠mihkawintipan sasekaa wiiwimaa! Nawac hsa wiin ishpentaakosi ahpiihc wiin i'i kaa‑aahkwakinsonitc miskwaapihkahsinii' Oroopi kaa'inimintc.

¹¹ Onaapeman hsa wiinke otepweyenimikoon, kaawiin tahsh wiihkaa kekoonini ta⁠manesihsiiwan.

¹² Minihk hsa ko ke⁠pimaatisitc aahpici ominotootawaan onaapeman, kaawiin wiin ishihcikehsii ke⁠onci wiihsakentaminitc.

¹³ Miitahsh eshihciketc e⁠nanaantone'waatc miskokaateyaapiin, ishiikinweyaapiini kaye kaa⁠onciinik kihtikaani mihtikonhsink, mooshak iko eh⁠tanahkamikisitc.

¹⁴ Mii hsa kaye eshihciketc waahsa e⁠onci naasihkank miicim taapishkoo kihci ciimaanan waahsa kaa⁠pionci piitaawataahsoomakaninikin miicim ke⁠ataawakaatenikin.

¹⁵ Wiipa tahsh kaye kikishep cipwaa piitaapaninik wanishkaa eh⁠kwayaancihsitamawaatc miicim otaawinink eyaanitc, e⁠waawiintamawaatc kaye ihkwewa' kaa⁠pamiihtaakotc aaniin ke⁠ishihcikenitc.

¹⁶ E⁠waapantank ihsa kihtikaanahkamikoni mii 'i eshi ataawetc. Minihk tahsh iko i'imaa wenci kashkihciketc mii 'imaa wenci oshihtootc keshi kihtikaasonitc shoomina'.

¹⁷ Wiinke hsa nihtaawanohkii, wiinke kaye mashkawaatisi kaa⁠onci kashkihtootc eh⁠tootank otanohkiiwinan.

¹⁸ Okihkentaan hsa kaye ehpiihtentaakwaninik kahkina kekoonini kaa⁠oshihtootc, enihtaa niipaa anohkiitc.

¹⁹ Wiin tahsh iko kaye otooshi'aan kashkikwaacikaneyaapiin, wiin iko kaye otooshihtoon ishiikin.

²⁰ Owiici'aa' kaye kaa⁠kitimaakisinitc, ominotootawaa' kaye kaa⁠manesinitc kekoon.

²¹ Kii⁠sokihpwaninik kaye kaawiin naniisaanentansii aaniihsh kaa⁠wiicitaamikotc otaawinink otayaani kaa⁠kiishowaninikin ke⁠kikishkaminitc.

²² Wiin iko kaye otooshihtoonan kaa⁠minwasinaatekin nipewiniikinoon; mii kaye eshi'otc eh⁠kikishkank kaa⁠onishihshininik senipaawekinini, kaa⁠mahkatewi osaawashkwekaninik kaye.

²³ Ini hsa onaapeman wiinke kihtenimimaawan owiitapimaani iitok i'i kaa⁠niikaanentaakosinitc ininiwa'.

²⁴ Otooshihtoonan kaye kikishkikanan, kihkinciciihpisonan kaye ci⁠ataamikotc kaa⁠papaamataawenitc.

²⁵ Mii kaye enentaakwaninik eh⁠kikishkank mashkawaatisiwin, kihtentaakosiwin kaye; showiinkweni kaye ehpiihci ocaanimentansik aaniin keni ishiwepaninik.

²⁶ Wiinke kakiihtaawikiishwe kiih⁠kiikitotc, kaashi kihkino'iketc kaye tepweyentaakwanini.

²⁷ Mooshak kaye tanahkamikisi e⁠naanaakaci'aatc otaawinink kaa‑ayaanitc kahkina kekoon ci⁠tepihsenitc.

²⁸ Oniicaanihsa' hsa owiintamaako' eh⁠mino ihkwewitc onaapeman kaye okihci inenimikoon, o'o e'ikotc,

²⁹ “Paahtiinowak hsa sasekaa wiiwimaak, kiin tahsh maawac kipaashicishkawaak kahkina wiiwimaak.”

³⁰ Minwentaakosiwin hsa wanentaakwan, minonaakosiwin kaye kaawiin kekoon inaapatahsinoon. A'a tahsh wiin ihkwe kaa⁠kohtaanenimaatc kaaTipencikenitc ta⁠kihci inentaakosi.

³¹ Kashkihtamaaso ohsha ci⁠tipa'amawintipan, tipa'amawihk itahsh. Ishinaakwanini ko entahso peshikowaatc awiyak ci⁠kihtenimaawaahpan ini ihkwewan.