Nikamonan 65 - Ojibwe Kihcimasina'ikan

Cimiikwehciwenimintipan Kishemanitoo

Mii 'oweni Peshik Tepit Onikamon

¹ Oo Kishemanitoo, kiwii miikwehciwenimikoo hsa weti Saayan (Zion) ecikaatek, ninka tipi tootaamin kaye kaakii ishi ahpimonotaakooyampan ewii ishihcikeyaank.

² Kiin iitok kaa⁠noontaman eshi anami'ehtawinaan, kahkina hsa ininiwak kipi naasihkaakook.

³ Nimamaashiiwininaanin hsa ninkiih shaakooci'ikomin, kiin itahsh wiin kikiih poonentaanan nimacitootamowininaanin.

⁴ Aahpici hsa shawentaakosi inini kaa⁠onaapamatc pehsho ci‑ishitaatc entashi anami'ehtaakowatc. Wiinke hsa ninka minwentamishkaakoomin wenishihshinkin eyaakin kiwaahkaa'ikanink, mii hsa 'i tepentaman kihci anami'ewikamik.

⁵ Oo Kishemanitoo e⁠nahkwehtawiyaank hsa kitishihcikehtamawihshinaam ci⁠shaakoocihtwaayaank, wiinke kimaamahkaacihcike ci⁠pimaaci'iyaank. Kahkina hsa pemaatisiwaatc misiwe ahkiink, akaamink kaye kihcikamiink ewiih tepweyenimihkwaa.

⁶ Kiin kaakii onahtooyan waciin kisoonkisiwin ekii aapacihtooyan, ekii naakohtooyan kimashkawisiiwin.

⁷ Kiin kaye kaa⁠koshkwaawaacikamihtooyan kihcikam, kaa⁠tootaman kaye ci⁠matweyaashkaahsinok; kaa⁠koshkwaawaaci'atwaa kaye pemaatisiwaatc kii⁠mikoshkaaci'ayaawaatc.

⁸ Iki hsa waahsa eyaawaatc okohtaanentaanaawaan eshi maamahkaacihcikewatc; miihsh kii⁠pitaapank, kii⁠onaakohshik kaye kaa⁠onci antawentaman ci⁠cihkentamo nikamonaaniwank.

⁹ Eh⁠kimiwanohkeyan hsa kitishi naakohtoon e⁠naanaakacihtooyan ahki ci⁠onci wenooci nihtaawikihcikemakahk. Siipiin pemiciwankin e⁠mamooshkinepiikin, ahki ci⁠nihtaawikihcikemakahk, mii 'i nahke eshi kwayaancihtooyan.

¹⁰ Kikimiwanohke hsa eh⁠shaapopatooyan kaashi piikwahkamikipicikenk mihshawahkamik, e⁠tahtakwaapaawatooyan eshi papiihkwahkamikipicikenk, e⁠noohkaapaawatooyan, miihsh kekoon i'imaa wenci maaciikink.

¹¹ Kiminohcikewinink hsa onciimakan ci⁠kihci wenooci manishikenk! Aanti hsa piko eshaayan, wiinke paahtiinatin ke⁠miicink.

¹² Wiinke hsa mamooshkinekaapawiwak aya'aawihshak eshi mamashkohsiihkaanik, pehkwatinaakin hsa piko minwentamoomakanoon.

¹³ Eshi mamashkohsiihkaak hsa wiinke mooshkine ayaawak maanahcaanihshak, eshi papahsatinaak paahtiino pahkweshikanimin kahkina e⁠shaakowemakahkin e⁠minwentamoomakahkin, e⁠nikamoomakahkin kaye.