ᑲᑮᑖᐎᑮᔗᐎᓇᓐ 11 - Ojibwe Kihcimasina'ikan

¹ KaaTipenciketc ihsa oshiinkentaanan kaa⁠wayeshimiwemakaninikin tipaapiishkoocikanan. Ominwaapantaanan itahsh kwayahk tino tipaapiishkoocikanan.

² Pemaatisiwaatc kaa⁠kihci inenintisowaatc ta‑akaci'aawak. Iki tahsh kekiihtaawentamowaatc tapahsenintisowak.

³ Kiishpin kwayahkwaatisiyan, kaawiin kika wayeshihcikehsii. Pemaatisiwaatc kaa⁠tepweyentaakosihsikwaa ta⁠onci nihshiwanaatisiwak eshi nihtaa wayeshinkewaatc.

⁴ Kiwenootisiwin ihsa kaawiin kekoon kika ishi naatamaakohsiin ahpii nakishkaman nipowin, kwayahkwaatisiwinink itahsh kika onci pimaaci'ikoowis.

⁵ A'awe hsa kweyahkwaatisitc ta⁠wententaakwanini opimaatisiwin, a'a tahsh mecaatisitc ta⁠kaskihtamaaso ke⁠onci pankihshink.

⁶ Eshi kwayahkwaatisitc hsa ta⁠onci pimaaci'ikoowisi, iki tahsh mecaatisiwaatc eshi kakayenisiwaatc ta⁠onci kashkihtamaasowak ke⁠onci pankihshinowaatc.

⁷ Omacaatis ihsa kii⁠nipotc, mii 'i kaawiin otayaahsiin ahpenimowin, kahkina kaakii ahpenimohpan omashkawisiiwin kaawiin oka wiici'ikohsiin.

⁸ Okwayahkwaatis ihsa kanawentaakosi ci⁠naasihkaakohsik wahsitaawihsewin, tekwac itahsh mecaatisiwaatc oka naasihkaakonaawaa.

⁹ Kika onci nihshiwanaaci'ikoo hsa aaniin ehkitowaatc kehkenimaahsikwaa Kishemanitoon. I'i tahsh wiin eshi okihkentamaawiniwaatc kweyahkwaatisiwaatc kika naatamaakon.

¹⁰ Ahpii hsa okwayahkwaatisiik kii⁠minohsewaatc, kihci ootenaank eyaawaatc minwentamook. Ahpii tahsh wiin omacaatisiik kii⁠nihshiwanaatisiwaatc, ta⁠noontaakwan ci⁠minwentamonaaniwank.

¹¹ Ahpii hsa okwayahkwaatis kii‑inentank ci⁠minohsenik, mii hsa 'i eshi kihci inentaakwaninik kihci ootena. I'i tahsh wiin ehkitowaatc omacaatisiik, mii 'imaa ke⁠onci nihshiwanaatahk kihci ootena.

¹² Awiya hsa kakiipaatisi kii⁠maci tashimaatc wiicipimaatisiin. Awiya tahsh wiin kii⁠ayaatc nihsitohtamowin kaawiin noontaatihsii.

¹³ Awiya hsa kaa⁠nihtaa papaamaacimotc kaawiin kii⁠kehcinaa'enimaahsii ci⁠kanawentank kiimootaacimowinan. Awiya tahsh kaa⁠tepweyentaakositc kaawiin kekoon opapaatashintansiin.

¹⁴ Kiishpin pemaatisiwaatc kii⁠kihkino'amawintwaahsiwintwaa, mii 'i keshi pankihshinonaaniwank. Kiishpin kii⁠paahtiinowaatc omaamiinomiwek, kehcinaac weweni ta‑ayaaniwan.

¹⁵ Awiya hsa kii‑ihkitotc ewiih tipa'ikehtamawaatc piiwiten, kehcinaac ta⁠minciinawesii. Nawac iitok ta⁠onishihshinini kekoon i'imaa ishi opapaamisiwinihsik.

¹⁶ A'a hsa ihkwe kaa⁠noohkaatisitc ta⁠kihtencikaniwi, a'a tahsh inini awiyan kaa⁠papaa pisiskenimaahsik, ta⁠mihci kihci wenootisi.

¹⁷ Inini hsa kii⁠koohpaatenimiwetc wiin iko ta⁠minotootaaso, a'a tahsh wiin kekwaanihsakisitc wiin iko maanshi tootaaso.

¹⁸ Mecaatisiwaatc ihsa kaawiin kekoon kehcinac kashkihtamaasohsiiwak, kiishpin kwayahk ishihcikeyan kehcinaac iitok kika tipa'amaakoowis.

¹⁹ Awiya hsa kaa⁠inentank tepwe ko kwayahk kaawiih kakwe ishi pimaatisitc ta⁠pimaatisi. A'a tahsh wiin awiya aanciko noociko kaawii ishihciketc ta⁠nipo.

²⁰ KaaTipenciketc ihsa oshiinkenimaa' pemaatisinitc noociko enentaminitc ote'iniink, ominwaapamaa' itahsh i'i kwayahk kaa⁠ishihcikenitc.

²¹ Kehcinaa'on itahsh mecaatisiwaatc ta⁠nana'ahcikaasowak, i'i tahsh kweyahkwaatisiwaatc ta⁠tapasii'aawak.

²² Ihkwe hsa kaa⁠minonaakositc kaa⁠naanaakatawentansik mii 'i eshinaakositc taapishkoo osaawi shooniyaa waapihk kaa⁠wiimpaakahk kaa‑akootenik koohkoohsh ocaashink.

²³ Eshi mihsawentamowaatc ihsa iki kweyahkwaatisiwaatc aahpici ta⁠minohseni, iki tahsh wiin omacaatisiik aana ahpenimowaatc, nishkaatisiwin ehta oka naasihkaakonaawaa.

²⁴ Awiya hsa aanakii⁠mihci maamiikiwetc, mii 'i aanciko anishi wenootisitc. Awiya tahsh kii⁠manaa wanihciketc, mii 'i aanciko enishi kitimaakisitc.

²⁵ Awiya kaa⁠minotootaaketc ihsa ta⁠wenoocihse, awiya kaa⁠wiici'iwetc hsa wiin kaa⁠wiici'itisotc.

²⁶ Pemaatisiwaatc ihsa omacakimaawaan awiyan kaa⁠mihci maawacihtoonitc pahkweshikani kihtikaanenhsan, a'a tahsh wiin kaa‑ataawaaketc ta⁠shawentaakosi.

²⁷ Awiya hsa kaa⁠kakwe mihkank wenishihshininik ta⁠minwaapancikaaso, a'a tahsh wiin kaa⁠kakwe mihkank macikekoon, kehcinaac iko oka tepinaan.

²⁸ Awenen ihsa ko ehpenimonotank owenootisiwin ta⁠pankihshin, a'a tahsh kweyahkwaatisitc ta⁠mashkawiki taapishkoo niipini aniipiihsh.

²⁹ Awiya hsa kaa⁠maanshipinaatc eyaanitc otaawinink, kaawiin weti ishkwaac kekoon oka ontinansiin. Okakiipaatis ihsa oka'anohkiihtawaan kekiihtaawentaminitc.

³⁰ Pimaatisiwin hsa i'imaa onciimakan awiya kii⁠kwayahkwaatisitc taapishkoo miinaahtik kaashi nihtaawikihciketc. A'a kaa⁠kakiihtaawentank okashki'aa' niipiwa' awiya' ci⁠onci pimaatisinitc.

³¹ Iki hsa kaa⁠minotootamowaatc o'omaa ahkiink ta⁠mino tipa'amaakoowisiwak, iki tahsh awiyak meci ishihcikewaatc, nehtaa macitootamowaatc kaye, eshi kashkihtamaasowaatc tashi tipa'amawaawak.