ᑲᑮᑖᐎᑮᔗᐎᓇᓐ 2 - Ojibwe Kihcimasina'ikan

Eshitipa'ikemakahk Kakiihtaawentamowin

¹ Ninkosihs, taka kihkentan aaniin eshi kihkino'amawinaan, ci⁠maawacihtooyan kaye nintinaahkonikewinan kipimaatisiwinink.

² Ci⁠pisintaman kaye eshihsink kakiihtaawentamowin, kite'ink itahsh kaye onci kakwe nihsitohtan.

³ Kakwetwen ci⁠miinikoowisiyan nihsitohtamowin, i'i kaye ci⁠miinikoowisiyan nihsitawentamaawin.

⁴ Wiinke hsa ko kakwe mihkan, taapishkoo keshi kakwe mihkawatipan waapaapihko shooniyaa, taapishkoo kaye kaashi nanaantone'ikaatek kaa⁠kaacikaatek wenootisiwin.

⁵ Kiishpin itahsh i'i ishihcikeyan, miihsh ci⁠kihkentaman wekonen i'i kaa'icikaatek “Ci⁠kohtaanenimintipan kaaTipenciketc.” Miihsh kaye ci⁠kihkenimatc Kishemanitoo.

⁶ KaaTipenciketc ohsha kaa⁠miikiwetc kakiihtaawentamowin, otihkitowinink hsa onciini kihkentamaawin, nihsitohtamowin kaye.

⁷ Wiin ohsha kaa⁠maawacihtamawaatc mino kakiihtaawentamowin kweyahkwaatisinitc, wiin kaye kaa⁠naatamawaatc i'i pemaatisinitc kekoon eshi anaamentaakosihsinik.

⁸ Okanawenimaa' kaye inahke eshaanitc kweyahkwaatisinitc, onaatamawaa' kaye inahke eshaanitc i'i pemaatisinitc weweni kaa⁠tootaakotc.

⁹ Miitahsh i'i ci⁠kihkentaman kweyahkwentaakwahk, weweni kaye inaahkonikewin, weweni kaye tootaatiwin, entahsink kaye aaniin keshi minohcikeyampan.

¹⁰ Miitahsh ci⁠otihsikoyan kakiihtaawentamowin kite'ink, miihsh kaye kihkentamaawin ci⁠minoshkaakoyan kipimaatisiwinink.

¹¹ Nihsitawentamowin hsa kika naatamaakon, nihsitohtamowin kaye kika kanawenimikon.

¹² Miiwan ihsa ini ke⁠kipishkaakoyan ci‑ishihcikewaahsiwatc nehtaa ishihcikewaatc omacaatisiik, iki kaye pemaatisiwaatc noociko kaa⁠ishikiishwewaatc.

¹³ Miiwak iitok iki kaakii nakatamowaatc kwayahk pimaatisiwin ewii ishi pimaatisiwaatc inahke kashkiitipihkanonk.

¹⁴ Osaakihtoonaawaa kaye nooci e⁠ishihcikewaatc, ominwentaanaawaa kaye e⁠macihcikewaatc.

¹⁵ Miiwak hsa oko tino noociko kaa⁠ishihcikewaatc, aahpici kaye nihtaa wayeshihcikewak.

¹⁶ Kiin itahsh kika onci kashkihtoon ci⁠tepwehtawaahsiiwatc a'a tino kaa⁠pishikwaatisitc ihkwe kaa⁠ishi minohtaakositc kii⁠wayeshimiwetc.

¹⁷ A'a ihkwe kaa nakanaatc otooshki onaapeman ekii waniihketc kaakii ishi ahshotamawaahpan enaahsamiinitc oKishemanitooman.

¹⁸ Kiishpin ishaawatc owaahkaa'ikanink kipima'atoo miihkana kaa⁠inamonk nipowinink. E⁠ishaayan i'imaa e⁠ani naasihkaman kaa⁠ishi'ayaawaatc kaa⁠nipowaatc.

¹⁹ Awiya kaa⁠mawatihsaatc kaawiin wiihkaa pikiiwehsii, kaawiin kaye wiihkaa pikiiweshkaahsii i'imaa pimaatisiiwimiihkanank.

²⁰ Miitahsh ci⁠pimosaataman kaa⁠ishi minotootamowaatc menwaatisiwaatc ininiwak miihsh kwayahk cishi pimaatisiyan.

²¹ Kaa⁠kwayahkwaatisiwaatc ininiwak kaa⁠kehcina'entaakosiwaatc o'omaa ta⁠ishitaawak kitahkiiminaanink.

²² Kishemanitoo ninkoci oka ishinisha'waan kaa⁠kakwaanisakisinitc ininiwan', oka onci manipinaa' kaa⁠macitootaminitc omaa kitahkiiminaanink taapishkoo kekoon kaa⁠pahkwatahkipicikaatek.