ᑲᑮᑖᐎᑮᔗᐎᓇᓐ 22 - Ojibwe Kihcimasina'ikan

Kakiihtaawikiishwewinan Ehtashintekin

¹ Minwaacimikoowin ohsha nawac mihsawentaakwan ahpiihc wiin kihci wenootisiwin; kihci inenimikoowin kaye nawac i'i onishihshin ahpiihc wiin waapaapihko shooniyaa, a'a kaye osaawi shooniyaa.

² Kaa⁠wenootisitc a'a kaye kaa⁠kitimaakisitc peshik kekoon peshikwan otayaanaawaa; kaaTipencikenitc kahkina ekii oshi'ikowaatc.

³ Kaa⁠kakiihtaawentank hsa niiyaak onihsitawinaan neniisaanatininik miihsh i'i eshi wemaashkank. A'a tahsh wiin kaa⁠naanaakatawentansik mii ko'i pisaan eshi mekwaashkank, miitahsh i'i naanaake keshi maanentamo'itisotc.

⁴ Kii⁠tapahsenimonk, kii⁠kohtaanenimintc kaye kaaTipenciketc; mii hsa imaa wenciik wenootisiwin, kihtenimikoowin, pimaatisiwin kaye.

⁵ Omiihkanaamiwaan kaa⁠maci'ishiwepisiwaatc wiinke kaawiminakashiihkaani, naniisaanatinini kaye, a'a tahsh wiin kaa⁠kanawentank opimaatisiwin kaawiin i'imaa ta⁠ishaahsii.

⁶ Kihkino'amawintc hsa apinoonciish aaniin inahke ke⁠ishaatc, ani kihtaatisitc tahsh kaawiin oka nakatansiin.