ᑲᑮᑖᐎᑮᔗᐎᓇᓐ 3 - Ojibwe Kihcimasina'ikan

Ehkanoonintwaa Oshkiniikiwak

¹ Ninkosihs, keko waniihkehken kaa⁠ishi kihkino'amawinaan. Pishihshik maamihkawin kaa⁠ishi wiintamawinaan ke⁠ishihcikeyan.

² Mii hsa i'imaa kinwesh ke⁠onci pimaatisiyan mii kaye imaa ke⁠onci minohseyan.

³ Keko pakitinanken kitimaakinaakewin kehcina'entaakosiwin kaye. Naapishkan, ci‑ishi oshipii'aman kaye i'imaa kite'ink.

⁴ Kiishpin o'o tootaman Kishemanitoo iki kaye kahkina awiyak kika kihci inenimikook.

⁵ Tepweyenim kaaTipenciketc enikohkote'eyan, keko wiin ahpenimonotanken kinihsitohtamowin.

⁶ Kihkentan ihsa ci⁠maamihkawinootawatc kaaTipenciketc misiwe kaa⁠tahso ishihcikeyan, miihsh ci⁠kihkinowinihk kwayahk aaniinti ke⁠ishaawatc.

⁷ Keko wiin ninkihkentaan kekoon inenintisohken; kohtaanenim kaaTipenciketc, keko kaye papaapisiskentanken nooci kekoon.

⁸ Miitahsh i'i ci⁠mino'ayaayan kiwiiyawink, ci⁠mino'ayaakin kaye kihkanan.

⁹ Kaashi wenootisiyan hsa onci kihtenim kaaTipenciketc ci⁠onci miinatc maawac iko nihtam kahkina kekoonan kaa⁠nihtaawikihtooyan.

¹⁰ Miitahsh i'i ci⁠mamooshkinekin kikihtikaanikamikoon ke⁠ahpiihci wenoocihseyan, oshki shoominaapo kaye ta‑ayaamipii kitahtoopaanink.

¹¹ Ninkosihs, keko shiinkentanken kaaTipenciketc kii⁠maamiino pahshanshe'ohk, keko kaye noonteyentamowaahken kii⁠maamiinomihk.

¹² KaaTipenciketc iitok omaamiino pahshanshe'waan awiyan kaa⁠shawenimaatc taapishkoo otetemaa kaa⁠tootawaatc okosihsan kaa⁠minwaapamaatc.

¹³ Aahpici hsa shawentaakosi a'a inini kaa⁠tepinank kakiihtaawentamowin, a'aweti kaani onci onihsitohtamowinitc.

¹⁴ Nawac iitok i'i kashkihcikewentaakwan ahpiihc wiin a'a waapaapihko shooniyaa, nawac kaye i'i kihci inentaakwan ahpiihc wiin a'a osaawi shooniyaa.

¹⁵ Kakiihtaawentamowin hsa nawac kihci inakinte ahpiihc wiin a'a miskwaapihkahsin, Oroopi (Ruby) kaa'inintc; kaawiin iitok kekoon kaa⁠mihsawentaman i'i ahpiihtentaakwahsinoon.

¹⁶ Miihsh kaye i'imaa wenciik kinwesh pimaatisiwin, wenootisiwin, kihtenimikoowin kaye.

¹⁷ Mii kaye i'imaa kakiihtaawentamowinink wenciik kaa⁠onishihshink pimaatisiwin, pisaan iko kaye awiya ke⁠onci pimaatisihpan.

¹⁸ Iki hsa kaani kakiihtaawentamowaatc ta⁠minwentamook, mii hsa imaa ke⁠ontinamowaatc pimaatisiwin.

¹⁹ Kishemanitoo okii onci oshihtoon o'o ahkiini i'imaa okakiihtaawentamowinink; I'imaa kaye okihkentaahsowinink okii onci onahtoon newacikiishik.

²⁰ Okakiihtaawentamowinink kii⁠onci ishihseniwan siipiin ci⁠pimiciwankin, wahkwiink kaye ci⁠onci kimiwank o'omaa ahkiink.

²¹ Ninkosihs, kihciwinan kikakiihtaawentamowin kaye kaa⁠ishi nihsitawinaman. Keko pakitinanken ci⁠nakanikooyan.

²² Kika ontinamaakon ke⁠onci minwentaman ke⁠onci minohseyan kaye i'imaa kipimaatisiwinink.

²³ Mii 'i ke⁠ani ishi maacaayan ci⁠naniisaanentansiiwan kaye ci⁠pisokehshinsiiwan.

²⁴ Kaawiin kika kohtaacisii ahpii ani kawihshimoyan, aahpici ci⁠minonkwaamiyan.

²⁵ Kaawiin memwehc ci⁠onci ocaanimentaman sesakooc takohsek maanshihsewin, kaa⁠ishi otihsikowaatc iki kaa⁠kakwaanihsakisiwaatc.

²⁶ KaaTipenciketc kika kanawenimik, kaawiin kaye kika pakitinikohsii ci⁠tahsoosoyan.

²⁷ Aaniin iko ke⁠ahko kashkihtooyan, ci⁠minohcike'atwaa iki kaa⁠noontehsewaatc.

²⁸ Keko wiihkaa ihkitohken, “Paamaa waapank kika wiici'in,” ci'inatc kiwiicitaamaakan shemaak ishihsek ci⁠tootaman.

²⁹ Keko kekoon ishihcikehken ke⁠onci maanentank kiwiicitaamaakan; pehsho kaa⁠onci wiicitaamatc e⁠ahpenimonotawihk.

³⁰ Keko onci kihci kanoonaahken e⁠ayaamakahsinok ke⁠onci⁠maanshi kakanoonatc, wiihkaa wiin kekoon e⁠ishi maanshi tootawihsinohk.

³¹ Keko ontenimaahken iki kaa⁠nihshiwanaatahkamikisiwaatc keko kaye kiin kakwe ishihcikehken i'iwe kaa⁠tootamowaatc.

³² Aaniihsh kaaTipenciketc oshiinkenimaa' kaa⁠macitootaminitc, kaa⁠kwayahkwaatisinitc itahsh oka wawiintamawaa' wiin kaa⁠ishi nanaakatawentank.

³³ KaaTipenciketc oka macakintaan entaanitc kaa⁠macaatisinitc, shikwa oka minwakintaan entaanitc iniweniwa' kaa⁠kwayahkwaatisinitc.

³⁴ Kaawiin kekoon otinaapatenimaahsii' kaa⁠kihci inenintisonitc, shikwa owaapanta'aa' minohcikewin i'i kaa⁠tapahsenimonitc.

³⁵ Kaa⁠kakiihtaawentamowaatc mii 'imaa ke⁠onci kihci'inenimaakaniwiwaatc, shikwa kaa⁠kakiipaatisiwaatc awahshime ta‑ani onci akaci'itisowak.