Nikamonan 63 - Ojibwe Kihcimasina'ikan

Kii'antawenimintc Kishemanitoo

Mii 'oweni Peshik Tepit Onikamon

¹ Oo Kishemanitoo, kiin hsa ninKishemanitoom, wiinke hsa kinantawenimin! Nintahcaahkonk, niwiiyawink kaye nintishi noonteyaapaakwe e⁠antaweniminaan taapishkoo kaashi noonteyaapaakwemakahk ahki tino kaa⁠paahtek, kekoon enentaakwahsinok, nipi kaashi ayaahsinok.

² Miitahsh i'i kaakii waapaminaan i'imaa kaa⁠tanentaakosiyan kihci anami'ewikamikonk; ekii waapantamaan kimashkawisiiwin, kikihci inentaakosiwin kaye.

³ Nintoonink itahsh miikwehc kika onci'inin aaniihsh mooshak kaashi saaki'iweyan nawac onishihshin ahpiihc wiin i'i pimaatisiwin.

⁴ Minihk hsa ko ke⁠pimaatisiyaan kika miikwehciwenimin; kitishinihkaasowinink hsa ninkashi ishpinihken.

⁵ Nintahcaahkonk hsa wiinke ninkashi tewiihsin kaa⁠tashi wihkwantiinaaniwank, ninka nikam tahsh nikamonan kaa⁠ciihkihtaakwahkin ci⁠miikwehciweniminaan.

⁶ Nipewinink kaye eh⁠pimihshinaan kimaamihkaawinotawin; miihsh kapetipihk eshi naanaakataweniminaan,

⁷ aaniihsh kiin kaa⁠wiici'iyan. I'imaa kaashi akawaahte ninkwiikaneniyan nintashi nikam ehpiihci ciihkentamaan.

⁸ Nintahcaahk hsa kikihciihkaak, kikihcinihk kaye kitishi minciminihsh eh⁠kanawenimiyan.

⁹ Iki tahsh wiin kaa⁠nanaantone'owaatc ewii nihshiwaatc ta⁠ishi naashishkaawak anaamaya'ii ahkiink kaashi ayaanitc kaa⁠niponitc.

¹⁰ Kaa⁠tashi miikaatinaaniwaninik hsa pashipa'ikewihkomaanink ta⁠onci nihcikaniwiwak, waakoshisha' tahsh oka miicini owiiyawiwaan.

¹¹ A'a tahsh wiin kihciokimaa ta⁠ciihkentam e⁠ishi'ikotc Kishemanitoon ci⁠shaakoocihtwaatc. Kahkina hsa awiyak kaa‑ahpi wiintamowaatc kaashi kihci inentaakosinitc oka miikwehciwenimaawaan, ikiweniwak tahsh wiin kaa⁠kiiwanimoshkiwaatc ta⁠kipa'ikaateniwan otooniwaan.